Туризмась Мордовияса

Туризмась Мордовияса — Россияса туризмать пяльксоц, кона мольфтеви Мордовия Республикаса.

Республикаса туризмать государствать ширде вятнезе Мордовия Республикань спортонь, физическяй культурань и туризмань министерствась, меле Мордовия Республикань национальнай политикань, туризмань и архивнай тевонь министерствась, тяни — Мордовия Республикань экономикань, мишендемань-рамсемань и предпринимательствань министерствась.

Мордовияса туризмать касоманц-виияманц историяц

2010-це кизоня Н.П. Огарёвонь лемса МГУ-нь географиянь факультетса (тяни — Геоинформационнай технологиянь и географиянь институтсь) панчфоль туризмань кафедра, кона аноклай специалистт туризмань сфераса. Тонафнихнень содамашиснон кемокстаманкса панчфоль «Этнотуристскяй центр „Варма“» НОЦ-сь. Студенттне, конат тонафнесть туризмань кафедрань видеса, эрявихть аф аньцек Мордовияса, но и Россиянь лия аймакса. Тонафнемста синь лездыхть сембе мероприятиятнень ётафтомста, конат улендихть Мордовияса, а стане жа кой-кона мероприятияса, конат ётнихть мастороньконь лия аймаксонза.

2014-це кизоня Мордовияса арьсефоль инвестиционнай теварьсефкс «Чемпиононь ош» руз.: (Город чемпионов) Саранскяйса туристско-рекреационнай кластеронь панжемать коряс. Туризмать коряс федеральнай агентствась кирдезе сонь ширенц и теварьсефкссь сувафтфоль «Российскяй Федерацияса эсь масторга и лия вастста сафнень лемс туризмать касомац-вииямац» федеральнай целевой программав. Штоба касфтомс-виияфтомс туризмать республикаса, путомс ингольдень васттненди туристонди няфтеманди лемтьф национальнай козяшить и касфтомс ломаттнень ёткса туризмать колга содамать, ульсь тиф Мордовиянь туристско-информационнай порталсь. Тяфта жа Республикань культурань и туризмань министерствась «Status» журналть мархта марса нолдась «Go to Mordovia» лем ала теварьсефкс — кой-мзяра репортаж Мордовиянь аймакнень туристтненди мяльс туй уликсшиснон колга.

2016-це кизоня Саранскяйсь сувафтфоль «Равонь оцюдонга оцю кись» руз.: (Великий Волжский путь) регионъётконь маршруту, кона кочкафоль-арьсефоль, кирдемок мяльса, эсь лацонь ширьснон сембе областтнень, республикаттнень и крайть, конат сувсихть Приволжскяй федеральнай округти, штоба тиемс сонь козякс историянь и культурань ширде. Тя маршрутть коряс, мзярда туристтне кармайхть Саранскяйса, теест ули кода молемс Ф. Ушаковонь лемса Кафедральнай собору, С.Д. Эрьзянь лемса изобразительнай искусствань музеи, Макаровскяй алянь монастыри и варжамс таньфснон национальнай ярхцамбяльхнень «Мокшэрзянь кудпирьф» руз.: (Мордовское подворье) ресторанца. Стане жа 2016-це кизоня Саранскяйсь сатозе рейтингса 18-це вастть сембода аф питни Россиява путешествиятнень инкса 2015-це кизоть коряс. Тя рейтингть кочказе Travel.ru сервиссь. Сонь кочкамстонза специалисттне ванондозь гостиницань и апартаментонь бронень тиемань даннайхнень 2015-це кизонь 1-це февральста сявомок 31-це декабрти молемс, тянь коряс сявфтольхть Россиянь сембода содаф ошнень и курортнень ёткса сядось.

