Пинясов, Григорий Ильич
| Григорий | |
|---|---|
| Шачема лемоц | Гриша |
| Шачема шиц | 11-це сентябрьста 1944-це кизоня (81 кизоц) |
| Шачема вастоц | Зубово-Полянскяй районць Кужа велесь |
| Кулома шиц | 3 мартста 2008 |
| Странась | |
| Тевонь тиемац | писатель |
| Аляц | Илья Максимович |
| Тядяц | Дарья Николаевна |
| Иденза | Валерий Григорьевич Пинясов; Галина Григорьевна Стеньшина |
| Казненза и премиянза |
медаль «За трудовую доблесть» |
Григорий Ильич Пинясов— мокшень содаф писатель, прозаик, драматург, Мордовия Республикань Заслуженнай писатель, Мордовия Республикань Государственнай премиянь лауреат.
Эряфонь киц
Зубу аймакса ули мокшень оцю веле, лемоц Кужа руз. (Мордовская Поляна). Кельме и ши мадома ширде сонь кяшезь аера вармада туста вирьхе. А шинь стяма и лямбе ширеса келептезь сянгяря и панчфу эльснон лугатне. Сенем санкс лангаст таргавсть ляйхне и ляйнятне, оцю калонь сельмокс пиндолдыхть эрьхкне и эрьхконятне. Вов тяфтама вастса 1944-це кизонь 11-це сентябрьста и шачсь мокшень содаф писательсь Григорий Пинясов. Ня мазыдонга мазы васттнень эса кассь-венемсь, ётафтозе идькс и одкс пингонц. Г. И. Пинясов шумордазе велень школать, сяда меле Зубово-Полянскяй педучилищать [1], Н. П. Огаревонь лемса Мордовскяй госуниверситетть [2]. 1963-1966-це кизотнень служась Германияса Советскяй войскань группаса. Армияда меле 16 киза покодсь спецкорреспондентокс, ответственнай секретарень заместителькс, ответственнай секретарькс «Мокшень правда» газетаса, сяльде – 16 киза главнай редакторкс «Мокша» журналса, мекольдень пингть покодсь главнай редактор «Якстерь тяштеня» идень журналса.
Творчествац
Мокшэрзянь литературав Г. И. Пинясов сась 1960-це кизотнень. Эсь творчестванц ушедозе поэзияста. Васенце стихотворенияц «Ваймама шиня» ульсь печатлаф 1961-це кизоня «Мокша» журналса. Эсонза азондовсь кизонь лугать мазышинц и танцти шиненянзон колга. Г. И. Пинясовонь оцю творческяй киц ушедсь «Ветецесь» повестенц эзда. Тя произведениясь няфтезе, што мокшэрзянь литературав сась цебярь писатель, конань сонцень, эсь лацонь сёрмадыень асувоц, сон маштсь эряфста цебярь и важнай событиятнень няфнема. «Ветецесь» повестец лиссь 1977-це кизоня, конань пара мяльса васьфтезь лувихне. Тя произведениясь лемтьф кажнайти эздонк инь мала, инь питни ломанти – тядяти.
Мордовскяй книжнай издательстваса лиссть Г. И. Пинясовонь повестень и азксонь книганза «Пси киза» (1980), «Ялгане и содафне» (1985), «Тушенттама, аля, тушенттама» (1990), «Сире ранат» (1995), «Эштерь туцят» (2000), ёфксонь, азксонь и повестень «Вирявань руця» (2004), 2013 -це кизоня лиссь «Кочкаф произведеният» кафта томса книгац.
Рузонь кяльса лиссть «Жаркое лето», «Старые раны», «Давай вернемся в молодость». Г.Пинясовонь произведениянза лисендсть «Литературная Россия» еженедельникса, «Волга» журналса, а стане жа Болгарияса, финно-угорскяй республикатнень эса. 1994-це кизоня Г. И. Пинясовонди максфоль Мордовия Республикань Заслуженнай писателень лем, а 2000-це кизоня максф Мордовия Республикань Государственнай премия. Г. И. Пинясов - Мордовия Республикань Писателень союзу сувафтфсь, ульсь Мордовиянь Культурань министерствань коллегиянь членкс, ульсь республикать эзда финно-угорскяй народонь Всемирнай консультативнай комитетса. Казьф «За трудовую доблесть» медальса. I мокшэрзянь пуромксса Г. И. Пинясов кочкафоль мокшетнень эзда исполкомонь сопредседателькс.
Казненза
Медаль «За трудовую доблесть»
Литературась
1. Ветецесь: повесть. - Саранск: Мордовскяй книжнай издательствась, 1977. - 96 с.
2. Пси киза: повесть и расскаст. - Саранск: Мордовскяй книжнай издательствась, 1980. - 206 с.
3. Ялгане и содафоне: расскаст и очеркт. - Саранск: Мордовскяй книжнай издательствась, 1985. - 239 с.
4. Сембода лямбе берякти: повестть. - Саранск: Мордовскяй книжнай издательствась, 1988. - 207 с.
5. Тушенттама, аля тушенттама: повесть, расскаст. - Саранск: Мордовскяй книжнай издательствась, 1991. - 190 с.
6. Эштерь туцят: азкст, пеетькст. - Саранск: Мордовскяй книжнай издательствась, 1998. - 240 с.
7. Вирявань руця: ёфкст, азкст, повестть. - Саранск: Мордовскяй книжнай издательствась, 2004. - 416 с.
8. Кочкаф произведеният: кафта томса. - Саранск: Мордовскяй книжнай издательствась, 2013.
1 томсь: Повестть. - 544 с.
2 томсь: Повестть, азкст. - 544 с.
Башка нолдафксне рузонь кяльса
1. Жаркое лето: повести / пер. Н. Байкова. - Саранск: Мордов. кн. изд-во, 1986. - 270 с.
2. Старые раны: повести и рассказы. - Саранск: Мордов. кн. изд-во, 1995. - 384 с.
3. Давай вернемся в молодость: рассказы = Эрька мрдатама одксшизонк: азкст. - Саранск, 2006 (Тип. «Крас. Окт.»). - 160 с.