Мокшень и эрзянь ломанень лепне

Мокшень и эрзянь ломанень лепне — христианствада ингольдень мокшень и эрзянь лемда лувондови тёжянда лама. Ламоцне эздост минценнет, но стане жа улихть стаптка, конат сявфт лия кяльста: славянскяй, арабскяй, тюркскяй и лия кяльхнень эзда. Кой-кона сире лепне арасть валюркс тяниень пингонь фамилиятненди, кепотьксонди: Шиндин (Шиндяй/ Чиньдяй), Вирясов (Виряс), Рузавин (Рузава), Маскаев (Москай), Пинясов (Пиняс) и стак тов.

Этимологиясь

Сидеста мокшень и эрзянь лепне няфтьсазь ломанень промозть — Кежай, Кежут, Кежапа, Кежеват, Кежедей (кяжи валста), Паруш (пара валста). Улихть лепт, конат няфтьсазь тядятнень-алятнень ёжомарямаснон идьснонды — Вечкас, Вечкуш, Вечкан, Вечковат, Вечкенза (вечкемс валста), Учай, Учват, Учесь, Учан (учемс валста). Улихть лепт, конат няфтихть васта, коса шачсь шабась — Паксяй, Паксют, Пакстян (пакся валста), Виряй, Виряс, Вирдян (вирь валста), или няфтихть пинге, мзярда шачсь шабась — Нуят, Нуянза, Нуякша (нумс валста). Кирдяй лемсь тиевсь кирдемс глаголста — тяфтама лем макссевсь шабати, кона стакаста шачсь или ульсь ламос учф васенце идькс семьяса и стак тов.

Мокшэрзятнень стане жа ульсть лемсна, конат тиевсть ракшань, нармонень, унжань, шуфтонь лемста. Кепотьксонди: Овтай – офта валста; Пиняй, Пиняс – пине валста; Каргай, Каргаш – карга валста, Пичай – пиче валста, Тумай – тума валста.

Христианствада ингольдень модельсь

Мокшэрзянь антропонимическяй модельсь ащи кафта пяльксста. Тоза сувси алянь лемсь (отчествась), кона путф васенце вастти родительнай падежса, и собственнай лемсь, кепотьксонди: Пивцаень Нуянза, Учватонь Паксют, Тумаень Виряс, Кежеватонь Сюмерьге, Ведяень Коломас, Вечкомасонь Чамза, Москаень Овтай, Нуякшонь Паруш, Вирдянонь Пичай, Сыресень Кавтась, Кирдяень Куляс.

Христианствада ингольдень мокшэрзянь антропонимиясь тячити самс аф сатомшка тонафнеф. Нльне педа-пес апак кочкак мокшэрзянь лепне, мезсь и кирдезе синь тонафнемаснон. Мокшэрзянь антропонимиянь кизефкнень колга ули статья, коса теряфневи няфтемс кой-кона мокшэрзянь лепнень тиевомасна. Статьяти максф валлувкс, коза сувафтф 400 лама лем. Тя лепнень авторсь кочказень Мордовскяй АССР-ть истоиянц колга документтнень и материалхнень эзда, а стане жа фольклоронь и этнографиянь материалхнень эзда, конат кочкафтольхть экспедициятнень пингста. Тяни кочкаф тёжянда лама мокшэрзянь ломанень лемда.

Мокшэрзянь антропонимиять тонафнемац, стане жа кода и лия народонь антропонимиять ваномац, салсесыне мяльснон учёнайхнень и аф стак. Сон лезды тонафнемс ся кизефкснень, конат сотфт мордвать топонимиянц мархта. Лепнень вельде улихть кода панжемс-содамс, коса инголи эрясть мокшэрзятне, сяс мес ламоц Христианствада ингольдень мокшэрзянь лепне арасть и вастонь лемкс, коса эрясть и эряйхть тячити самс мокшетне и эрзятне. Ня географическяй лепне сидеста сяда кунардоннет тяфтама жа лепнень коряс, конат тиевсть ни христианскяй лепнень эзда.