2017-це кизоня «Мордовия Республикань туристическяй сувенир» пялькстомати итогонь тиемста ульсь васенцеда няфтьф ломаттненди Саранскяень и Мордовиянь туристическяй од картась, конань тиезь марса Туристско-информационнай центрась и Мордовия Республикань культурань, национальнай политикань, туризмань и архивнай тевонь министерствась. Картась тифоль сянкса, штоба туристтне содалезь мезьса козя тя аймаксь, штоба сяда тёждяста мушендовольхть мялень салай васттне и сяда лама ломань сашендоль республикань содаф объекттненди. Тя картась макссеви ярмакфтома регионца эряйхненди и инжихненди, сон ули кода сявомс инжиень куттнень, ярхцама васттнень, машина кинь и автовокзалхнень, аэропорттнень, музейхнень эса.

Саранскяйсь арась ошекс, коса лия ошнень мархта ряцок ётафтовсь 2018-це кизонь Марнек масторонь чемпионатсь футболть коряс. Матчень ётафтоманди строяфоль «Мордовия Арена» стадионць, коза тяльги 45 тёжянь ломань. Ошть кучкаса Саранка ляйть трваса строяфоль вете тяштенянь гостиница. Ошень кучка ульцятнень эзга покодсь 22 информационно-туристическяй ащема вастт, коста футболонь ванондома сафненди ульсь кода кизефтемс кода якай ошса транспортсь, культурнай программать колга и FIFA-нкса сярядихнень фестивальснон расписанияснон. Футболонь марнек масторонь чемпионатть ётафтомдонза ингольде Мордовия Республикань туристско-информационнай центрась марса «Саранск 2018» дирекциять мархта ётафтсть футболонь ванома сафненди туристическяй маршрутонь коряс пялькстама тяфтама номинациянь коряс: «Сембода цебярь туристическяй маршрутсь Футболонь марнек масторонь чемпионатонь 2018 FIFA™ ваныхненди (группанди)», «Сембода цебярь туристскяй маршрутсь Футболонь марнек масторонь чемпионатонь 2018 FIFA™ ваныхненди (фкя ломаненди)», «Сембода цебярь туристскяй маршрутсь Футболонь марнек масторонь чемпионатонь 2018 FIFA™ ваныхненди (семьянди)», «Сембода цебярь ваймама шинь турсь Футболонь марнек масторонь чемпионатонь 2018 FIFA™ ваныхненди». Футболонь ваныхненди, конатнень ламоль пингсна, арьсефоль ошть кувалмос маршрут, конань ульсь кода ётамс экскурсовод мархта или соньфтомонза, или аудиогидть лезксонц вельде. Сембода содаф маршрутсь «Саранск — мекольце вайгяльбесь», сонь ётамстонза ульсь кода няемс Поволжьянь сембода сери фонтанть— «Мордовиянь тяштсь», ваномс ошть Н. П. Огарёвонь лемса Мордовскяй государстваннай университетть перьфпялень ванондома площадкастонза, ваномс сембода содаф мазы васттнень и колма частонь потмоста тага мрдамс «Мордовия Арена» стадионтть малас.

Сяда кели маршрутокс, кона арьсефоль кеняртьфтоманди-ваймаманди, ульсь «Шумбрат, Саранск!» маршрутсь. Сонь ётамксонза эрявксты сяда лама пинге, но ули кода шаромс ошть кучка куронзон эзга, кулемс мялень салай азкст культурно-историческяй объектнень колга, варжамс мокшень и эрзянь ярхцамабяльхнень, содафтомс национальнай налхксематнень мархта. Стане жа ульсть арьсефт лия васту ардомань колма маршрутт: «Торамать тердемац» руз.: (Зов Торамы), кона содафты республикань шнама васттнень мархта, сувенирхнень, ярхцамбялень и этнокультурнай койхнень мархта; «Адмирал Ушаков» культурно-содафтомань маршрутсь вяти Санаксарскяй алянь монастыри; «Заповеднай Мордовия» маршрутсь вяти Мордовскяй заповеднику, конади сувси 10-шка программа, конань ёткса ульсь «Кода аф юмамс-араламс вирьса» курссь. Стане жа ульсть арьсефт мялень салай лия экскурсият: «Пивань вайгяльбе» руз.: (Пивная миля) маршрутсь, сон мольсь Саранскяень пивань пидемань забодста и пачкотькшнесь ошень инь цебярь бархненди и рестораттненди; ульсь маршрут шаба мархта семьятненди; «Илядень Саранск» маршрутти сувси илядень ярхцамась, илядень валдоптф куротнень эзга якамась, валдоптомань и музыкальнай шоунь ваномась, кона няфневсь Поволжьянь инь оцю фонтанть эзда.

