Мокшэрзянь национальнай драматическяй театрась

Мокшэрзянь национальнай драматическяй театрась
Тетарать од кудоц
Ладяф	1989 кизось
Здание театра
Ащи	Россия  Саранск
Ащема вастоц	ул. Советская, д. 27
54°10′50″ с. ш. 45°11′29″ в. д.
Руководство
Директор	Дорогайкина Светлана Ивановна
Сайт	Официальнай сайтсь
Мокшэрзянь национальнай драматическяй театрась

Мокшэрзянь государственнай национальнай драмань театрась – тя Мордовия Республикаса профессиональнай театра, конань оцю путфксоц мокшэрзянь национальнай искусствати. Театрать козя репертуароц, эзонза сувайхть эрь кодама жанрань 40 лама спектакля. Ётксост – мокшень, эрзянь, рузонь и омба масторонь драматуркнень пьесаснон коряс путф эрь кодама кизоса ваныхненди классика, а стане жа темань и жанрань коряс отт, тячиень вешематнень коряс няфтемат. Аноклавихть рузонь кяльса и национальнай кяльса рузкс синхроннай ётафтома мархта . Мокшэрзянь национальнай драматическяй театрась Мордовия Республикаса ащи этническяй искусствати вятикс. Театрать репертуарса эсь лацонь эрь кодама жанрань 45 спектакля аф аньцек мокшэрзянь драматургиять, но и рузонь, омба масторонь. Тя спектаклятне ладяфт эрь кодама эряфонь кизоса ломаненди, кода эряфкшу, станя и ёмалтненди.

Эряма пингсь

Театрать ушетксонь киц

Мокшэрзянь национальнай драмань театрать эрямань киц моли 25-це августстонь 1932 кизоста сявомок, мзярда Мордовиянь облисполкомонь Президиумсь кемокстазе Мокшэрзянь национальнай театрать панжеманц колга Постановлениять. Од театрати лездыкс арась Моску ошень Государственнай академическяй Малай театрась. 1935 кизоня нолдафоль васенце спектаклясь – тя ульсь А. Островскяень «Гроза» пьесанц коряс Малай театрань налхкить А. Костровонь эрзянь кяльса путфксоц. Васень пингть театрась путнезень мокшень и эрзянь кяльса ётафтф рузонь и советскяй сёрмадыхнень: А. Островский «Бедность не порок», Л. Толстой «Власть тьмы», А. Корнейчук «Платон Кречет». Валом-валом театрась пуроптсь перьфканза Мордовиянь и лия региононь мокшень и эрзянь асу ломатть. Пингонь ётазь ламотне эздост кассть оцю артистокс: К. Тягушев, Н. Костюшев, С. Колганов, Н. Агевнина, И. Аржадеев, Н. Сурайкин, А. Демидова, А. Шаргаева и лиятне.

Драматургиянь жанрати кундайхть мокшэрзянь содавикс сёрмадыхне: П. Кириллов, Ф. Чесноков, К. Петрова, М. Безбородов, М. Бебан и лиятне. 1939 кизоня васенцеда путфоль минцень сёрмадыеньконь пьесац – П. Кирилловонь «Литова» драмац. 1940 путфоль В. Коломасовонь «Прокопыч» комедияц. Тяфта жа ваныхненди пяк тусь мялезост П. Кирилловонь «Учительница» пьесанц коряс спектаклясь.

Мокшэрзянь сёрмадыхнень пьесаснон коряс сембе путфксне саласть мяль, ульсть афкуксонь сатфксокс республикать культурнай эряфсонза. Родной валть вийса полафтомс ломанть ваймонц. Мзярда тя валсь кайги театрань сцена лангста – сонь виец нинге сяда оцю. Ваныхне ашезь кяшенде кепотьф мяльснон, сёрматкшнесть ванфть коряс шнама валхт. Пяк учсть спектаклятнень эса Мордовиянь аймакса. Синь пингстост, мярьгат, ёфси юмсесть залть и сценать ёткса перяфксне, ваныхне сембе седиса пичедсть геройхнень инкса, ёрасть лездомс теест мезьса маштсть. Тя пингть театрась касфтсь аф аньцек пяк вии артистт, но и драматуркт.

