Мокшень кой

Мокшень кой (руз. Мокшанский обычай) — мокшень ломаттнень этническяй религиясна. Эвондась тяфта жа ингольдень маздаизмать влияниянц ала. Кучкастонь векть пингста эзонза канць полафкст народнай православиясь. Эрзятнень коряс, конат малат мокшетненди этническяй ширде, мокшетнень ёткса ашезь ванфтов языческяй койсь. 2006-це кизонь уликснень коряс синь ётксост аш неоязычествать ширенц кирдиенза.

Кемамать юронза

Инь оцю шкайкс, масторонь-менелень азоркс тя кемамать коряс ащи Шкайсь (семботь Тииец), конанди мярьгихть нинге Шкабаваз — семботь тииец, кона эряй менельса, сембе вярдень (менелень) и алдонь (модалангонь) шкайхненди оцюня.

Шкайть каршезонза молити мярьгихть Идемявозь.

Мокшетнень лия шкайснон и ваймопожфснон эзда кундасайнек лемснон нятнень:

• Кардазава — пирьфонь ванысь, шкай-авась
• Кардазонь кирди — пирьфонь-кардонь кирдись
• Юрхтава — юрхтонь, родонь кирдись-ванысь, шкай-авась
• Велень кирди юрхтава — велень кирдись-ванысь, шкай-авась
• Якшамава — якшамонь шкай-авась
• Якшаматя — якшамонь шкай-атясь
• Вазава — жувататнень ванысна, шкай-авась
• Вармава — вармань азоравась, шкай-авась
• Вармань кирди — вармань кирдись
• Вирява — вирень ваны авась, шкай-авась
• Виряля — вирень ванысь
• Ведява — ведень ваны авась, шкай-авась
• Ведяля — ведень ванысь
• Акша кал
• Акша локсти
• Акша келу
• Тумашкай — тумонь шкай
• Лепешкай — лепень шкай
• Атямшкай — атямонь шкай
• Солтан — Модать кирдиец-шкаец
• Толава — толонь кирдись-ванысь, шкай-авась
• Ковава — Ковонь шкай-авась
• Коватя — Ковонь шкай-алясь
• Масторатя — Модалдонь шкай-атясь
• Модава — модань шкай-авась
• Кудава — кудонь шкай-авась

Тяниень пингть озкст ётафнихть тяфтама шкайхненди:

• Шкай
• Акша келу
• Акша локсти
• Акша кал
• Тумашкай
• Лепешкай

Озксне эряйхть:

• стак шинь озондомат (кепотьксонди, пиземонь анаманкса)
• марстоннет— оцю илат (Акша келу, Акша кал и лият)
• башка ётафневи озкст (семьянь келеса) — рьвяямань илат, шабань шачемань илат (бабань кшит), калмамат и лият.

Озксне

Марстонь озксне и стак шинь озондоматне ётнихть башка тянди ладяф вастса, ковгярьксть коряс или эрь кодама тевонь пингста (пиземфтема пингсь, урматнень пингста). Марстонь озксне ётафневихть, кода ладяф ни, иняру пораса (репештаса), а тяфта жа лугаса, лоткса (озондома лоткса) или кудса. Кереметьса ётафневихть аф цебярь шкайхненди озкст. Кереметсь ащи ляй трваса, коса касы вирь и коса касыхть иняру шуфтт: келуфт, тумот, поюфт. Атянь атятнень лятфнемаснон Атянь пъшкядема ётафтсазь ляй трваса туста кальналса, тяфтама вастти сядонголе мярьгольхть ямкаль. Озксть ётафнесазь инятясь и ёнцавась (ингольдень пинкнень теенза мярьгольхть имбаба), конатнень кочксезь озксонь ётафнемс сембе пингть, куломозост, кудса озондомать ётафнезе родонь оцюнясь. Сембе иняру паршихне ванфтовихть инятять кудса. Нят иняру кечетне, иняру парьсь, озкспарьсь, сёвонень кядьгонятне, коса аноклакшневи озксонь симомбяльхне — позась и пуресь, иняру милесь, конань мархта шорсевсть анокламста симомбяльхне, иняру пеельсь да лият месть, конатне нолявихть тевс аньцек озксонь ётафтомста. Инятяти лездыкс кочксихть колма оцюнят «пурень тии атят», конат аноклакшнезь озондомань симомбяльть пуреть. Инятясь максси теест озкспарь и синь ушеткшнихть кочксема озксу сембе сайхнень кядьста ярмакт, а тяфта жа сёра, медь, алхт, вай и стак тов. Озксть лемс ярмаконь и ярхцамбялень аф максомась лувондови пежекс. Колма шида озондомда инголе кочкайхть колма ломатть палонь пидихть, конат кармайхть пидема озксонди сиволь. Инятясь максси тейст озконь пеель, конань мархта синь кармайхть керсема озксонь сивольть эса и явондомонза озондыхненди. Мзярда озксти ляды фкя ши, кочксихть ямонь колма кирдихть — ямонь пидихть, конат кармайхть пицема озксонь ям. Инятясь макссыне теест иняру кечетнень (синь эздост улендсь 40, 50 или 100), эзост ямонь кирдихне кайсесазь озксонь ямть и явондсазь озондыхненди. Инятясь азондсы озксонь ушедома пинкть. Озксть пингста инятясь аф канды озксказнет и аф морси озксморот лиятнень эзда башка, но вяти озксморонь марстонь мороть эса. Сонцень озксть мольфтеманц вятьсы ёнцавась. Инятяти васенцекс кандови «иняру кечесь» медень од пива мархта пуре, кона аноклаф озксказнекс путоманди, меле сонь эздонза симихть сембе озондыхне. Озксть аделаманц азондсы инятясь, меле сембе озксвятихне срадыхть кудга. Озксне тяфта жа тиендевихть иняру шуфттненди, иняру кефненди.