Пингонь ётазь ламоц мокшэрзянь топонипне(ru) полафневсть рузонь кяльть фонетиканц и морфологиянц коряс, кепотьксонди, -ово, -ево, -ино, -ин(ка) и лия суффикснень вельде. Тяфта мокшэрзянь Алтыш антропонимсь ащи юркс Алтышево (Чув. АССР) велень лемти, Кадыш — Кадышево велесь (Ульян. обл., Морд. АССР), Кельдюш — Кельдюшево велесь, Mapeсь — Маресево, Большое Маресьево велетне, Азрапа — Азрапино велесь (Горьк. обл.), Кочкур — Кочкурово велесь (Морд. АССР, Горьков. обл.), Кечуш — Кечушево велесь, Вечкус — Вечкусы велесь, Полдяс — Полдясово велесь, Судось — Судосево велесь, Сыресь — Мордовские Сыреси, Береговые Сыреси велетне (Морд. АССР), Сыреси велесь (Чув. АССР) и стак тов.

Мокшэрянь антропонипне сидеста васьфневихть аф аньцек велетнень лемса, но и, кепотьксонди, ляень и эрьхконь лепнень эса. Мокшекс – ляй, эрьхке; эрзякс – лей, эрьке и сонцень ляйть или эрьхкть лемоц, кона ащи васенце вастса и лиси антропоним: Кудаш-лей (Кудаш), Каба-лей (Кабай), Аляма-эрьке (Алемай) и стак тов.

Христианствада ингольдень мокшень и эрзянь лепне тяни пцтай юкстафт, сяс мес христианизациять пингста, кона ушедсь XVI-це сядокизоть кучкаста, мордвась шабанзонды ушедсь путнема церькавонь лепт, но, виде, синь полафтовсь мокшень и эрзянь кяльхнень корява. Кепотьксонди, Фёдор лемсь эрзякс Кведор, Филипп — Квилё, Фома — Кома, Федосья — Кведо, Фёкла — Кекла, Марфа — Марква, Ефросинья — Окро, Никифор — Микикор, Николай — Миколь (мокш. Микола), Харитон — Каритон, Заxap — Закар, Агафья — Ога (мокш. Ага), Аксинья — Окся (мокш. Аксю), Арина — Орё или Оряй, Акулина — Околь, Елена — Олё или Олёна (мокш. Алёна), Авдотья — Олдо или Олдай, Дарья — Дарё (мокш. Даря), Мария — Марё (мокш. Маря, Марю), Анисья — Ансё, Василиса — Васё, Матрёна — Матрё (мокш. Матю), Наталья — Наталь (мокш. Ната, Нату), Лукерья — Лукирь и стак тов.

Христианствада ингольдень мокшэрзянь лепне ашесть юма прокс кяльста. Ламоцне ванфтовсть тяниень пингонь фамилиятнень эса:

Кирдяев, Кирдяйкин — Кирдяй;
Кудашов, Кудашкин — Кудаш;
Учватов, Учваткин — Учват;
Нуянзин — Нуянза;
Коломасов, Коломаскин — Коломас;
Казеев, Казейкин — Казей;
Сураев, Сурайкин — Сурай;
Кемаев, Кемайкин — Кемай;
Тингаев, Тингайкин — Тингай;
Тремасов — Тремас;
Янгаев, Янгайкин — Янгай;
Пиксаев, Пиксайкин — Пиксай;
Суродеев, Суродейкин — Суродей;
Кильдюшов, Кильдюшкин — Кильдюш;
Симдянов, Симдяйкин — Симдян;
Вирясов, Виряскин — Виряс;
Ведяшов, Ведяшкин — Ведяш;
Пивцаев, Пивцайкин — Пивцай;
Резаев, Pезайкин — Резай;
Кежватов, Кежваткин — Кежват;
Кулясов, Куляскин — Куляс и лият.