Великай Отечественнай войнать пингста

1941 кизоня П. Кириллов сёрмадозе фашизмать каршес моли «Кафта братт» пьесанц, конань путозь сцена лангс. Кодак ушедсь Великай Отечественнай войнась, мокшэрзянь спектаклятне ушедсть нолявома коль сяда шуроста. Актёрхнень эзда ламотне тушендсть фронту. Театрань васенце тевкс арась Якстерь Армияти лездомась, мастороньконь идиензон инголе мялень кеподи путфксонь анокламась. Тя тевть эса лятфтамат актёрхнень В. Зоринонь, С. Колгановонь, П. Асташкинонь.

Мельцек-мельцек моли ся кизоста путф спектаклятнень оцюсна пялькссна ульсть рузонь кяльса. Б. Басаргин и В. Пешонова «Очерки истории мордовского советского театра» марстонь книгасост сёрмадыхть: национальнай кяльса пьесат лисендсть шуроста, синь налхкоманкса ашесть сатне мокшень и эрзянь актёрхт. Шарьхкотьфоль: тянь мархта эрявсь мезевок тиемс. МАССР-нь Правительствать мярьгоманц коряс 1943 кизоня Саратовань консерваториять видеса панчфоль Мокшэрзянь оперань студия, кизода меле – Анатолий Васильнвич. Луначарскяень лемса Москунь государственнай театрань институтса – драмань студия. (Тя сембось тифоль войнань пяк стака кизотнень пингста!)

Театрав сашендсть покодема сят, кит шумордакшнезь Москунь и Ленинградонь театрань институттнень. Аньцек мокшень и эрзянь авторхнень сёрматфсна путневсть рузонь кяльса. Содавиксокс ся пингть арасть Пётр Кирилловонь, Кузьма Абрамовонь, Григорий Меркушкинонь пьесасна.

Войнада мелень эряфоц

1989 кизоня, мзярда Моску ошста Щепкинскяй училищать шумордамдонза меле Мордовияв састь мокшень и эрзянь артисттне, театрась, мярьгат, шачсь одукс. И стака пингть лангс апак ватт, ушедсь покодема сембе вийса. 90-це кизотнень пингста сире койхне ушедсть срадома-каладома, а оттне, мзярс нинге лац-ряц аф содафне, латцевома. Театрась ётафтфоль ташта кудс, максфоль 35 васта мархта пялес подвальнай зал. Мезьге лангс апак ватт, актёрхне марнек ваймоснон путнезь марстонь тевти. Театрать сонцень режиссёроц ашель, тернесть лия аймакста. Путневсть лама од спектакляда, виде, аф сембе ульсть виихть, аньцек синьге эрявсть асушинь, маштомашинь касфтоманкса. Одукс мрдасть сцена лангс минцень национальнай сёрмадыеньке.

Лац васьфтьфольхть К. Абрамовонь «Эрьванть эсензэ ормазо» («Эрьть сонцень урмац»), К. Петровань «Ташто койсэ» («Сире койса»), Г. Меркушкинонь «Сенем валда», «Поэтть тяштец», «Генерал Пуркаев», А. Пудинонь «Шава кудса ломатть», «Виртян и Валда», «Уроз ваймонди уженя», В. Мишанинань «Кда орта лангса суви пине», «Тят шава, тят сала», А. Терёшкинонь «Нильгемонь шинь лятфнема», финнонь драматургть И. Кильпиненонь «Столь лангсо ашо розат» («Шра лангса акша розат») и ламотне лиятне.

