Мордовия

Рувики лопаста
Российскяй Федерациянь субъектсь
Республика Мордовия
мокшекс Мордовия Республикась
эрз.: Мордовия Республикась
Saransk from Ferris wheel.JPG
Котфоц Содафксоц
Котфоц Содафксоц
Мордовиянь шнама морось
54°26′00″ с. ш. 44°27′00″ в. д.GЯO
Масторсь  Россия
Сувси
  • Приволжскяй федеральнай округти
  • Волго-Вятскяй экономическяй районць
Пряошец Саранск
Оцюня Артём Здунов
Российскяй Федерацянь субъектонь правительствань Оцюнятне#Мордовия Галина Лотванова
(тевонь пяшкодись)
Государственнай Собраниянь Председатель Владимир Чибиркин
Историясь и географиясь
Площадец

26 128 км²

  • (68 вастсь)
Часовой каркссь MSK0
Сембода оцю ошне Рузаевка,
Ковылкина
Экономикась
ВРП 227,3[2] миллиард цалковай (2018)
 • вастсб 66 вастсь
 • на душу населения 284,0[5] тёжянь цалковай
Эряйхне
Эряйхне

↘778 965[6] ломань (2021)

  • (62 вастсь)
Плотностсь 29,81 ломань/км²
Национальносттне руст, мокшет, эрзят
Государственнай кяльхне рузонь и мокшэрзянь кяльхне (мокшень, эрзянь)[7]
Цифровой идентификаторхне
Код ISO 3166-2 RU-MO
Код ОКАТО 89
РФ-нь субъектть кодоц 13
Преемственностсь
← Мордовская АССР
Официальный сайт​(руз.)
Республика Мордовия на карте
Награды Орден Ленина Орден Ленина Орден Октябрьской Революции Орден Дружбы народов
Логотип РУВИКИ.Медиа Мордовия
Внешние аудиофайлы
Гимн Мордовии (Инс.)
Гимн Мордовии (Мокш.)
Марка «50 лет Мордовской АССР». Почта СССР 1980 г.

Мордо́вия мокшекс Мордовия (Мордовия Республикась), Российскяй Федерациянь субъект, республикась сонь лувкссонза. Кандови Приволжскяй федеральнай округти, сувай Волго-Вятскяй экономическяй районть пяльксозонза.

Площадец 26 128 квадратнай вайгяльбе. Эряйдонза мекольце всемирнай оду сёрмадомать коряс 765 891 ломань. Пряфкс ошец — Саранск ошсь.

Государственнай кяльхне: рузонь, мокшень, эрзянь кяльхне.

Пингонь зонась МСК, шаштомась UTC видеса ащи +3:00. Явфтф 22 муниципальнай районга и 1 городской округ. Мордовия Республикань Оцюнясь Здунов, Артём Алексеевич (2021-це кизоста сявомок). Правительствань Председательсь Латванова, Галина Алексеевна — тевонь пяшкодись (2025-це кизонь 1-це апрелсьта сявомок), Председатель Государственного Собрания Республики Чибиркин, Владимир Васильевич (2011-це кизоста сявомок).

Тиф-ладяф 1928-це кизонь 16-це июльста кода Мордовскяй округ. 1930-це кизонь 10-це январяьста ладяф одукс кода Мордовскяй автономнай область. 1934-це кизоста сявомок — Республика. 1978-це кизоня «Мордовия» поездти макссть «Мордовия» лем Мордовскяй АССР-ть лемс — тяни Мордовия Республикась

Физико-географическяй характеристикась

Географиясь

Республикась ащи Восточно-Европейскяй равнинань шинь стяма ширесонза, примерна Москуть и Волгать ёткса кучкасост, и географиянь ширде сонь моданза улихть кода явомс условна кафта пяльксова: шинь мадома ширесь ащи Окско-Донскяй рравнинаса, кучка и шинь стяма ширдень пяльксоц — Приволжскяй возвышенностьса. Шинь мадома ширеста шинь стяма ширети кувалмоц - 295 вайгяльбе. Кельме ширде лямбе ширети - 172 вайгяльбе. Мордовиять сембода сери тёкш вастоц — 337 метра, ащи Чамзинскяй районца.

Кельме ширде шабракс ащи Нижегородскяй областсь, северо-востокса — Чувашия Республикас, шинь стяма ширде — Ульяновскяй областсь, лямбе ширде Пензенскяй областсь, шинь мадома ширде — Рязанскяй областсь.

Мордовия Республикась Москути инь малась российскяй республикатнень эзда: ётксь МКАД-ть и Мордовиять кержи ширенцты — 410 вайгяльбе, видеста — 318 вайгяльбе. Сембе сяка административнай ширде Мордовиясь сувафтови аф Центральнай федеральный округти, а Приволжскяй федеральнай округти.