• 

  Саранскяйса Футболть коряс марнек мастор лангонь чемпионатти 2018 анокламась

• 

  Санаксарскяй монастырсь, коса ванфневихть адмирал Фёдор Ушаковонь мощанза

• 

  «Гайги вайгель» фольклорнай народнай ансамбльсь «В. И. Ромашкинонь лемса «Этно-кудо» этнографиянь кудть-музейть» панжемста. Мордовиянь Кочкуровань аймаксь, Подлесная Тавла велесь.

• 

  Эрзянь родонь-плямань штатолхне буень штатол и раськень штатол «Раськень Озкс» иласа

Мордовияса туризмань виттне

Этническяй и культурань содафтомань туризмась

Кочкуровань аймакса Подлесная Тавла велеса ули «В.И. Ромашкинонь лемса «Этно-кудо» этнографиянь музей» МУК-сь. Эсь пингстонза музыкантсь и фольклористсь Владимир Ромашкин рамась Подлеснай Тавласа аф оцю кудня. Мзярда сон арась сембонди содавиксокс, сон арьсекшнесь тиемс этнотуристическяй маршрут тя велети, кона содаф кода шуфтста керсемать коряс эрзянь коень кирди центра, и сембе вастова азонкшнесь Тавлань мастярхнень асушиснон колга. Сон ульсь инжиень кельги, сяс Подлеснай Тавлань кудоц най пяшксель инжида, пялонза улендсть омба масторонь инжихть Эстонияста, Венгрияста, Финляндияста, а стане жа Россиянь финно-угрань делегацият. Владимир Ромашкинонь лезксонц вельде «Эрьмезь» ОО-сь ётафтсь шуфтста керсихнень лемс Республикань васенце семинарть, а меле и «Вейсэнь ундокст» (руз.: «Единые корни») финно-угрань шуфтста керсиень народъётконь семинарть. В.И. Ромашкинонь лемса «Этно-кудо» музейсь фкясь сякось, коса ванфневихть В.И. Ромашкинонь паршиенза, стане жа тоса кочкафт эрзятнень материальнай культураснон коряс коллекцият: кудъёткса эрявксни паршихть, паксяса-пирьфса покодемабяльхть. Музейса сембе паршихнень ули кода аф аньцек варчсемс кядьса, но и нолдамс тевс. Фестивалень и илань пингста, мзярда пуромкшни лама инжи, азораватне аноклайхть пянакудса ярхцамбяль, панихть копшат, пицихть пачат. Кинь ули мялец, ули кода лядомс венди, корхнемс музейть кирдиензон, велеряйхнень мархта. Музейсь сувафтф «Сюлгамо» туристическяй маршруту, кона сяськсь «ПФО-нь территорияса регионъётконь туристическяй маршрутонь сембода цебярь разработкась» номинацияса. Маршрутонь участниксь «Этническяй Мордовиясь» (руз.: «Мордовия этническая»). «Этно-кудо» музейса ётафневихть экскурсият идень садонь шабатненди и школаса тонафнихненди, васьфневихть и лама ломатть и тифтень-кафтонь туристт. Ётафневихть мероприятият: региононь — «Торамась терди» (руз.: «Зов Торамы») сире пингонь эрзянь моронь регионъётконь фестиваль, 2016-це кизоня сон ётась ветексть ни, «Кулдор-Калдор» рахсемань-пееткшнемань фестиваль); народъётконь — «Тюштянь налксемат»(руз.: «Игры Тюшти») аф корхтайхнень и аф маряйхнень ёткса спортонь фестиваль, «Вейсэнь ундокст» (руз.: «Единые корни») шуфтста керсиень финно-угрань народъётконь семинар, «Кой» (руз.: «Традиция») парконь скульптурань фестиваль. Кода пачфни «Мордовия Республикань туристско-информационнай центр» ГБУ-сь, 2016-це кизоня «Этно-кудо» куду-музеи сашендыхнень лувкссна кассь 164 %.