Виде, театрати аш кода эрямс рузонь и лия масторонь классикафтома. Репертуаронцты сувасть А. Островскяень «Доходное место» пьесац, Л. Андреевонь «Василий Фивейский» (пьесась А. Пудинонь), В. Распутинонь «Эряк ды иля стувтне» («Эряк и тяк юксне») (инсценировкась В. Долговонь) повестьсна, В. Шукшинонь «Латось сыргась» («Латось срхкась») азксоц (инсценировкась И. Кузьминонь), О Нилонь «Любовь под вязами», Ж-Б. Мольеронь «Шумбрат, Сганарель» («Лекарь поневоле») пьесатнень коряс .

Тячиень эряфоц и казненза

Мекольце кизотнень театрась улендсь регионъётконь и народъётконь лама фестивальса, аф весть арсесь сяськикс. 1991 кизоста сявомок (эста Удмуртия Республикань Ижевск ошса, сяда меле ушедсь ётафневома Марий Элонь Йошкар-Ола-са) Мокшэрзянь национальнай драмань театрась фалу примай участия «Майатул» Финно-угрань народонь театрань международнай фестивальса, коста мртци питни казне мархта. «Федерация-92» фестивальть эса (Моску ошсь) Л. Андреевонь повестенц коряс «Василий Фивейский» спектаклясь тяшкстаф омбоце степенень дипломса. 2007 кизонь 21 июльста Мокшэрзянь государственнай национальнай драмань театрань од кудсь панжезень кенкшензон Финно-угрань народонь международнай I-це фестивальти. Инжихнень ёткса ульсть колма масторонь Оцюнятне: Россиянь – Владимир Путин, Финляндиянь – Т. Халонен, Венгриянь – Ф. Дюрчань.

2009 кизоня Е.А. Евстигнеевонь лемса Идень и од ломанень театральнай искусствань фестивальть эса Э. Портеронь «Уроки радости» романонц коряс спектаклясь (инсценировкась А. Блиновонь) кочкаф фестивалень сембода валда и цебярьс верондафты спектаклякс. Екатерина Исайчева налхкись арась лауреатокс «Авань сембода цебярь рольсь» номинацияса. 2011 кизоня Мокшэрзянь государственнай национальнай драмань театрась ётафтозе «Штатол» национальнай театрань сембе Россиянь фестивальть. Сон ульсь Мордовияса васенцеда. Фестивальсь ётафтовсь Мокшэрзянь народть Россиянь лия нароттнень мархта марстомомань 1000 кизонь топодемань оцю илать видеса и пуроптозень лама регионцта саф театратнень.

2019 кизоня оцю сатфксокс театрати арасть В. Мишанинать «Куйгорож» пьесанц коряс спектаклять путомац и «Штатол. Родовая свеча» Национальнай театрань сембе Россиянь II-це фествиальть ётафтоманкса Российскяй Федерациянь Культурань министертсвань грантонь сяськомась. Фестивальть пингста ваныхненди вете шиста няфтевсть Марий Элонь, Чувашиянь, Татарстанонь, Дагестанонь и Мордовиянь театратнень спектаклясна. Фестивальсь пуроптозень театрань тевонь ламонц содайхнень, блогерхнень, журналисттнень. Тя лездсь келептемс фестивальть колга содайхнень лувксснон. Васендакиге, тяфтама фестивальхне лездыхть театратненди эстейстка панжемс искусствать од ширензон, козякофтомс содамошиснон и ладямс инголи моли кит.

Сембе 2019 кизоть театрась улендсь народъётконь и сембе Россиянь лама фестивальса. Москуса «Русский остров» фольклоронь театрань народъётконь IV фестивальть эса «Ташто койсэ» спектаклясь тяшкстафоль «Драмать и музыкать ёткса сембода цебярь соткс» и «Сценическяй сембода цебярь щам» номинациянь диплопнень эса; Ялтаса «Крымская театральная осень» Национальнай театрань фестивальса «Вешние воды» спектаклясь сявсь фестивалень участниконь диплом; Чебосары ошса «Волжская сказка» национальнай театрань фестивальса (мольсь Чебоксаронь театрань 2019 кизонь форумть видеса) «Курмай» спектаклясь сявсь диплом «Национальнай койхнень ванфтомаснон инкса» номинацияса. Тяка кизоть театрась васенцеда ульсь «Весёлая коза. Перезагрузка» театрань «капустниконь» XVII фестивальса (Нижняй Новгород) и «Российский театр – XXI век. Новый взгляд» Приволжьянь театрань форумса.

