Мариецне

Рувики лопаста
Аф эряви тапарякшнемс мерять — лия финно-угрань народть мархта.
Мариецне
Тяниень лемоц мар. мари, марий, мары, маре, мере, мӓрӹ
Лувкссь и эряма вастсь
Марнек:
  • 557 000 ломань

 Россия
423 803 (2021 кизось)[1], 547 605 (2010 кизось)[2], 604 298 (2002 кизоня эряень сёрматфтомась)[3]

 Казахстан:
5285 (2021 кизоня эряень сёрматфтомась)[4]
 Украина:
4130 (2001 кизоня эряень сёрматфтомась)[5]
 Белоруссия:
416 (2009 кизоня эряень сёрматфтомась)
 Эстония:
225 (2021 кизоня эряень сёрматфтомась)[6]

 Латвия:
220 (2023 оценкась)[7]
Колганза
Археологическяй культурась Ананьинскяй культурась
Городецкяй культурась
Кунардонь марийскяй культурась
Кяльсь марийскяй, горномарийскяй, рузонь
Религиясь марийскяй коень кемамась, православиясь
Расань типсь европеоиднай расась сублапоноиднай типсь субуральскяй типсь[8]
Сувай  Суоми-угрань раськеть[d]
Раднянь нароттне мерятне, мокшетне, эрзятне, удмурттне, чувашне[9]
Эвондамац волжскяй фиттне
Логотип РУВИКИ.Медиа Мариецне

Мариецне, марихне, мари ломаттне (руз. мари́йцы) (мар. мари, марий, мары, маре, мере, мӓрӹ; революцияда ингольдень рузонь лемсь — черемисне[10][11]) — Россияса финно-угрань народ, конань оцю пяльксоц эряй Марий Эл Республикаса и Башкортостан Республикать кельме ширесонза. Ня кафта региоттнень эса эряй сембе мариецнень эзда, а эздост 424 тёжянь ломань (2021), 72 % (52 % и 20 %). Лядыкс мариецне сратфт Равкужень и Уралонь ламоц областтнень и республикатнень эзга. Синь основной эряма вастсна — Вятка и Ветлуга ляйхнень ёткса.

Явфнихть мариецонь ниле группат: пандоннетне (эряйхть Рав ляйть види и пакшонь-пакш кержи ширесонза Марий Элть шивалгома ширесонза и шабрань региоттнень эса), кельме-ши валгомань ширеннетне (Кировскяй областть лямбе-ши валгома ширесонза и Нижегородскяй областть кельме-шинь стямань ширесонза), луганнетне (марийскяй народть ламошкац, эряйхть Рав-Вятка ляйхнень ёткса) и шинь стямань ширеннетне (эвондасть Рав ляйть лугань ширеста Башкирияв и Приуральяв эряма сафнень эзда) — мекольце кафта группатнень историческяй и кялень малашинкса пуропнесазь марс и лемнесазь лугань шинь стяма ширень мариецокс.

Корхтайхть марийскяй (лугань шинь стяма ширень марийскяй), пандонь марийскяй и кельме-ши валгомань ширень марийскяй кяльса, кона кандови уральскяй кялень семьянь финно-угрань группати. Мариецнень ламошкасна тячи корхтайхть кафта кяльса, содасазь стане жа рузонь кяльть. Шкайти кемамать коряс — православнайхть. Тяфта жа ванфтовсь кунардонь пингста, сембода пяк шинь стяма ширень мариецнень ёткса, марийскяй коень кемамась (руз.) (мок..

Этногенезсь

Маринь пляматнень эвондама вастсна минь эрань I-це тёжянь кизотнень — Унжа, Ветлуга ляйхнень бассейнасна и Равть виде ширдень трвац Сура и Цивиля ляйхнень ётка вастса. Маритненди юркс арасть шинь стяма ширдень дьяковецне, ананьинецнень уноконь уноксна и, улема, мекольдень городецкяй пляматнень (мокшэрзятнень атянь-атясна)[12].

Тя аймакста мариецнень атянь-атясна балттнень и славяттнень ширде люпштамать сюнеда тушендсть шинь стяма шири, мянь Вятка ляйти и лямбе ширде Казанка ляйти самс[13]. Шинь стамань ширеса кунардонь пермяттнень (азелинскяй культурась (руз.) (мок.) мархта тефне-сотксне вятсть аф фкя лацонь ширетненди, конат ульсть кержи ширень ляйтрвань и види ширень ляйтрвань маринь пляматнень ёткса[12]. Ня миграциятнень сюнеда мариецнень эряма вастсна келемкшнесть Рав ляйть кафцьке трванзон эзга Казанка ляйть келемкшни вастстонза ушедомок Ока ляйть келемкшни вастонцты самс. Равть види трвасонза кунардонь мариецне занцезь аф аньцек тяниень Горномарийскяй районть моданзон, но и кельме ширень Чувашиять. Кельме ширеса синь эряма вастснон границац ульсь Котельнича ошть видеса.

Шинь мадома ширеса мариецне ульсть шабракс Унжа ляйть кувалмос костромской мерять шинь стяма ширдень пяльксонц мархта. Нароттнень ёткса, кода содазь археолокне и лингвисттне, пяк ламоль марстоннеда, мезсь кой-конашкада мярьги корхтамс ветлужскяй марить и костромской мерять ёткса этнокультурнай общностть колга[14].

Эрямопингсь

Юрса ащи статьясь: Мари Элть эрямопингоц (руз.) (мок.

Ингольдень эрямопингсь

Лувондови, што васенцеда лятфневихть мариецне (лат. Impiscaris) VI-це векста, лятфнесыне синь готскяй историксь Иордан (руз.) (мок.[15].

Марий Элть масторкотфоц (2006—2011), сидеста ноляви тевс марийскяй национальнай масторкотфть эземс.
Финно-угрань нароттне минь эрань 1—2 тёжянь кизотнень ётка пингстост

Хазаронь кагаттне[16], киевонь княсне[17] аф фкя пингста лемнезь «черемисонь» народть теест дацькянь пандыкс. XI-це векста мариецне ушедсть пандома Волжскяй Булгарияти харадж (руз.) (мок. и джизья (руз.) (мок., но ашесть сувсе эзонза.

VIII-це векста сявомок мариецне ушедсть шаштома шинь стяма шири, коса синь ушедсть кирдема соткст удмурттнень мархта. Кафцьке нароттнень айнемаснон коряс удмурттнень матрамасна ульсь тюрема мархта. IX—XI-це векнень пингста мариецне занясь марнек Вятка и Ветлуга ляйхнень ёткса ащи модатнень, панезь и вастонь-вастонь ассимилировандазь ингольдень эряйхнень[18].

XII-це векста Поветлужьяса тиевсь Ветлужскяй кугузствась (вождествась) —маринь пляматнень марстомомасна, кона ульсть XV-це векть ушетксонцы самс[12].

XII-це векть ушетксста кой-кона марийскяй пляматне кармасть пандома дацькя рузонь княжестватненди. 1170-це кизоста летописне васенцеда лятфнесазь, мзярда мариецне тюрсть военнай действиятнень эса: Галичень княcне сиводезь ветлужскяй и вятскяй мариецнень эсь ётковаст тюрематнень пингста[19].

1171—1172-це кизотнень лятфневи рузонь Городец Радилов ваксарошсь, кона путф Рав ляйть кержи трвасонза маринь модатнень лангса. Сон арась рузонь колонизациянь центракс Кучка Равса. Сяда тов мариецне и синь рузыяф уноконь уноксна арасть Городец ошти эряйкс[20]. Нинге фкя рузонь влияниянь центракс марийскяй модатнень лангса арась Галич Мерский-сь, кона лятфтафоль 1274-це кизоня.

Вятскяй масторть колга Повестть (руз.) (мок. коряс, 1181-це кизоня ушкуйникне (руз.) (мок.фатязь Кокшаров марийскяй ошкять — тяниень Котельнич ошсь, кона арась Вятскяй модань центракс[21].