Стане жа ули кода содафтомс мокшетнень и эрзятнень эрямань-ащемань койснон мархта «Мокшэрзянь кудбирьф» руз.: (Мордовское подворье) музеень и этнографиянь комплексса. Сире Теризморга велеса Национальнай культурань центраса туристтненди ули кода содафтомс мокшетнень культураснон мархта, а Подлесно-Тавлань экспериментальнай идень художественнай школаса ули кода сувамс шуфтста керсемань мастер-классу и сявомс мархтот лятфнеманди «финно-угрань миронь сисем чуданзон» эзда фкять  — шуфтста тиф Тавлань эрзянь налхкш.

Экологиянь туризмась

Темникавонь аймакса, Мокша ляйть виде ширесонза, пичень-кузонь, кели лопа шуфтонь вирьхнень и вирень, вирьфтома вастонь аймакнень ёткса ащи Пётр Гермогенович Смидовичень лемса Мокшэрзянь масторонь государственнай природнай заповедниксь. 2013-це кизонь декабрьста сявомок Мокшэрзянь масторонь заповедниксь арась Россиянь туристическяй операторкс, сон аноклась сашендыхненди экскурсиянь и перьфпяльть мархта содафтомань мзярошка тур, тяконь лувксса улихть тя тевонди тиф экологиянь башка яннят. Стане жа ули кода сиводемс заповедникть кордононзон эса ули инжиень куднят и эрямс тоса. Пушта велеса ули Мокшэрзянь масторонь государственнай природнай заповедникть природанц музеец, конань эса кочкафт касыксонь и ракшань кепотькст, фотоснимкат.

Заповедникса улихть эрь кодама маршрутт: «Уледа содафт мархтонза: Мокшэрзянь масторонь заповедниксь!» — сон тиф, штоба содафтомс касыкснень и ракшатнень мархта, конат касыхть и эряйхть тяса и ляйхнень-эрьхктнень мархта, ули перьфпялень ванондоманди тиф оцю площадка, коза инжихнень уйфнесазь венчса; «Атянь-атяньконь киснон эзга»  — тяса ули кода содафтомс кунардонь пингонь мокшэрзятнень ёфксснон и айнемаснон мархта, тоса ули ёфксонь кудня и куженя, коса ащихть шуфтста тиф мокшэрязянь шкайхне; «Заповедникть экосистеманза» — тяса ули кода содафтомс заповедникса ули экологическяй сембе систематнень мархта; «Лихтибрятне — ляйть эряфоц» — тяса ули кода содафтомс заповедникть ляензон-эрьхконзон мархта; «Серафим Саровскяень эряфоц» — тяса ули кода содафтомс Серафим Саровскяень эряфонь кинц мархта и ся васттнень мархта, коса улендсь иняру ломанць; «Дивеевать иняру ломаненза» — Цыгановка велеса Серафим Саровскяень лихтибряц; «Вирень палитра» («Смольнай» национальнай парксь) — тяса ули кода содафтомс Алатырь ляйть кержи ширень аймаконц перьфпяленц мархта; «Сянгяря перьфпяль» .

