Равкужень финно-угратне

Рувики лопаста

Равкужень финно-угратне (руз. Финно-угры Поволжья)[1], Равкужень (во́лжскяй) фи́ттне — финно-угрань нароттнень территориальнай группасна, конат эряйхть Кучка Раваса: Мокша, Сура, Ветлуга ляйхнень бассейнасост и Вятка ляйть види ширдень трванцты прай ляйхнень эзга. Теест кандовихть мариецне, конат корхтайхть горномарийскяй, луговомарийскяй и кельме-ши валгомань ширень марийскяй кяльса, мокшетне, конат корхтайхть мокшень кяльса, и эрзятне, конат корхтайхть эрзянь кяльса. Мокшетнень башка этнографическяй группасна — каратайхне. Эрзятнень этнографическяй группадост кафта — терюхаттне и шокшетне.

Марийскяй и мокшень, эрзянь кяльхнень тяда инголе лувондозь финно-угрань кяльхнень волжскяй башка подгруппакс. Но, сепаратнай параллелень аф улемать сюнеда, тяни тя группировкась лувондови аньцек географическяйкс, а марийскяй, мокшень и эрзянь кяльхне лувондовихть финно-волжскяй подгруппань башка тарадкс, ряцок прибалтийско-финнонетнень и саамскяйхнень мархта[2][3][4].

Лувкссна

Лувоматнень коряс, XVI-це векть пенцты мокшетнень и эрзятнень лувкссна ульсь пцтай 150 тёжянь ломань, 1719-це кизоня — 107 тёжянь ломань. Российскяй империянь 1897-це кизонь эряйхнень сёрмадомаснон коряс мокшеда и эрзяда лувондовсь 1025 тёжянь ломань, 1917-це кизоти синь лувкссна путневсь 1200 тёжянть ваксс. СССР-нь сёрмадоматнень коряс мокшеда и эрзяда ульсь: 1926-це кизоня — 1340 тёжянь, 1937-це кизоня — 1249 тёжянь, 1939-це кизоня — 1456 тёжянь, 1959-це кизоня — 1285 тёжянь, 1979-це кизоня — 1192 тёжянь ломань. 1989-це кизоня эряень сёрматфтомать коряс СССР-са (руз.) (мок. мокшеда и эрзяда лувондовсь 1154 тёжянь ломань (пцтай сембе мокшетне и эрзятне эрясть Советскяй Союзса), синь эздост РСФСР-са — 1072,9 тёжянь ломань, тяконь лувксса Мордовскяй АССР-са эрясь 313,4 тёжянь ломань, мезсь ульсь республикань сембе эряйхнень эзда 32,5 процентсь.

Шокшетне эряйхть Мордовиянь Теньгушевскяй райононь 15 эряма васттнень (велетнень-меснень) эса и Торбеевскяй райононь 5 эряма васттнень эса. Марстонь лувкссна 10 000 малава ломань.

Эрямопингсь

XX-це векть ушетксста сембода оцюфне шинь стяма ширень финскяй нароттнень эзда, марстонь лувкссна 1 млн малава ломань и конат эряйхть Нижегородскяй, Пензенскяй, Тамбовскяй, Симбирскяй, Казанскяй, Самарскяй, Уфимскяй, Оренбургскяй и Саратовскяй губерниятнень эса.

XII-це векть ушетксста Гильом де Рубрук (руз.) (мок. васенцеда корхтай мокшетнень колга (Moxel). Эрзятнень колга (арису) васенцеда корхтави X-це векста хазаронь оцязорть Иосифонь сёрмаса[5]. Сяда мельдень пинкнень мокшетне и эрзятне няфнихть пря Рязанскяй и Суздальско-Нижегородскяй княжестватнень историясост.

Мокшетне и эрзятне ульсть славяттнень, остготтнень (руз.) (мок., балттнень, скифнень и сарматонь пляматнень культурнай влиянияснон ала, конат кунардонь пинкнень эрясть мархтост шабракс.

Хорографическяй лепнень коряс, мокшетне и эрзятне эрясть кунардонь пинкнень Равть, Окать, Сурать и Мокша ляйти прай ляйхнень ётка вастова, ингольдень Нижегородскяй, Симбирскяй, Пензенскяй и Тамбовскяй губерниятнень эса; сяда тов шинь стяма шири синь ётасть эряма ни сяда мекольдень пинкнень, мзярда потасть руснень эзда.

Равкужень финно-угратнень мархта русне ушедсть тюрендема 1103-це кизоста сявомок, мзярда летописьти сувафтфоль куля муромскяй князть Ярослав Святославичень мокшетнень лангс врьгятеманц колга: «тюрсь Ярослав Мордвать мархта март ковонь 4-це шиня и сяськф ульсь Ярослав». XIII-це векста русне кармасть сяськондемост «поганскяй мордвать», тя вииякшнесь мзярда 1221-це кизоня мокшэрзянь модатнень малас путфоль Нижняй Новгород ошсь. 1236—1237-це кизотнень эрзятнень и мокшетнень модасна марнек розаряфоль Батыйть мархта.