Волжскяй Булгариять срадомдонза меле мариецне сувасть Зрнянь Ордати. Марийскяй модатне ульсть Ордать уша-пензон эса, сяс синь мельгаст кемоста ашесть вана. Ордань азорондайхне сяда кемоста ванцть Панда ширеть мельге. Лугань ширеса маринь модатнень мельге ваномась мольфтевсь зрнянь ордань военнай поселениять вельде, кона тяни содаф кода Мари-Луговской селищась, и лятф булгаронь ошнень вельде[12].

XIV—XVI-це сядокизотне

XIV-це векста мариецненди кельме ширде шабракс арась Вятскяй вечевой республикась (руз.) (мок.. XIV-це векть омбоце пялестонза вятчаттне панезь ни Кучка Вятка и Пижма вастста мариецнень и удмурттнень. Вятскяй модать мархта каршек ащемаса кассь уржумскяй и малмыжскяй маринь княснень влияниясна.

1372-це кизоня нижегородскяй княсне Сурать келемкшни вастсонза путозь Курмыш ваксарошть, мезсь лездсь эвондамс русненди Сура ляйть фтала — мокшэрзятнень и пандонь мариецнень модаснон лангса.

Ушкуйникнень грабамань врьгятнемасна панжезь марийскяй народти XIV—XVI-це веконь апак лотксек войнань пингть, коса няфнезь пряснон Москувонь Великай княжествась, Вятскяй республикась, Великай Устюгсь и Галичскяй княжествась, сяда меле — Казанскяй ханствась.

1438-це кизоня Казанскяй Ханствать эвондаманц мархта сонь и мариецнень ёткса ушеткшнихть латцевома союзническяй и конфедеративнай соткст[20]. Марийскяй модатне сувсесть Галицкяй, Алатскяй, Арскяй ханствань даругатненди. Казанскяй ханствать улеманц пингста (1438—1552 кизотне) маринь модатне арасть васенце аренакс Москуть и Казанть ёткса вятеви тюрематненди.

XV—XVI-це векнень мариецне эрясть Окско-Сурскяй и Унженско-Ветлужскяй ляй ёткнень эса, тяниень Чувашия Республикать кельме и шинь мадома ширесонза. Эряма вастснон кельме ширдень границасна ётнесть Унжать, Ветлуга ляйхнень ушетксснон маласа, Пижма ляйть и Кучка Вяткать бассейнаса. Шинь стяма ширень аймакокс ульсть Вятка ляйть алдонь вастонза. Мариецне тя пингста ашесть уле фкя народкс, ульсть плямань марстомомат; летописненди содафт «пандонь черемисась», «кокшакскяй и ветлужскяй черемисась», «лугань черемисась». А. Г. Бахтин ункстазень мариецнень лувксснон XVI-це векста 70-120 тёжянь ломаньца. Сембода лама эряйда ульсь Равть види трвасонза и аймаксь, кона ульсь Ёмла Кокшагать эзда шинь стяма ширеса . Кржа эрясь мариецта Линда и Оцю Кошага ляйхнень ёткса[22]. XV—XVI-це векненди кандовихть лятфтаматне мариецнень колга, конат эрясть Кама и Белая ляйхнень эзга, конатнень эзда сявсазь ушетксснон шинь стямань ширень мариецне. XVII-це векста Закамьяв, Приуральяв и Башкирияв эряма ётайхнень лувкссна кассь[23].

Ули арьсема, што XVI-це векста мариецнень ёткса ушедсь нолявома тевс колма паксянь сокамань-видемань системась. Витцесть сура, полба, розь, иляназ, канцёр. Сокамась-видемась сяда вихонзафоль пандонь и лугань мариецнень ёткса. Ветлуженскяйхнень и кокшайскяйхнень ёткса макссевсь оцю васта жуватань кирдемати, охотендамати, калонь кунцемати, вирень медень добувамати. Валютакс нолявсть тевс уронь и паргана пана мархта лия ракшань кеднятне. Тястоконь кшнинь рудать таргамац стакаль, сяс сон вешсь марстонь виень путома и маринь модатнень эса пуропневсть «апшат-белякт» («кузенцянь общинат») — кузнецонь производствань центрат, конат васендакиге сотфтольхть военнай вешфкснень мархта. Казанскяй ханствать потмоса трудть явомста мариецнень лангс путфоль сяда военнай функциясь, а аф экономическяй[24].

1523-це кизоня Василий III стяфтсь мариецонь Цепель ошть вастса Сура ляйть келемкшни вастсонза Васильсурск ваксарош. Пандонь ширесь сувась Рузонь государствати. Герберштейн сёрмады, што маритнень пяльксснон великай князсь ётафтозень литовскяй масторкитьксть лангс сянкса, мес лангозост арьсесть, што синь полафтсть государствати, коста синь ворьгодсть Литвав[25]. Синь эздост сявондьсы эсь ушетксонц украинскяй чемерисонь пандонь марийскяй этническяй группась, кона ворьгодсь Днепрать эзга алу Волыньть шири. 1551-це кизоня Иван Грознайсь чувашень модатнень лангса стяфтсь Свияжск ваксарошть, сяда меле Панда ширень лядыкс мариецне, чувашне, мокшэрзятне макссть присяга Иван Грознаенди[26].

1552-це кизоня Казанскяй ханствать сявомдонза меле тяда инголе сонь эзонза сувси марийскяй модатне арасть Рузонь оцязорксшити пяльксокс[27] и ётасть Казанскяй приказть кядялу. Москуть кядялу васенцеда повомать мельге мольсть поволжскяй нароттнень колма кеподемасна — 1552—1585-це кизонь Черемисскяй войнатне, конатнень эса оцю васта занясть мариецне[28][29]. Войнатне аделавсть марийскяй модатнень рузонь государствати марнеконь петфтомаснон мархта. Мариецнень модаснон лангса строяфтольхть рузонь ваксарошт: Кокшайск (1574), Малмыж (1580), Козьмодемьянск (1583), Царевококшайск (1584), Царевосанчурск (1584), Уржум (1584), Яранск (1584). Марийцненди ашезь мярьгондев тиендемс кузнецонь и сиянь тефт, ашезь мярьгондев мишендемс оружия, военнай снаряженият, металлхт, мишендемс-рамсемс покодемань металлическяй орудия, ашезь мярьгондев мишендемс металлста изделият, эрямс ошса и лядондомс ошу удома. Мариецне паньфтольхть оцю ляйхнень трваста, тяконь лувксса Равста и Вяткаста[30]. Черемисскяй войнада меле шиса лятф марийскяй княснень ашезь сувафта дворянскяй сословияв, кода татаронь козя содаф ломаттнень. Марийскяй народсь валом-валом арась сокай-види народкс, конат покодсть велень хозяйстваса и охотендасть паргана пона ракшатнень лангс.

Лугонь и пандонь «черемисне» (мариецне) Россиянь картаса (1593)

XVII-це сядокизось

Писцовай книгатнень коряс, XVII-це веконь 20—30-це кизотнень понизовай ошнень маласа эвондасть рузонь сокайхнень-видихнень васенце эряма вастсна[31]

XVII-це векста русне эрясть ни Ветлугать види ширдень трвасонза. Ветлужскяй мариецнень эряма вастсна кержи ширень трваса ульсть тя пингть условнай масторкитьксокс Москувонь царствань Замосковнай крайть и Понизовьять, Вятскяй модать ёткса[32]. XVII-це векста Россиять аймакова явоманц коряс, маринь модатне кандовсть Понизовьяти.

Карательнай мератне, экономическяй и религиознай люпштаматне вятсть сянди, што маринь ломаттне ульсь марнек паньфт кучка Приветлужьяста Уста ляйть келемкшни вастонцты. Крайть кельме ширесонза Ёмла и Оцю Какшаса пуроптфоль эсь лацонь марийскяй «резервация», кона 1661-це кизоня максфоль Макарьевскяй монастырть кядялу[33].

