Мокшэрзянь сёрмась
Мокшэрзянь сёрмась (руз. Мордовская письменность) — тя сёрма (письменность), кона ноляви тевс мокшень и эрзянь кяльса сёрмадомста. XVIII-це векста сявомок и тя пингти самс мокшэрзянь сёрмась вятевсь кириллицаса. XX-це векть ушетксозонза алфавитть ашель фкя тяка нормац и сидеста полафнесь. Тяниень алфавитсь тевс ноляви 1920-це кизотнень песта.
XVII-це сяда кизоть пец — XIX-це сяда кизоть кучкац
Мокшень и эрзянь кялень инь сире памятникокс лувови голландскяй учёнайть Н. Витсенонь «Noord en oost Tartarye» трудоц, кона лиссь Амстердамса 1692-це кизоня. Тя книгаса авторсь кочкась валкскя, коса максф 325 мокшень и эрзянь (сяда лама мокшень) вал, конат ётафтфт стане жа голландскяй кяльс[1]. Сяда меле, XVIII-це векста, мокшень и эрзянь валонь лемлувкснень и аф оцю тексттнень аф весть сёрматкшнезь и нолязь россиянь и омба масторонь учёнайхне (Ф.Страленберг, Э. Фишер, П. И. Рычков, П. С. Паллас, И. Г. Георги и лият). Синь трудсост нолявсь тевс кода латинскяй, стане и кириллическяй транскрипциясь[2].
Мокшень и эрзянь фонематнень графикаса няфтемасна XVIII-це веконь тяштькснень эса[2]:
| УФА | Латиницась | Кириллицась | УФА | Латиницась | Кириллицась | УФА | Латиницась | Кириллицась | УФА | Латиницась | Кириллицась |
|---|---|---|---|---|---|---|---|---|---|---|---|
| [a] | a, aa, ou | а, аа, я | [g] | g | г | [m] | m | м | [x] | ch | |
| [ä] | ä, a, ai | я, а | [d] | d | д | [n], [n'] | n | н | [c], [ć] | ts, z, cz, tz | ц |
| [o] | o | о | [ž] | sch | ж | [ŋ] | n, ng | н, нг | [č] | tsch, cz | ч |
| [e] | e | е | [z], [ź] | z, s | з | [ŋ̩g] | ng | нг | [š] | sch, s, sh | ш, с |
| [u] | u, ou | у, ю | [ʒ], [ʒ'] | dz, ds | дз | [p] | p | п | [šč] | schc | щ |
| [ai] | ai, ei | ай, ей | [j] | j, i | й, ю, я | [r], [ŕ] | r | р | [ks] | ks, cks, x, kx | кс |
| [i] | i, y | и | [ȷ] | ch, ix | [ʀ], [ʀ'] | r | палат. | j, i | ь | ||
| [ə] | i, e, a, y | а | [k] | k, gk, ck, c | к | [s], [s'] | s, ss, ß | с | |||
| [b] | b | б | [l], [l'] | l, ll | л, лл | [t], [t'] | t, d | т, д | |||
| [v (u̠)] | v, w, u | в, у | [ʟ], [ʟ'] | x, l | [f] | f, ff | в |
XVIII-це сяда кизоть омбоце пялестонза появасть мокшэрзянь (кода мокшень, стане и эрзянь) васенце тексттне. Ётксост сембода лама Казанскяй и Нижегородскяй семинариянь тонафнихнень и преподавательхнень вийса ётафтфт официальнай-торжественнай нюрьхкяня сочиненият. Ня произведенияса сявондевсь кириллицань алфавитсь. Кодамовок стандарт мархта сёрма нинге ашель, сяс эрь кодама текстса сявондевсть аф фкя лацонь графическяй приемт тя или тона фонемать няфтемста[3].
XIX-це векть ушетксста мокшэрзянь кяльса ушедсь книгань нолямась. Тяфта, 1804-це кизоня нолдафоль церковнославянскяй букварь катехизис мархта, кона ётафтфоль эрзянь кяльс. Мельганза нолявсть лия лама богослужебнай книгат. 1821—1827-це кизотнень нолдафоль Од Заветсь эрзянь кяльса. Но ня книгатне ашесть пачкотькшне ломаттнень кядьс, и ётафтфтольхть пяк кальдявста[4].