Театрати лемтьф кизоть театрась тяштькстазе 85 кизонц. Тя ульсь оцю аськолксокс тейнек и марнек республикати. Эрявиксшить коряс аф сяда ёмлакс лувома «Радуга сказок» иттненди театрань искусствань фестивальтьке, конань пингста национальнай театрань артисттнень лезксснон вельде эсь спектакляснон няфтезь Краснослободскяень лама профилень лицеень и Саранскяйнь 24№ школань тонафнихне. Тяда башка, театраса ётафтовсь «Театральное Приволжье» студентонь и школань театрань коллективонь фестивальсь, конань ванома сашендсть 1000 лама ломаньда.

Кизоньберьф цебярьста покодемать инкса театрась сувафтфоль культурань государственнай 5 учреждениятнень ёткс, конатнень сембода оцю путфкссна республикасонк культурать и искусствать кеподеманцты. Театрась казьф МР-нь Культурань, национальнай политикань и архивнай тевонь министерствань Дипломса.

2020 кизостовок театрась поладозе фестивальга арнеманц: Иттненди «Арлекин» национальнай искусствань сембе Россиянь XVII фестивальсь (Санкт-Петербург); «Майатул» народъётконь фестивальса (Марий Эл) и «Волжская сказка» регионъётконь фестивальса (Чувашия) «Куйгорож» спектаклясь сявсь Гран-при; Национальнай театрань народъётконь II фестивальса (Дагестан) «Куйгорожсь» сявсь диплопт колма номинацияса. 2021 кизонь сёксенда «Волжская сказка» фестивальса (Чебоксары) «Эрьзя. Валдос Ливтиця» спектаклясь сяськсь колма номинацияса, 2022 кизоня «Майатул» Финно-угрань народонь театрань международнай XVI фестивальса театрась тя спектаклять мархта сявсь диплопт «Алянь сембода цебярь рольсь», «Алянь омбоце планонь сембода цебярь рольсь», «Авань омбоце планонь сембода цебярь рольсь» номинациятнень эса.

Мокшэрзянь театрась республикасонк национальнай койхнень ванфтоманкса и козякафтоманкса вяти оцю тев. Мордовияса тя фкя тяфтама театра, коса спектаклятне молихть колма кяльса: мокшень, эрзянь и рузонь. Национальнай театрась сувафтф «Зов Торамы» Мордовия Республикань брендовай маршрутти, кона лемдеви туристонь национальнай маршрутокс. Театраса покоди 30 лама артист. Ламотне эздост – Мордовия Республикань заслуженнай и народнай артистт, мезсь корхтай синь асушиснон и ваныхнень седис кинь мумаснон колга. Од кизонь карща мекольдень пингть театрась ащи Якшаматяти резеденциякс. Мокшэрзянь национальнай драматическяй Тячи театрать репертуарса эсь лацонь эрь кодама жанрань 45 спектакля аф аньцек мокшэрзянь драматургиять, но и рузонь, омба масторонь. Синь няфневихть рузонь кяльс синхроннай ётафтомать коряс, а кой-конат аньцек рузонь кяльса. Тя спектаклятне ладяфт эрь кодама эряфонь кизоса ломаненди, кода эряфкшу, станя и ёмалтненди.

Фотогалереясь

• Постановка (эрз. «Апак лемде эрзянть тейтерь») по пьесе «Дочь некрещеного мордвина»
• 
• 
• 

Лятфтамат

Литературась

Бассаргин Б. А. Очерки истории Мордовского советского театра, 1930-1960. — Мордовское книжное изд-во, 1966. — 246 с.

Ссылкатне

• М. Девятаевонь колга спектаклясь