Лугань, пандонь, ветлужскяй мариецне отькорьста няфтезь пряснон Степан Разинонь крестьянскяй войнаса (1667—1671). Восстаниять тапамда меле оцязоронь власттне полафтозь марийскяй модатнень лангса азорондамань порядкать. 1672-це кизоня «сембе Казанскяй уездонь ясачнай ломаттнень челобитьяснон коряс», ульсь сувафтф ясаконь коскамань од порядка: дворяттнень, баяронь иттнень, приказной ломаттнень вастс, ясачнай пандоматнень кармасть кочксема тястоконь ломаттнень ёткста кочкафне. 1677-це кизоня ладяфтольхть тястоконь эряйхнень эзда толмачень (руз.) (мок. (ётафтыень) кочкамат — «ясачнайхнень эзда панда алонь велетнень эзда, конат рузонь кяльти маштыхть»[31].

XVII-це веконь 80-це кизотнень пингста Равкужень сисем уезттнень эса (Казанскяй, Кокшайскяй, Козьмодемьянскяй, Уржумскяй, Царёвококшайскяй, Царевосанчурскяй, Яранскяй), лувоматнень коряс, эрясь 70,1 тёжянь мариец (и аляда, и авада). Васенце ревизияса (1723 кизоня) сёрматфоль 74 тёжянь мариец[31].

XVIII-це сядокизось

1722-це кизоня мариецнень и мокшэрзятнень лангс путфоль рекрутонь повинностсь — синь кармасть служама российскяй армияса[34]. XVIII-це векть ушетксста мариецнень ламошкасна ульсть ётафтфт ясачнайхнень эзда казеннай (государственнай) сокайхнень-видихнень лувксс. Ня туфталхнень сюнеда, а тяфта жа государственнай каяфксонь, повинностень и петровскяй пингонь трудовой мобилизациятнень курокста касомаснон сюнеда мариецне ушедсть ётнема эряма башкиронь модатненди. ХVIII-це векть васенце нилеце пяльксстонза мариецнень лувкссна кирсть разнай уезттнень эса 1/4-ста 2/3-ти молемс эряень сёрматфтоматнень пингста лувфть эзда. Тя вятсь XVIII-це векть кучкаста шинь стямань ширень мариецень этническяй группать эвондаманцты[35]. Кой-кона мариецне, ётамок эряма шинь стяма шири, пяшкодезь уралонь заводонь покоди ломаттнень лувксснон[23].

XVIII-це веконь 30-це кизотнень Равкужень аф рузонь нароттнень Христости кемамати сувафтомасна вииясь. Новокрещенскяй конторань служительхненди удалась кстиндамс мариецнень оцюшка пяльксснон. Но ламотненди тя ульсь шава тевкс, сяда меле ламоц мариецне мрдасть меки язычествати[23]. Феодальнай люпштамась и Христости кемамати шарфтомань тяряфнематне арасть туфталкс, мес марийцнен кирдезь ширенц Емельян Пугачёвонь сокаень-видиень кеподемать.

1775-це кизонь губернскяй реформать вельде маринь народсь явфтфоль мзярошка губерниянь ёткова. Казанскяй губернияв кандовсть: Царёвококшайскяй, Козьмодемьянскяй, Чебоксарскяй и Казанскяй уезттне; Вятскяйти — Царевосанчурскяй, Уржумскяй и Яранскяй уезттне; Нижегородскяйти — Васильскяй и Макарьевскяй уездтне; Костромскойти — Ветлужскяй уездсь[23].

Ня кизотнень эвондась марийскяй сёрмась кириллицать юрса. 1775-це кизоня Казанскяй архиепископсь Вениамин (мирса — В. Г. Пуцек-Григорович) нолдазе маринь кяльса васенце сочинениять.

Россияса мариецнень лувкссна XVIII-це веконь ревизиятнень коряс[12]:

Кизось (ревизиясь) Тёжянь ломань
1719 (1-це ревизиясь) 61,9
1745 (2-це ревизиясь) 79,9
1763 (3-це ревизиясь) 103,0
1782 (4-це ревизиясь) 122,4
1795 (5-це ревизиясь) 145,2

XIX-це сядокизось

1897-це кизонь Марнек Россиянь эряень сёрматфтомать результатонзон коряс, мариецне (шачема кяльсь — черемисскяй), эрясть Российскяй империянь тяфтама губерниятнень эса:[36]

Мариецне Российскяй Империянь А. Риттихонь этнографическяй картаса. 1875 кизось
Губерниясь Аляда Авада Марнек
Вятскяй 69 589 75 329 144 918
Казанскяй 59 963 62 754 122 717
Уфимскяй 39 618 40 990 80 608
Пермскяй 7 765 7 922 15 687
Нижегородскяй 3 232 3 472 6 704
Костромской 1 071 930 2 001
Лия губерниятне 2 280 524 2804
Марнек империяса 183 518 191 921 375 439

Сембе мариецнень лувксста ошса эрясть 0,6 % (2191 ломань)[37].

XX-це сядокизось

1917-це кизонь июльста ётась Марнек Россиянь марийскяй народонь васенце съездсь. Ульсть пуроптфт национальнай организацият — «Марий ушем» («союст» или «маринь обществат»), конат путнесть эсь инголест, васендакиге, культурно-просветительскяй цельхть[12].

1917-це кизонь 25-це августста сявомок, ушедсь нолявома «Ужара» («Заря») газетась[12].

1918-це кизонь 21-це февральста маринь Национальнай съездсь сась мяльс: «Лоткафтомс мари народть „черемис“ лемонц, сявомок мяльс, сонь „аф национальнай“ эвондаманц, полафтомс сонь историянь ширде национальнай „мари“ лемса»[12].

1920-це кизонь 4-це ноябрьста Вятскяй губерниянь Краснококшайскяй, Уржумскяй и Яранскяй уездонь волосттнень эзда ульсь пуроптф Марийскяй автономнай областсь РСФСР-ть лувксса, 1936-це кизонь 5-це декабрьста МАССР-сь. Васенда тя аймакса лувондовсь 338,5 тёжянь ломань, тяконь лувксса 183 тёжянь мариец. 1920-це кизотнень васенце пялестост Марийскяй автономнай областти нинге сувасть Нижегородскяй, Вятскяй губерниянь велет и Татарскяй, Чувашскяй АССР-нь велет. 1926-це кизоня эряень сёрматфтомать коряс национальнай автономияса лувондовсь ни 247,9 тёжянь мариец[12].

Марнек Союзонь эряень сёрматфтомать коряс, марийскяй населениять лувксоц 1926-це кизоня ульсь 428 192 ломань СССР-са и 428 000 РСФСР-са[38]:

Губерниясь Аляда Авада Марнек
Марийскяй АО-сь 117 071 130 908 247 979
Башкирскяй АССР-сь 36 523 42 775 79 298
Вятскяй губерниясь 28 295 31 446 59 741
Уральскяй областсь 8757 10 063 18 820
Казанскяй АССР-сь 6174 6956 13 130
Нижегородскяй губерниясь 1872 2063 3935
Вотскяй АО-сь 1257 1570 2827
Сибирскяй крайсь 503 424 927
Лия региоттне 1343
Марнек РСФСР-са 428 000

Марийскяй народть национально-государственнай тиевомац ня кизотнень отмечаф пандонь маритнень эсь пряснон народкс марямаснон инкса движениять мархта. 1930-це кизонь сентябрь ковста, мзярда тиевсь Горномарийскяй районць Марийскяй автономнай областть лувксса, пандонь мариецнень эзда кой-кит азозь мяльснон пуроптомс Пандонь-марийскяй область и лисемс пандонь маритненди Марийскяй автономнай областьста. Синь тевсна ульсь судендаф, синь паньфтольхть партияста и ламошкасна репрессировандафт[12].

Этногруппатне

  • Пандонь мариецне (пандонь марийскяй кяльсь)
    • Вирень мариецне
    • Украинань чемерисне (барскяй черемисне)
  • Лугань шинь стяма ширень мариецне (лугань шинь стямань ширень марийскяй кяльсь)
    • Лугань мариецне
    • Шинь стямань ширень мариецне
      • Прибельскяй мариецне
      • Уральскяй мариецне
        • Кунгурскяй или сылвенскяй мариецне
        • Верхнеуфимскяй или красноуфимскяй мариецне
  • Кельме-ши валгомань ширень мариецне (кельме-ши валгомань ширень марийскяй кяльсь)
    • Ветлужскяй мариецне
Марийскяй авань щам. XIX — XX-це векть ушетксоц. Казанякяй губерниясь, Российскяй империясь

Лувкссна и куване эряйхть

Маритнень ламошкасна эряйхть Марий Эл Республикаса (290 тёжянь ломань).