Климатсь

Климатсь республикать видеса умеренно континентальнай (Алисовонь климатонь классификациянц коряс), умеренно континентальнай летькес лямбе киза мархта, Кёппенень климатонь классификациянц коряс. Январьста кучкаса ащи темтературась −9°С, республикать шимадома ширесонза -12 °C, северо-востокса, асембода ламось пачкотькшни -42... -45°С. Июльть кучкастонь температурац +19... +21 °C, сембода ламось +39... +40°С. Рельефонь перяфксонь аф улемать сюнеда, Мордовиять моданза панжадот кода кельме ширдень , станя и лямбе ширдень кожфненди. Кизоньберьф менельста прай начкнень лувкссна 400-500 мм.

Эряйхне

Республикаса эряйхнень лувксса 783 552 ломань: 63,3 % — ошень эряйхть, 36,7 % — велень эряйхть. Эряйхнень лувксснон касомасна няеви Саранск ошень округса. Кода и марнек странасонк минь ресбуликасонк велень эряйхне ётнихть эряма ошу. Мордовияса, кода и марнек Россияса, автнень лувкссна сяда оцю алятнень коряс: респубдикаса эрь 1000 аляти сави 1158 ава.

Эряйхнень одукс сёрмадомасна няфтезе — Мордовияса эряй 90 национальность. Синь ётксост 400 тёжянць – руст, пцтай 291 тёжянць – мокшет и эрзят, 40 тёжянть малава – татархт.

Народы Мордовии.png

Гидрографиясь

Ведень ширде Мордовиять вастонза тожа явфтовихть кафту: кержи ширдень (53 % республикань площаденц эзда) кандови Мокшеть бассейназонза, види ширденнесь (47 %) — Сурать бассейназонза. Ляйхнень лувксна марнек, конат шудихть республикать эзга (кирдемок мяльса и ёмла ляйнянь лувксть), — 1525[8], эздост аньцек 10 ляйть кувалмосна 100 вайгяльбеда лама: тя Сура и сонь шудерьксонза Алатырь, Инсар, Пьяна, а тяфта жа Мокша Сивинь, Исса шудерьксонзон мархта, Вад, Парца ( Вадть шудерьксоц) и Выша (Цна).

Мордовияса лувондови 63 лофцта симихнень эзда вид ( 35-сь эздост шуроста васьфневихне), 267 нармонень вид (70-ць шуроста васьфневихне), республикань ведь васттнень эса эряй 44 калонь вид. Пяк лама унжада (1000-да лама вид), а эрь кодама рептилияда и амфибияда кржа. Вирьса эряйхнень эзда улихть сяртт, вирьтувот, вирькатот (кашмарашт), шимотть, нумолхт, сувозихть, рябчикт, шякшатат, дрост, ситявнят)[8].

Республикаса федеральнай сереса кафта перьфпяльдень ванфтови вастта : П.Г. Смидовичень лемса Мордовскяй государственнай заповедниксь и Смольный (национальнай парксь). Тяфта жа улихть заказникт и перьфпяльдень памятникт, конат лувондовихть региональнайкс.

Ляйхне

Мордовияса 114 ляйхть. Сяда оцюфне:

Ляйда башка Мордовия Республикаса 500-шка эрьхкта.

Мода потмонь козяшись

Мода потмонь козяшись палы мода, цементнай сырьят, пурхт, минералонь ветть и ст. тов.

Административнай явомась

Мордовия Республикань Пряфкс ошсь: Саранск.

Мордовиянь административнай явомась
Республикань Кудонь зданиясь (Саранск)

Мордовия Ресупбликать видеса улихть 22 райотт и республикаь подчиненияса 3 ошт — Саранск, Рузаевка и Ковылкина.

  1. Ардатовскяй район
  2. Атюрьевскяй район
  3. Атяшевскяй район
  4. Большеберезниковскяй район
  5. Большеигнатовскяй район
  6. Дубёнскяй район
  7. Ельниковскяй район
  8. Зубово-Полянскяй район
  9. Инсарскяй район
  10. Ичалковскяй район
  11. Кадошкинскяй район
  12. Ковылкинскяй район
  13. Кочкуровскяй район
  14. Краснослободскяй район
  15. Лямбирскяй район
  16. Рузаевскяй район
  17. Ромодановскяй район
  18. Старошайговскяй район
  19. Темниковскяй район
  20. Теньгушевскяй район
  21. Торбеевскяй район
  22. Чамзинскяй район

Мокшетнень эзда ламошкась эряйхть Атюрьевскяй (90,27 %), Торбеевскяй (62,55 %), Старошайговскяй (59,48 %), Зубово-Полянскяй (52,14 %) и Ковылкинскяй (51,72 %) райоттнень эса.

