Сайгин, Михаил Лукьянович
| Михаил | |
|---|---|
 | |
| Шачема лемоц | Михаил |
| Шачема вастоц | Ковылкинскяй районць Ёжка велесь |
| Тевонь тиемац | писатель |
| Аляц | Лука Иванович |
| Тядяц | Анна Демидовна |
| Казненза и премиянза |
Орден Отечественной войны I степени; Орден Отечественной войны II степени;Орден "За прорыв в столицу Германии Берлин";; Медаль "За взятие Берлина"; Медаль "За победу над Германией В Великой Отечественной войне (1941-1945)". Мордовия Республикань Народнай писатель (2003) Мордовскяй АССР Государственнай премиянь Лауреат (1993) Мордовскяй АССР Заслуженнай писатель (1983) |
Сайгин, Михаил Лукьянович — содаф мокшень сёрмадысь, прозаиксь, СССР-нь Писателень Союзонь членць (1962), Мордовскяй АССР-нь заслуженнай писательсь (1983), Мордовскяй АССР-нь Государственнай премиянь Лауреатсь (1993), Мордовия Республикань Народный писательсь (2003), Великай Отечественнай войнань II-це группань инвалидсь, ветеранць.
Эрямокиц
Шачсь 21-це ноябрьста 1913-це кзоня Мордовия Республикань Ковылкинскяй райононь Ёжка велеса ашу семьяса. Аляц — Лука Иванович 1914 –це кизоня ульсь мобилизованнай Васенце Мировой войнаса, тоса сон и кулось. Шабатнень касфтозень тядяц — Анна Демидовна. Ёжка велеса, коза сувсесть нинге колма веленят, ульсь аньцек фкя аф оцю школа, коса эрь кизоня тонафнесь 10-15 шаба. Михаил тонафнесь аньцек 5-це классти молемс. 1927-це кизоня кальдяв урмать эзда кулость сонь тядяц и Анна сазороц. Илядомок сиротакс сазоронц мархта, тейнза савсь кадомс тонафнемац и ушедомс работама.
1929-це кизоня, мзярда М. Сайгин ульсь велень комсомолонь и од ломанень активть организаторкс, Ёжка велеса ётафнесь коллективизация. 1930-це кизоня сон кучфоль тонафнема мокшэрзянь краевой Совпартшколав. Школать аделамдонза меле (1933-це кизоня) сонь кучсезь практикас Ковылкинскяй райононь Шонгарня руз. Шенгарино вели, коса ся пингть ётафневсть Советскяй властень пингонь сембе мероприятне.
Лама тевда тиемда меле, Михаил Сайгинонди савсь велеса панжемс колхоз. Тянкса сонь и сонь маластонь ломанензон аф весть гразьсезь: васенцеда синь пяк пикссезь, омбоцеда, мзярда синь ётафнесть ашу ломатненди пуромкс, бандиттне пякстазь ушень ширде кенкшть и крьвястезь изба-читальняснон. Аньцек «кеньжешканяда» синь илядсть живста.
Тевтиемац
Михаил Сайгинонь сембе покодемань теввятемац ульсь сотф партийнай работать, журналистикань и литературнай тефнень мархта.
1930-це кизотнень пингста — «Знамя Ленина» Ковылкинскяй районнай газетать редакторонц полафтыец, сяда меле «Комсомолонь вайгяль» руз. («Голос комсомола») 1937—1941, «Мокшень правда» (1949—1950), «Труд» (1950) газетатнень отделонь вятикс.
1949-це кизоня аделазе Горьковскяй межобластной партийнай школать, а 1954-це - ЦК КПСС – ть видеса Высшай партийнай школать. 1950-це кизоста сявомок 1956-це кизоти молемс — Мордовскяй обкомонь ВКП(б)-ть пропагандань и агитациянь отделть видеса инструктор. 1956-це кизоста сявомок 1958-це кизоти молемс — Мордовскяй АССР-нь Министрань Советть видеса радиовещаниянь и телевидениянь политвещаниянь Комитетть редактороц. 1957-це кизоя ноябрь ковста, примаф СССР-нь журналистонь Союзу. 1958 - 1970 кизотнень — «Мокша» журналса ответственнай редактор.
