Юрчёнков, Валерий Анатольевич

Валерий Анатольевич Юрчёнков
Валерий Анатольевич Юрчёнков
Мзярда шачсь	23-це сентябрьста 1960-це кизоня
Шачема вастоц	Краснослободск, Мордовскяй АССР[d], РСФСР, СССР;
Мзярда кулось	3-це октябрьста 2017-це кизоня (57 кизоц)
Коса калмаф	Саранск ошсь, Россия;
Странась	СССР; Россия;
Научнай сферась	Россиянь историясь, историографиясь
Покодема вастсь	Мордовия Республикань Правительствать видеса гуманитарнай наукань НИИ (директор)
Образованияц	Н. П. Огарёвонь лемса Мордовскяй государственнай университетсь (1982); Н. П. Огарёвонь лемса Мордовскяй государственнай университетсь;
Учёнай степенец	историянь наукань доктор[d]
Учёнай лемоц	Профессор
Научнай руководитель	Ю. С. Кукушкин
Содаф кода	специалист Мордовиянь историять коряс
Казненза и премиянза	;

Вале́рий Анато́льевич Юрчёнков (23-це сентябрьста 1960-це кизоня, Краснослободск, Мордовскяй АССР^[d] — 3-це октябрьста 2017-це кизоня, Саранск ошсь) — советскяй и российскяй историк, историограф, краевед, наукань организатор. Историческяй наукань доктор (1997), профессор (2000). Мордовия Республикань наукань заслуженнай деятель (2001), Российскяй Федерациянь наукань заслуженннай деятель (2008), сувси Российскяй Федерациянь политическяй наукань Академияв (2000) и Педагогическяй образованиянь наукань международнай академияв (2005).

Мордовия Республикань Правительствать видеса гуманитарнай наукань НИИ-нь директор (2001—2017).

Эряфонь киц

В. А. Юрчёнков шачсь служащаень семьяса. Идькс пингонц ётафнезе Ичалки и Атяшева велетнень эса, коса покодсь сонь аляц. 1982-це кизоня аделазе Мордовскяй государственнай университетть историко-географическяй факультетонц и поступась мокшень и эрзянь кялень, историянь, литературань и экономикань НИИ-нь (НИИЯЛИЭ) аспирантурав (руз.) (мок., конань шумордазе 1985-це кизоня. Историческяй наукань докторть академикть Ю. С. Кукушкинонь кядяла тяштсь и аралась кандидатскяй диссертация «Мордовиянь Советтне Гражданскяй войнать и омба масторонь интервенциять пингста (1918 — 1920 кк.)».

1982-це кизоста сявомок покодсь НИИЯЛИЭ-са младшй научнай сотрудникокс, историянь секторса вятикс, учёнай секретарькс, историянь отделса вятикс. 1994-це кизоня декабрьста кадозе институтть руководствать мархта фкя мяльти аф самать сюнеда научно-исследовательскяй тевть ладяманц и тематиканц коряс. 1995—1998-це кизотнень ульсь региональнай историянь секторонь вятикс, Н. П. Огарёвонь лемса МГУ-ть видеса региональнайологиянь НИИ-нь научнай работать коряс директорти полафтыкс.

1997-це кизоня аралась докторскяй диссертация «Мокшэрзянь крайть историяц западнай историографияса XIII—XIX векнень пингста».

1998-це кизоня кочкафоль Н. П. Огарёвонь лемса МГУ-нь Историко-социологическяй институтонь Россиянь народонь инь од историиянь кафедрань профессоркс,1999 — 2005-це кизотнень покодсь тяка институтса страноведениянь кафедрань вятикс.

2001-це кизонь октябрьста В. А. Юрченков путфоль НИИЯЛИЭ-нь директорокс. Сонь кядялонза институтса тифольхть полафкст, сон лемтьфоль Мордовия Республикань Правительствать видеса гуманитарнай наукань НИИ-кс, ульсть тифт структурань од подразделеният, конат водендафт республикать социально-экономическяй положениянц, общественно-политическяй виензаманц, культурать теориянц и историянц тонафнемаснонды.

В. А. Юрчёнков ульсь главнай редакторкс «Центр и периферия» научно-публицистическяй журналса (2003—2017), «Мордовия Республикань Правительствать видеса гуманитарнай наукань НИИ-нь Вестник» научнай журналса (2006—2017). Сувсесь «Странник» и «Гуманитарнай наукатне и образованиясь» журналхнень редакционнай коллегиязост. Ульсь главнай редакторти полафтыкс и председателькс «Мордовия» энциклопедиять научно-редакционнай советонцты (2003—2004).

Арась сценариень авторкс научно-популярнай фильматненди, конатнень тиезень Казанскяй кинохроникань киностудиясь (режиссёрсь — Н. Дьяков), «Мордовия» ГТРК-сь (режиссёрхне—И. Кузьмин, В. Каланов). Синь ётксост: «Мялямсь и мялямфтома улемась» (1991), «Матросне, ванфтоза тинь эсонт Шкайсь» (1996), «Эряфонь шуфтсь, Тиить тяштьксонза» (2001), «Кинь мархтат тон, комдив Миронов?» (2008), «Аф сяськфне. 1237 кизось» (2009) и лият.