Эрзятне — Кочкуровскяй (92,14 %), Дубёнскяй (86,4 %), Атяшевскяй (84,72 %), Большеигнатовскяй (83,47 %), Ардатовскяй (57,85 %) и Большеберезниковскяй (56,84 %) райоттнень эса.

Лядыкс райоттнень эса, сувафнемок Саранск ошень округть, эряень ламошканц тиендьсазь русне.

Ошне

№ Ошне Эряйхне (2021)
1 Саранск 312,252
2 Рузаевка 42,989
3 Ковылкина 19,793
4 Краснослободск 8,910
5 Ардатова 8,857
6 Инсара 7,920
7 Темникав 6,451

Демографиясь

Численность населения
1959[9]1970[10]1979[11]1987[12]1989[13]1990[14]1991[14]
1 001 994↗1 029 562↘990 617↘964 000↗964 132↘963 778↘962 340
1992[14]1993[14]1994[14]1995[14]1996[14]1997[14]1998[14]
↘960 443↗960 671↘958 247↘954 348↘949 061↘942 694↘935 013
1999[14]2000[14]2001[14]2002[15]2003[14]2004[14]2005[14]
↘927 437↘918 443↘908 152↘888 766↘886 165↘876 105↘866 631
2006[14]2007[14]2008[14]2009[16]2010[17]2011[18]2012[19]
↘856 833↘847 645↘840 391↘833 031↗834 755↘833 263↘825 454
2013[20]2014[21]2015[22]2016[23]2017[24]2018[25]2019[26]
↘818 566↘812 156↘808 888↘807 453↗808 541↘805 056↘795 504
2020[27]2021[6]
↘790 197↘778 965
250 000
500 000
750 000
1 000 000
1 250 000
1 500 000
1970
1991
1996
2001
2006
2011
2016
2021
  • Эряйхне: 771373 (2023)
    • Ошса эряйда: 490,4 (63,6%)
    • Велеса эряйда: 281,0 (36,4%)

Азорондамась

Пряфкс законць — Мордовия Республикань Конституциясь.

1991-це кизоня Мордовияса, кода РСФСР-нь ингольдень кой-кона автономнай республикатнень эса (суверенизациять пингста) кемокставсь президентонь постсь.

1993-це году Мордовиянь Верховнай Советсь машфтозе президентонь вастть.

Мордовия Республикаса улихть основной политическяй партиятнень региональнай представительствасна: «Единая Россия», КПРФ, ЛДПР, «Справедливая Россия», «Яблоко», «Правое дело». Республикань парламентса — МР-нь Государственнай Собранияса — покодихть депутаттне «Единай Россиять» и КПРФ-ть эзда. Сяка, лия политическяй вийхнень тяфта жа ули уликсшисна покодемс ломаттнень инголе, кепотьксонди, Мордовиянь Общественнай Палатаса.

Экономикась

2016-це кизоня цебярь полафткс улихть экономикань сембе отраслятнень эса, тяконь лувксса промышленностьса, велень хозяйстваса, строительстваса. Кассть основной капиталти инвестициятне, омба масторонь инвесторхне шарфтыхть мяльснон республикати. Мялень кеподи сатфкст сатсть Мордовиянь аграрийхне — производствать касомац отрасляса няфтсь 112 процент. Васенцеда перерабатывающай промышленностень предприятиятне арасть малакс производствань объемтнень коряс оцю промышленностть мархта[28].

Республикань строительнай отрасляса работань объемтне кассть 15 процентта и 27 миллиартта лама цалковай. Ламода тянди лездсь Мордовияса тевс нолдаф кизоти 5 процентонь алу льготнай ипотекань процентфтома программась. Программась няфтезе эсь эффективностенц, эсь лацонь условиятнень тевс нолязь ни 2 тёжятть ломанць, тянь мархта республикань строительнай отрасляти вельф нолдавсь 4 миллиартть малава цалковай[29].

2016-це кизоня средняй зарплатась республикать эзга кассь 7 процентта, а инфляциясь тись 5,5 %[30].

Тяниень пингонь одкстоптоматнень и тяниень пингонь од производстватнень тиемаснон вельде республикась тись сатфкст инновационнай вииямаса. Мордовиясь сувась странань региоттнень-лидерхнень ёткс промышленнай продукциянь марстонь объемса инновационнай продукциянь пяльксть коряс,кона тячи 28% лама. Тя странань средняй показательть коряс пцтай кафтонь-крда сяда оцю[31].

Цебярь полафтксне васьфневихть и социальнай сфераса. 2013-це кизоста сявомок 2016-це кизоть самс республикаса няеви эряень миграционнай касомась. 2016-це году сон пуроптсь пцтай 3 тёжятть ломань.