Вяре максф и лия синь лацост мокшэрзянь фамилиятне эвондасть христианизациять пингста. Рузонь священникне-миссионерхне, макссемок кстиндамста мокшетненди и эрзятненди христианскяй лепт, сёрматкшнезь и синь фамилияснон церькавонь документтненди. Фамилиятне лисендсть кстиндафть алянц лемонц эзда, путнемок -ов, -ев, -ин, -(к)ин рузонь фамилиятнень лаца пет. Кирдяшань цёрац арсесь Кирдяшов-кс или Кирдяшкин-кс (Кирдяшка-о лемста), Кудашань цёрац — Кудашов-кс или Кудашкин-кс (Кудашка-о лемста), Маресянь цёрац — Маресьев-кс или Мареськин-кс (Мареська-о лемста), Кочемасонь цёрац — Кочемасов-кс или Кочемаскин-кс (Кочемаска-о лемста) и стак тов.

Кой-кона мокшэрзянь антропонипне тячити самс нолявихть тевс, лемнемок радня ломаттнень, конатнень фкя марстонь атянь-атясна, конань ульсь христианствада ингольдень лемоц. Тяфта «Тон кинь?» кизефксть лангс Иванцева эрзянь велеса, кона Горьковскяй областьса, ули кода кулемс: «Кежаинь» (Кежай лемста), «Лямаинь» ( Лямай лемста), «Бубушкань» (Бубуш лемста) и стак тов. Тяфтама лемнемат улихть кода васьфтемс и лия эрзянь, а стане жа мокшень велетнень эсовок.

Христианствада ингольдень мордватнень ёткса васьфневсть аф аньцек эсь лацонь мокшень и эрзянь лепт, но и лептка, конатне састь лия нароттнень эзда. Заимствованнай лепнень ёткса лама христианствада ингольдень, аф христианскяй рузонь сире лептка, а стане жа васьфневихть тюрскяй кяльста саф антропонипт. Тя лепне мокшень и эрзянь кяльхнень вельде, а меле ни и христанскяй лепневок, конатне састь руснень эзда, полафневсть-латцевсть мокшень и эрзянь кяльхнень корява (корхтамать, валонь полафнемать и валонь тиевомать корява). Рузонь сире лепнень, христианствада ингольдень, аф христианскяй лепнень сувамасна мокшэрзятнень лемснон ёткс ушедсь пяк кунара (минь эрань I-це тёжянь кизотнень пингста), минь эрань II-це тёжянь кизотнень пингста руснень и мокшэрзятнень ёткса сотксне кемокставсть. Сембода сидеста васьфневи рузонь аф христианскяй лепне, конат шарсть мордватнень ёткса, нят: Несмеян, Любим, Назван, Бурнай, Поздей, Чудай, Ждан, Гуляй, Малка, Девятка, Радай, Надежка, Дурай, Дурнай, Буди, Милуш, Первуш, Жадей, Живай, Петай и лият. Ламоцне эздост стане жа арасть валъюркс тяниень пингонь мокшэрзянь фамилиятненди.

Христианствада ингольдень мордвать ёткса сидеста васьфневсть тюркскяй кяльхнень эзда саф антропонипне. Синь сувсесть кяльти, мзярда мокшетнень, эрзятнень и тюркскяй нароттнень ёткса эвондакшнесть соткст, васендакиге татархнень мархта. Тяфтама лепне: Булай, Чембулай, Чалмай, Сабай, Китай, Мемей, Ногай, Селеват, Сюлдюк, Казанчей, Бичура, Ямаш и лият.