Сонь руководстванц ала мольфтевсть научнай исследованият тяфтама направления коряс: российскяй и региональнай историясь XX вексь; региональнай историографиясь; мокшэрзянь народть историянц источниковеденияц; краеведческяй исследованиянь методикась; региональнай культурологиясь; Россиянь финно-угрань нароттнень (руз.) (мок. историясна и культурасна.

В. А. Юрчёнков сяськондсь Российскяй гуманитарнай научнай фондонь грантонь сатомань пялькстоматнень эса: 10-01-23106 а(р) проектсь «Ингольдень сатфкст: Мордвать колга историко-этнографическяй документонь сборник. А. А. Гераклитов — мокшэрзянь народть историянц ушедыец» 2010—2011; 13-11-13002 а(р) проектсь «Россиянь Финно-угрань нароттне» 2013—2014; 15-31-12034 а(ц) проектсь «Крестьянствась и казачествась Россияса 1917-це кизонь революциять и гражданскяй войнать пингста: регионально-национальнай аспектсь» 2015—2017.

Сёрмадсь 200-да лама научнай и учебно-методическяй работа (эздост 84-сь сувафтф РИНЦ-ти; Хиршань коряс индексоц—7).

Аноклась наукань 6 докторхт и 27 кандидатт.

Мезень лангс шарфнесь мяль наукаса

В. А. Юрченков наукаса шарфнесь мяль XX векть васенце пяльксонь отечественнай историять лангс. Учёнайть салсезе мяленц источниковедениясь и историографиясь, историческяй содамошинь теориясь и методологиясь, мокшэрзянь крайть и мокшэрзятнень историясна, картографиять историясна, краеведениясь. В. А. Юрчёнков азозе эсь мяленц мордовскяй этность историянц периодизациянц колга. Сон аноклазе мокшэрзянь крайть и народть Рузонь государствав этапонь-этапонь суваманц колга концепциять.

Учёнайсь ащесь сятнень ширеса, конат историческяй реальностть ётафнесазь художественнай шарьхкодемать пачк. Тяфта сёрматфтольхть «Хронографсь, или Азондомась мокшэрзянь народть и сонь историянц колга» (1991) и «Эрек лямбось» (2001) книгатне.

Обществаса тевонза

Историянь и культурань памятниконь ванфтомань марнек Россиянь обществань Мордовскяй республиканскяй отделениять председателец (1988—1999). Сувсесь Историянь и культурань памятниконь ванфтомань марнек Россиянь обществань центральнай совету (1992—1999);

Историконь-архивистонь Российскяй обществань Мордовскяй республиканскяй отделениять председателец (2006—2017), сувсесь Историконь-архивистонь Российскяй обществань центральнай совету;

Сувсесь Российскяй Федерациянь Общественнай палатав (2010—2012)^[1];

Сувсесь Мордовия Республикань Общественнай палатав (2006—2007), ульсь Мордовия Республикань Общественнай палатань оцюнятнень ёткса (2008—2017);

Сувсесь Гражданскяй обществань институтонь виензамать коряс Приволжскяй федеральнай округонь Общественнай совету (2010—2017);

Россиянь народонь Ассамблеять Мордовскяй региональнай отделениянц председателец (2009—2013).

Сувсесь Российскяй Федерациянь финно-угрань нароттнень Ассоциацияснон наукать и финно-угрань исследованиятнень коряс Советонь Президиуму (2010—2017)^[2].

Мордовия Республикаса Российскяй военно-историческяй обществать региональнай отделениянц председателец (2013—2017).

Мордовия Республикань Оцюнять видеса геральдикань комиссиять председателец (2002—2017).

Казненза

Ульсь казьф «1941-1945 кизонь Великай Отечественнай войнаса Сяськомати 60 киза» Российскяй Федерациянь Президентть лятфнемань медальса (2005), Славань III степенень орденца (Мордовиясь, 2010), Славань II степенень орденца (Мордовиясь, 2016), «Сатфксонкса. Мокшэрзянь народть Российскяй государствань нароттнень ёткс сувамаснонды 1000-кизонь топодемать иланц пингста» медальса (2012). «Литературная Россия» эрь недяляня лисендить лауреатоц (2004). Мордовия Республикань государственнай премиянь лауреат (2005, 2015). Мордовия Республикань Оцюнять премиянц лауреатоц (2013).

Оцю тевонза-сёрматфонза

• Хронограф, или Повествование о мордовском народе и его истории. Саранск : Мордов. кн. изд-во, 1991. 368 с.

• Историография отечественной истории (1917 — начало 90-х гг.) : учеб. пособие. Саранск, 1994. 190 с. (в соавт.)

• Взгляд со стороны: Мордовский народ и край в сочинениях западноевропейских авторов VI—XVIII столетий. Саранск, 1995. 285 с.