Республикать эзга ётнихть транспортнай магистральхне, конат сотсазь Москуть Поволжьять, Уралть и Сибирть мархта. Мордовиять прявкс ошец — Саранскяйсь — арась ошнень ёткста фкякс, конат примазь футболть коряс миронь чемпионатть матчензон 2018-це кизоня.

Касфнихть сёрот (59,3 % видемань паксят), кормовой культурат (32,4 %), модамарь и перень сёрот (4,4 %), и техническяй культурат (4 %). Ули сиволень-лофцонь тряма и нармонень водяма; касфнихть нинге тувот, учат и сяват.

2011-це кизонь итокнень коряс Саранск ошсь лувфоль сяськикс I-це категориянь ошнень ёткса «Россиянь сембода благоустроеннай ошень (велень) поселениять» лемонц инкса[32].

Промышленностсь

Мордовиянь промышленностень прявкс отраслякс лувондовихть машиностроениясь и металлообработкась. Тяфта жа вихонзафт цюгунолитейнай производствась, химическяй и нефтехимическяй промышленностсь, тёждя и пищевой промышленностсь. Энергетикась тиф тепловой электростанциянь тевс нолнемать вельде. 2016-це кизонь даннайхнень коряс, инновационнай продукциять пяльксоц пачфтьф продукциять марстонь объёмсонза арась 30 процентти молемс. Мордовиянь вяти промышленнай предприятиятне сувсихть Приволжскяй федеральнай округонь и Россиянь инь цебярь предприятиятнень ёткс, кирдихть кеме соткст омба масторонь партнерхнень мархта. Покоди «САН ИнБев» пивовареннай корпорациянь Саранскяень филиалсь, Danone-Юнимилк компаниянь группань филиалсь «Молочный комбинат „Саранский“»

  • «Лисма» предприятиясь;
  • «Резинотехника» Саранскяй заводсь;
  • Рузаевскяй клянцеконь тиемань заводсь;
  • Рузаевкань химическяй машиностроениянь завод;
  • ГАЗ группань саранскяень автосамосвалонь завод;
  • Саранскяень вагононь петемань завод;
  • «Мордовцемент» предприятия;
  • «Магма» предприятия;
  • «Лато» предприятия;
  • «Сарансккабель»завод;
  • «Электровыпрямитель» предприятия;
  • Мордовиянь вагоностроительнай компания;
  • Саранскяй приборостроительнай завод;

Велень хозяйствась

2020-це кизоня 1-це январти велеряйхнень лувкссна 285 663 ломань, Мордовия Республикса эряень малава 36%.

Перьфпяльдень климатическяй условиятнень коряс Мордовиясь канневи Средневолжскяй регионти, Пензенскяй, Самарскяй, Ульяновскяй областтнень и Татарстанть мархта ряцок. Велень хозяйствась — республикань материальнай производствать прявкс отраслянзон эзда фкясь.

2020-це кизоня Мордовиянь делегациясь ульсь российскяй агропромышленнай выставкаса Зрнянь сёксе-2020 (руз. Золотая осень-2020) и получась кой-мзяра медаль отраслевой конкурснень эса участиянь примаманкса [33].

Культурась

Мордовияса инь васенце музейсь ульсь панчф Темников ошса тястоконь дворяттнень лезксснон вельде (меценаттнень ёткса ульсть адмиралть Ушаковонь потомканза, писательть Купринонь бабац и атяц, Демидофнень металлургтнень юрсна и стак тов.) Музейнай фонттнень эса ульсь 3 тёжяньда лама экспонат. 1956-це кизоня музейть сёлгозь(тя пингть малава сембонь срафтозь-калафтозь, фкада башка, темникавонь церькавть), экспонаттне максфтольхть республикань краеведческяй музейти.

Тяниень пингонь оцю музейхне: Мордовиянь республиканскяй объединеннай краеведческяй музейсь 9 филиал мархта республикань райоттнень эса, Композиторть Л. И. Воиновонь кудоц-музеец, С.Д. Эрьзянь лемса Мокшэрзянь республиканскяй изобразительнай искусствань музейсь колма филиал мархта, Адмиралть Ф. Ф. Ушаковонь лемса темниковскяй историко-краеведческяй музейсь, Боевой и трудовой подвигонь музейсь А. И. Полежаевонь музеень филиалть мархта. Государственнайда башка республикаса ули сядода лама[34] общественнай ушетксса ёмла музейхне, сяконь лувксса конат тифт образовательнай учреждениятнень, кой-кона предприятиятнень видеса.

Республикань инь оцю библиотекась — А.С. Пушкинонь лемса национальнай библиотекась. Н.П. Огарёвонь лемса Мордовскяй государственнай университетть видеса ули М.М. Бахтинонь лемса инь оцю научнай библиотека.

