Мокшэрзянь литературась

Мокшэрзянь литературась (руз. Мордо́вская литерату́ра) — мокшэрзянь народть литературац мокшень и эрзянь кяльса

Эрямопингоц

XX-це векть ушетксста нолдафоль сядода лама книга и брошюра мокшень и эрзянь кяльса. Но синь аш кода лемдемс художественнай произведениякс марнек смузьса, сяс мес эсост кржаль художественностсь. Мокшэрзянь литературань основной витокс XX векти самс ульсть: духовно-светскяй, агиографическяй, панегирическяй форматне, устнай народнай творчествань образецонь публикациятне, букварьхне, мокшэрзянь кяльса учебникне.

Жанрань ширде литературась няфтьфоль историко-этнографическяй очеркса, стихса, прозаса стихса, корхтамаса, кантаса, религиознай книгань ётафтф текстса.

Эрзятнень и мокшетнень эсь лацонь творческяй вешендемасна ушедсть няевома XIX — це векть песта-XX-це векть ушетксста. Тянь колга корхтайхть произведениятне: С. Аникинонь (С. Чардымскяень), М. Герасимовонь, А. Завалишинонь, С. Кондурушкинонь, А. Коринфскяень, В. Бажановонь, З. Дорофеевонь, А. Дорогойченкань и лиятнень.

Аф азовомшка путфксоц мокшэрзянь литературать и сёрмадомать касомаса сотф содаф мокшэрзянь учёнай, общественнай тевонь тиить, педагогть, просветительть, фольклористть, мокшэрзянь васкенце профессорть Макар Евсевьевич Евсевьевонь (1864—1931) лемоц мархта. Сон лама тиендсь мокшэрзянь письменностень разработкаса, мокшэрзянь школань учебнай пособиятнень и учебникнень изданиятнень («Букварь», «Основы мордовскойграмматикать») анокламаса.

Национальнай художественнай мяльть касомань-вииямань эрямопингса няеви васта занци Степан Васильевич Аникинонь (Чардымский С.) (1868—1919) — писательть-реалистть, народнай учительть, фольклористть, Российскяй империянь Васенце Государственнай думаса ащить творчествац, кона лиссь Саратовскяй губерниянь мокшэрзянь сокаень-видиень семьяста. С.Аникинонь лувондсазь мокшэрзянь литератураса ёмла жанрань форматнень — азксть и художественнай очеркть ушедыензон ёткста фкякс.

Мокшэрзянь литературать эстетическяй коензон ладямасна и сонь российскяй просторхненди лисемац сотфт Захар Фёдорович Дорофеевонь (1890—1952) — поэтть, прозаикть, асу педагогть, эсь народонц фольклоронц и историянц тонафниенц лемонц мархта.

Инь оцюста кассь устнай творчествась. Мокшэрзянь ёфксонь искусствать ингольдень представителензон эзда фкясь ульсь Ефимия Петровна Кривошеева.

1918-1920-це кизотне

1918-це кизотнень официальна кемокстаф мокшэрзянь народть письменностец. Национальнай культурать содафокс тиеманцты лездсь пингонь-пингонь печатсь. Кармасть лисендема васенце газетатне и журналхне мокшень и эрзянь: «Чинь стямо» (руз. «Восход солнца»), «Якстере теште» (руз. «Красная звезда»), «Од веле» (руз. «Новая деревня»), «Якстере сокиця» (руз. «Красный пахарь»), «Валда ян» (руз. «Светлый путь»), «Сятко» (руз. «Искра»).

1920-це кизотнень ушетксста пуроптовсь сатомшка кеме писателень коллектив. Тя пингонь мокшэрзянь литературать касомань-вииямань тенденциянза няфтевсть З. Дорофеевонь, Я. Григошинонь, а. Дорогойченконь, Ф. Чесноковонь, А. Куторкинонь, И. Кривошеевонь и лиятнень творчествасост.

1920-це кизотнень омбоце пялестост творческяй эсь лацонь ширеснон няфнесазь М. Безбородов, Д. Морской (Малышев), Т. Раптанов, П. Кириллов, А. Моро, Н. Эркай, К. Петрова, В. Виард и лиятне.