XIX-це векть кучкац — XX-це векть ушетксоц
1867-це кизоня Казаньца пуроптфоль святительть Гуриень братствац, конань тевоц ульсь Россиянь нароттнень христианствав сувафтомасна и тонафнефтемасна. Сонь тевонц вельде 1870-це кизотнень эзда сявомок, сяда лама ушедсть лисендема книгат мокшень и эрзянь кяльхнень эса. Нолявихть аф аньцек религиознай тексттне, конатне ётафневсть мокшень и эрзянь кяльс, но нинге эвондакшнихть букварьхть, а тяфта жа художественнай произведеният и фольклорнай материалхт. Сяс мес мокшень и эрзянь педа-пес тиф алфавитт нинге ашельхть, пцтай эрь изданияса сёрматфсь аф фкя лацоль[5]. Но сёрмать фкя стандратс сувафтомань тяряфнемат ни тиендевсть. Тяфта, эрзянь букварть автороц-кочкаец А. Ф. Юртов тись графическяй система, конань кода аф кода нолязе тевс эсь трудонзон эса[6]. XIX—XX -це векнень ётка пингстост печатнай изданиятнень эса эрзянь алфавитсь пяк ашезь явфнев рузонь алфавитть эзда (Ҥ ҥ тяштьксть башка)[7].
Мокшень жа алфавитсь, кона няфтьфоль 1892 и 1897-це кизонь букварьхнень эса, тевс нолясь кой-мзяра башка тяштькс: ӑ аф ударнай [a]-ть няфтемс, я̈ ингольце рядонь алце подъёмонь [ä] няфтемс, ы̃ кучка рядонь аф напряжённай редуцированнай гласнайть няфтемс ,ҥ-сь заднеязычнай вариантонь г и к инголе ащи н -нь звукть няфтемс[8]. Лия мокшень изданияса нолневсь тевс стандартнай рузонь алфавитсь[9] (1898-це кизонь «Священнай историяса» сявондевсь ԙ тяштькссь)[10].
XIX-це векть песта — XX-це веконь ушеткста нолдаф букварьхнень алфавитснон аф фкя лацонь ширьсна тяниень алфавитть эзда:
- Мокшень
- Букварь для мордвы-мокши: 1-е изд., 2-е изд. Казань, 1892, 1897. Аш Ъъ буквась. Улихть Ӑӑ, Іі, Ҥҥ, Ы̃ы̃, Я̈я̈.
- Дорофеев З. Ф. Валда ян. М., 1925. Аш Ъъ буквась. Улихть Ԕԕ, Ԗԗ.
- Эрзянь
- Букварь для мордвы — эрзи с присоединением молитв и русской азбуки. Казань, 1884. Аш Щщ буквась. Улихть Іі, Ѣѣ, Ѳѳ.
- Букварь для мордвы-эрзи. Казань, 1892. Аш Хх, Ъъ букватне. Улихть Ii, Ҥҥ.
- Тундонь чи. Эрзянь букварь. М.-Пг., 1923. Аш Ъъ буквась. Ули Ҥҥ.
- Данилов Т. Валдо чи. М., 1926. Аш Ъъ буквась.
1917-це кизода меле
1920-це кизоста сявомок мокшень и эрзянь кяльса ушедсть ноляма лама книгат, кармасть лисендема газетат. Но нинге ашель фкя диалектнай база, фкя алфавит и орфография. 1924-це кизоня тя прябалась ванфоль мокшэрзянь учительхнень съездсост, а 1928-це кизоня Москувонь кялень конференцияса. 1920-це кизотнень кучкаста мокшень и эрзянь изданиятнень эса ушедсть кочкавома-тиевома литературнай норматне и диалектнай базатне, тя процессь аделавсь 1930-це кизотнень кучкаста. Мокшень литературнай кяльти юркс путфоль Краснослободско-Темниковскяй корхтамась, а эрзянь литературнай кяльти—Козловка велень корхтамась[10].