Республикань кудсь, Санаксаронь монастырсь, Саранскяйса скульпторть С. Д. Эрьзянь памятникоц, Мордовиянь декоративно-прикладной искусствась, Мокша ляйсь Россиянь 2005 кизонь почтовай маркаса, кона лемтьфоль Мордовия Республикати(ЦФА [АО «Марка»] № 993)

XX-це векть ушетксста масторлангса келиста содафоль скульпторсь Степан Дмитриевич Эрьзя, сявозе эсь псевдонимонц «эрзя» народонц лемста. Сонь творчестванц смузец келиста пачфневи республикасонк, сяс мес эсь работасонза сон шарфнесь сатомшка мяль тяконь лувксса и мокшэрзянь культурати[35].

Мордовияса сяда содафокс арась композиторсь Леонид Иванович Воинов. Сонь лемсонза лемдевсть Саранскяйса и Темниковса куротне, Саранскяйса и Темниковса музыкальнай школатне, рузонь народнай инструментонь оркестрась.

Россияса содаф Мордовия Республикань някань Государственнай театрась[36]. Театрать репертуарса — народнай ёфкст.

Финно-угрань масторонь центра

Мордовия Республикась финно-угорскяй миронь содаф центратнень эзда фкясь. 2002-це кизонь июль ковста Саранскяйса ащи Россиянь финно-угорскяй нароттнень Ассоциацияснон центральнай офисоц.

2006-це кизоня Российскяй Федерациянь президентть В.В.Путинонь мярьгоманц коряс и РФ-нь региональнай вииямань Министерствать лезксонц вельде Мордовияса тиевсь «Финно-угорскяй народонь культурань поволжскяй центрась» (руз. «Поволжский центр культур финно-угорских народов»)).

Тонафнемась

Мордовия Республикаса 9 высшай учебнай заведеният.

  • Россиянь кооперациянь университетонь Саранскяень кооперативнай институтсь. Эвондась 23-це сентябрьста 1976-це кизоня. СКИ РУК-са тонафни пцтай 7000 студент.
  • Мордовскяй гуманитарнай институтсь.
  • Н. П.Огарёвонь лемса Мордовскяй государственнай университетонь (филиал) машиностроениянь рузаевскяй институтсь.
  • Тяниень пингонь гуманитарнай академиять Саранскяень филиалоц.
  • Средне-Волжскяй (Саранск ошсь) РФ-нь юстициянь Министерствань Российскяй правовой академиянь филиал.
  • Саранск ошса государственнай службань Волго-Вятскяй академиять филиалоц.
  • Рузаевкаса кинь сообщениянь Самарскяй государственнай университетть филиалоц.
  • Саранскяень духовнай семинариясь.

Мордовиясь лувондови 15 региоттнень ёткста фкякс, конатнень эса 2006 кизонь 1 сентябрьста сявомок сувафтфоль образованиянь региональнай компонентокс Православнай культурань основанц коряс предметсь[39].

Религиясь

Мордовияса улихть масторлангонь инь оцю тяфтама религиятне: христианствась, исламсь, буддизмась, иудаизмась и лиятне. Республикань эряйхнень ламошкасна кемайхть православияти. Регионца 3 епархият: Саранскяй, Краснослободскяй и Ардатовскяй. Вяти архиерейсь — Саранскяй и Мордовскяй митрополитсь Зиновий. Саранск ошень центральнай соборсь — Святой праведнай воинть Феодор Ушаковонь кафедральнай собороц.

Республикаса улихть кунардонь монастырьхть, конат арасть паломничествань вастокс сембе странаста тёжятть ломаттненди. Республикань алянь монастырьхне: Санаксаронь (Темников ошсь), Иоанно-Богословскяй (Макаровка велесь), Свято-Троицкяй (с. Б. Чуфарова велесь), Александро-Невскяй (Кимляй велесь) Республикань алянь монастырьхне; авань: Параскево-Вознесенскяй (Пайгарма велесь), Свято-Тихвинскяй (Курилова велесь), Свято-Ольгинскяй (Инсар ошсь)[40]. Мордовияса улихть мусульматтнень 3 духовнай управлениясна — МР-нь мусульманонь Духовнай управления, Мордовиянь мусульматтнень региональнай Духовнай управлениясна и Мордовиянь мусульматтнень центральнай Духовнай управлениясна.

Спортсь

2010-це кизоня май ковста Мордовия Республикать и РФ-нь спортонь, туризмань и од ломанень политикань Министерствать ёткса ульсь тяшкстаф марстонь покодемать колга соглашения, конань вельде регионца арьсекшневи 22 спортонь видтнень виияфнеманц коряс марстонь работа. Российскяй Федерациянь Президентть видеса физкультурать и спортть коряс Советть заседанияса Мордовия Республикась азфоль странань региоттнень массовай физкультурнай движенияснон виияфнеманкса ниле инь цебярьхнень ёткса [41].

