Мокшэрзянь морамбяльхне

Мокшэрзянь морамбяльхне (эрз. седямопельть) - мокшэрзятнень кунардонь пингонь эсь лацонь коень-обуцянь ванфты кядьёнкссна. Сяда инголе морамбяльда ульсь аф кржа. Тячиень мокшэрзянь морамань культурась кассь-виензась вельдест.

Мокшэрзянь морамбяльхне

Нюди

Нюди руз.: Тростник — мокшэрзянь музыкальнай инструмент. Народнай музыкань культураса тя морамбяльсь пяк содафоль. Керсевсть тарадонь кафта почконят 20 сантиметрань кувалмоса. Фкя почконяса тиендсть 3 варянят, омбоцеса — 6. Почконятнень песа тиендсть «кяльня», кожфонь уфамста тя кяльнясь либордсь. Ся петне, конань мархта ашесть мора, ашкоткшневсть куйгорса.

Нюдить тиемац

Аноклакшнезь тя морамбяльть аф аньцек нюдиста. Кепотьксонди, Тарбею, Инсар, Ковылкина аймаконь велетнень эса нюдись тиендевсь саразонь пакарьстонга. Варянянь тиеманди пакарсь васендакиге лакафтовсь, штоба сон сяда ляпомоль. Нюдить кафтоль почктонза. Фкя почкста лиси вайгяльсь лемневсь вяри вайгялькс, омбоце почкста мольсь алу вайгяльсь. Нюдись ули кода лемдемс кафтонзаф кларнетокс.

Тевс нолдамац

Кунардонь пинкнень нюдиса морсесть озксонь ётафтомста, нюдиса морсесть Роштувань кудонь праздникть пингста, свадьбань иласа. Нюдиса морсесть стадань ваныхневок.

Карзи

Карзи (руз.: Скрипка) - тя морамбяльсь шары скрипкати. Карзихнень тиендезь коське келуста. Оцю морайхненди тиендсть сяда оцю карзихть, шабатненди тиендсть шабань карзихть. Карзить колма струнанзольхть, синь тифтольхть алашань пулонь шяярьста. Карзиень морамась кайгомань коряс малаль нюдиса морамати. Нюдить коряс морсесть обрядовай морот, кштишендсть мордовскяй свадьбань иласа, нюдида башка свадьбаса морсесть уфамсовок, карзисовок.

Гайфтемась

Башка вастса мокшэрзянь народнай музыкань культураса ащи гайфтемась. Тя морамбяльсь тяфтамоль: сявондевсь метрашкань кувалмоса келувонь или ушторонь досканя, фкя пец сонь сяда келиель, 12-15 сантиметра, а омбоце пец тяйняня, 4-5 сантиметрат. Досканять кувалмос таргафоль струна, эста кшнинь струнат ашельхть, струнать тарксезь нарде сюреста или шуваня пикскаста. Дугянякс мянтьф смычокса ётафнесть струнать ланга, и кулевсь кайгома. Тяка группати кандови гуслятне. Мокшень или эрзянь кяльса тя народнай морамбяльть лемоц ашезь ванфтов. Мильковичень тяштьксонзон коряс, гусляса мокшэрзятне морсесть 18-це векть песта.

Торама

Мокшэрзятнень сембода сире содавикс морамбялькс лувови торамась. Сонь вельденза няфтевсь оцязорть Тюштять вайгялец. Мзярда тюштясь валхтозень лангстонза вятиень тевонзон , сон васенцекс валхтозе торамать, конась сувай военнай доспехнень лувксс.

Торама — тя инструментсь пяк вии, кайги. Торамать кувалмоц пачктькшнесь 100 сантиметрати. Сявондсть келувонь или ушторонь виде тарад, пачк лазондозь сонь, лазф пялькснень потсмоснон карсезь, тиендезь почконь лаца. Меле ня лазф пялькснень меки токафнезь фкя-фкянди и ашкорязь куйгорса. Шуфтть карсезь стане, што почкть фкя пец лисендсь сяда тяйняня , а омбоце пец сяда кели. Ульсть лия тораматка, нят сяда нюрьхкнятольхть. 50-80 сантиметра. Синь тиендевсть пичень керста, мяньтьф керхнень песна тонгондовсть фкя-фкас, а меле вадендевсть столярнай клейса.

