Пачат

Пачат (руз. Блины) — ярхцамбяльсь, кона тиеви органь шонгара шапаксста и пицевихть пачкалга лангса. Сядонголе пицевсть пянакудса. Пачатне улихть кода пидемс эрь кодама почфста: тозеронь, люкшянь, снавонь, суронь. Сидеста швордакшевсть кодамовок кафта сёронь почфне. Финно-угорань ламоц нароттнень пачасна фалу эчкт и пицефсть эрь кодама почфста. Тяфта ули мариецнень Команмелна пачасна нинге сяда эчкт, мокшеннетнень коряс.

Пачатне лисендихть эчкт, сяс мес шапакссь ичеви аф фкя сёронь почфста, эзост кайсеви лама алда, оргада. Пачада ярхцасть лофца или вай мархта. Штоба пачатне улельхть сяда ляпонят, шапаксти кайсесть крахмал или пидеф тапаф модамарь.

Эрямопингсна

Сяда сидеста сядонголе синь пицевсть эрь кодама иланди. Меле, мзярда ломаттне кармасть эряма сяда козяста, кармасть пицема стакшинявок. Сяда кельговсть и сяда сидеста пицевсть суронь пачатне. Суротне томбсевсть шуфтонь шоварса или яжсевсть кев ёткса. Ульсь синцень рецептсна. И эрь мокшавать ули сонцень салава маштомашиц и асушиц тя ярхцамбяльть пидемаса.

Мокшень пачат

Кода пидемат

Эрявксты:
1 литра лофца;
4 оцю куцюфт сахарбочф;
2 ëмла куцюнят сал;
Пяле кило манка;
1 стакан суронь почф;
1 стакан тозер почф;
1 пачканя коське оргат;
4-5 алхт;
100 грамма скалвай;
100 грамма постнай вай.

Лямбе лофцти каяма сахарбочфсь, салсь, оргатне, манкась и почфне. Сембось лацкас шоряма и кадома кеподеманди фкя частс. Меле кепотьф шапаксти каямат алхне. Лакафтомат марса скал и постнай вайхне и псиста шорямат шапаксти. Сон лиси тустста. Шонгаргофтоманкса шапаксть лангс каяма лакай ведь. 15-шка минутада меле ушедома пачань пицема. Пачатне вадендемат скалвайса или алтюжаса.

Литератураса и культураса

Пачатнень колга мокшень и эрзянь писательхне и поэттне аф весть лятфнихть эсь произведенияснон коряс.
Пицихть аватне од суронь пачат.
Кядьсот, мярьгат, шиняцень кирдьсак.
Ярхцат — топодят, ламос аф вачат.
Танцтихть пачатне — кяльцень нильсак.
(В. Родькин)

Лятфтамат

Литературась

Никонова Л. И. Суронь пачат // Мордовия. Энциклопедия: в 2 томах / Гл. ред. А. И. Сухарев. — Саранск: Институт гуманитарных наук при Правительстве Республики Мордовия, 2004. — Т. 2 (М—Я). — С. 381. — 704 с. — ISBN 5-900029-08-5.

Ссылкатне

• Традиционные блюда народов России: бурятские буузы, татарский эчпочмак, якутский саламат (рус.) (7 февральста 2022). Дата обращения: 18 августста 2025.