Мордовиянь спортсметтнень-кандидаттнень ёткс Россиянь спортивнай сборнай командатненди сувси 112 ломань. Лондонскяй олимпиадати Мордовиясь аноклась 150 спортсмен спортонь эрь кодама виттнень коряс. Мордовиянь сборнайть символическяй лувксса — инь престижнай пялькстомаса сяськиень и призеронь оцю лувкс. Эзонза сувсихть Олимпийскяй налхкомань 3 Чемпиотт и 3 призёрхт, миронь 27 чемпион, Европань 20 чемпион, миронь и Европань 21 кубань сяви, Европань и миронь Первенствань 19 сяськи. Инь цебярьхнень лувксса— олимпийскяй чемпиоттне Алексей Мишин, Ольга Каниськина, Валерий Борчин, олимпиадань призёр Денис Нижегородов. Од и оцю ломанень уровеньца мокшэрзянь спортивнай школать сяськоманза Станислава Емельянова, Татьяны Шемякиной, Алексея Барцайкина, Вячеслава Пахомова, Алексея Юфкина и ламонц лиятне.

Спортсметтне, конат ётасть Мордовияв странань лия региоттнень эзда,— дисконь ёряйсь Дарья Пищальникова, легкоатлетсь Юрий Борзаковский, ядрань тостиейсь Анна Авдеева[42]. 2011-це кизоня август ковста сявомок Мордовияса покоди фигурнай курькснемать коряс вяти пермскяй тренерсь Людмила Калинина. Мархтонза ётасть эряма и кой-кона воспитанниконза. Синь лувкссост — Европань чемпионатонь призёрхне, Олимпийскяй налхкомань участникне Вера Базарова и Юрий Ларионов [43].

Мордовиянь спортсметтне 2012 кизонь Олимпиадаса

2012-це кизоня Лондонца Олимпиадаса Мордовиянь представительхне арасть вете казнень сатыкс. Спортивнай якамаса медальхть сатсть мордовиянь спортивнай молемань школать воспитанниконза Россиянь заслуженнай тренерть Виктор Чегинонь вятеманц ала. «Зрнять» сявозь Елена Лашманова 20 вайгяльбень кувалмоса и Сергей Кирдяпкин 50 вайгяльбень кувалмоса. «Сиять» — Ольга Каниськина. Кафта медальхне пяшкодезь высшай спортивнай мастерствань школань спортсметтнень активса. Дисконь ёряйсь Дарья Пищальникова эсь «сиянц» мархта панчсь Мордовиять лемс казнень счет, а ласькись Екатерина Поистогова шумордазе сонь «бронзаса»[44]. 2012-це кизоня Лондонца Паралимпийскяй налхкомаса Мордовиянь легкоатлетсь Евгений Швецовсь арась 100, 400 и 800 метрань ласькомаса колмонь-крда чемпионкс. Тяка пингть сембе колма дистанциятнень эса сон ладясь мировой од рекортт.

2022-це кизоня Мордовия Республикань Атяшевскяй районца ушедозе эсь покодеманц Каменка (панда соксонь курькснема вастсь), тяфта лемдевсь, сяс мес вастонц Каменка велеть маласа.

СМИ-тне

Мордовияса васенце газетась лиссь 1906]-це кизоня, мзярда Саранскяйса ушедсь лисендема «Мужик»газетась. Тячи Мордовияса регистрировандаф пцтай 100 печатнай массовай информациянь средства; покодихть оцю российскяй газетань филиалхт.

Республикаса ноляви 1 эрь шинь газета — «Мордовиянь Кулятне» (руз. «Известия Мордовии» ) (лисенди шавшиста, вержиста и пяденцяста) и эрь недяляннетне «ProГород», «Столица С», «Вечерний Саранск», «Мордовия», «Республика молодая», «Сельская газета», «ТВ-неделя», «Телесемь», «Мокшень правда», «Эрзянь правда», «Юлдаш- Спутник». Тяфта же нолявихть 22 районнай газетат.

Телевидениятне

Республикаса работайхть региональнай колма телеканалхт — «Россия» ВГТРК-нь филиал, «Телесеть Мордовии» (10 канал) частнай и Мордовиянь Народнай Телевидения (НТМ). Тяфта жа ули 12 ТВК «Саранскяй телевидениясь», кона ащи ошень каналкс[45].

Тяда башка Саранскяйса Н. П. Огарёвонь лемса Мордовскяй Государственнай университетть видеса покоди Огарев-ТВ, кона няфнесы вещаниять университетть потмоса, а стане жа интернет-телевидениянь форматса[46].