Лугань мариецень семья Казанскяй губерниянь Царевококшайскяй уездонь. Российскяй империясь, XX векть ушетксоц

Оцю пялькссь эряй Кировскяй, Нижегородскяй областьса. Сембода оцю марийскяй диаспорась Башкортостан Республикаса (103 тёжянь ломань). Мариецне эряйхть Татарстанца (18,8 тёжянь ломань), Удмуртияса (8 тёжятть ломань), Свердловскяй областьса (23,8 тёжянь ломань) и Пермскяй крайса (4,1 тёжянь ломань), Ханты-Мансийскяй автономнай округса, Челябинскяй и Томскяй областтнень эса[2]. Эряйхть стане жа Казахстанца (4 тёжятть эряй 2009 кизоня и 12 тёжянь эряй 1989 кизоня), Украинаса (4 тёжятть эряй 2001 кизоня и 7 тёжятть эряй 1989 кизоня), Узбекистанца (3 тёжятть ломань 1989 кизоня).

Мариецнень эряма вастсна Приволжскяй федеральнай округса ошева и велева %-са, 2010 кизоня эряень сёрматфтомась
Мариецнень эряма вастсна Уральскяй федеральнай округса ошева и велева %-са, 2010 кизоня эряень сёрматфтомась
Мариецнень эряма вастсна Волго-Уральскяй регионца 2010 кизонь Марнек Россиянь эрянь сёрматфтомать коряс

Мариецнень лувкссна эряень сёрматфтомань даннайхнень коряс (ломань):

1897[39][40] 1926[41] 1939[42] 1959[43] 1970[44] 1979[45] 1989[46] 2002[47] 2010[48]
СССР — 428192 ↗ 481587 ↗ 504205 ↗ 598628 ↗ 621961 ↗ 670868 — —
Российскяй Федерациясь (Российскяй империясь, РСФСР-сь) 375439[49] ↗ 428001 ↗ 476382 ↗ 498006 ↗ 581082 ↗ 599637 ↗ 643698 ↘ 604298 ↘ 547605
Марий Эл Республикась (Марийскяй автономнай областсь, Марийскяй АССР-сь) — 247979 ↗ 273332 ↗ 279450 ↗ 299179 ↗ 306627 ↗ 324349 ↘ 312178 ↘ 290863
Кировскяй областсь (Вятскяй губерниясь) 144918[50] ↘59741 ↘57008 ↘52570 ↘51682 ↘47910 ↘44496 ↘38930 ↘29598
Башкортостан Республикась (Уфимскяй губерниясь, Башкирскяй АССР-сь) 80608[51] ↘79298 ↗ 90163 ↗ 93902 ↗ 109638 ↘ 106793 ↘ 105768 ▬105829 ↘103658
Кировскяй областсь

2002-це кизось: аймаксь, лувкссь, аймаксса талекась:

  • Кильмезскяй, 2 тёжятть, 8 %;
  • Кикнурскяй, 4 тёжятть, 20 %;
  • Лебяжскяй, 1,5 тёжятть, 9 %;
  • Малмыжскяй, 5 тёжятть, 24 %;
  • Пижанскяй, 4,5 тёжятть, 23 %;
  • Санчурскяй, 1,8 тёжятть, 10 %;
  • Тужинскяй, 1,4 тёжятть, 9 %;
  • Уржумскяй, 7,5 тёжятть, 26 %.

Лувкссь (Кировскяй областсь): 2002-це кизось — 38 390, 2010-це кизось — 29 598.

Мариецнень лувксснон талекасна Россиянь райоттнень и ошнень эзга (2010 кизоня эряень сёрматфтомать коряс)

(максфт муниципальнай образованиятне, коса мариецта эряйхнень ёткса 20 % сяда лама):

Мариецнень лувксснон талекасна Россиянь райоттнень и ошнень эзга
Районць (округсь) РФ-нь субъектсь % мариецта
Волжскяй МР-ць Марий Эл 86,9
Горномарийскяй МР-ць Марий Эл 85,8
Моркинскяй МР-ць Марий Эл 81,2
Сернурскяй МР-ць Марий Эл 76,6
Мишкинскяй МР-ць Башкортостан 71,5
Куженерскяй МР-ць Марий Эл 69,2
Новоторъяльскяй МР-ць Марий Эл 67,4
Советскяй МР-ць Марий Эл 65,5
Оршанскяй МР-ць Марий Эл 55,6
Мари-Турекскяй МР-ць Марий Эл 49,5
Звениговскяй МР-ць Марий Эл 49,3
Килемарскяй МР-ць Марий Эл 47,2
Калтасинскяй МР-ць Башкортостан 45,9
Параньгинскяй МР-ць Марий Эл 43,2
Медведевскяй МР-ць Марий Эл 42,5
Козьмодемьянск ГО-сь Марий Эл 30,9
Пижанскяй МР-ць Кировская 30,3
Кикнурскяй МР-ць Кировская 29,5
Краснокамскяй МР-ць Башкирия 26,5
Йошкар-Ола ГО-сь Марий Эл 23,6
Бирскяй МР-ць Башкортостан 20,5

Антропологическяй типсь

Мариецне кандовихть субуральскяй антропологическяй типти, кона аерды уральскяй расать классическяй вариантонзон эзда сяда оцю монголоиднай компонентть пяльксонц вельде[8]. Тяфта жа ётксост васьфневихть стапт, конат кандовихть европеоиднай валда типти[52].

Иван Степанович Палантай

Антропологическяй шамаликонь коряс мариецне кандовихть кунардонь уральскяй общностти, кона европеоиттнень мархта метисациять (руз.) (мок. вельде путсь ушеткс финно-угрань народонь антропологическяй типненди[53][54][55].

Кяльсь

Юрса ащи статьясь: Марийскяй кяльсь
Юрса ащи статьясь: Горномарийскяй кяльсь (руз.) (мок.

Марийскяй кяльхне сувсихть уралонь кяльхнень финно-угорскяй тарадонь финно-волжскяй группати.

1938/1939-це тонафнемань кизоста сявомок маринь школава сувафтфоль алфавитсь, конань юрса рузонь алфавитсь[56].

1958-це кизонь СССР-нь законць образованиять колга макссесь аф рузонь национальностень шабатнень тядяснонды-аляснонды кочкамс эсь идьснонды тонафнемань кяль, мезсь кирьфтазе школатнень лувксснон, конат тонафтыхть марийскяй кяльса. Тяда башка, ушедсь кирьфтамац национальнай кяльса кода шачема кяльса тонафнемать: 1960/61-це тонафнема кизоня маринь кяльса кода шачема кяльса тонафнемась кирсь сисем класста васенце нилети, 1972-це кизоня — васенце колма классненди. Национальнай школатнень эса лугань марийскяй и пандонь марийскяй кяльхнень тонафнемасна кода башка предметонь ульсь кемонь кизот. Марийскяй АССР-са 1988/89-це тонафнемань кизоня лувондовсь 255 национальнай школа. Ламонцне тонафнезь марийскяй кяльть кода башка предмет. Марийскяй кяльть кода шачема кяльть начальнай школаса тонафнезь 12 000 идь Марийскяй АССР-са и шабрань региоттнень эса[57].

Марий Эл Республикаса 2000-це кизотнень кучкаста марийскяй кяльсь кода шачема кяль тонафневсь 163 школаса, башка предметокс — 125 школаса[58].

Россияса, 2002 -це кизонь Марнек Россиянь эряень сёрматфтомать коряс, марийскяй кяльхнень содасазь 487 855 ломань, тяконь лувксса марийскяй (лугань шинь стямань ширень марийскяй) — 451 033 ломань (92,5 %), и пандонь марийскяй кяльхнень — 36 822 ломань (7,5 %). 604 298 мариецнень ёткса Россияса марийскяй кяльхнень содасазь 464 341 ломань (76,8 %), рузоннеть — 587 452 ломань (97,2 %), лиякс мярьгомс, пцтай сембе корхтайхть кафта кяльса, маринь и рузонь кяльса[59][60]. 312 195 мариецнень ёткса Марий Элса маринь кяльса корхтай 262 976 ломань (84,2 %), синь ётксост лугань шинь стямань ширень маринь кяльса — 245 151 ломань (93,2 %) и пандонь маринь кяльса —17 825 ломань (6,8 %); рузонь кяльса — 302 719 ломань (97,0 %, 2002 кизоня)[61][62].

