Панар
Панар (руз. Рубашка) — тя щам, кона лувондови стакшинь и иланди каннемс. Кодамовок илас фкя-фкянь лангс щащендовсь кафта, а кой коста и колмошка панар, штоба алга сёрматфксне афольхть кяше фкя-фкянь.
Мокшрзянь нарядть колга васенце сведениятне васьфневихть XVIII-це векста. Тянь колга ляфтнихть ученайхне-путешественникне И. Г. Георги, И. И. Лепёхин, П. С. Паллас. Эсь исследованиясост синь сембе ширде сёрмадыхть-азондыхть Моркшэрзятнень щамснон колга.
Панарсь стаф шуваня акша котфста. Кувака, эсонза керф сивонди васта. Ожакитне и лафту васттне мазоптфт сёрмаса. Эрь кодама районца эряй мокшетнень щамсна аф фкя лацот. Авань панарсь сяда сидеста кувалмоц плманжа видьге оцю пов мархта, ингольде и фталда кувалмос тифт сёрматфкст, Зубунь райононь руз. (Зубово-Полянскяй район) чембарскяй мокшетнень — нинге и лафтубряваст. Эрь сёрматфксть ули сонцень лемоц.
Пяк крхкаста корхтави мокшень нарядть, и сонь орнаментонзон (тяштьксонзон) В. Белицеронь работасонза «Народная одежда мордвы»[1].
Эрямопингоц
Народнай щамонь стямать эрямопингоц тушенды кунардонь пинкненди. Мокшэрзянь щапне тиевсть сокаень-видиень ёткса. И эстокиге ни максфоль пяк содаф китькскя мархта. Мокшэрзятнень эрямаснон географиясна, синь тевсна и шабрань нароттнень мархта шабрасна — тя сембось няфневсь сонь тифсонза и оформлениясонза. Мокшень и эрзянь национальнай щамсь ладявсь Россиянь европейскяй пяльксть кучкаса. Мокшэрзятнень эряма вастснон кели историческяй ширесна тись эрь кодама вариантт мокшетнень и мордвать-эрзятнень щамса.
Эсь лацонь ширет няфтихть щапне кода Мордовиять потмоса, тяфта мокшэрзянь велетнень эса Пензенскяй, Ульяновскяй, Нижегородскяй, Саратовскяй, Самарскяй, Оренбургскяй, областтнень эса, Чувашияса, Татарияса, Башкирияса.
Башка мяль шарфни авань щамсь. Интересоц теенза ульсь аф аньцек российскяйхнень, но и омба масторонь исследовательхнень и путешественникнень. Мокшэрзянь щамть колга васенце кулятне васьфневихть XVIII-це векста. Учёнайхнень-путешественникнень И. Г. Георгань, И. И. Лепёхинонь, П. С. Палласонь покодемаснон эса. Синь салазь мяльснон костюмонь тиихнень козя арьсемасна и мазыдонга мазы сюреса сёрмадомасна.
Мокшэрзятнень народнай асушисост сюреса сёрмадомась занци башка васта. Кунардонь пингста сявомок тячити молемс тя мокшаватнень и эрзяватнень кельгома тевснон эзда фкясь. Мокшэрзянь сёрматфксонь традиционнай тюсне-сенем (или равжа, сенем тюсса) и тюжя, и сянгяря полаткс мархта шобда-якстерь. Мокшэрзянь щапнень эсь лацонь ширесна — декоративностсь. Эффектть виияфтоманц и узорти рельефностть максоманкса сюреса сёрмадыхне сёрмадомста тевс ноляйхть лама тюсонь ожнат, блёсткат, лентат, серень бляшкат, понань помаланят и стак тов. рьвакс тумань паршиснон мзярошка панарста, нардамаста, руцяста и стак тов. Кой-кона сюреса сёрмадома элементтнень ульсть синцень лемсна. Эрь кодама тюсонь сюреса сёрмадомась марс кочксесь стамань приёмт. Сёрматф узорхне няевихть символикась, кона нежетькшни народть кунардонь кемаманзонды. Инь кунардоннесь финно-угрань пластсь, сон корхтай финно-угратнень культурнай койснон марстонь шиснон колга. Сон няеви щамонь керсемаса, сюреса сёрмадомаса орнаментальнай мотивса, мазы декорса. Кепотьксонди, марийскяй авань панарсь стаф мокшень панарть лаца. Сюреса сёрмадомать тюсоц и сонь тиемац фкя лацонне мокшэрзятнень национальнай щамснон мархта. Тюркскяй пластсь, улема, сувась мокшэрзятнень культуразост татаро-монгольскяй нашествиять пингста. Тя влияниясь ванфтовсь авань костюмть башка пяльксса. Теест кандовихть, кепотьксонди, лафтубрянь вельф лапотьф мазоптомкась[2].