Иван IV Казанть лангс походонзон меле 1540-це кизотнень синь ётасть Москуть кядялу. XV—XVII-це векнень паннесть ясак Касимовскяй оцязорхненди. Мокшэрзятне отькорьста няфтезь пряснон Степан Разинонь и Емельян Пугачёвонь кеподемаснон эса.

Татархне азорондасть, сембода пяк, лямбе ширеса, коса эрясть мокшетне, тя пингть эрзятне лядондсть эсь князьснон кядяла, конат сяда тов тюрсть руснень каршес Нижняй Новгородть видеса, теест тя тевса лездсть татархне. 1377-це кизоня эрзятне ордынскяй оцязоронь цёрать Арапшить вятеманц ала, тапазь нижегородецнень и москувонь князть Дмитрий Донскяень ушмовиензон Пьяна ляйть видеса. Тя тапамась ашезе лоткафта, тяка пингть, рузонь колонизациять, и нижегородскяй, рязанень и москувонь княснень кядялу мокшетнень и эрзятнень фатямасна мольсь валом-валом ушедомок XIV-це векть песта. Грознайть молемасонза Казань ошть каршес ульсть и темниковскяй князсь Еникеев, и сонь кядялдонза ащи мокшетне.

Казанть сявомда меле эрзятнень пялькссна явовсть баярхнень ёткова; лядыксне аф лама пингс сувасть оцязоронь вотчинатненди, но меле явондовсть монастырьхненди и помещикненди, васендакиге синь христианствати шарфтоманкса. Рузонь помещикнень ваксса васьфневихть и туземнай мурзат и княсть, конат ётасть христианствав, (кепотьксонди княсне Баюшефне). Москуть кядялу повомась няфтезе прянц васендакиге мокшетнень и эрзятнень кядьста модань сявомаса и лангозост стака дацькянь путомаса, мезсь, улема, и арась туфталкс ламоц бунттнень и кеподематнень эса тюремати (васенце самозванецонь эвондамань пингста сявомок и Пугачевти молемс), а стане жа Шинь стяма шири ворьгодемати. XVII-це векть пялестонза ни мокшетне и эрзятне эряйхть Равть фтала, а XVIII-це векста тушендыхть эряма Самарскяй, Уфимскяй и Оренбургскяй губерниятнень эзга. Сятне, конат лядонцть ингольдень вастсост сяда и сяда пяк рузыякшнесть, кой-конашкада вихца кстиндамать вельде (сембода пяк XVIII-це векть пялеста). Од кемамас сувафтфне мезевок ашесть шарьхкотькшне од религиять эса, а сяда афкуксонь язычникне сязендезь мяштьстост крёснень и лазондозь шкайнятнень; эста синь каршезост прважсевсть командат и муворуфне наказакшневсть и нльне плхневсть. Тяряфнематне вельмафтомс «сире кемамать», хуш и христианскяй шарьхкодемань формаса, ульсть нинге XIX-це векть ушетксста («Кузя-шкай»). Сембе сяка, мокшетне и эрзятне рузыякшнесть, и Равть фтала, и тя рузыямась тоса мольсь сяда курок, афкуксонь мокшэрзянь модатнень лангса эряйхнень коряс: нльне эрзятне, тоса эрязь, сявондезь эсь шабраснон эзда аф аньцек кяльть и эрямань-ащемань койхнень, но и религиять лангс ваномать; заволжскяй мокшетнень и эрзятнень ёткса сидеста васьфневихть раскольничай сектатне «Шкаень Ломатть», «Собеседникт» и лият. Мокшетнень эсь модаснон лангса рузыямась стане жа сатсь оцю сатфкст; ламоц велетнень нльне лемснон коряс аш кода аерфтомс руснень эзда. Сяда кемоста мокшетне кирдьсазь эсь лацонь ширеснон Пензенскяй губерниять кельме ширесонза, Краснослободскяй, Наровчатскяй и Инсарскяй уезттнень эса; но и тясонга синь велесна, конатнень перьф эряйхть русне, сядонга пяк рузыякшнихть, мезти лездыхть китнень цебярьгофтомась, вирьхнень керомасна, лия васту покодема тушендомась и, мекпяли, школась. Мокшетне и эрзятне ланга ванозь коданга аф аердыхть руснень эзда.