Интернет-изданиятне

Республикаса улихть 3 региональнай информационнай агентстват «Вестник Мордовии» (http://vestnik-rm.ru), «MordovMedia» (http://www.mordovmedia.ru) и «Инфо-РМ» (http://info-rm.com). Информационнай агентствань форматса стане жа покоди Мордовия Республикань государственнай властень оргаттнень интернет-порталсна (https://e-mordovia.ru/). Региононь аф зависимай интернет-изданиятнень ёткста ули кода азомс «Городские рейтинги»порталть (http://cityratings.ru/) и «Законовест» интернет-газетать(https://zakonovest.ru)[47].

Лятфтамат

  1. ↑ Валовый региональный продукт на душу населения | Россия. Данные по годам (рус.). statbase.ru. Дата обращения: 27 январьста 2026.
  2. ↑ Валовый региональный продукт на душу населения | Россия. Данные по годам (рус.). statbase.ru. Дата обращения: 27 январьста 2026.
  3. ↑ Валовый региональный продукт на душу населения | Россия. Данные по годам (рус.). statbase.ru. Дата обращения: 27 январьста 2026.
  4. ↑ Валовой региональный продукт на душу населения. mojgorod.ru. Дата обращения: 29 январьста 2026.
  5. ↑ Валовой региональный продукт на душу населения. mojgorod.ru. Дата обращения: 29 январьста 2026.
  6. ↑ 1 2 Оценка численности постоянного населения на 1 января 2021 года и в среднем за 2020 год. Росстат. Дата обращения: 19 мартста 2021.
  7. ↑ Конституция Республики Мордовия, ст. 12.
  8. ↑ 1 2 Ямашкин А. А. Физико-географические условия и ландшафты Мордовии: Учеб. пособие. — Саранск: Изд. Мордов. ун-та, 1998. — ISBN 5-7103-0380-1.
  9. ↑ Всесоюзная перепись населения 1959 года. Численность наличного населения городов и других поселений, районов, районных центров и крупных сельских населенных мест на 15 января 1959 года по республикам, краям и областям РСФСР. «Демоскоп Weekly». (руз.)
  10. ↑ Всесоюзная перепись населения 1970 года. Численность наличного населения городов, поселков городского типа, районов и районных центров СССР по данным переписи на 15 января 1970 года по республикам, краям и областям. «Демоскоп Weekly». (руз.)
  11. ↑ Всесоюзная перепись населения 1979 года. Численность наличного населения РСФСР, автономных республик, автономных областей и округов, краев, областей, районов, городских поселений, сел-райцентров и сельских поселений с населением свыше 5000 человек. «Демоскоп Weekly». (руз.)
  12. ↑ Народное хозяйство СССР за 70 лет: юбилейный статистический ежегодник. Государственный комитет СССР по статистике. Москва. Финансы и статистика. 1987 (руз.)
  13. ↑ Всесоюзная перепись населения 1989 года. Численность населения СССР, РСФСР и ее территориальных единиц по полу. «Демоскоп Weekly». (руз.)
  14. ↑ 1 2 3 4 5 6 7 8 9 10 11 12 13 14 15 16 17 18 Численность постоянного населения на 1 января (человек) 1990-2013 года
  15. ↑ Всероссийская перепись населения 2002 года. Том. 1, таблица 4. Численность населения России, федеральных округов, субъектов Российской Федерации, районов, городских поселений, сельских населённых пунктов - райцентров и сельских населённых пунктов с населением 3 тысячи и более (PDF). 2002. (руз.)
  16. ↑ Численность постоянного населения Российской Федерации по городам, поселкам городского типа и районам на 1 января 2009 года. (руз.)
  17. ↑ Перепись населения 2010. Численность населения России, федеральных округов, субъектов Российской Федерации, городских округов, муниципальных районов, городских и сельских поселений. Федеральная служба государственной статистики.(руз.)
  18. ↑ Оценка численности постоянного населения на 1 января 2011 года с учётом окончательных итогов Всероссийская перепись населения 2010 года
  19. ↑ Численность населения Российской Федерации по муниципальным образованиям. Таблица 35. Оценка численности постоянного населения на 1 января 2012 года. (руз.)
  20. ↑ Численность населения Российской Федерации по муниципальным образованиям на 1 января 2013 года. — М.: Федеральная служба государственной статистики Росстат, 2013. — 528 с. (Табл. 33. Численность населения городских округов, муниципальных районов, городских и сельских поселений, городских населённых пунктов, сельских населённых пунктов). (руз.)
  21. ↑ Таблица 33. Численность населения Российской Федерации по муниципальным образованиям на 1 января 2014 года. «Росстат» (руз.)