1920-це кизотнень мокшэрзянь поэттненди удалась сатомс оцю сатфкст эпическяй поэтическяй форматнень тонадомаса. «Ёфкс-быль» (1928) поэманц мархта выступандай М. Безбородов, кона лувондови национальнай поэтическяй валонь классикокс и литератураса од жанрань ушедыкс. поэмань жанраса покодсть и лия авторхт: П. Кириллов «Шобдавась Сураса»(руз. «Утро на Суре»), А. Рогожин («Гале»), Н. Эркай («Морось Раторть колга»), Д. Морской («Нувази», «Ульяна Сосновская») и лият.

1920-це кизотне — эсьлацонь авторскяй национальнай драматургиянь эвондамань пинге. Эвондакшни агитационнай и бытовой характеронь фкя актса и кафта актса пьесада — «пьеса-агиток» («Буржуй и генерал», «Кормилицы и поилицы», «Комар» и лият).

1920-це кизотнень песта эвондасть «Мокша» (мокшень кяльса) и «Сятко» (эрзянь кяльса) журналхне.

1930-це кизотне

1930-це кизотнень мокшэрзянь народть эряфса оцю полафткст. 1930-це кизоня панжеви М. Е. Евсевьевонь лемса Мордовскяй государственнай педагогическяй институтсь, 1932-це кизоня-научно-исследовательскяй институт. 1932 кизоня ушедсь работама Мокшэрзянь государственнай издательствась, тяка кизоня пуроптфоль Мокшэрзянь драматическяй театрась.

1934-це кизоня Саранскяйса ётафтфоль республикань литераторхнень васенце съездсна, кона аноклазе Писателень союзть Мордовскяй отделениянц тиеманц. Тяка кизоня эзонза примафтольхть Я. Григошин, Н. Эркай, П. Кириллов, Ф. Чесноков и лиятне.

1930-це кизотне арасть ушетксокс творческяй киснонды А. Рогожинонь, С. Вечкановонь, М. Бебанонь, Г. Ельмеевонь, Ф. Дурновонь, А. Мартыновонь, В. Коломасовонь, Л. Макуловонь, Я. Пинясовонь, П. Гайнинь, К. Абрамовонь, М. Сайгинонь, И. Девинонь, А. Малькинонь, А. Щегловонь и лиятнень.

1930-це кизонь поэзиять касомац-вииямац няфневи поэттнень лирикань эрь кодама виттненди пшкядемаснон и эпическяй поэмать стака форманц тиеманц мархта: «Матовсь кяжец» (руз. «Потушенная злоба»), «Волянкса» (руз. «За волю») М. Безбородовонь, «Эрьмезь» Я. Кулдуркаевонь, «Валске Сура лангсо» (руз. «Утро на Суре») П. Кирилловонь, «Литува» А. Рогожинонь, «Эряшке леенть чиресэ» (руз. «На реке Эряшке») Е. Пятаевонь, «Моро Раторть колга» (руз. «Песня о Раторе») Н. Эркаень, «Вейсэ» (руз. «Вместе») А. Куторкинонь, стихотворнай драмась («Литова» П. Кирилловонь), стихотворнай пьесась «Кафта ширет» (руз. «Два лагеря») М. Безбородовонь), 40-це кизотнень — романонь жанрась стихса («Ламзурь» А. Куторкинонь).

1930-це кизонь мокшэрзянь прозать пуроптомаса-эвондамаса оцю тев тисть Ф. Чесноков, А. Куторкин, П. Кириллов, Я. Григошин, Т. Раптанов, В. Коломасов, В. Виард, В. Радаев, П. Левчаев и лиятне.

Повестень формась ульсь ладяф Т. Раптановонь «Татю», «Филиппень кизэ» (руз. «Дорога Филиппа»), П. Левчаевонь «Кавонст кудат» (руз. «Двое сватов»), П. Кирилловонь «Васенце уроксь» (руз. «Первый урок»), Н. Эркаень «Верев эрьке» (руз. «Окровавленное озеро») и лиятнень сёрматфснон вельде.