Пяк содаф туристтненди «Кречет» сафари-парксь, кона ащи Мордовиянь Кочкуровскяй аймакса. Тоса эряйхть 300 лама сёрмав вирень тракс руз.: (пятнистый олень), маралхт и 4 алашат. Тя тяфтама васта, коса ракшатне лац марясазь пряснон, синь топоцтот, аф пелихть ломаньда, ваймосихть и эжендихть шинять каршеса. Тяса ракшатнень кельгсазь и танцтиста андсазь. Алашатненди сашенды инструктор, кона синь тонафтсыне прянь вятема. Экскурсиясь тяса аф пелькс, частонь экскурсиять питненцты сувси и сафари-паркова ардомаське, и ракшатнень шири молемась эсь тевонь содай егерень мархта .

2024-це кизонь 25-це декабрьста Саранскяень Ботаническяй садса панжевсь «Бажамо» экологиянь од ян. Сянгяря янць лезды нолдамс тевс ботаническяй садть мазы вастонзон, конат инголи аф содафтольхть туристтненди и лезды топафтомс ломаттнень мяльснон сетьмошиса, мазы перьфпялень эшксса ваймамаса. Тяда башка, янть ули тонафтомань смузец, сон няфтсыне, кода фкя вастса касондыхть касыксне, конат сявфт эрь кодама климатическяй зонаста.

Иласа улемань туризмась

Мордовия Республикаса ётни лама эрь кодама ила, ушедомок велень илатнень эза и аделамок народъётконь содаф фестивальхнень марта: «Соотечественникт» рузонь драмань театрань народъётконь фестивальсь, «Шумбрат, Мордовия!» народнай творчествань фестивальсь, «Акша келу» и «Раськень озкс» национальнай фольклоронь илатне и лама мезе лия.

Эрзянь коень кирди «Раськень озкс» илась вельмофтфоль1999-це кизоня кода этническяй культурань фестиваль, и ся пингста сявомок ётафневи колма кизоти весть Мордовиянь Большеигнатовань аймаконь Чукалы велеса. Мордовия Республикань Оцюнять указонц коряс (17.06.2004 № 80-УГ) Раськень озксь путфоль ряцок тяфтама илатнень мархта, кода Акша келу, Велень озкс, Сабантуй и Славянонь сёрмань и культурань шись, сувафтф Мордовия Республикань государственнай национально-фольклорнай илатнень лувксснон ёткс. Театрань няфтема лаца ила-крдась ушеткшни торамань кайгомаста. Сире калмонь панда пряняса путневи оцю штотол раськень штатол, конань серец 3 метрат. Толмарста, конань лангса аноклави-пидеви архцамбяль озксс сафненди, крьвясневи родонь-плямань штатолсь буень штатол, а сонь эздонза — раськень штатолсь. Озксавась кандсы штатолть пандапряв, мархтонза молихть лездыенза, конат кандыхть кши и медь. Ниле сире атятне сявихть кядьстонза тол и крьвястьсазь оцю штатолть. Тяда меле озксавась озонды Шкабавазти Инешкипазти и кулоф атянь-атятненди. Тя ила-крдаса оцю васта макссеви кядень кундазь перьф якамась, кононь вельде сембе илав сафне сувафтовихть илань ётафтомати. Тя илать пингста ётафневи нинге «Руця» регионъётконь пялькстамась, конань пингста кочксеви эрзянь инь мазы щамсь, тяда башка, ётафневихть спортонь коряс пялькстамат и национальнай налхксемат.