  22. ↑ Численность населения Российской Федерации по муниципальным образованиям на 1 января 2015 года. Федеральная служба государственной статистики. (руз.)
  23. ↑ Численность населения Российской Федерации по муниципальным образованиям на 1 января 2016 года. Федеральная служба государственной статистики. (руз.)
  24. ↑ Численность населения Российской Федерации по муниципальным образованиям на 1 января 2017 года. Федеральная служба государственной статистики. (руз.)
  25. ↑ «Численность населения Российской Федерации по муниципальным образованиям на 1 января 2018 года» (руз.)
  26. ↑ Численность населения Российской Федерации по муниципальным образованиям на 1 января 2019 года. Федеральная служба государственной статистики. (руз.)
  27. ↑ Оценка численности постоянного населения на 1 января 2020 года и в среднем за 2019 год. Росстат. Дата обращения: 13 мартста 2020.
  28. ↑ Глава Мордовии Владимир Волков поздравил работников СМИ с Днем российской печати. Официальный сайт органов государственной власти РМ. Дата обращения: 24 сентябрьста 2025. Архивировано из оригинала 18 январьста 2017 года.
  29. ↑ Глава Мордовии поздравил победителей журналистских конкурсов, в числе награжденных – "Вестник Мордовии". Вестник Мордовии. Дата обращения: 29 ноябрьста 2019. Архивировано 19 январьста 2017 года.
  30. ↑ Глава Мордовии Владимир Волков поздравил работников СМИ с Днем российской печати. Дата обращения: 24 сентябрьста 2025. Архивировано из оригинала 18 январьста 2017 года.
  31. ↑ Инновации в Мордовии: в чем секрет успеха региона? Региональные комментарии. Дата обращения: 29 ноябрьста 2019. Архивировано 25 ноябрьста 2019 года.
  32. ↑ Всероссийский конкурс на звание «Самое благоустроенное городское (сельское) поселение России». Дата обращения: 24 сентябрьста 2025. Архивировано из оригинала 2 февральста 2013 года.
  33. ↑ Объявлены победители конкурса «За производство высококачественных кормов и кормовых добавок» - Золотая осень, Золотая осень - Выставка (8 октябрьста 2020). Дата обращения: 24 сентябрьста 2025.
  34. ↑ Всё о Мордовии: Энциклопедический справочник / сост. Н. С. Крутов, Е. М. Голубчик, С. С. Маркова. — Саранск: Мордов. кн. изд-во, 2005. — 840 с. — ISBN 5-7595-1662-0.
  35. ↑ {{cite web|author=|datepublished=|url=https://erzia-museum.ru/%7Ctitle= Степан Эрьзя|lang=ru|publisher= Мордовский Республиканской музей изобразительных искусств им.С.Д.Эрьзи|accessdate=2025-09=-24}
  36. ↑ Государственный театр кукол Республики Мордовия (рус.). Культурный портал Республики Мордовия. Дата обращения: 25 сентябрьста 2025.
  37. ↑ МГУ им.Н.П.Огарёва (рус.). МГУ им.Н.П.Огарёва. Дата обращения: 25 сентябрьста 2025.
  38. ↑ МГПУ им.М.Е.Евсевьева (рус.). Министерство Просвещения Российской Федерации. Дата обращения: 25 сентябрьста 2025.
  39. ↑ C 1 сентября во многих школах страны добавится ещё один обязательный предмет — основы православия. Newsru, 30 августа 2006.
  40. ↑ Сайт Саранской епархии Мордовской митрополии РПЦ: Монастыри. Дата обращения: 24 сентябрьста 2025. Архивировано из оригинала 4 апрельста 2013 года.
  41. ↑ Из истории мордовского спорта. Дата обращения: 24 сентябрьста 2025. Архивировано 15 октябрьста 2012 года.
  42. ↑ В преддверии Международного форума «Россия — спортивная держава» Мордовия стала одним из самых спортивных регионов страны. Дата обращения: 24 сентябрьста 2025. Архивировано из оригинала 14 декабрьста 2013 года.
  43. ↑ Известный российский тренер по фигурному катанию Людмила Калинина теперь работает в Мордовии. Дата обращения: 24 сентябрьста 2025. Архивировано из оригинала 10 сентябрьста 2012 года.
  44. ↑ Мордовии на Олимпиаде принесли российской сборной пять медалей(недоступная ссылка — история).
  45. ↑ Министерство печати и информации Республики Мордовия. mprm.e-mordovia.ru. Дата обращения: 24 сентябрьста 2025. Архивировано 15 мартста 2016 года.
  46. ↑ ОГАРЕВ TV. tv.mrsu.ru. Дата обращения: 24 сентябрьста 2025. Архивировано 14 апрельста 2016 года.
  47. ↑ Законовест – Интернет-газета (рус.). zakonovest.ru. Дата обращения: 24 сентябрьста 2025. Архивировано 29 октябрьста 2018 года.

Ссылкатне

Сявф"https://mdf.ruwiki.ru/w/index.php?title=Мордовия&oldid=418066"-ста