Тораматнень бокс варянят ашесть пяленде. Кунардонь пинкнень торамаса макссесть вайгяль фкя-фкянди стадань ваныхне. Торамаса морсесть постуфне шобдава сдадать панемста, торамась макссесь вайгяль обедъёткть, штоба кудазораватне содалезь, коса стадась, коза молема траксонь потяма, и торамаса морсесть илять стадать вели панемстонза. Кой-кона мокшень велетнень эса тянивок тиендихть торамат шабатненди налхкшенди.

Кда корхтамс народнай инсструментальнай музыкать тевса лездомань колга, то тяса азомат охотань пингста торсематне. Содаф, мордвась фалу эрясь вирю вастса , маштсь охотендма. Штоба панемс зверьхнень ляцихнень шири, вирьса морсесть торамаса.

Кальхцияма

Кальхцияматне тиендевсть коське шуваня досканяста. Ня досканятнень кувалмосна аф фкатольхть, сяда кувакась — 45 сантиметра, сембода нюрьхкянясь — 20 сантиметра. Досканятненди пяльфоль варяня, сияня нолневсь пикс. Седяфкятне кальхциямать эса тифт келуста или тумоста. Сотовихть фкя-фкянь мархта ленгяса или шнань карксса. Морайсь эрьхнесь шуфтонь куцюса ня досканятненди. Тембрань коряс кальхцияматнень кайгомасна шарсь ксилофонти.

Кальхциямать повфнезь лафтуста аф ламода сяда ала мяштть эзда. Мокшэрзятнень пцтай эрь кудса ульсть тяфтама кальхциямат. Мокшень и эрзянь кяльхнень эса тя шуфтонь морамбяльть кайгоманц азонкшнезь «друн-друн» валхнень вельде. Ня друн-друттне васьфневихть фольклорнай тексттнень эсовок. Арьсихть, што морамбяльсь эвондась идень налхкоматнень пингста, мзярда шабатне, ласькомок шабра куттнень малава, ётафнесть седяфкаса перяфксть пачк.

Шавома

Шавоматне кунардонь пинкнень эрьхневсть кулянь пачфтоманкса, шавомас эрьхнесть ваныхне. Шавоматне эрявкснесть кштимань ритмань няфтемс. Шавоматнень тиендезь коське келувонь седяфста, шавомать келецоль 25-30 сантиметрат, кувалмоц — 45-50 сантиметра. Штоба шавомась сяда кайголь, келувонь седяфть вадендезь пичевайса, канцёрвайса, меле лацкас косьфнезь.

Шавомась повфневсь морайть лафтус шна вельде. Шавомаса морайсь эрьхнезе седяфть шуфтонь молаткаса , лияста шуфтонь куцюса Ульсть лия шавоматка. Сире пинкнень мокшень эрзянь велева путнесть вень ваныхть — салайда, пожарда-мезьда. Синь якасть велева и калдорфнезь шуфтонь чакамкаснон. А меле тя чакамкась арась музыкальнай инструментокс.

Пайгонят

Народнай музыкальнай инструменттнень ёткса кивок аф тапарясыне пайгонятнень. Улихть сяда оцю пайгонят, улихть сяда ёмла пайгонят, тяса корхтамась моли ся ёмла пайгонятнень колга, конат повфнефт сёконятненди, крганятненди, ашкотфненди. Мордовскяй национальнай авань щамть эса лама пайгоняда. Свадьбаса мокшаватне и эрзяватне лама кштишендсть, и нарядсост нюрьги пайгонятне циннясть, кальдердсть, гайнясть. Вов мес сидеста корхнихть: мокшавать, эрзявать нинге сонцень аф няйсак, а молеманц ни марясак, национальнай щамсонза кальдердихть пайгонятне. Велень инструментнень эзда эряви лятфтамс пайгське. Тяса кирдеви мяльса ся, мезть эрьхнезь пожаронь или лиянь-мезень колга пачфтемста. Кунардонь пинкнень пайга вастс повфнесть коське мокорь (уштор, келу), кой-коса повфнесть кувака эчке доска, а тяни повфнихть рельса пакш, лия кайги кшни. Пайгть эрьхнезь байдекса, кшниса.