Мокшень и эрзянь ломанень лепнень тиевомасна ули кода шарьхкодемс лепнень смузьснон эзда, кона, кепотьксонди, няфтьсы иднять промозонц (Кежай, Кежут, Кежапа, Кежеват, Кежедей (эрз.)кежей— «злой»; Кутяй (эрз.)кутявиця — «щекотливый»; Веляй (эрз.)велиця — «вертлявый»; Паруш (эрз.)паро — «хороший» и стак тов), или тядятнень-алятнень ёжомарямаснон идьснонды( Алтыш (эрз.)алтамс — «обещать»; Учай, Учват, Учесь учемс валста — «ждать»; Казей, улема, казнемс, (мокш.)каземс — «подарить»; Инжай, Инжеват — (эрз.) инже, (мокш.)инжи — «гость» и стак тов), или шабать шачема вастонц коряс (Кудаш, Кудас, Кудай (эрз.)кудо, (мокш.)куд — «дом»; Ошай, Ошас, Ошапа, Ошесь ош — «город» валста; или шабать шачема пингонц коряс (Видяй видемс — «сеять» валста; Нуят, Нуянэа, Нуякша нуемс — «жать» валста; Пивцай (эрз.)пивцемс — «молотить» и стак тов).

Тяфта мокшень и эрзянь антропонипне тиевомань коряс пяк малат, кепотьксонди, рузоннетнень мархта, но улихть и стама лепт, конатнень тиевомасна аф шарьхкодеви. Тяфтама антропонимне састь тейнек рузонь сёрматфса, сяс, улема, ульсть полафтфт, рузонь кялень фонетикать и морфологиять коряс (Червов, Арэют, Антяс, Азрапа, Чекулай, Кутор, Ацапа, Кичат, Начар, Тенякша, Чиндяс и лият).

Сянкса, мес оцязорсь ладязе государствань каготтнень сёрматкшнемс алятнень лангс, рузонь документтнень эса и мордвать колга лия материалхнень эса васьфневи пяк кржа авань лем: Мака, Нахя, Паштеня, Цебарка. Фольклорнай источникнень коряс содафт тяфтама авань лепт: Литова, Саманька, Сыржа, Акамка, Мазярго, Паё, Снальтё, Атюта, Нуяль, Кастуша, Цеца, Сэняша, Витова, Канёва, Элюва, Кирдява, Виртява, Сиямка, Люкщамка, Васяльга, Азравка, Сирява, Стирява, Утяша и лият.

Эряви азомс, што кода эрзянь, стане и мокшень антропонипне фкя лаца васьфневсть мордвать ёткса.^[1]

Эрзянь стирень-авань лепне (Эрзянь тейтерь-авань лемть)^[1]

Анге — Инешкипазонь (Семботь Тииец) рьванц лемоц
Алгужа — улема, ал (яйцо)валста + кужо (поляна), лиси алонь кужа; или алце (нижний) валста + кужо, то есть алдонь кужа
Алкажа — алняня
Анелина — анелямс валста
Аргума — мазыдонга мазы
Арта/Артана — кона архты, мазопты
Ашава — акша ава
Ашназа — акша шяярь, валда
Байгуша — путерькскя, эрз. байге — капля; или байге+кужо — путерькскя лаца кужа
Бажана/Бажата/Бажена/Бажута — бажамс (ёрамс) валста, лиякс мярьгомс, кельговикс
Важава/Важена — трудонь кельги, мялень ваны, важодемс (покодемс) валста
Валдава/Валдася/Валдуша — валда
Валгужа — валдо валста + кужо (мокш.кужа)
Вандола — вандолды, пиндолды
Вастаня — машты васьфтема
Веденея — ведьса няи
Вежана/Вежава — ёмлась — эрз. веженсь валста
Вельмата — вельмафсь, живолготфсь — вельмемс валста
Вечкана — кельгома
Видява — виде, видешинь кельги
Витова/Витава — виде
Вияна — вии
Виринея — вирьса няи
Зэхель — сетьме
Инжаня — инжи или инжиень кельги
Инесь/Инюва/Инюта — вятить, инятять, оцязорть стирец
Истарта — лац сюреса сёрмады, маштозь мазолгофни
Кастарго — панжись
Кастуша/Кастусь — касысь
Канёва/Канява/Канюва — каназоть стирец
Килява — келу лаца
Кевганя/Кевге — калгода, кев лаца
Кирдява — кирдись
Кемаль/Кемельте — кеме валста или кемамс (верондамс, надиямс)валста
Куляша — кулянь канды
Лияна — лия, аф сембонь лаца или иляназ (лён)
Лада /Ладава — ладяма валста (сетьме, порядкань содай)
Лаймарь, Лаймарина — лаймарень
Ламзурь — лама сюрень кштирди
Ликшаня — люкшянь
Люкшава — эрь кодама тише
Мазаня/Мазярго — мазы
Метьказа — нетьказ лаца
Миянза — ведьбинень
Мазава — мазы ава
Наяна — прянь няи
Нормаль — норов эрз. валста (мода, путькс) + марь, лугаса касы кстый
Нуя — нумс валста
Наруша — нар валста
Налкума — налхкси
Пияда/Пияна/Пиянза — пивань пидись
Паксяльтя/Паксюта — паксянь
Парава — пара, цебярь ава
Селема — сялиень (сяли - вяз шуфта )
Сияна — сиянь
Сола/Соланя — солай
Сырнежа — зрнянь
Сэнежа — акша-сенем
Сэтьмела — сетьме
Сюмерьге — сюнера, нусманя
Таштана — таштонь ванфты
Телена — тялонь
Тештела — тяштьфкс мархта, тяште лаца
Теяна — тяйня, осалня, шуваняня
Тикшана — тишень
Тиряна — родной, фкя веронь
Тундаль/Тундаля/Тунданя — тундань
Утяша — идень басяй-маты
Чевгине/Чевгелина — чивге лаца
Чипаня — мани ши лаца или шиньжаромань
Чеймарина — шяймарькс
Эйзюраль — букв. эйень сюра, эйзюра, шачсь эйзюронь пингста
Элюва — эрьваза
Эряна /Эряния — эрьгав
Эрьгана — лиятнень эзда сяда няеви
Эрьгела — кенярди
Эрьмеза — машты
Ямзюр — эрз. ямся сюро (кафта видьме мархта) шуроста васьфневи