Коень коряс щапт-каряпт

Мариецнень васенце щамсна ульсть туникакс стаф панарсь (тувыр), понксне (йолаш), а тяфта жа суманць (шовыр); щамсна карксневсть каркс лаца нардамаса (солык), а кой-коста и карксса (ӱштӧ).

Алятненди ульсь кода каннемс войлочнай шляпат, васть и накомарникт. Карьсембялькс ульсть кедень кямотне, а меле — валенцятне и карьхть (састь рузонь щамста). Шяйналса покодемста пилькс щаматненди путнесть шуфтонь колодкат (кетырма).

Марийскяй авань сюлгам. Хельсинкань Культурань музеень коллекцияста, Финляндия

Аватнень ульсть карксонь повфтамкасна —тя ожнаняста, каури ракакудняста, кшнинь ярмакста мазоптомкат. Тяфта жа аватнень ульсть колма видонь пряс путомкасна: конусонь лаца колпак (шимакш), конань ульсь шовонь шире лопастец; сорока (сявф руснень эзда), шарпан — коняфкс мархта пряс сотневи нардама. Мокшэрзятнень и удмурттнень лаца пряс путомкасна шурка[63].

Кемамась

Юрса ащи статьясь: Марийскяй коень кемамась (руз.) (мок.

Православияда башка, мариецнень ули синцень койснон коряс кемамасна, кона ванфтозе эсь вастонц ваймоёжень культурасост тянивок. Маритнень синцень койснон коряс кемамаснонды кирдемасна салсесыне мяльснон европань и россиянь журналисттнень . Мариецнень нльне лемнесазь «Европань мекольце язычникокс»[64].

XIX-це векста мариецнень синцень койснон коряс кемайхнень сялнозь. Кепотьксонди, 1830-це кизоня внутренняй тевонь министрать мярьгоманц коряс, конанди сась Святейшай Синодть эзда пеняцяма, ульсь сязф озксонь вастсь — Чумбылат курык. Сембе сяка Чумбылатовонь кевть машфтомац ашезь макса учсеви эффект, сяс мес мариецне сюконякшнесть аф кевти, а тоса эряй шкайти[65].

Лепне

Юрса ащи статьясь: Марийскяй лемсь (руз.) (мок.

Кунардонь пингста сявомок, мариецнень ульсть национальнай эсь лемсна. Мариецнень ули лемонь тиемань эсь формасна, кона ащи патронимста (руз.) (мок. и сонцень ломанть лемстонза, тя формась пяк мала исландскяйти. Кепотьксонди, Абай Имансар (Имансар Абаевич), Янграват Токтар (Токтар Янграватович), Темрай Саркандай (Саркандай Темраевич). Тяфта ащи тевсь и авань лепнень мархтовок, кепотьксонди: Лари Салима (Салима Лариевна), Кыркылай Лыставий (Лыставий Кыркылаевна), Гельсий Агави (Агави Гельсиевна) и лият.

Рьвяямань койхне

Рьвяямань илань инь оцю паршикс ащи свадьбань локшесь «Сӱан лупш» — араламань, прянь ванфтомань парши, кона ванфтсы эряфонь «кить», конань эзга эряви молемс од рьвяяйхненди.

Тонафнемань уровенць

Россияса эряй мариецнень ёткса сяда кржа тонафнефта, кда ваномс марнек РФ-нь ломаттнень коряс. 2010-це кизонь эряень сёрматфтомать коряс, мариецнень ёткса аньцек 11,7 % ульсь высшай или вузда мельдень образованиясна (55 277 ломань 470 834 марийскяй национальностень ломаттнень ёткста, конатненди 15 кизоса или сяда лама, конат сёрмадозь образованияснон)[66]. Тяка пингть Россиянь сембе национальностень эряйхнень ёткса высшай или вузда мельдень образования мархта ломаттнень лувкссна 2010-це кизоня тись 23,4 % (27 540 707 ломань 117 639 476 ломаньцта, конатненди 15 кизоса или сяда лама, конат сёрмадозь образованияснон)[67].

Башкортостанонь мариецне

Башкортостанць — Россиянь омбоце регионць Марий Элда меле, коса сембода лама эряй мариецта. Башкортостанца эряй 105 829 мариец (2002)[68][69]. Башкортостанонь мариецне, синь колмоце пялькссна, эряйхть ошева.

Уралу мариецнень эряма ётафтомасна ётнесь XV—XIX-це векнень пингста, тя лиссь сянкса, мес синь Кучка Равть моданзон лангса вихца сувафневсть христианствань кемамати. Башкортостанонь мариецне ламошкада ванфтозь эсь койснон коряс кемамаснон.

Ули кода тонафнемс марийскяй кяльса национальнай школатнень эса, среднеспециальнай и высшай учебнай заведениятнень эса Бирскяйса и Благовещенскяйса. Уфаса ули «Марий ушем» Марийскяй общественнай пуромкс.

«Марий ушем» масторкотфсь

Кировскяй областень мариецне

Областень марийскяй культурань центрась ащи Кировскяй областень Пижанскяй райононь Мари-Ошаево велеса (руз.) (мок.. Областной марийскяй культурань центрась ётафни национальнай концертт, улихть кружокт, народнай ансамбльхть. Эрь кизоня июнь-июль ковста Мари-Ошаево велеса ётни Пеледыш пайрем илась. Кировскяй областень марийскяй культурань областнай центрась кирди соткст Марий Эл Республикань национальнай общественнай движениятнень мархта[70][71][72].