Кальдердема

Кальдердемась — тя шуфтонь инструмент. Сявондевсь покарявста лаксеф шуфтонь брус, кувалмоц 15-20 сантиметра, келец 7-8 сантиметрат, тя брусти лаксекшнесть пейхть, шарфтомста ня пейхне эрьхнесть вачкаф досканяти-кяльти, досканять пеняц фкя пейть эзда омбоцети токамста эрьхневсь, кайгсь. Кунардонь пинкнень кальдердемаса постуфне эвфнезь врьгаснень, панцезь стадать маласта. Кальдердемать шарфнезь атятне велень озкснень пингстовок, тяфта синь панцезь кальдяв вийхнень. Ансамбляса, конац морась нюдиса, вешкомаса, карзиса, шарфнезь кальдердематьке.

Кунардонь пинкнень морсесть пиласовок. Морайсь шятнезе пильгонц пилать алуце кундамканцты, а кержи кядьса пилать то мянцезе, то видепнезе. Тяфтама инструментса сяда сидеста морсесть эряфкшу ломаттне.

Вяшкома

Мордовскяй народнай музыкальнай инструменттнень ёткса улихть стапт, конат кайгомань коряс малат флейтати. Эсост звуксь лиси кожфть уфамста. Тяза кандови акациянь куфтолсь. Куфтолть потмоста шамдовихть видьмотне, фкя пец керови, морайсь уфай куфтолть пачка кожф, кулеви вяшкомань кайгома. Тяза же кандови сендиень морамась. Сенди — камыш. Сендиса сяда сидеста морсесть постуфне, сендиень морамкать кувалмоц 30-35 сантиметра, почконяти тиф колма, сяда шуроста ниле варянят.

Вяшкома — тя инструментсь сяда кувакаль, 30-70 сантиметра. Вяшкоматнень тиендезь илиста, керсесть 4-6 варянят. Вяшкомаса морайхнень коряс кштишендсть, морсесть морот. Вяшкомась моли нюдить и уфамть мархта ансамбльса.

Ули сёвонень вяшкома. Тиендевсь плхтаф сёвоньцта нармонень лаца. Сёвонень вяшкомать ульсть кафта варянянза бокова и фкя варяняц алува. Сёвонень вяшкомаса морсесть шабатне, мзярда масланцянь ёткть тернезь вели мрдамс нармоттнень.

Уфама

Уфамась — тя морамбяльсь рузкс лемдеви волынкакс. Уфапне аф фкя лацотольхть. Синь явондовсть сянь коряс, мезьста тифт. Ульсть уфапт, конат тифтольхть вазнянь кедьста. Уфамти тонгондовсть колма почкт. Фкя тяфтама почксь тиендевсь пяшень или келувонь шуфтста, сонь ульсь «кяльняц». Тя почкста мольсь алуце вайгяльсь, омбоце и колмоце почкне тиендевсть сендиста, синь ульсть кафтонь варянясна и нюдиень кодяма «кяльнясна». Ульсть лия уфаптка. Ня морамкатне титендевсть букань, траксонь или тувонь потмоста. Тяфтама уфамть сяда келиста уфсезь, и аньцек тяда меле тонгондозь варяня мархта почкнень, меле морайсь кафта кядьса люпшнезе уфамть, панезе эздонза кожфть, а почконятне морасть. Тяфтама уфамса морайда кафтоль: фкясь морась, а омбоцесь уфсесь уфамть эса.

Кунардонь пинкнень уфамса морсесть пяк сидеста, тяфтама народнай музыкальнай морамбялсь пяк содафоль, тонатфоль. Тяфтама инструментса морайсь панцезень рьвянять маласта кальдяв вийхнень, сельмодематнень. Тяка пингть, народть кунардонь арьсеманц коряс, уфамонь вайгяльсь петнезе вярдень шкайхнень, кудонь ванфтыхнень мяльснон. Сяс уфамса морсесть озкснень пингстовок.

Лятфтамат

Литературась

Бояркин Н. И. Мордовские народные музыкальные инструменты // Мордовия : Энциклопедия : в 2 т. / гл. ред. А. И. Сухарев. — Саранск : Институт гуманитарных наук при Правительстве Республики Мордовия, 2004. — Т. 2 (М—Я). — С. 39—41. — 704 с. — ISBN 5-900029-08-5.

Ссылкат