Паломниконь туризмась

Саранскяйса ащи Иняру видексшинь воинть Ф.Ф. Ушаковонь кафедральнай собороц. Тя кабаконашка церькавсь кандови Поволжьянь инь оцю церькафнень ёткс и, тяда башка, сон Мордовиять визитнай карточкац. Мордовиять ши валгомань ширесонза ащи Санаксаронь Рождество-Богородничнай алянь монастырсь, коса ванфневихть адмирал Фёдор Ушпковонь мощанза. Саранск ошть аймаксонза ащи Макаровскяй Иоанна-Богословскяй алянь монастырсь, конань оцю вастоц Мордовиять ваймопожфонь и культурань эряфсонза. Тяни тя поломниконь оцю центра, коса пяк мазы перьфпяльсь и эзонза сувси 20 лама храм. Сонь нинге лемнесазь «ёмла Афонкс».

Велень туризмась

2012-це кизоня «Од ломанень политикань и туризмань центрась» Рузаевка аймаконь муниципальнай автономнай учреждениять видеса Агротуризмать виияфтоманц-келептеманц коряс ассоциациять мяленц коряс пуроптфоль «Мокшэрзянь кудъюрхта» республикань общественнай организациясь, кона виияфтсь велень туризмать эса. 2013-це кизоня аноклафоль туристонь маршрут Шишкеева — Стрелецкяй Слобода — Огарёва велетнень ланга, кона арась велень туризмань няфтемань вастокс тя аймакса. Шишкеева велеса аноклафоль экскурсиянь маршрут засечнай китьксть ланга и вельмафтфтольхть кшинь пидемань, сёвонцта кядьгонь и налхкшень тиемань койхне.

2014-це кизоня аноклафоль теварьсефкс Мордовияса агротуристическяй кластеронь тиемань коряс. Тя тевть вельде колма велетне пуроптфтольхть агротуристическяй маршрутс и ушедсть туристонь васьфнема.

Туристтнень ёткса содаф Мордовиянь Большеберезниковскяй аймаконь Паракина велесь, коса мялень салайста ладяф велень эряфть историянц, коензон и обуцянзон мархта содафтомась. Тяса сембонь тернесазь инжикс Коень куду руз.: (Дом традиций). «Парынза» фольклорнай ансабльть Российскяй Федерациянь народнай творчествань заслуженнай коллективть морсиенза няфнесазь эрзянь щамбяльхнень, морайхть эрзянь сире морхт, ётафтыхть мастер-класст морамать коряс, азондыхть койхнень-обуцятнень, мазы васттнень колга.

