Мокша (журналсь)
| Мокша | |
|---|---|
.jpg) | |
| Специализациясь | литературно-художественнай и общественно-политическяй журнал |
| Мзяроксть лисенди | ковти весть |
| Кяльсь | мокшень |
| Редакциять адресоц | 430000, г. Саранск, ул. Советская, д. 22 тел. +7(8464)17-06-38 |
| Главнай редакторсь | Аникина Марина Владимировна |
| Странась |
 Россия Мордовия Республикась |
| Изданиять эрямопингоц | 1928 |
| Тиражсь | 452 |
| Казненза |
 |
Мокша (руз. Мокша) - тя литературно-художественнай и общественно-политическяй издания мокшень кяльса. Лисенди весть ковти. Тиражец 450 экземпляр Редакциясь ащи Саранскяйса, Советскяй ульцяса, 22 кудса, 430005. Главнай редакторсь - Марина Владимировна Аникина.
_%D0%BB%D0%B0%D0%BD%D0%B3%D0%B0%D0%BA%D1%81%D0%BE%D0%BD%D0%B7%D0%B0.jpg)
Эрямопингоц
«Мокша» журналсь шачсь 1927-це кизонь мартста Пенза ошса. Васенце лемоцоль - "Валда ян", сон мольсь полатксокс "Од веле" (тяни "Мокшень правда") общественно-политическяй и велень хозяйствань газетати. 1927-це кизоня "Валда янть" лиссь аньцек фкя номероц, кона марнек лемтьфоль мокшэрзянь аватнень социализмать строямаса улемаснон няфтеманцты. Эрь ковня журналсь ушедсь лисендема 1928-це кизоста сявомок, но ся кизоня лиссть сонь аньцек колма номеронза, 1929-це кизоня - вете.
Журналсь полафнезе лемонц
- 1927 - 1932-це кизотнень лемневсь «Валда ян»;
- 1932 - 1941-це кизотнень - «Колхозонь эряф»;
- 1956-це кизоста сявомок и тячити самс лемневи «Мокша» журналкс.
«Мокшети» васенце главнай редакторкс ульсь И. В. Шотин. Сяда меле ульсть Л. Е. Бажанов, С. Б. Леонтьев, Н. С. Шестов, И. Д. Илькинов, Т. Г. Купряшкин, П. Ежов, Ф. С. Руськин, П. Ф. Горьканов, И. Ф. Чумаков, Г. А. Игнатьев, И. М. Девин, М. Л. Сайгин, М. А. Бебан, А. П. Тяпаев, В. М. Сурков, Г. И. Пинясов, В. М. Лобанов, М. И. Малькина, Т. Ф. Сенькина.
2022-це кизоста сявомок журналть главнай редактороц Аникина М. В.
Журналть зрнянь кизонза сотфт Григорий Ильич Пинясовонь мархта, кона вятезе журналть 1982 - 1998-це кизотнень. Кода асу писатель, шачема кялень лац содай, сон журналса печатлави материалхненди путнесь оцю вешфкст.
Саранскяйса журналсь ушедсь лисендема 1929-це кизонь январьста, издателькс сёрматфоль ВКП(б)-нь Мордовскяй окружкомсь и Окрисполкомсь.
Журналсь арась литературно-художественнайкс 1933-це кизоста сявомок.
1934-це кизоста сявомок "Мокшесь" ушедсь лисендема кода Мордовиянь Писателень союзть литературно-художественнай и общественно-политическяй журналоц. Мордовиянь Писателень союзсь 2024-це кизонь ноябрьста васьфтезе эсь 90 кизнь юбилеенц[1]
Великай Отечественнай войнать пингста журналсь ашезь ноляв. Война мельдень кизотнень (1946-1956 кк.) эземозонза лисендсь "Сяськома" литературно-художественнай альманахсь. Сонь лиссть 16 номеронза.
Путфксоц мокшэрзянь литературать касомасонза-вииямасонза
Журналть лопанянзон лангса шачсь тядянь-алянь кяльса художественнай литературась. Сонь вельденза мушендовсть и касфневсть асу тяшти од ломатть, конат, пингонь ётазь, арсесть цебярь писателькс. Журналса публикациятнень эзда ушеткшнезь эсь творчествань киснон мокшень пцтай сембе прозаикне и поэттне.
Журналсь лездсь ладямс мокшень литературать жанровай системанц. Валом-валом аф оцю стихотворениятнень, сиде моронятнень, пейзажнай зарисовкатнень полафтозь гражданскяй и филосовскяй лирикась, баснятне, элегиятне, поэматне и балладатне, азкснень - повесттне и роматтне, сценкатнень - пьесатне, комедиятне и драматне. Журналсь кирнесы фкя мокшэрзянь литературать колга концепциять, кона тиендеви кафта маластонь (мокша и эрзя) кяльса, сяс мокшекс ётафтомста печатлакшневихть и эрзянь прозаикнень, поэттнень, критикнень-литературоветтнень произведениясна; эрзянь поэттнень башка лирическяй стихотворенияснон печатлакшнесыне оригиналть кяльса. «Учительти лезксонди» рубрикаса материалсь валдопнесыне родной кяльть, литературать тонафтомань методикань кизефксснень, шачема крайть историянц мархта сотф кизефкснень. Фалу печатлакшневихть од авторхнень произведениясна.
Журналти учредителькс ульсть: 1990-це кизонь декабрти самс-Мордовскяй АССР-нь писателень Союзсь, 1991-це кизонь январьста сявомок 1999-це кизонь майти самс-Мордовиянь писателень Союзсь.[2] и редакциянь коллективсь, 1999-це кизонь июньцта сявомок 1999-wt кизонь декабрти молемс — Мордовия Республикань Правительствась и редакциянь коллективсь. 2000-це кизонь январьста «Мокшеть»-ть учредителец Мордовия Республикань Правительствась.
Казненза
журналсь казьф «Знак Почёта» орденца
Лятфтамат
- ↑ Союз писателей Мордовии отметил 90-летие
- ↑ Общественная организация «Союз писателей Республики Мордовия» общероссийской общественной организации «Союз писателей России» (рус.). Бухгалтерский, учет, налогооблажение,аудит в РФ. Дата обращения: 17 октябрьста 2025.
Литературась
А. Каторова "Мокша" и "Сятко" журналхне исяк и тячи // Мокша журналсь, 2023/11
- Справочник Союза писателей СССР / ред. М. В. Горбачев, сост. Н. В. Боровская. — М.: Советский писатель, 1970. — 792 с. — 6000 экз.