Смирновонь ванфонц коряс, мокшетнень ёткса васьфневихть сяда лама эрь кодама типонь коряс ломаньда эрзятнень коряс; акша шяярьхть и уле сельмот сяда сидеста васьфневихть эрзятнень ёткса, мокшетнень ёткса васьфневихть и равжа тюсонь шяяярь мархтот и сяда шобда тюсонь кедь мархтот, путьксне шамасост сяда ёмлат-шуванят. Мокшетнень и эрзятнень сересна фкя лацот, но мокшетне, улема, ронгс коре сяда келихть (сембода пяк аватне)[6]. Ули аф фкаксши авань щамсовок: мокшавась канни панар и понкст, и панароц сонь валгонды аф кочкярязонза, кода эрзявать, а кирневи карксонц видеса; панарть ланга эрзявась канни кафтан, сон лемневи шушпанкс, мала черемискань щамти. Эрзяватне прясост каннихть покаряв кокошникт сюра лаца лисьфкя мархта, а мокшаватнень пряс путомкасна сяда малат черемисненди и кой-коста полафневи нардамаса или руцяса, конат ашкоряваихть чалма лаца (афкукс, пряса каннемкатне улендихть эрь кодамот, эрь аймакть сонценнет). Мокшаватне аф каннихть «пулайхть» — тя фталда пети сотневи мазоптома кувака сюрелда мархта, тяфтапт щакшнихть эрзяватне. Шинь стяма шири Равть эзда ащи модатнень эса финно-угрань населениять оцюшканц тисазь эрзятне. Мокшетнень и эрзятнень эряма койсост, синь эряма вастсост, модать лангса покодемаснон коряс ванфтовсь кржа эсь лацоннеда, хуш кунардонь пинкнень синь велесна и кудсна аердсть сяда пяк руснень эзда и кудсна-велесна путфольхть сяда ичкозьге фкя-фкянь эзда, кудсна ащесь пирьф кучкаса, а кда кудсь путфоль ульця шири, эста вальмасна ванцть аньцек пирьф шири. Кой-кона васттнень эса синь промысласна тя — поташень (руз.) (мок., канцёр ваень тиемась, кудонь котфонь кодамась (эрзятнень кельгома тюссна — акшесь). Искусствать лангс мокшетне и эрзятне ваныхть сяда озадонь седихть чувашнень и черемиснень коряс, конат, кепотьксонди, ламоц паршихнень мазопнесазь керсефса; аньцек аватне сяда ваныхть эсь щамснон мазоптоманц меле и старандазь сюреса сёрматкшнесазь эсь панарснон и пряс путомкаснон. Свадьбань койхнень и обуцятнень эса ванфтовсть нинге кунардонь пингонь койхне, кунардонь пингонь рьвяямань и родовой правань пильгокитне. Родонь-плямань эряфть лятксонза няевихть атянь-атянь культть ваномаса, конань ули кода няемс калмамань койхнень, поминкатнень эса. Мокшетнень и эрзятнень ванфтовсть нинге лама языческяй койсна, конат ванфтовсть пакшень-пакш, тапаряфста и тя аф максси одукс кочкамс сяда видеста кунардонь теологиять. Содаф аньцек, што эрзятне и мокшетне почитандазь ваймопожфнень, ваныхнень, конат няфневсть антропоморфнайста и кой-конашкада шоворсть рузонь домовойхнень, водянойхнень и лешайхнень мархта и стак тов. Пшкятькшнесть тяфта жа шити, атямти и ёндолти, заряти, вармати и стак тов. Улихть кода няемс Шкай (менель) и Шайтанть ёткса дуализмань — антагонизмань пильгокитнень, конатнень вельде тифт, тяконь лувксса, Алганжейхне (урмань каннихне). Мокшетнень и эрзятнень ванфтовсть озкссна, конат стане жа лемтьфт христианскяй илатненди[7].

Лятфтамат

  1. ↑ Финно-угры Поволжья Вв исследованиях краеведов XIX – начала XX в. web.archive.org. Дата обращения: 12 декабрьста 2025.
  2. ↑ Bereczki, Gábor. Geschichte der wolgafinnischen Sprachen // The Uralic languages: description, history and foreign influences. Handbuch der Orientalistik 8: Handbook of Uralic studies 1; Leiden: Brill, 1988. S. 314—315.
  3. ↑ Kuznecova Festschrift. web.archive.org. Дата обращения: 12 декабрьста 2025.
  4. ↑ К реконструкции лингвистической карты Центра Европейской России в раннем железном веке | Журнал «Арт» — культура и история, литература и искусство Республики Коми. web.archive.org. Дата обращения: 12 декабрьста 2025.
  5. ↑ Judah Halevi. Kitab al Khazari by Judah Halevi, free ebook download - Global Grey.
  6. ↑ И. Н. Смирнов, «М. Историко-этнографический очерк» в «Известиях Общества археологии, истории и этнографии при Казанском университете» за 1892—95 гг.; лучшая новейшая монография Мордвы.
  7. ↑ Мельников П. И. Очерки мордвы. — Саранск: Мордов. кн.изд-во, 1981. — 134 с.

Литературась

  • Смирнов И. Н.. «М. Историко-этнографический очерк» в «Известиях Общества археологии, истории и этнографии при Казанском университете» за 1892—95 гг.
  • Мордва // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1890—1907.
Сявф"https://mdf.ruwiki.ru/w/index.php?title=Равкужень_финно-угратне&oldid=418072"-ста