Содаф мариецне

  • Арбан (Деревяшкин) Николай Михайлович — прозаик, драматург, музыкант, художник, Марийскяй АССР-нь искусствань васенце заслуженнай деятельсь, Марий Элонь народнай писательсь [73].
  • Айзенворт (Деревяшкин) Анатолий Карпович — писатель, литературовед[74].
  • Тыныш Осып (Борисов Иосиф Алексеевич) — писатель, исследователь, педагог, СССР-нь писателень Союзонь член[75].
  • Васикова Лидия Петровна — профессор, филологическяй наукань доктор, васенцесь маринь аватнень ёткста[76].
  • Васильев Валериан Михайлович — кялень содай, этнограф, фольклорист, литератор[73].
  • Васин Ким Кириллович (руз.) (мок. — писатель[77].
  • Вишневский Семён Алексеевич — поэт, ётафни, журналист[78].
  • Герасимов Михаил Степанович — поэт и баснянь сёрмады[79].
  • Григорьев Александр Владимирович — художник[80].
  • Данилова Раисия Михайловна — Марий Элонь заслуженнай артистка, редактор, морси[81].
  • Евсеев Тимофей Евсеевич — этнограф, краевед, педагог, Марий Эл Республикань национальнай музейть (руз.) (мок. пуроптыец[82].
  • Ефимов Измаил Варсонофьевич — художник, герольдмейстер[73].
  • Ефруш Георгий Захарович — писатель[83].
  • Ефремов Тихон Ефремович — просветитель[84].
  • Зотин Владислав Максимович — Марий Элть 1-це президентоц[85][86][87].
  • Игнатьев Никон Васильевич — писатель[73].
  • Йыван Кырла — поэт, киноактёр[88].
  • Искандаров Алексей Искандарович — композитор, хормейстер[89].
  • Казаков Николай Иванович — поэт[73].
  • Кириллова Сарра Степановна — режиссёр, Марийскяй АССР-нь искусствань заслуженнай деятель, Марий Эл Республикань народнай артистка, МАССР-нь Государственной премиянь лауреат[90][91].
  • Колумб Валентин Христофорович — поэт[73].
  • Конаков Александр Фёдорович — драматург[75].
  • Коршунов Константин Максимович — актёр, драматург, режиссёр, МАССР-нь заслуженнай артист, МАССР-нь Государственнай премиянь лауреат[92][73].
  • Лашманов Пётр Ильич — поэт, прозаик, ётафни, этнограф, краевед, педагог[93].
  • Лекайн Никандр Сергеевич — писатель[77].
  • Луппов Анатолий Борисович (руз.) (мок. — композитор[73].
  • Макс Майн — поэт, ётафни, журналист, редактор[78].
  • Матвеев Иван Сергеевич — актёр.
  • Матюковский Геннадий Иванович — поэт, прозаик, ётафни, журналист[78].
  • Мосолов Василий Петрович — агроном, мариецнень ёткста васенце академиксь[94].
  • Мухин Николай Семёнович — поэт, ётафни[73].
  • Николаев Сергей Николаевич — драматург[73].
  • Олык Ипай (руз.) (мок. — поэт[73].
  • Орай Дмитрий Фёдорович — писатель[77].
  • Осмин Йыван — поэт, прозаик, журналист, редактор, педагог[95].
  • Петров Иван Петрович — государственнай и общественнай деятель, Марийскяй ОБИК-нь васенце председатель[96].
  • Палантай Иван Степанович — композитор, фольклорист, педагог[97].
  • Першуткин Пётр Григорьевич — поэт[77].
  • Прохоров Зинон Филиппович — гвардиянь лейтенант, Советскяй Союзонь Герой[98].
  • Рябинина Марианна Владимировна — марийскяй языковед, литературовед.
  • Рыбаков Николай Фёдорович — драматург, писатель, журналист, артист[73].
  • Сави Владимир Алексеевич — писатель[79].
  • Савинов Эчан — писатель-драматург, ётафни, журналист, актёр[99].
  • Сануков Ксенофонт Никанорович — историческяй наукань доктор, журналист[100].
  • Сапаев Эрик Никитич — композитор[73].
  • Смирнов Кузьма Алексеевич — композитор, фольклорист[101][102].
  • Суворов Сергей Романович — мариецнень ёткста васенце Советскяй Союзонь Геройсь[103].
  • Тактаров Олег Николаевич — спортсмен, актёр, телеведущай, кинопродюсер, режиссёр, общественнай деятель[104].
  • Тойдемар Павел Степанович — музыкант[75].
  • Чавайн Сергей Григорьевич — поэт и драматург[73].
  • Чалай Васлий — поэт, прозаик[105].
  • Четкарёв Ксенофонт Архипович[106] — этнограф, фольклорист, писатель, наукань организатор.
  • Шабдар Осып (руз.) (мок. — писатель[79].
  • Шадт Булат — поэт[107].
  • Шакиров Станислав Алексеевич (руз.) (мок. — морси, композитор, Марий Эл Республикань заслуженнай артист (1997), Марий Эл Республикань народнай артист (2000), Башкортостанонь заслуженнай артист (2012).
  • Шкетан Яков Павлович — писатель[79].
  • Элексейн Яков — прозаик, журналист, педагог[108].
  • Эшкинин Андрей Карпович — писатель[83].
  • Эшпай Андрей Яковлевич — советскяй композитор[89].
  • Эшпай Яков Андреевич — этнограф и композитор[109].
  • Юзыкайн Александр Михайлович — писатель[73].
  • Юзыкайн Алеко — писатель, журналист[73].
  • Юксерн Василий Степанович — писатель[73].
  • Ялкайн Яныш Ялкаевич — писатель, критик, этнограф[110].
  • Ямбердов Иван Михайлович (руз.) (мок. — художник[73].
  • Мамич-Бердей князсь.
  • Чоткар патыр.
  • Полтыш князсь Малмыжскяй, шавфоль рузонь ушмовийть мархта тюремста.
  • Чумбылат — XII-це веконь марийскяй князь

Искусстваса

  • 1839-це кизоня Надежда Дуровать повестень и азксонь сборниксонза лиссь романтическяй повестец «Черемиска. Рассказ исправницы Лязовской», конанди ульсь подзаголовка «Черемисская повесть»[111]. Тяниень пингть повестсь содаф «Серный ключ» лем ала.
  • Мариецне (черемисне) няфневихть Ярослав Гашеконь пялес документальнай юмористическяй азкссонза. Тоса лятфневи черемиснень и чувашнень ёткса лама кизонь кяжиякшнемась и черемиснень язычествасна[112].
  • 2006-це кизоня Алексей Федорченко нолдась «Шошо» (мар.: «тунда») фильма, а 2012-це кизоня экранс лиссь «Небесные жёны луговых мари» киноц Денис Осокинонь тяка лем мархта книганц коряс. Кафцьке фильматне нолдафт мариецонь кяльса.
  • 2010-це кизоня режиссёрсь Василий Домрачев снимандазе «Салика» фильмать Сергей Николаевонь комедиянц коряс марийскяй велеть эряфонц колга.
  • Александр Иванович Купринонь «Поединок» повестьсонза (1905 кизось) подпоручикть Ромашовонь денщикоц Гайнан ульсь черемисокс.
  • 2021-це кизоня Денис Шаблий нолдась фильма «Не Иван, или как приручить Богатыря» маринь цёранять Йыванть и мифическяй марийскяй богатырть Онарть колга.

