Мокшэрзянь ярхцамбялень пидемась-панемась
Мокшэрзянь ярхцамбялень пидемась-панемась руз. (Мордовская кухня) — мокшетнень и эрзятнень пидемань-панемань койсна.
Ярхцамбяльхне
Мокшетнень и эрзятнень ярхцамбяльсна пицевсь сянь эзда, мезе шаченды-касонды модать лангса. Кшись фалу лувондовсь васенце ярхцамбялькс, сон путневсь сембода вяри. Илатнень пингста ульсть кшинь озондомат, кши мархта якасть рьвянянь ладяма, кшить вельхксса воражендакшнесть, сотцезь сай пингть. Пицесть шапафтома мархта кшит. Сяда кунардонь пинкнень кшить панцезь пянакудса капстань лопа лангса. Пицесть шонгара япт суроста, цецявицяста, снавста канцёр вай мархта. Сембода содаф и шнаф ярхцамбяльсна мокшетнень и эрзятнень — тя пачатне. Пачат пицесть розень, тозеронь почфста, ямкс почфста, снавонь почфста. Мокшень(ru) пачатне пицевсть эчкста. Пачада ярхцасть лофца или вай мархта. Штоба пачатне(ru) улельхть сяда ляпонят, шапаксти кайсесть крахмал или тапаф пидеф модамарь. Кельгозь мокшэрзятне пярякань пицемаснон. Потмозост марсесть ям, модамарь, капста, шурьхкат, пурьхкат, панкт, имошт. Пицесть пярякат сиволь мархтонга, но сяда шуроста. Ульсть пярякат кал мархта. Пинемста, снавста, розьста пицесть ксяль. Пинемонь ксяльть ёткс кайсесть сал. Снавонь ксяльть ваияфнезь канцёр вайса. Мзярда кармасть путнема модамарьхть, кармасть пицема крахмалонь ксяль лофцса и ведьса.
Тялонди косьфнесть панкт лямонди, салыяфнесть капстат, лопафнесть марьхт. Салыяфнесть тувонь куя и коптиндакшнесть тувонь сиволь. Сивольда ярхцесть лямса пидефста. Кизонда валондсть кваз. Иласта тиендсть сиволь мархта цёмарат. Лама ярхцамбяльда мошэрзятне тиендсть лофцста. Лофцста пицесть мичке, пихнесть вай. Сяда сидеста тиендсть шапама лофца. Мзярда сон тустолготкшнесь лямбе вастса, лихнезь бохаряму(ru). Шапама лофцта ярхцасть кши мархта, модамарь, ям, пача мархта. XIX-це сяда кизонь 2-це пяльксстонза мокшэрзятненди пачкодсь модамарьсь.
Пингонь ётазь кармасть пицема-панема и аноклакшнема и эрь кодама салатт [1].
Симомбяльхне
Симомбяльхне — кваз, шапама лофца, пихтем лофца, келувонь ведь. Сембода кунардонь симомбялькс лувондови пуресь. Сон ирефти. Сембе озкснень, оцю илатнень ётафтомста ульсь пуре. Пуресь тиендевсь медьста, комляста и шужста. Симат кеченя и марясак, кода верце ушеды сангат якама. Пяк лама пуреда симондемс аф эряви. Стакалгодыхть кяттне, пилькне, кода синць мордватне пеетькшнихть, иредихть пилетневок. Пуреть мархта вихцок аф эряви симондемс мезевок лия комляв(ru) симомбяль. Пуреда симомда меле сай удомаце. Ветешка-котошка част удат афи марясак кода. А тяфтак пуресь аф пяк кяжи, 16 - 18 градуст эсонза Мордовская кухня (1977). Кунардонь симомбялькс мокшэрзятненди ульсь позась. Поза аноклакшнесть оцю иланди, озксонди. Васень пингть сонь пицезь розень почфста, а меле ламбама якстеряпсста.
Озксонь ярхцамбяльхне
Тяфтама ярхцамбяльхть пицесть-панцесть паксянь оцю тефнень аделамда меле, свадьбанди, кстинганди, поминканди. Суронь ямсь ульсь фкя тяфтама ярхцамбялькс. Озондомста ярхцсесть, тяфта лемневи, бабань ямда. Кстинганди пицесть лофцонь суронь ям. Суронь ямсь, кода и алхне, ульсть бславама шачфтомань-раштамань тевти. Илати эрь сайсь, ярхцамок ямда, азонкшнесь пара валхт тядяти-аляти, арьсесь одс шачити эрямс сняра киза, мзяра ямкскада цюгуння ямса. Свадьбанди пицесть оцю пяряка — лукш. Шапаксть ичендозь розь или тозер почфста, потмозонза путнесть эрь кодама ярхцамбяль 7—12 слойса.
Рьвяяйть радня ломаненза пицесть свадьбань оцю пярякат. Тяфтамда эрявсь пидемс вейхксошка. Эрь пярякать сонцень лемоцоль, эрсь вожавафоль башка арьсеманди, башка тевонди. Сембода оцюволь лувкшсь, лувонь кшись. Тя пярякать макссезь стирть алянцты. Омбоце вастсоль сувама пярякась. Сон аноклакшневсь стирть мельге сайхненди, алашаса ардыхненди. Рьвянянкса сайхне макссезь тя пярякать стирть кудс сувамста. Ава лофцсь макссевсь стирть тядянцты. Тя пярякась, кле, тейть казне стирень касфтоманкса. Тя пярякать макссезе рьвяяйть тядяц / Мордвась (мокшет, эрзят) очеркт мокшэрзянь народть историянц, этнографиянц и культуранц колга
Кши мархта якасть и стирень ладяма. Сваттне сявондсть мархтост шумбра кши и путнезь сонь шра лангс, мзярда ушеткшнезь ладямать од стирть кудса[1].
Лятфтамат
- ↑ Мокшин Н. Ф. Мордва // Народы России. Энциклопедия.— М., 1994.— С. 236
Литературась
- Никул Эркай. Шумбра,танцти народнай ярхцамбяльхне и симомбяльхне // Мордовскяй кухнясь. / Сост. А. В. Зотова. - Саранск, 1977. С. 10]
- Мордовская кухня // Мордовия : Энциклопедия : в 2 т. / гл. ред. А. И. Сухарев. — Саранск : Институт гуманитарных наук при Правительстве Республики Мордовия, 2004. — Т. 2 (М—Я). — 704 с.
- Мордовская кухня // Культура питания. Энциклопедический справочник / Под ред. И. А. Чаховского. — 3-е издание. — Мн.: «Белорусская энциклопедия имени Петруся Бровки», 1993. — С. 186. — 540 с. — ISBN 5-85700-122-6.