Графикань ширде мокшень и эрзянь сёрматнень тиевомаснон эса ульсть тяфтама башка ширет: 1920-це кизоста сявомок 1924-це кизоти молемс нолявсь тевс рузонь алфавитсь башка тяштьксфтома. [ə] вайгяльксть кармасть няфнемонза а букваса, а [ä] — е букваса. 1924-це кизоня аф кайги согласнайхнень няфтеманкса [ʟ] и [ʀ] сувафтфтольхть ԕ и ԗ букватне, а [ä] лемс кармасть ноляма э и ӭ букват, но мекольцеть пцтай эстокиге лоткафтозь. 1924—1926-це кизонь мокшень изданиятнень эса [ə] няфтеманкса кой-коста нолневсть тевс ӗ, о̆ и ы̆ букватне[10].
1927-це кизоня сембе башка букватне мокшень и эрзянь алфавитса валхтфтольхть и сон арась стамкс, кодама тяни, марнек стама, кодама рузонь алфавитсь. [ʟ] и [ʀ] няфтеманди кармасть нолдаф лх и рх буквань сюлмотне (палатализованнайхне — льх, рьх), а [ə]-ти аф палатализованнай согласнайда меле о буквась и е буквась палатализованнайда меле[10]. 1993-це кизоня примафтольхть мокшень кялень орфографиянь од правилат, конатнень коряс редуцированнай [ə] няфтеви валть ушетксста и васенце пякстаф слогса ъ букваса[11].
Тяряфнесть ётамс латинонь алфавитти
1932-це кизонь 25-це мартста марнек Союзса мольфтеви латинизациянь процессть коряс Од алфавитонь марнек Союзонь центральнай комитетсь прьняндась мокшень и эрзянь алфавитт, конатненди юркс арась латинскяйсь. Эзост сувсесть тяфтама букват: A a, Ə ə, B в, C c, Ç ç, D d, Э э, E e, F f, G g, Ь ь, I i, J j, K k, L l, M m, N n, O o, Ɵ ɵ, P p, R r, S s, Ş ş, T t, U u, Y y, V v, X x, Z z, Ƶ ƶ, ȷ, Rx, Lh (мекольце кафта букватне улихть аньцек мокшень кяльса). 1932-це кизонь 19-це майста тястоконь кялень содайхнень мархта корхтамада меле Од алфавитонь Нижне-Волжскяй комитетсь прьняндазе тя алфавитть кой-кодама полафкс мархта: A a, B в, C c, Ç ç, D d, Ə ə, F f, G g, Y y, I i, J j, K k, L l, M m, N n, O o, P p, R r, S s, Ş ş, T t, U u, V v, X x, Z z, Ƶ ƶ, Ь ь, Rx, Lh[12]. Но кодамовок аськолкст ашесть тиендев мокшэрзянь латинизированнай алфавитть сувафтоманцты, сон ашезь нолява тевс.
| 1-це проектсь | 2-це проектсь | 3-це проектсь[13] | Кириллицась | 1-це проектсь | 2-це проектсь | 3-це проектсь | Кириллицась | 1-це проектсь | 2-це проектсь | 3-це проектсь | Кириллицась |
|---|---|---|---|---|---|---|---|---|---|---|---|
| A a | А а | I i | И и | Ş ş | Ш ш | ||||||
| Ə ə | Ja ja | Ä ä | Я я | J j | Й й | T t | Т т | ||||
| B в | Б б | K k | К к | U u | У у | ||||||
| C c | Ц ц | L l | Л л | Y y | Ju ju | Ü ü | Ю ю | ||||
| Ç ç | Ч ч | M m | М м | V v | В в | ||||||
| D d | Д д | N n | Н н | X x | Х х | ||||||
| Э э | Ə ə | Э э | O o | О о | Z z | З з | |||||
| E e | Je je | E e | Е е | Ɵ ɵ | Jo jo | Ö ö | Ё ё | Ƶ ƶ | Ж ж | ||
| F f | Ф ф | P p | П п | ȷ | ь | ь | |||||
| G g | Г г | R r | Р р | Rx rx | Рх рх | ||||||
| Ь ь | Y y | Ы ы | S s | С с | Lh lh | Lx lx | Лх лх | ||||
Тяниень пингонь мокшень и эрзянь алфавиттне
Тяниень пингонь мокшень и эрзянь алфавиттне сявозь ушетксснон 1920-це кизотнень песта. Графикань коряс синь фкя лацот рузоннеть мархта.