Лятфтамат

  1. ↑ Национальный состав населения Российской Федерации согласно переписи населения 2021 года. web.archive.org. Дата обращения: 4 февральста 2026.
  2. ↑ 1 2 3 4 5 6 7 8 9 10 11 12 Итоги переписей (рус.). Музей истории переписей в России. Дата обращения: 4 февральста 2026.
  3. ↑ 1 2 3 4 5 6 7 8 9 Всероссийская перепись населения 2002 года. web.archive.org. Дата обращения: 4 февральста 2026.
  4. ↑ Бюро национальной статистики Агентства по стратегическому планированию и реформам Республики Казахстан - Главная (рус.). stat.gov.kz. Дата обращения: 4 февральста 2026.
  5. ↑ Итоги переписи населения Украины 2001 года. www.demoscope.ru. Дата обращения: 18 февральста 2026.
  6. ↑ Население по национальности, родному языку, гражданству, полу, возрастной группе и место проживания (регион населения), 31 декабря 2021 года. Дата обращения: 5 февральста 2026. Архивировано 19 июньцта 2022 года.
  7. ↑ Latvijas iedzīvotāju sadalījums pēc nacionālā sastāva un valstiskās piederības (Datums=01.01.2023). Дата обращения: 5 февральста 2026.
  8. ↑ 1 2 Народы мира: Энциклопедия / под. ред. Минц Л. М. — М.: ОЛМА Медиа Групп, 2007 г, — 638 c.: ил. С. 334 — ISBN 5-373-01057-3
  9. ↑ А чуваша назови – «родня». О марийско-чувашских контактах в период средневековья (рус.). Кидшер (8 июльста 2022). Дата обращения: 5 февральста 2026. Архивировано 21 декабрьста 2022 года.
  10. ↑ Марийцы, 2005, с. 5.
  11. ↑ Энциклопедия Республики Марий Эл, 2009, с. 519.
  12. ↑ 1 2 3 4 5 6 7 8 9 10 Финно-угорские народы России: генезис и развитие. — Саранск: НИИ гуманитарных наук при Правительстве Республики Мордовия, 2011. — С. 187. — 220 с.
  13. ↑ Этнология. Учебник. Для высших учебных заведений / Э. Г. Александренков, Л. Б. Заседателева, Ю. И. Зверева и др. — М.: Наука, 1994.
  14. ↑ Свечников С. К. Присоединение Марийского края к Русскому государству. — Йошкар-Ола - Казань, 2014. — С. 57. — 268 с. Архивировано 20 августста 2022 года.
  15. ↑ Мочаев, 2007, с. 152.
  16. ↑ Хазарская переписка. Письмо хазарского царя Иосифа (рус.). www.bibliotekar.ru. Дата обращения: 5 февральста 2026. Архивировано 22 январьста 2022 года.
  17. ↑ Повесть временных лет (рус.). spsl.nsc.ru. Дата обращения: 5 февральста 2026. Архивировано 21 январьста 2022 года.
  18. ↑ Свечников, 2014, с. 56.
  19. ↑ Александр Жуков. История Марийского княжества в Поветлужье в XII—XVI веках. web.archive.org. Дата обращения: 5 февральста 2026.
  20. ↑ 1 2 Свечников, 2014.
  21. ↑ "Повесть о стране Вятской" в свете новых исследований и открытий. web.archive.org. Дата обращения: 5 февральста 2026.
  22. ↑ Свечников, 2014, с. 86—91.
  23. ↑ 1 2 3 4 Марийский край в XVII-XVIII веках | Историческая география. geohyst.ru. Дата обращения: 1 февральста 2026. Архивировано 31 мартста 2020 года.
  24. ↑ Свечников, 2014, с. 93—100.
  25. ↑ Герберштейн С. Записки о Московии: в 2 т. / А. Л. Хорошкевич.. — М., 2008. — С. 387. — 776 с.
  26. ↑ Свечников, 2014, с. 189—190.
  27. ↑ Бахтин, 2012.
  28. ↑ История марийцев - Присоединение левобережных марийцев к России. Черемисская война 1552—1557 гг. (рус.). web.archive.org. Дата обращения: 5 февральста 2026.
  29. ↑ История марийцев - Черемисские войны 1571—1574 и 1581—1585 гг. Последствия присоединения марийцев к Русскому государству. web.archive.org. Дата обращения: 5 февральста 2026.
  30. ↑ История сёл и деревень Мари-Турекского района Республики Марий Эл // Мари-Турекский район. — Йошкар-Ола, 2003. — С. 5. — 320 с. — (История сёл и деревень Республики Марий Эл). — 1500 экз. — ISBN 5-87898-241-2.
  31. ↑ 1 2 3 Айплатов, Геннадий Николаевич. Марийский край в составе Российского государства второй половины ХVI - начала ХVIII вв.. — 2002.
  32. ↑ Замосковный край в XVII веке - Готье Юрий Владимирович. — 1906. Архивировано 17 июньцта 2022 года.
  33. ↑ Краснобаковский район. Краеведение. История. web.archive.org. Дата обращения: 5 февральста 2026.
  34. ↑ Как призывали в российскую армию в эпоху Петра I, MariUver (15 июльста 2015). Дата обращения: 5 февральста 2026.
  35. ↑ Государственные подати и повинности ясачных марийцев в конце XVII — первой четверти XVIII века. cyberleninka.ru. Дата обращения: 5 февральста 2026. Архивировано 19 июньцта 2022 года.
  36. ↑ Демоскоп Weekly - Приложение. Справочник статистических показателей. demoscope.ru. Дата обращения: 5 февральста 2026. Архивировано 31 июльста 2019 года.
  37. ↑ Демоскоп Weekly - Приложение. Справочник статистических показателейwebsite=demoscope.ru. Дата обращения: 5 февральста 2026. Архивировано 5 январьста 2023 года.
  38. ↑ Демоскоп Weekly - Приложение. Справочник статистических показателей. demoscope.ru. Дата обращения: 5 февральста 2026. Архивировано 27 июньцта 2022 года.
  39. ↑ Данные по переписи 1897 г. приведены по территории Российской империи, Вятской и Уфимской губерниям
  40. ↑ Первая всеобщая перепись населения Российской Империи 1897 г. Распределение населения по родному языку, губерниям и областям. Дата обращения: 3 февральста 2026. Архивировано 4 февральста 2012 года.
  41. ↑ Всесоюзная перепись населения 1926 года. Национальный состав населения по республикам СССР. Дата обращения: 5 февральста 2026. Архивировано 22 майста 2011 года.
  42. ↑ Всесоюзная перепись населения 1939 года. Национальный состав населения по республикам СССР. Дата обращения: 5 февральста 2026. Архивировано 23 августста 2011 года.
  43. ↑ Всесоюзная перепись населения 1959 года. Национальный состав населения по республикам СССР. Дата обращения: 5 февральста 2026. Архивировано 16 мартста 2010 года.
  44. ↑ Всесоюзная перепись населения 1970 года. Национальный состав населения по республикам СССР. Дата обращения: 5 февральста 2026. Архивировано 3 декабрьста 2009 года.
  45. ↑ Всесоюзная перепись населения 1979 года. Национальный состав населения по республикам СССР. Дата обращения: 5 февральста 2026. Архивировано 24 мартста 2010 года.
  46. ↑ Всесоюзная перепись населения 1989 года. Национальный состав населения по республикам СССР. Дата обращения: 5 февральста 2026. Архивировано 16 мартста 2010 года.
  47. ↑ Всероссийская перепись населения 2002 года. Национальный состав населения по регионам России. Дата обращения: 5 февральста 2026. Архивировано 22 июньцта 2011 года.
  48. ↑ Всероссийская перепись населения 2010 г. Население по национальности, полу и субъектам Российской Федерации. Дата обращения: 5 февральста 2026. Архивировано 28 декабрьста 2014 года.
  49. ↑ Первая всеобщая перепись населения Российской Империи 1897 г. Распределение населения по родному языку, губерниям и областям. По империи. Черемисское. Дата обращения: 5 февральста 2026. Архивировано 20 декабрьста 2014 года.
  50. ↑ Первая всеобщая перепись населения Российской Империи 1897 г. Распределение населения по родному языку, губерниям и областям. Вятская. Черемисское. Дата обращения: 5 февральста 2026. Архивировано 20 декабрьста 2014 года.
  51. ↑ Первая всеобщая перепись населения Российской Империи 1897 г. Распределение населения по родному языку, губерниям и областям. Уфимская. Черемисское. Дата обращения: 5 февральста 2026. Архивировано 20 декабрьста 2014 года.
  52. ↑ В. В. Бунак. Антропологический тип черемис. «Русский антропологический журнал», т. 13, М., 1924, стр. 138
  53. ↑ Моисеев В. Г., Козинцев А. Г. Антропологическое своеобразие уралоязычных народов. Этнографическое обозрение 1998 № 2 С. 148
  54. ↑ Марийцы, 2005, с. 27.
  55. ↑ Энциклопедия Республики Марий Эл, 2009, с. 519—520.
  56. ↑ Финно-угорские народы России: диалектика жизненных ценностей. Учебное пособие / Под ред. П.Н. Тултаева. — Саранск: НИИ Гуманитарных наук при Правительстве Республики Мордовия, 2013. — С. 128. — 195 с.
  57. ↑ Финно-угорские народы: диалектика жизненных ценностей / Под ред. П.Н. Тултаева. — Саранск: НИИ Гуманитарных наук при Правительстве Республики Мордовия, 2013. — С. 131—133. — 195 с.
  58. ↑ Финно-угорские народы России: диалектика жизненных ценностей / под ред. Тултаева. — Саранск, 2013. — С. 134—135. — 195 с.
  59. ↑ Всероссийская перепись населения 2002. Т.04.04. Распространенность владения языками в России (2002 г.). web.archive.org. Дата обращения: 3 февральста 2026.
  60. ↑ Всероссийская перепись населения 2002. Т.04.05. Владение языками населением наиболее многочисленных национальностей. web.archive.org. Дата обращения: 3 февральста 2026.
  61. ↑ Всероссийская перепись населения 2002. Т.04.06. Владение языками (кроме русского) населением отдельных национальностей по республикам, автономной области и автономным округам Российской Федерации. web.archive.org. Дата обращения: 3 февральста 2026.
  62. ↑ Всероссийская перепись населения 2002. Т.04.03. Население по национальности и владению русским языком по субъектам Российской Федерации. web.archive.org. Дата обращения: 3 февральста 2026.
  63. ↑ Марийцы// Народы России. Гл. ред. В. А. Тишков М.: БРЭ 1994 стр.230
  64. ↑ Последние язычники Европы (рус.). GEO. Дата обращения: 3 февральста 2026.
  65. ↑ Кузнецов С. К. Поездка к древней черемисской святыне, известной со времён Олеария // Этнографическое обозрение. 1905. № 1. С. 129—157.
  66. ↑ Население наиболее многочисленных национальностей по возрастным группам, полу и уровню образования. web.archive.org. Дата обращения: 3 февральста 2026.
  67. ↑ Население по возрастным группам, полу и уровню образования по субъектам Российской Федерации (c. 6). web.archive.org. Дата обращения: 3 февральста 2026.
  68. ↑ Число марийских деревень — более 240. web.archive.org. Дата обращения: 3 февральста 2026.
  69. ↑ Марийцы (рус.). bashenc.online. Дата обращения: 3 февральста 2026.
  70. ↑ Делу – время, потехе – час. «Пеледыш пайрем» – для всех нас! (рус.). Сельские вести (6 июньцта 2016). Дата обращения: 3 февральста 2026. Архивировано 20 июльста 2018 года.
  71. ↑ Пеледыш пайрем (рус.). Сельские вести (7 июньцта 2016). Дата обращения: 3 февральста 2026. Архивировано 20 июльста 2018 года.
  72. ↑ Пижанский краеведческий музей (рус.). Пижанский краеведческий музей (2014). Дата обращения: 3 февральста 2026. Архивировано 7 июньцта 2019 года.
  73. ↑ 1 2 3 4 5 6 7 8 9 10 11 12 13 14 15 16 17 18 Марийцы, 2005, с. 252.
  74. ↑ История марийской литературы, 1989, с. 122.
  75. ↑ 1 2 3 Марийцы, 2005, с. 269.
  76. ↑ Васикова Лидия Петровна // Кто есть кто в Марий Эл / Авт.-сост. В. А. Мочаев. — Йошкар-Ола: Марийский биографический центр, 2002. — С. 85—86. — 2000 экз. — ISBN 5-87898-197-1.
  77. ↑ 1 2 3 4 Марийцы, 2005, с. 267.
  78. ↑ 1 2 3 История марийской литературы, 1989, с. 249—259.
  79. ↑ 1 2 3 4 Марийцы, 2005, с. 266.
  80. ↑ Марийцы, 2005, с. 279.
  81. ↑ Мочаев, 2017, с. 120.
  82. ↑ История марийской литературы, 1989, с. 106.
  83. ↑ 1 2 История марийской литературы, 1989, с. 100.
  84. ↑ История марийской литературы, 1989, с. 41.
  85. ↑ Зотин Владислав Максимович. web.archive.org. Дата обращения: 2 февральста 2026. Архивировано 12 августста 2018 года.
  86. ↑ Сергей Смирнов. Выборы президента Республики Марий Эл. web.archive.org. Дата обращения: 2 февральста 2026. Архивировано 17 сентябрьста 2018 года.
  87. ↑ Зотин Владислав Максимович - Биография - БД "Лабиринт". labyrinth.ru. Дата обращения: 2 февральста 2026. Архивировано 25 июльста 2018 года.
  88. ↑ Марийцы, 2005, с. 270.
  89. ↑ 1 2 Марийцы, 2005, с. 276.
  90. ↑ Марийский национальный театр драмы им. М.Шкетана - Кириллова Сарра Степановна(руз.). web.archive.org. Дата обращения: 5 февральста 2026.
  91. ↑ Марийцы, 2005, с. 271.
  92. ↑ Коршунов, Константин Максимович (рус.). web.archive.org. Дата обращения: 2 февральста 2026.
  93. ↑ Мочаев, 2017, с. 249.
  94. ↑ Посёлок Мари-Турек // Мари-Турекский район. — Йошкар-Ола, 2003. — С. 176—186. — 320 с. — (История сёл и деревень Республики Марий Эл). — 1500 экз. — ISBN 5-87898-241-2.
  95. ↑ Мочаев, 2017, с. 321—322.
  96. ↑ Мочаев, 2017, с. 335—336.
  97. ↑ Марийцы, 2005, с. 275.
  98. ↑ Прохоров Зинон Филиппович (рус.). Сайт «Герои страны».
  99. ↑ История марийской литературы, 1989, с. 99.
  100. ↑ История марийской литературы, 1989, с. 353.
  101. ↑ Смирнов Кузьма Алексеевич | Национальная библиотека имени С.Г. Чавайна Республики Марий Эл (рус.). nbmariel.ru. Дата обращения: 2 февральста 2026.
  102. ↑ Стр. 132 - Для интернета. gosarhivrme.ru. Дата обращения: 2 февральста 2026.
  103. ↑ Кошкина Д. В Марий Эл открыли парк в честь первого Героя Советского Союза по национальности мари (рус.). Марийская правда. Новости Республики Марий Эл (30 июльста 2015). Дата обращения: 2 февральста 2026. Архивировано 25 июльста 2018 года.
  104. ↑ Олег Тактаров: «Я - мариец» (рус.). ya.ru (11 июльста 2018). Дата обращения: 3 февральста 2026.
  105. ↑ История марийской литературы, 1989, с. 277.
  106. ↑ Четкарёв Ксенофонт Архипович — краткая биография на сайте «Марийская история в лицах». Дата обращения: 5 февральста 2026. Архивировано 19 октябрьста 2013 года.
  107. ↑ Шадт Булат // Писатели Марий Эл: биобиблиографический справочник / Сост. А. Васинкин, В. Абукаев и др. — Йошкар-Ола: Марийское книжное издательство, 2008. — С. 122—124. — 752 с. — 3000 экз. — ISBN 978-5-7590-0966-5.
  108. ↑ История марийской литературы, 1989, с. 61.
  109. ↑ Марийцы, 2005, с. 277.
  110. ↑ Марийцы, 2005, с. 268.
  111. ↑ Надежда Дурова. Записки кавалерист-девицы. — Казань: Татарское книжное издательство, 1979. — С. 197. — 200 с.
  112. ↑ Комендант города Бугульмы (рус.). Ярослав Гашек. Дата обращения: 3 февральста 2026.