• Российская история: вопросы и ответы: учеб. пособие : в 2 ч. Саранск : Тип. «Красный Октябрь», 1999. Ч.1. 252 с.; Ч.2. 352 с. (в соавт.).

• От ВЧК по ФСБ: История и современность Управления ФСБ РФ по Республике Мордовия. Саранск : Изд-во Мордов. ун-та, 2003 (в соавт.).

• На пороге реформ. Общественно-политическая жизнь Мордовии в первой половине 1990-х годов. Саранск, 2006. Саранск, 2006. 368 с. (в соавт.).

• Мордовский народ: вехи истории / Саранск, 2007. Т. 1. 460 с.

• Власть и общество: российская провинция в период социальных катаклизмов 1918—1920 гг. : монография. Саранск, 2010. 440 с.

• Начертание мордовской истории : монография ; НИИ гуманитар. наук при Правительстве Республики Мордовия. Саранск, 2012. 612 с.

• Занимательная археология: далекие предки. Саранск, 2013. 224 с.

• Занимательная история. Саранск, 2014. 328 с.

• Мордовская история: курс лекций. Саранск, 2014. 276 с.

• Война на всех одна. Мордовский край в 1941—1945 годах. Саранск, 2015. 552 с.

• Финно-угорские народы России. Саранск, 2016. 864 с. (науч. редактор).

• Занимательное родиноведение. Саранск, 2017. 256 с.

• Крестьянство и казачество России в условиях революции 1917 г. и Гражданской войны: национально-региональный аспект. М. ; Саранск, 2017. 1048 с. (отв. редактор).

В. А. Юрчёнков кочкась-пуроптсь мзярошка труд, синь ётксост «Серафим Саровский» (1998) альбомсь, «Инярусь, видексшинь ломанць Феодор Ушаков, Российскяй флотонь адмиралсь» (2006 к.) сборниксь, «Никон Патриархсь: Русть Инярувонц сталмонза — Российскяй Государствань тиемась» 3-це пяльксса (2009, 2010, 2011), «Российскяй империянь мордвась» сборниксь (2014). В. А. Юрченковонь кядяла аноклафоль «Мордовиясь. XX-це вексь» лама томса проектсь, конань видеса нолдафоль «Мордовиясь Великай Отечественнай войнать 1941—1945 кк. пингста» 2-томса монографиясь (2005—2006 кк.), «Мордовиясь войнада мельдень кизотнень 1945—1953 гг.» 2-томса монографиясь (2012—2015 кк.).

Лятфтамат

↑ Указ Президента Российской Федерации от 23 сентября 2009 года N 1070 «Об утверждении членов Общественной палаты Российской Федерации» (рус.). Российская Газета. Дата обращения: 18 сентябрьста 2025.
↑ Президиум Совета Общероссийского общественного движения «Ассоциация финно-угорских народов Российской Федерации» | Ассоциация финно-угорских народов РФ (неопр.). Дата обращения: 18 сентябрьста 2025. Архивировано из оригинала 11 августста 2015 года.

Литературась

Кабытов П. С. История у нас трагична… Записки историка. — Самара : Изд-во Самар. ун-та, 1995. — С. 93—97.
Барычева Л. П. Валерий Анатольевич Юрчёнков // Библиотечное краеведение Мордовии : [сб.]. — Саранск, 1999. — Вып. 6. — С. 53—54.
Воронина Н. И. Полет над историей // Регионология. — 1999. — № 4. — С. 200; № 1. — С. 402—408.
Воронина Н. И. Лики провинциальной культуры. — Саранск : Тип. «Красный Октябрь», 2004. — С. 136—145.
Гагаев А. А. КПЛ В. А. Юрчёнкова. Философия истории. Человек исторический // Гагаев А. А., Гагаев П. А. Философия и психология естественных, технических и гуманитарных наук: культурно-типологическая и личностная модель науки (логика открытия). Космо-психо-логос уникального человека. Система философии. — Саранск, 2004. — Ч. 2, 3. — С. 211—241.
Северцев В. Пульсирующий этнос // Литератур. Россия. — 2004. — 3 сент. — С. 3.
Мордовия : энциклопедия. — Саранск, 2004. — Т. 2. — С. 554.
Центр гуманитарных наук: история и современность / НИИ гуманитар. наук при Правительстве Республики Мордовия. — Саранск, 2008. — С. 326—327.
Куршева Г. А. Историк, историограф, краевед, организатор науки // Красная Слобода. — Саранск, 2008. — С. 393—396.
Мордовия, XX век: культурная элита : энциклопедич. справочник. — Саранск, 2013. — Ч. 2: Н—Я. — С. 330—331.

[1] Указ Президента Российской Федерации от 23 сентября 2009 года N 1070 «Об утверждении членов Общественной палаты Российской Федерации» (рус.). Российская Газета. Дата обращения: 18 сентябрьста 2025.

[2] Президиум Совета Общероссийского общественного движения «Ассоциация финно-угорских народов Российской Федерации» | Ассоциация финно-угорских народов РФ (неопр.). Дата обращения: 18 сентябрьста 2025. Архивировано из оригинала 11 августста 2015 года.

[1]

[2]