| А а | Б б | В в | Г г | Д д | Е е | Ё ё | Ж ж | З з | И и | Й й |
| К к | Л л | М м | Н н | О о | П п | Р р | С с | Т т | У у | Ф ф |
| Х х | Ц ц | Ч ч | Ш ш | Щ щ | Ъ ъ | Ы ы | Ь ь | Э э | Ю ю | Я я |
Башка букватнень фонетикань коряс смузьсна:
- А а — [a] вайгялькссь. Мокшень кяльса стане жа [ə] (валть песа калгода валъюрхтонь мельге).
- Е е — [e] вайгялькссь ляпе согласнайда меле, а стане жа кда инголенза моли й-сь. Мокшень кяльса стане жа [ə] (валть кучкаса ляпе согласнайда и шипящайда меле) и [j]+[ə].
- Ё ё — [o] вайгялькссь ляпе согласнайда меле, а стане жа кда инголенза моли й-сь.
- И и — [i] вайгялькссь ляпе и аф парнай согласнайда меле.
- О о — [o] вайгялькссь. Мокшень кяльса стане жа [ə] (калгода согласнайда меле).
- Ъ ъ — мокшень кяльса [ə] валть ушетксса и васенце сёлкф слогса.
- Ы ы — [i] вайгялькссь калгода согласнайда меле.
- Э э — мокшень кяльса [ä] вайгялькссь валть ушетксса.
- Ю ю — [u] вайгялькссь ляпе согласнайда меле, а стане жа кда инголенза моли й-сь.
- Я я — [a] вайгялькссь ляпе согласнайда меле, а стане жа кда инголенза моли й-сь. Мокшень кяльса [ä] (валть кучкаса и песа) и [j]+[ä].
- Палатализациясь няфневи ь букваса согласнайда меле или е, ё, и, ю, я букваса согласнайда меле.
- Мокшень аф кайги сонорнайхне [ȷ], [ʟ], [ʀ] няфневихть йх, лх, рх буквань сюлмоса[14].
Лятфтамат
- ↑ Феоктистов, 2008, с. 133—135.
- ↑ 1 2 Феоктистов, 2008, с. 165—172.
- ↑ Феоктистов, 2008, с. 173—190.
- ↑ Феоктистов, 2008, с. 191—194.
- ↑ Феоктистов, 2008, с. 248.
- ↑ Феоктистов, 2008, с. 249—250.
- ↑ Феоктистов, 2008, с. 252.
- ↑ Феоктистов, 2008, с. 273.
- ↑ Феоктистов, 2008, с. 284—288.
- ↑ 1 2 3 4 Основы финно-угорского языкознания. — М.: "Наука", 1975. — Т. 2. — С. 268—271.
- ↑ А. Н. Келина. Алфавит. — Мордовия. Энциклопедия. — Саранск : Мордовское кн. изд-во, 2003. — Т. 1. — С. 116.
- ↑ 1 2 Г. Аитов. Новый алфавит. Великая революция на востоке. — Саратов: Нижневолжское краевое изд-во, 1932. — С. 61—64. — 73 с. — 3150 экз.
- ↑ Н. П. Дружинин. Эрзя-мокшонь од латинизированной алфавитэнть пачтясынек алов массатненень // Сятко. — 1932. — № 19. — С. 20.
- ↑ М. Е. Митрофанова. Графика. — Мордовия. Энциклопедия. — Саранск : Мордовское кн. изд-во, 2003. — Т. 1. — С. 262.
Литературась
- А. П. Феоктистов. Очерки по истории формирования мордовских письменно-литературных языков. — Саранск: Мордовское книжное издательство, 2008. — 392 с. — 1000 экз. — ISBN 978-5-7595-1753-5.