Троцясь
Троцясь руз.: Троица — Шкаенди верондай ломанень оцю илась.
Васенцеда «Троица» терминць сявф II векста святительть Феофил Антиохийскяень эзда. Колма фкаса Шкайть колга шарьхкодемась макссеви-ванфневи тяниень пингонь христианскяй конфессиятнень пцтай сембонь мархта.
Троця илать шиц
Иняру Троцясь руз.: Святая Троица васьфневи Очижида руз.: Пасха (Христово Воскресения) меле 50 шинь ётазь. Сяс мес Очижись васьфневи эрь кодама числаня, то и Троцянь шись тяфта жа васьфневи аф фкя числаня.
Троця илать эвондамац
Илать кемай ломаттне ушедсть васьфнемонза 381 кизоста ушедомок. Именна эста Вселенскяй Константинопольскяй церковнай омбоце соборса ульсь кемокстаф Шкаень колма ипостасянь колга тонафтомась: Алять, Цёрать и Ару Ваймопожфть руз.: Отец, Сын и Святой Дух.
Колмоединай Шкайть тонафтомаса ащихть колма положеният: 1) Фкаса колмонза Шкай, што Шкайса Колма Лицат-Шамат (Ипостасихть, Личностть): Алясь, Цёрась, Иняру Ваймось (Ваймопожфсь). 2) Иняру Троцять эрь Лицац ули Шкай, но Синь сутьсна аф колма Шкайхть, а сутсь единай Божественнай существа. 3) Сембе колмоцьке Лицатне явондовихть личнай, или ипостаснай свойстваса.
Од Соткссть руз.: Новый Завет коряс, Менелень Царствав Вознесенияда инголе Иисус Христоссь надияфтсь эсь тонафниензонды, апостолхненди, што ваймонь петеманкса кучсы теест Эсь Алянц эзда Ару Ваймопожфть.
Вознесенияда меле апостолхне эрь шиня пуромкшнесть морафтома Иняру Сёрматфть руз.: Святое Писание Сионскяй горницав Иерусалимса. Христость Вознесениядонза меле кемонь шинь ётазь улемок горницяса, апостолхне кульсть шум. Эвондасть толонь кяльхть, конат валгсть эрть лангс. Тяфта Иисусть тонафниенза пяшкодевсть Иняру Ваймопожфса и кармасть корхтама эрь кодама кяльса, ётафнемок проповедть эрь кодама народонь ёткса.
Троця илать ётафтомац
Иняру Троцять карша церькафнень эса ётафневихть службат. Литургияда меле ётафтови оцю вечерня, кона лемтьф Иняру Ваймопожфть валгоманцты, и морафневихть колма молитватне, конань пингста комсихть плманжа лангс и Озкс вятихне и церькаву озондома сафне.
Троцяста церькафне, куттне наряжакшневихть шуфтонь сянгяря лопаня мархта тарадса и тишеса, конат корхтайхть ломаттнень одкстомомаснон колга Иняру Ваймопожфть вельде. Церькафнень эса священникне лангозост щакшнихть сянгяря тюссонь щапт. Сянгяря тюссь няфтьсы Иняру Ваймопожфть одкстоптомань виенц.
Мокшэрзятне Троцять васьфнесазь пяк кенярдезь. Троцяти самс кунардонь пингть афоль мярьгондев керсемс шуфтт, сязендемс лопат, лядендемс тише. Пцтай сембе велетнень эса тя илати куттнень инголи стяфнихть келунят руз.: берёзки, вальмятнень наряжакшнесазь келувонь тарадса. Кияксти ацсихть сянгяря тишеня. Альтя велеса руз.: Алькино од стирнятне щашендсть лангозост палят, конань эса обязательна улендсь сянгяря тюс.
Литературась
- Спасский А. А. История догматических движений в эпоху Вселенских соборов (в связи с философскими учениями того времени). Тринитарный вопрос (История учения о св. Троице). — Сергиев Посад, 1914.
- Е. Петровский. Идеи троичности в духовных традициях Китая и Индии // Встреча. — 1999 — № 10 — С. 54-60. — сравнение восточных триад и христианского догмата Троицы.
- Ульянов О. Г. Эволюция иконографии Живоначальной Троицы в древнерусском искусстве времени прп. Андрея Рублёва и проблемы семантики образа // Труды ГМИР. Вып. 9. СПб., 2009. С. 7-15.
- А. И. Кырлежев. Троица // Новая философская энциклопедия : в 4 т. / пред. науч.-ред. совета В. С. Стёпин. — 2-е изд., испр. и доп. — М. : Мысль, 2010. — 2816 с.