• 

  «Раськень Озкс» илать пингста штатолонь крьвястемань койсь

• 

  Мокшэрзянь масторонь заповедникса перьфокс моли туристонь янць

• 

  «Мордовиянь тяштсь» — Поволжьянь сембода оцю фонтантнень ёткста фкясь

• 

  Цыгановка велеса Серафим Саровскяень лихтибряц

Лятфтамат

Библиографиясь

• Бурланков С. П., Захватова И. В. Современный туристский рынок России и перспективы его развития в Мордовии // Финно-угорский мир. — 2013. — С. 110—113.
• Бурланков С. П., Захватова И. В. Туристский рынок России и перспективы его развития в Мордовии // Регионология. — 2013. — С. 178—184.
• Вавилова А. В., Сарайкина С. В. Особенности приграничных территорий Мордовии для развития туризма // Огарёв-Online. — 2016.
• Воронин И. Д. Достопримечательности Мордовии: природные, исторические, культурные. Саранск: Мордов. кн. изд-во, 1982. 256 с.
• Гавина Е. М., Жулина М. А., Сотова Л. В., Фирстов М. И. Туристский маршрут «Зов Торамы» как инструмент развития этнического туризма в Республике Мордовия // Финно-угорский мир. — 2018. — Т. 10, № 4. — С. 74—87.
• Емельянова Н.А. Охраняемые природные территории республики Мордовия как объекты рекреации и туризма // Инженерные технологии и системы. — 2008. — № 1. — С. 150—153.
• Емельянова Н. А., Жулина М. А., Карасев А. С. и др. Территориальная организация туризма в Республике Мордовия: моногр. / под общ. ред. М. А. Жулиной. Саранск : Изд-во Мордов. ун-та, 2017. 272 с.;
• Туристско-рекреационный потенциал Республики Мордовия : учеб. / Н. А. Емельянова, М. А. Жулина, В. М. Кицис [и др.]; под общ. ред. М. А. Жулиной. Саранск : Изд-во Мордов. ун-та, 2017. 188 с.
• Елфутина И. С., Емельянова Н. А. Изучение туристского образа республики Мордовия посредством контент-анализа региональных средств массовой информации // Огарёв-Online. — 2014. — С. 1—5.
• Жулина М. А., Терехова Ю. С. Этнотуризм как приоритетное направление развития республики Мордовия // Огарёв-Online. — 2014.
• Жулина М. А., Зайцева Л. А., Сарайкина С. В., Сотова Л. В. Сравнительный анализ туристского потенциала финно-угорских республик Марий Эл и Мордовии // Финно-угорский мир. — 2019. — С. 342—355.
• Жулина М. А., Кицис В. М., Фирстов М. И. Позиционирование Республики Мордовия как туристской дестинации // Сервис в России и за рубежом. — 2019. — Т. 13, № 4 (86). — С. 111—122.
• Жулина М. А., Емельянова Н. А., Кусерова и др. Перспективные направления развития туризма в Республике Мордовия // Природно-социально-производственные системы регионов компактного проживания финно-угорских народов: сборник. -Саранск, 2012. — С. 55-63.
• Жулина М. А. Аспекты формирования региональной программы развития туризма Республики Мордовия / М. А. Жулина, М. И. Фирстов, Н. Е. Нехаева // Вестник НИИ гуманитарных наук при Правительстве Республики Мордовия. — 2013. — № 2 (26). — С. 35-43.
• Жулина М. А. Потенциал Республики Мордовия для создания этнических туров / М. А. Жулина, Ю. С. Терехова // Географические проблемы сбалансированного развития староосвоенных регионов. сб. научных ст. Междунар. научно.-практ. конф. — Брянск: Брянский гос. ун-т, 2012. — С 74-79.
• Жулина М. А., Кицис В. М. Локальные туристские кластеры Республики Мордовия: формирование и функционирование // Современные проблемы сервиса и туризма. — 2016. — Т. 10, № 1. — С. 75—82.
• Захарова А.А. Экономико - статистическая оценка развития индустрии гостеприимства в регионе (на примере республики Мордовия) // Огарёв-Online. — 2014.
• Калабкина И. М., Кицис В. М. Возможности получения туристической ренты в Мордовии // Инженерные технологии и системы. — 2000. — С. 30—35.
• Формирование туристско-рекреацион-ного потенциала Республики Мордовия / И. Г. Кильдюшкина, К. Г. Киселева, Г. Щукин, Л. Н. Липатова, А. В. Булавин; НИИ гуманитар. наук Правительстве Республики Мордовия. Саранск, 2016. 237 с.
• Кицис В. М., Князькина А. Ю. Возможности организации промышленного туризма на предприятия пищевой промышленности Республики Мордовия // Современные проблемы территориального развития. — 2017.
• Кицис В. М., Вавилова А. В. Туристско-инфраструктурный потенциал экологического туризма сельской местности республики Мордовия // Современные проблемы сервиса и туризма. — 2017. — № 4. — С. 57—67.