1930-це кизотнень — мокшэрзянь романть шачема пингоц. 1934-це кизоня Москуса эрзянь кяльса листть кафта роматт : «Раужо столба» (руз. «Чёрный столб») А. Куторкина и «Чихан пандо ало» руз. «Под Чихан-горой» Т. Раптанова.

Войнань и войнада мельдень периодсь

Войнада мельдень кизотнень мокшэрзянь драматуркне башка мяль шарфтыхть войнань темати: А. Щеглов «Комсомольскяй билет» (руз. «Комсомольский билет»), К. Абрамов «Од вий» (руз. «Молодая сила»), П. Кириллов «Валдо васоло угол велькссэ» (руз. «Свет над дальним углом»), И. Кишняков «Тундась» (руз. «Весна») и лиятне..

1940-це кизотнень эсь романцнон лангса покдсть В. Коломасов, И. Антонов, Т. Кирдяшкин.

Тяниень пингонь мокшэрзянь литературась

Тяниень мокшэрзянь литератураса башка васта занци эссень жанрась. Тя формаса покодихть Д. Надькин, М. Брыжинский, Р. Кемайкина, О. Поляков, В. Юрченков, Н. Мокшин и лият.

Келиста нолдавихть тевс ёмла жанрань форматне: пшкядемась, беседась и лиятне.

Тяниень пингонь прябалатнень тонафнемаснонды лемдезь эсь произведенияснон К. Абрамов, И. Девин, Н. Эркай, М. Бебан, М. Брыжинский, Ю. Кузнецов, В. Мишанина, Г. Пинясов, Л. Седойкин, Н. Ишуткин и лиятне.

Ётай пингонь эряфсь панчф М. Сайгинонь, А. Куторкинонь, В. Юрченковонь, Г. Балабаевонь и лиятнень азксса.

Идень литературась

Идень тематикась музь вастснон Я. Пинясовонь, Ф. Атянинонь, М. Сайгинонь, А. Щегловонь, А. Тяпаевонь и лиятнень творчестваса.

Мекольдень кизотнень идень литератураса эвондасть идень прозаикнень од лемсна: Андрей Брыжинский, Михаил Ломшин, Геннадий Дьяков, Евгений Лапицкий, Евдокия Терешкина, Геннадий Гребенцов, Валентина Мишанина, Рая Орлова и лиятне. Васенце книгасна ни — сай пингонди аф кальдяв творческяй заявка. Сёрматфт синь иттненди седи ваксста кельгозь, кеняртьфнесазь идень психологиять шарьхкодеманц, иттнень эряфснон, интересснон содамаснон мархта. Синь тонафтыхть паронь арьсемати, марямати, ломанькс улемати, азондыхть, мярьголень, простой, стакшинь тефнень колга, конатнень эса сидеста няеви и ломанть характероц, и эряфти сонь отношенияц.

Мокшень авторхне

• Безбородов, Михаил Ильич (1907—1935)
• Девин, Илья Максимович (1922—1998)
• Дорофеев, Захар Фёдорович (1890—1952)
• Мишанина, Валентина Ивановна (1950)
• Пинясов, Григорий Ильич (1944)
• Сайгин, Михаил Лукьянович (1913—2007)
• Тяпаев, Анатолий Прохорович
• Голенков, Николай Борисович

Эрзянь авторхне

• Абрамов, Кузьма Григорьевич (1914—2008)
• Доронин, Александр Макарович (1947)
• Кириллов, Пётр Семёнович (1910—1955)
• Радаев, Василий Кузьмич (1907—1991)

Лятфтамат

Литературась

• Воронин И. Д. Литературные деятели и литературные места в Мордовии / Проф. И. Д. Воронин; Оформление В. Климова. — Изд. 2-е, дополненное. — Саранск ошсь: Мордовское книжное издательство, 1976. — 336, [16] с. — 7000 экз. (в пер.) (1-е издание — 1951).
• Кубанцев Т. И. Поэтический хронотоп жизненного пространства (на примере творчества З. Ф. Дорофеева). Саранск, 2005. С. 15.
• Антонов Ю. Г. Зарождение и пути развития мордовской драматургии. Саранск, 2012. С. 105.
• Шеянова С. В. Современный мордовский роман: проблематика, поэтика : монография. Саранск, 2013. С. 261.