Мокшэрзятнень щамсна ульсь пяк козя лувксс коре и сембода пяк авань щапне-каряпне. Ульсть аф фкя лацонь пряс путомкат, панар, нула, понкст, сапоня, ожафтома жилеткат. Эрь кодама илати наряжамста аватне тяда башка путнельхть-щакшнельхть эрь кодама мазоптомкат кода кргазост и карксэземозост (каркст, кушакт) — мокшаватне, пулай — эрзяватне); каштазонь цифкс, кона лапиеви мокшавать лафтунзон лангс, мяштеванза, копорьганза, пилеснон ваксс повфневольхть соргонят, кядезост кятькст, пильгозост хромовай срму кямот[3].
Мокшень и эрзянь аватненди панарсь нолневсь тевс алдонь и вярдень щамкс фкя пингть. Хоть эрзяватнень панарсна ульс лия мокшаватнень панарснон эзда, но и сятнень и лиятнень панарсна тиендевсть туникань лаца стафкс лаца воротникфтома. Котфонь виде котфне мазопневсть эрь кодама мазы сёрматфса ожатнень, алгать и пялеть кувалмос. Тяфтама панарти эрявсть нинге лама пялькст, конат лездсть авати максомс щамти эрявикс силуэт — сюрок вастонь и мяштень мазоптомкат. Лангсост панаронь каннемась няфнесь эряма вастонь эсь лацонь шире.
Авань панар
Мокшавань панарсь
Щамонь эсь лацонь ширекс мокшетнень ульсь паргана ширесь, кона тиендевсь инголест повфтамста. Эрзянь щамса сюрок вастонь мазоптомкань ансамбльсь ульсь пяк эсь лацоннекс. 13-14 кизоса, а кой-кона вастова сядонголе, эрзянь стирнятне ушеткшнесть каннема карксэземса пулай (пулогай, пулакш, пулокаркс). Мокшень авань щамса ладяфоль каннемс туникань кодяма панарсь плманжа видева кувака сиве мархта кафта бокова путкс и оцю пов мархта[4]. Эрзянь панарть сташендозь котфонь кафта келеста, конат мянтьфтольхть кафтова и стафт фкя фкянди кувалмова. Мокшаватнень панарсна аф фкатольхть панарса и мазыса. Кафта пяли мянтьф туркс ащи сюреть коряс точнай котфсь ульсь панарть стафонц юрса, конанди бокова сташендовсть сяда нюрьхкяня котфне. Тяфтама керефтемась тиендсь лафтуть видеса ожатненди ниле фкя лаца ужа мархта варя. Панар сивось кемоксневсь сюлгамса[5].
Лятфтамат
- ↑ Белицер В.Н. Народная одежда Мордвы Труды Мордовской этнографической экспедиции Вып. 3. — Москва: Наука, 1973. — 216 с.
- ↑ Про костюм - История мордовского костюма (рус.). Мордовский республиканский музей изобразительных искусств им. С.Д. Эрьзи. Дата обращения: 22 сентябрьста 2025.
- ↑ Символика праздничного костюма мордвы (рус.). cyberleninka.ru. Дата обращения: 9 октябрьста 2025.
- ↑ Митина В. В. Структура культурного кода женского традиционного костюма мордвы (рус.). Научная электронная библиотека»КиберЛенинка ". Дата обращения: 4 октябрьста 2025.
- ↑ Лунина, М.В. Символика праздничного костюма мордвы (рус.). Научная электронная библиотека «КиберЛенинка». Дата обращения: 4 октябрьста 2025.
Литературась
- Белицер В.Н.. Нродная одежда мордвы. — Москва: Наука, 1973. — 316 с.
- Нижегородский сборник, Том 1 / Нижегородский губернский статистический комитет под редакций А. С. Гациского. — Типография Нижегородского губернского правления, 1867. — С. 220.
- Риттих Александр Федерович. Матеріалы для этнографіи Россіи: Казанская губерния, ХIV. — Тип. Казанскаго университета, 1870. — С. 217.
- Семёнов Василий. Библиотека иностранных писателей о России. Том 1. — Типография III. Отделение Е. И. В. Собственной Канцелярии, 1836. — С. 155.
- Юрченков В. А. Мордовский народ: вехи истории. — Саранск, 2007.
- Brook, Kevin Alan. The Jews of Khazaria. 2nd ed. Rowman & Littlefield Publishers, Inc, 2010. ISBN 978-0-7425-4981-4
- Minahan, James B. Encyclopedia of Stateless Nations: Ethnic and National Groups around the World, 2nd Edition: Ethnic and National Groups around the World. — ABC-CLIO, 2016. — С. 278. — 568 с. — ISBN 1610699548, 9781610699549.
- Prichard, James Cowles. Researches Into the Physical History of Mankind, Том 3. — Sherwood, Gilbert & Piper, 1841. — 317 с.
- Корнишина Г. А. Панар // Мордовия : Энциклопедия : в 2 т. / гл. ред. А. И. Сухарев. — Саранск : Институт гуманитарных наук при Правительстве Республики Мордовия, 2004. — Т. 2 (М—Я). — С. 142. — 704 с. — ISBN 5-900029-08-5.