Авань лепне

Мзярда ванфтольхть стирень-авань лепне, шарфтсть эсь лангозост мяль ся лепне, конат ащихть кафта валюрста и омбоце валюркс ащи ава валсь: Анава (Инява, Онава), Азрава (Азрафка, Асрава), Ашава (Ошава), Валдава (Вальдява, Волдава), Видява (Ведявка, Вадава), Вежава, Вергава, Виртява, Канява (Канюва, Кунава, Кунавка), Литава (Литова), Лиява, Мазава (Мозява, Мозава, Мозявка), Нулзява (Нулзявка), Ордава, Парава (Порава), Покшава, Потява, Равжава, Рузава, Сернява, Сочава (Сочефка), Сырява, Синява (Синевка), Тетява (Тедява), Тундава, Чиньдява (Шиндява), Черава (Черавка), Шонжава, Элюва, Ялгава (Ялгавка) и лият.

Кой-конатне ня лепнень эзда иноголи ульсть социальнай терминкс, конатнень вельде няфтевсть рьвянятнень лемсна-вастсна семьяса. Ня лепне ульсть кода семьянь титулхт, и тя или тона рьвянять, каннемок тя или тона лемть, ульсь сонцень вастоц мокшэрзянь оцю семьятнень эса. Эрь рьвянять, ваномок лемонц лангс, ульсть сонцень праванза и тевонза семьяса, коса ванондовсть койхне иерархиянь системать коряс.

Рузонь лепне эрзякс[петнемс | Петнемс лисьмапрянц]

Алянь лепне

Абрам — Обран
Александр — Сандра
Алексей — Алёк
Андрей — Андю
Антон — Онтон
Артём — Артё
Гавриил — Гаврё, Гаво, Галё
Григорий — Дриго, Дрига
Василий — Васюк, Васют
Виктор — Викай
Владимир — Оло, Олодя
Дорофей — Доро
Захар — Закар
Егор — Ёгорь, Ега
Игнатий — Иго, Игай
Илья — Илько, Илькут
Кирилл — Кирё