• Юрхтонь озкc — кудса ётафневи, семьянь и юрхтонь инкса
• Айгор озкс — алашатнень инкса
• Лисьмонь озкс — лихтибрять ваксса
• Келувонь озкс — иняру шуфтть ваксса — келуть
• Тумонь озкс — иняру шуфтть ваксса — тумоть
• Пяшень озкс — иняру шуфтть ваксса — пяшеть
• Пичень озкс — иняру шуфтть ваксса — пичеть
• Сувафтомань озкс — луга лангса, тунда, жувататнень паксяв панемдост инголи
• Веле озкс — велеть инкса
• Юрхтава озкс — кудть и юрхть инкса
• Видемозкс — озимойхнень видемда инголе
• Пакся озкс — паксять инкса
• Варма озкс — вармать инкса
• Лайме озкс — лугать инкса
• Пизем озкс — пизем анамань озкс коськть пингста
• Тракс озкс — тракснень инкса
• Сараз озкс — кудонь нармоттнень инкса
• Атянь пъшкядема — атянь-атятнень лятфнемань шись, ётафнесазь ляйть трваса, кальналса. Пидихть ям. Стака пингть печксихть вероскат, пидихть сиволь, тернесазь атяснон-бабаснон лездомс и ваномс синь.
• Од тол — Од толсь. Зияттнень или урматнень пингста толса аруяфтомась. Чудилакс щаф аватне кильдихть пря сокас и сокасазь велеть перьф. Сембе куттнень эса, эрь пянакудса матсазь толть. Сембе пуромкшнихть озондома, конань пингста шовсезь крьвяснихть од тол. Озондомда меле тя толть сявондсазь кудга.

Илатне

Ингольдень пинкнень илать анокламанц и ётафтоманц вятезе озатясь, кона кочкафоль оцюнятнень ёткста и сон улель аф сяда од 70 кизода. Теенза путневсть 12 лездыхть, конат кочксевсть пуромксонь пара лувкс путома алятнень ёткста. Оцю иласта фалу крьвясневсь Салтан штатолсь («Золтанонь штатолоц») озксонь штатолсь. Штатолсь тиендевсь штаста 2 метрань сереса и пяле метрада кели диаметраса. Лувондовсь, што тя штатолсь стама, кодама весть прась менельста и конань крьвястезе сонць Шкабавазсь. Тя штатолсь путневсь озондома парьть лангс — пякстаф иняру парьть, коза илань карша кочксесазь иланди кочкафкснень.

• Оцю Сёра — ётни тундань видемада меле. Сяда инголе илань ётафтома вастть перьф ётнесть сокаса, штоба перямс кудонь ракшатнень урмада. Тя суркссь илань вастть перьф лемневсь «перьф копорема».
• Акша келу — ётни Иняру Тройцянь шиня. Тя шиня ётнихть «Акша келу» карксса тюремать коряс пялькстомат

• Акша кал

Озксказнень кандома

Шкайхненди озксказнекс путневи жуватань сиволь (ляба), конань лемнесазь озондоманнекс (озондомвалкс). Кудонь озкснень пингста печкф жуватать печксесазь кардса, жертвеннай кевть ваксса (кардаз сярхка), тозк, кевть ваксса ули лоткти кайсесазь жуватать веронц. Озондомда меле озксонь сиволть эзда аф оцю пакшть путнесазь куд порог лангс. Сяда инголе нолявсь тевс иняру пеельсь, кона тифоль кевста. Тевс нолямс сонь лия тевса или тарксемс стак шиня лувондовсь пежекс. Марстонь озксть пингста тя пеельть каннесы мазыста сёрматф карксонц фтала инятясь, кудонь озондомать пингста — родонь-плямань оцюнясь.