Литературась

  • Знаменский П. Горные черемисы Казанского края (Из наблюдений очевидцев). — Б. м., 1867.
  • Народы России: живописный альбом, Санкт-Петербург, типография Товарищества «Общественная Польза», 3 декабря 1877, ст. 161
  • История марийской литературы / Отв. редакторы К. К. Васин, А. А. Васинкин. — Йошкар-Ола: Марийское книжное издательство, 1989. — 432 с. — 3000 экз.
  • Марийцы. Историко-этнографические очерки. — Йошкар-Ола: МарНИИЯЛИ, 2005. — 336 с. — 2000 экз. — ISBN 5-94950-027-X.
  • Марийская биографическая энциклопедия / Авт.-сост. В. А. Мочаев. — Йошкар-Ола: Марийский биографический центр, 2007. — 486 с. — 2032 экз. — ISBN 5-87898-357-0.
  • Марийцы // Этноатлас Красноярского края / Совет администрации Красноярского края. Управление общественных связей ; гл. ред. Р. Г. Рафиков ; редкол.: В. П. Кривоногов, Р. Д. Цокаев. — 2-е изд., перераб. и доп. — Красноярск: Платина (PLATINA), 2008. — 224 с. — ISBN 978-5-98624-092-3.
  • Марийцы / Марийцы восточные / Марийцы горные / Марийцы луговые / Марийцы северо-западные // Энциклопедия Республики Марий Эл / Отв. ред. Н. И. Сараева. — Йошкар-Ола, 2009. — С. 519—524. — 872 с. — 3505 экз. — ISBN 978-5-94950-049-1.
  • М. В. Пенькова, Д. Ю. Ефремова, А. П. Конкка. Материалы по духовной культуре марийцев // Сборник статей памяти Юго Юльевича Сурхаско. — Петрозаводск: КарНЦ РАН, 2009. C. 376—415.
  • С. В. Стариков. Марийцы (черемисы) Среднего Поволжья и Приуралья на рубеже XIX—XX веков. — Филокартия, 2009, № 4(14) — с. 2—6.
  • Бахтин А. Г. Марийский край в XIII—XVI веках: очерки по истории. — Йошкар-Ола: МарГУ, 2012. — 660 с. — 1000 экз. — ISBN 978-5-94808-678-1.
  • Марийская биографическая энциклопедия / Авт.-сост. В. А. Мочаев. — 2-е изд. — Йошкар-Ола: Марийский биографический центр, 2017. — 606 с. — 1500 экз. — ISBN 978-5-905314-35-3.

Ссылкатне

Сявф"https://mdf.ruwiki.ru/w/index.php?title=Мариецне&oldid=418255"-ста