Матвей — Матё
Мефодий — Нехот
Михаил — Михал, Микай
Моисей — Мосей
Никифор — Микикор
Николай — Миколь, Микулай
Павел — Павол, Паул
Сергей — Серьгу, Сегай
Софрон — Сохрон
Тимофей — Тимо, Тюма
Трофим — Трохим
Фёдор — Кведор
Филипп — Квилё
Фома — Кома
Харитон — Каритон
Фадей — Ходдей

Авань лепне

Вера — Верки

Анна — Анка

Авдотья — Олдай
Агафья — Ганя, Ога
Аграфена (Агриппина) — Окро
Аксинья, Оксана — Окся
Акулина — Околь, Куля
Александра — Леса, Лёкся
Анастасия — Наста
Анисья — Ансё
Варвара — Варо, Вара
Дарья — Дарё

Евгения — Евля
Марфа — Марква
Марья — Марё
Матрёна — Матря, Матя
Ольга — Ольке
Пелагея — Полё, Палага
Светлана — Валда, Валдоня
Степанида — Спёпа
Федосья — Кведо
Христиния, Кристина — Крестя

Мокшень лепне

Алянь лепне, конат тиевсть нармонень лемста

Сюлга (чайка)
Панзи (канюк)
Мече (голубь)
Пилекш (свиристель)
Пучкарган (цапля)
Туртас, Турташ (дрозд)
Турпур (дикий голубь)
Карьгата (чернай дрозд)
Тундас (пеночка, «весенник»)
Тяргон, Тяргас (коростель)
Тельга (иволга)
Торай (дикий гусь)
Кавал (коршун)
Куцькан (орел)
Увксни (удод)
Цёфкс (соловей)
Шавача (сойка, «болтать»)
Сязьгата (сорока)
Шякшата (дятел)
Шурман (рябчик)
Яксярга (утка)
Сузи, Сувози (Глухарь)
Пулукш (тетерев)

Авань:

Кара
Кемельхтя
Кодай (кодамс)
Стай (стамс)
Салоня
Тевтярь (шачсь, мзярда кунцезь ворьготьф мешвеленятнень; тефтерь - мешень кунцемка)
Трафа
Яга
Еша
Васальге (улема, Василиса лемста)
Кизор (киза)
Тундас (тунда)
Алгас (шачсь ала вастса)
Рамас (рамамс)
Кельган, Кельге (кельгомс)
Куяма (куя)
Ракшай (ракша)
Эрекай (эрек)
Порапа (пора)
Паранза — (пара)
Кичат, (эрз. (нармонь) КИЧА — ЧИЖ.)
Кецята (кенярдема)
Нолдаш (нолдамс)
Алякс (аля)
Цятна
Сатнай
Мокшай
Тюштя
Пуреш
Кафтор
Рангай
Цифтомаз
Пинкедь
Ромай
Армей
Ордащ — (ордашкодомс, ордаш)
Ардащ
Саущ
Мартас
Цякай
Пекта
Кальдя
Курай
Аржа
Зетай
Мялеха

Лятфтамат

↑ ¹ ² Мелькужо Эрзянь Мастор — Форум Страна эрзян, эрзянский форум(недоступная ссылка)

Литературась

Мокшин Н. Ф. Тайны мордовских имён: (Исторический ономастикон мордовского народа). — Саранск: Мордов. кн. изд-во, 1991. — 112 с.
Мокшин Н. Ф. Мордовско-татарские этнические связи // Гуманитарные науки и образование: проблемы и перспективы. Материалы I Сафаргалиевских науч. чтений / МГУ им. Н. П. Огарева. — Саранск, 1997. — С. 27—36.
Никонов В. А. Из географии мордовских фамилий // Никонов В. А. География фамилий / Отв. ред. С. И. Брук; предисл. Р. Ш. Джарылгасиновой. — Изд. 3-е, стереотипное. — М.: УРСС, 2007. — С. 127—140. — 200 с. — ISBN 978-5-484-00762-2.

Ссылкатне

[autogenerated1-1] ¹ ² Мелькужо Эрзянь Мастор — Форум Страна эрзян, эрзянский форум(недоступная ссылка)

[1]