Великай Отечественнай войнась
1941–це кизоть ушетксста Михаил Сайгин ульсь сявф армияв, коса сонь кенярезе Великай Отечественнай войнась. 1942-це кизоня сон арась Советскяй Союзонь Коммунистическяй партиянь членкс.
1943-це кизоня аделазе Пушкинскяй танковай училищать. Примась участия васенце Украинскяй и васенце Белорусскяй фронттнень эса танковай взводонь и ротань командиркс. Васенце Гвардейскяй Краснознамённай танковай армиять мархта ётазень бойхнень Курскяй сражениятнень эзда сявомок Берлинскяйхненди молемс.
Главнай задачакс танковай ротаса, коса служась Сайгин, ульсь сувамс врагть тылозонза и сембе стакать сявомс эсь лангозонза. «Земной ад» лем ала лятфнеманзон эса Михаил Сайгин сёрмады:
«1943-це кизоня минь армиясонк ульсь тиф батальон особого назначения, конань задачац ульсь – сувамс вракть тылозонза и срафтомс ингольце моли эшелонттнень. Батальонць ащесь авиациянь и морской флотта башка, сембе родонь войскань часттьнень эзда. Тя батальонца танкисттнень няфтезень минь ротаньке. Васенце рейдсь, коса тейне савсь участвовондамс, ульсь Казатин узловой станциянь районць. Казатинти пачкодеме шобдава пяли, сахарнай заводть видеса минь озаме кяшема вастс. Мзярда совсем валдашкодсь, заводонь стенатнень ваксста минь няеме оцю штабелькс мараф шавф ломанень ронкт.
Лама ульсь содаф фашисттнень кяжи шиснон колга, но тяфтама картина монь няень васенцеда. Виденцян, тяфтама страшнай картинась сядонга пяк эвфтемазь и нинге сядонга пяк фашисттне арасть тейнек аерксокс. А эста корхнекшнесть: «Аф эряви врагть сяськомс снярс, мзярс сон аф аерттанза“. Тяни ламонцне тя теориять аф лувсазь виде шикс, лувсазь сонь кода аф ломанень инстинктокс, но эста тейнек сон лездсь. Целай неделя минь ётафтоме вракть тылсонза: тапасть воинскяй эшелоттне, конат мольсть фронту, вракть тепловой базанза, но и миньге цебярь ашеме няй…»
.
Михаил Сайгин ульсь кафсть контуженай, Великай Отечественнай войнаста мрдась II–це группань инвалидокс.
Казненза Ведикай Отечественнай войнаса улеманкса
Отечественнай войнань 1-це степенень орденца руз. Орден Отчественной войны 1-й степени; Отечественнай войнань 2-це степенень орденца руз. Орден Отчественной войны 2-й степени (09.06.1945); «За прорыв в столицу Германии Берлин» Орденоц (23.04.1945) Медаль Берлинть сявоманкса руз. «За взятие Берлина» (02. 05.1945) ; Медаль Германиять лангса сяськоманкса руз. «За победу над Германией в Великой Отечественной войне 1941—1945 гг.»
Литературнай и журналистикань тев вятемац
Михаил Сайгинонь литературнай деятельностец ушедсь 1930-це кизотнень пингста. 1937 – це кизоста сявомок сонь стихотворениянза лисендсть «Комсомолонь вайгяль» руз. («Голос комсомола») газетаса. Эсь афкуксонь писателькс араманц Михаил Сайгин музе художественнай прозаса. Великай Отечественнай войнаста мрдамда меле сон эсь азксонзон и повестензон эса шарфнесь мяль социально-бытовой проблематнень и войнада мельдень строительствань кизефкснень лангс.
«Мундштук» (1959), «Пси седи» руз. («Огненное сердце») (1961), «Алянь цёра» руз. («Папин сын»), (1962), «Тядянь седи» {{lang-ru|}(«Материнское сердце»)} (1980), и лиятне).