Иняру щамсь

Инятясь — озксонь вятись или озатясь — илань вятись сяда сире пинкнень щашендсь оцю и кувака акша панар, конань щакшнезе прява, сон карксэземть видеса сотнекшневсь эрь кодама тюсонь сюреса сёрматф эсь лацонь карксса («иняру каркс»). Панарть сташендозь иляназонь или мушконь котфста. Ингольдень пингть сембе озондыхне щашендсть «панархт» озксть пингста.

Атянь-атятнень почитандамасна

Кунардонь пинкнень кулофнень калмосезь керса, коза ашкорязь ловажать и повфнезь шуфта пряс, тяфтама калмама вастти мярьгольхть урля или уркспря. Сяда меле калмосесть вирень калмолангс (калмакужа). Ниле серцек касы шуфттнень эзда тиендсть сруб и путнезь сонь сери мокорьхнень лангс, конат лиссть шуфттнень керомдост меле. Срубть лангс тиендевсь кудбря, потмозонза путнезь кулофть ловажанц керть потмос ашкотфста. Вихца кстиндамань пингть калмакужетне ульсть плхтафт. Тяда меле ушедсть калмосема модать потмос. Калмамань койсь фалу сотфоль озкснень мархта, мезсь няфнесы тунда и сёксенда калмолангса ётафневи озондоматне-поминандаматне, конат ванфтовсть тячити самс. Кулофне лувондовсть эряйкс тона шиса, синь арсесть эряйхненди ванфтыкс. Синь ульсь кода тернемс лездома, синь маштсть и кяжиякшнема. Кулофне кулсесть аф весть. Почитандави сире ломаттне, лувондовсть инярукс, тяфта синь ётазь «омбоце куломать». Куломать колга куляда меле кулофть пяли ушеткшнесть сашендома раднянза, шабранза и содаф ломаненза, сембе каннесть теенза казненди кши, пачат, пуре, ярмакт и путнезь семботь башка шра лангс. Родста кочксесть ве ваныхть (кулоф алятненди — аля, кулоф аватненди — ава). Сонць сафсь азонкшнесь кулофти кантф казненц колга, эрь азондомста сембе сюконякшнесть кулофти. Ярмакнень крксезь ловажать вельхксса, аф пяк кайгиста мотерьфтсть: «Вов тейть ярмакт, тик мархтост семботь, мезе мяльце, туят, пади, беседас, свадьбас, воражендак минь, шистотнень инкса». Тяфта жа, кшнинь ярмакнень крксемок, пшкятькшнесть инголи кулоф радняснонды: «Тядят-алят, атят, бабат! Вов минь кучтама тейнть 40 фунт сия, 40 фунт сере, махорка мархта пяшксе коробка и стак тов». Кулофть ваксс путнихть ведь («штоба ваймось шталезе шаманц»), эзонза инголи кайсесть ярмак, штоба ляпомгофтомс кулофть ваймонц, и путнесть цюкор («штоба ваймось ярхцаль»). Кулофть родста кочкафсь ляткшнесь ве ванфтома ловажать ваксс. Тернесть кулоть эшеляма («штайхть»). Киндинге штайда башка афоль мярьгондев токафнемс кядь аф ловажати, аф лазксненди, аф лазксть эзда чепкафненди, аф кулофть щамонзонды, сяс мес пельксоль сярятькстомс «ловажань урмаса» (шопача наркоть). Ведть эшелямда меле, лазксонь чепкафнень и кархчнень лихнесазь кудста сяда ичкози. Покойникть наряжамда меле мала раднянза ушеткшнесть авардема (явсема), (мирденц колга явсема ушеткшнесь полац, иттнень коолга — синь тядясна, тядяснон-аляснон — стирьсна). Кда явсекшнемс аш кинди —сиводихть авардихть («ольксихть»). Явсесть эрявикс явсемат, тиендезь тянь вии ёжмаряма мархта, сяс сембе тоса улихне авардсть. Явсематне мольсть илядьс. Явсемань омбоце пялькссь ётнесь лазксть куду сувафтомдонза меле, лазксу кулоть путомдонза меле, омбоце шиня куломда меле (козятнень — колмоце шиня). Явсемань-ольксемань тёкшсь сашендовсь лазксть лихтемда инголе. Сембе сафне прашендсть плманжа лангс и анасть кулофть кядьста простямс синь и ванондомс синь. Кудста лазксть лихтемда меле сембе лотксесть и пшкятькшнесть атянь атятненди эняльдема мархта примамс эстеест од ломань, а шиса лядыхненди кучемс шумбраши. Кудснон инголе лацсесть шра ярхцамбяль мархта и путнезь лазксть шрать ваксс. Тяда меле ётнесть явсематнень колмоце пяльксснонды. Сембе раднянза и кулофть кельгиенза тяфта жа лихнесть кудть инголи аноклаф шрат лазкс мархта процессиять молема кинц лангса, конатненди сембе лотксесть. Калмамда инголе стане жа эрявсь кандомс жертва — «вастонь рамама» (вастонь идема) — ёрдамс ярмакт сай пингонь калмоть потмос, коса кармай кулофть пряц. Явсихне авардезь явсемань мекольце пяльксть. Сяда ингольдень пингть явсематне явондовсть вейхкса пяльксова:

• васенцесь — эсток куломда меле
• омбоцесь — ловажань эшелямать пингста
• колмоцесь — лазксу путомста
• нилецесь — кудса прощандамста
• ветецесь — кулофть лихтемста
• котоцесь — панжада лазксть ильхтемста
• сисемцесь — мекольце прощандамста
• кафксоцесь — лазксть сёлгомста
• вейхксоцесь — калму лазксть нолдамста

Мзярда кулофсь прважафоль (кучмолият) и калмафоль, тя тевть пингста ашезь мярьгондев корхнемс, калмолангста самста сембе морсесть озксморот, конат морсевихть Роштувань вень иласта, рьвяямста и од куду эряма ётамста. Кудть пирьфсонза крьвяснихть оцю толмар конанди малаткшнихть калмолангста сембе сайхне, ламоц вастова — малаткшнихть пянакудти. Сембонди, кие пели кулофнень эзда, фалу мярьгондевсь маладомс толти или варжакстомс пянакуду, сяс мес толсь канни эсь эсонза ароптомань вий. Сембе пуромкшнихть поминандама (лятфамат) кулофть кудса.

Тя пингти кочксихть вастозай — ломань, конанди сави «полафтомс» кулофть, сон улеза кулофть лангс шары. Сонь щакшнесазь щамса, конатнень каннезень кулофсь, озафнесазь кулофть вастс, макссихть кизефкст сянь колга, кода сон эряй тона шиса. Вастозайти эрявсь отвечсемс кизефкснень лангс и шнамс кулофть эряфонц, корхтамок колмоце лицать эзда («Сонь тосонга цебярь козяшиц». «Тиннеть тосонга сембось пара».). Кудса поминандамда меле тушендыхть калмолангс каваняма и симомбяль мархта. Семботь тянь эряви сивомс калмолангса, явфтомок пялькс кулофти озксказнекс. Тяда меле кулофть мархта сембе пращайхть и эняльдихть «аф сашендомс апак тернек». Колмоце шиня раднянза сашендсть калмолангс и эняльдсть Модавати «примамс и аф нолямс кулофть».

Поминкас 3-це, 9-це, 20-це и 40-це шитнень и атянь-атятнень поминандама озксонь шиня (Атянь пъшкядема ши) куду тернесазь мала ломаньцнон и сонцень кулофть, пшкядемок теенза калмалангть шири. Шрать ваксса тага ули вастозайсь, кона азонды сянь колга, што кулофть сембе лац сонь «лия эряфсонза». Ярхцамась моли шобдавас, мезьда меле сембонь прважасазь кудга, пшкядемок аф няеви саф кулофтивок. Рьвакс апак тук стирьхнень и цёратнень калмосесазь рьвяямань щамса, сяс мес лия эряфса теест эрявсь лисемс рьвакс или рьвяямс. Синь эшелямост тернесть пяк сире ломатть (стирьхненди — сире бабат, цёратненди — сире атят).

Лятфтамат

Литературась

• Жиганов М. Ф. 1961. К истории мордовских племен в конце 1 тысячелетия н. э. // Советская археология, # 4. Зеленин Д. К. 1937. Тотемы-деревья в сказаниях и обрядах европейских народов. М.: Л.
• Harva, U. 1952. Die religiosen Vorstellungen der Mordwinen. Helsinki.
• Минх А. Н. Моляны и обряды мордвы Саратовской губернии // Этнографическое обозрение. # 4, Москва, 1892
• Мельников П. И. /Андрей Печерский/. 1981. Очерки мордвы. Саранск.
• УПТМН, т.7, ч. 2, НИИЯЛиЭ, Саранск, 1979
• УПТМН, т.7, ч. 3, НИИЯЛиЭ, Саранск, 1981
• Смирновъ И. Н. Мордва. Историко-этнографическій очеркъ, Казань, 1895
• Мокшин Н. Ф. Религиозные верования мордвы. Саранск, 1998
• Е. Н. Мокшина. Историография религиозной жизни мордовского народа//«Регионология» № 4 2012
• Татьяна Девяткина, Мокшэрзянь мифологиясь, Тартунь университет, 2002 ISBN 9985-867-24-6