• Козин В. В., Кирдяшкина Т. И. Мониторинг посещаемости объектов этнического туризма в Республике Мордовия в 2017 г. // Финно-угорский мир. — 2018. — № 3. — С. 86—94.
• Кусерова А. И. Спортивно-событийный туризм как основа развития туризма в Мордовии // Огарёв-Online. — 2014.
• Леонов В.В. Этнокультурный экотуризм в Мордовии // Регионология. — 2011. — С. 309—311.
• Майкова С. Э., Окунев Д. В. Исследование перспектив формирования и развития финно-угорского туристского кластера в республике Мордовия // Регионология. — 2018. — Т. 26, № 3. — С. 438—459.
• Морозова М. К. Разработка экскурсионного тура по районам мордовского края // Российские регионы: взгляд в будущее. — 2017. — С. 233—242.
• Мынов А. А., Тесленок К. С. Цифровое моделирование рельефа как первый этап выявления мест возможного размещения центров горнолыжного туризма в республике Мордовия // Огарёв-Online. — 2015.
• Нехаева Н. Е. Развитие этнического туризма в Республике Мордовия как основа сохранения культуры мордвы // Современные проблемы территориального развития. — 2018. — № 1.
• Носонов А. М., Макаева Е. А. Проблемы и перспективы развития экологического туризма в Республике Мордовия // Географические исследования территориальных систем природной среды и общества: Межвуз. сб. науч. тр., вып. 2. Саранск, 2003. С. 75-80.
• Пресняков В. Н., Уткина М. В. Рекреационные возможности республики Мордовия // Псковский регионологический журнал. — 2011. — С. 96—100.
• Пресняков В. Н., Жулина М. А. Народные промыслы республики Мордовия и этнический туризм // География и туризм. Пермь: Пермский государственный национальный исследовательский университет, 2010. С. 156—166.
• Пресняков В. Н. Природный и духовный потенциал Мордовии для отдыха и туризма. // Центр и периферия. Саранск: Мордов. кн. изд-во, 2007. С. 68 — 72
• Ржанова С. А. Интеграционные формы взаимодействия национальных сообществ в формате культурного туризма и этножурналистики (на примере Республики Мордовия) // Вестник Марийского государственного университета. — 2020. — Т. 14, № 1. — С. 53—57.
• Приоритетные виды развития туризма в Республике Мордовия / С. В. Сарайкина [и др.] // Известия Смоленского государственного университета. Смоленск. — 2011. — № 4. — С. 47-55.
• Сарайкина С. В. Православные религиозные объекты республики Мордовия и их роль в развитии религиозного туризма // Инженерные технологии и системы. — 2015. — Т. 25, № 2. — С. 114—121.
• Сарайкина С. В., Емельянова Н. А., Нехаева Н. Е. Социальное значение детского туризма в регионе // Регионология. — 2017. — Т. 25, № 4. — С. 573—587.
• Сарайкина С. В., Сотова Л. В. Рекреационно-туристический потенциал особо охраняемых территорий Республики Мордовия // Псковский регионологический журнал. — 2008. — С. 117—120.
• Сураева-Королева С. Г. Состояние и перспективы развития автотуризма в Республике Мордовия // Российские регионы: взгляд в будущее. — 2017. — С. 242—265.
• Терешкин И. П., Тесленок С. А. Отбор и характеристика объектов для разработки и картографирования туристического велосипедного маршрута по монастырям Мордовии // Огарёв-Online. — 2016. — С. 1—7.
• Челмакина Л. А., Бурнаева М. В. Оценка потенциала и направления развития этнотуризма в республике Мордовия // Финно-угорский мир. — 2014. — № 4. — С. 104—107.
• Челмакина Л. А., Москалева Е. Г., Саранцева Е. Г. Развитие этнотуризма как важный фактор социально-экономического развития республики Мордовия // Финно-угорский мир. — 2016. — № 2. — С. 113—118.
• Чугунова О. А. Формирование туристского образа Республики Мордовия в региональных средствах массовой информации // Природно-социально производственные системы регионов компактного проживания финно-угорских народов: межвуз. сб. науч. трудов. — Саранск: Изд-во Мордов. ун-та, 2012. — С. 85.
• Республика Мордовия. Отдых и туризм: Проспект туристического агентства «Юнион». Саранск: Мордов. кн. изд-во, 2006. 44 с.

Ссылкатне

• Национальный календарь событий. Мордовия
• Система обмена туристской информацией. Мордовия
• Официальный туристско-информационный портал Республики Мордовия