Сайгинонь лемонц мархта сотф мокшэрзянь романть-трилогиять вииямац. Васенце трилогияти сувасть романтте «Давол» руз. («Ураган») (1974), «Крхка ункст» руз. («Глубокие корни») (1976), «Ляпе кожф» руз. («Теплый ветер») (1980), конатнень эса авторсь пяк крхкаста няфтезень войнада меле мокшень велеса эсь героензон судьбаснон.
Омбоце трилогиясонза — «Стака паваз» руз. («Трудное счастье») (1988—1993) Михаил Сайгин художественнайста няфнесы мокшень велеть эряфонц революцияда ингольдень кизотнень.
Сайгинонь трилогиянза арасть пяк содавиксокс, а «Трудное счастье» трилогияц инкса тейнза максфоль Мордовия Республикань Государственнай премия (1993). 1997-це кизоня лиссь рузонь кяльса «Разломы» романоц. Мокшэрзянь литератураса Михаил Сайгин васенцеда няфтезе Великай Отечественнай войнань фронть эса танкисттнень тюремаснон.
1962-це кизоста сявомок Михаил Сайгин лувондови СССР-нь писателень Союзонь членкс. 1983-це кизоня Михаил Сайгинонди максфоль МАССР-нь Заслуженнай писателень лем, 1993-це кизоня — МАССР-нь Государственнай премиянь Лауреатонь лем, 2003-це кизоня — Мордовия Республикань Народнай писателень лем.
Михаил Сайгинонь произведениянза ётафтфт рузонь, чувашень, карелонь, удмуртонь, марийскяй и лия народонь кяльс.
1977-це кизоня 27-це сентябрьста США-нь Колумбийскяй университеста Салтыков-Щедринонь лемса библиотекав (Санкт-Петербург ошсь) сась Михаил Сайгинонь «Глубокие корни» книганц коряс вешфкс.
Кулось Михаил Лукьянович Сайгин 2007-це кизоня 27-це апрельста эсь квартирасонза, Саранск ошса 93 кизоса.
Михаил Сайгинонь сёрматфонза
Трилогиянза
Васенце трилогияц:
- 1974 кизось — «Давол» («Ураган»)
- 1976 кизось — «Крхка ункст» («Глубокие корни»)
- 1980 кизось — «Ляпе кожф» («Теплый ветер»)
Нолдаф мокшэрзянь - мокша и рузонь кяльса.
Омбоце трилогияц: «Стака паваз» («Трудное счастье»)
- 1988 кизось — Васенце книгась: Мокшэрзянь велеть эряфоц Великай Октябрьскяй социалистическяй революцияда ингольде, советскяй властть тиевомац.
- 1990 кизось — Омбоце нигась: главнай геройхне арасть народнай властть аралама, тюрьсть гражданскяй войнаса.
- 1993 кизось — Колмоце книгась: Васенце кафта книгатнень главнай геройхнень шабасна тиихть од эряф велвеса 20-30-це кизотнень пингста.
Мокшэрзянь - мокша кяльса. «Стака паваз» книгати максф Мордовия Республикань Государственнай премия (1993).
Иттненди азксонза
Азкст мокшень и рузонь кяльса
- 1955 кизось - Азкст (руз. (Расказы), мокшень кяльса
- 1959 кизось — Яблоня мокшекс (Марлюня), рузонь кяльса
- 1962 кизось — Лихтибря руз. (Родник), мокшень кяльса
- 1966 кизось — Ёжу калня руз. (Хитрая рыбка), мокшень кяльса
- 1968 кизось — Храбрый ёрш, рузонь кяльса
Романонза и повестенза
- 1997 кизось — «Разломы»
- 2013 кизось — «Сказ о пережитом»
Нолдафт рузонь кяльса.
Казненза и премиянза
- Мордовия Республикань Народнай писатель (2003)
- Мордовскяй АССР Государственнай премиянь Лауреат (1993)
- Мордовскяй АССР Заслуженнай писатель (1983)
Лятфтамат
https://www.podvignaroda.ru/?#id=26725172&tab=navDetailManAward
Литературась
Поделиться Писатели Советской Мордовии: Библиографический справочник. — Саранск: Мордовское книжное издательство, 1970. — 207 с.