Мурома

Рувики лопаста

Муромá (руз. му́рома) — финно-угрань пляма, кона минь эрань I-це тёжянь кизотнень кучкаста сявомок, эрясь Ока ляйть алдонь вастсонза Муром ошть аймакса[1].

IX—X веконь мурома плямань авань щамста кшнинь мазоптомбялень реконструкция. Владимирскяй областсь. Экспозициясь ащи ГИМ-са

Лятфневи Пингонь кизотнень повестса (руз.) (мок. кода аф славянонне и эряй-ащи Ока ляйть Равти прама вастса[2].

Тя плямань ломаттне сокасть-видесть, охотендасть, маштсть эрь кодама ремёслань тевса. XII-це векти ульсть ассимилировандафт шинь стямань славяттнень мархта, мзярда аньцек ушедсь кочкавома рузонь этноссь[3]. Наукаса муромать эвондаманц колга кизефкссь кепси спорямат[3]. Кулоф муромань кяльсь, алудонь Клязьмать гидронимиянц коряс, ульсь мала меряннети.

Муромань топо-и гидронимиясь сатомшка лац ванфтовсь васттнень, велетнень, ляйхнень и эрьхкнень лемснон эса (Теша, Кекша, Ушна и стак тов). Ванфтовсть археологиянь муромань памятникне — калмотне — велетне-ошне и Чаадаевскяй ошпандсь, Мурманск ошсь и Муромскяй мыссь Онежскяй эрьхкса.

Этнонимсь

Муром ошть лемоц лятфневи XIII-це веконь скандинавскяй сагатнень эса кода др.-сканд. Móramar. Волжско-финскяй кяльхнень фонетическяй койснон мяльс сявозь, тя формась няфтезе валть сяда кунардонь форманц др.-рус. Муромъ формать коряс. Тяка туфталонкса, «Повесть временных лет» сёрматфксса лятфтаф мурома валсь, улема, ульсь сире рузонь кялень валонь формакс, кона тиевсь ошть лемонц эзда. *Morama этнонимть, кона мурома валть инь сире формац, В. С. Кулешов путнесы серцек меря плямать лемонц мархта, кона, сонь мяленц коряс, сявф балтийскяй источникста[4].

В. В. Напольских учёнайть мяленц коряс, плямать лемонц ули кода ванондомс мерятнень[5] и мариецнень *mari[6] марстонь лемснон эзда сафокс, кона эсь инксонза сась индоиранскяй кяльста *marya- «од цёра, од ломанень мирьжень союзонь член» валста. И тя сире кунардонь валъюрть гласнаенц ланга ётась лабиализациянь процесс, кона стане жа муф муромскяй гидронимияса. -ma пялькссь может улемс суффиксокс или суом.: maa «мода, мастор» валти аналогокс[7].

«Повесть о водворении христианства в Муроме» (XVI вексь) сёрматфксса максови народнай этимологиясь (руз.) (мок.: «ошть стенанза марафт кевста и мраморста, и тянкса лемневи Муромкс»[8]. Брокгаузонь и Эфрононь энциклопедическяй Лексиконць ётафтсы мурома валть рузкс «мода лангса ломаттне», мезевок аф азонды сянь колга, кодама финно-угрань кяльста эвондась тя валсь. Мурм вепскяй кяльса «морошка»[9].

Антропологическяй типсь

Подболотьевскяй калмотнень эзда муфне-таргафне, конатнень эзда аф пяк лама, корхтайхть сянь колга, што муромать шама пакарьснон диаметрасна, кода и мокшэрзятнень, сяда оцюволь региононь славянскяй ломаттнень коряс, а шамать лапш шиц ульсь нльне сяда оцю цнинскяй мокшэрзятнень коряска[10].

Этногенезонь прябалатне

Ся васттнень эса, куване эрясь муромась, улихть кшнинь веконь памятникт, конатнень улихть фкя лацонь ширесна кода городецкяй, стане и дьяковскяй культурать (руз.) (мок. мархта. Ламоц исследовательхне сотнекшнесазь ня памятникнень городецкяй культурать мархта. Но П. Н. Третьяков арьсесь, што Ока ляйть маласа ульсь ётконь культура, кона мала кода дьяковскяйти стане и городецкяйти, а В. Ф. Генингонь арьсеманзон коряс ня памятникне сяда малат дьяковскяй культурати. Ломаттне, конат кадозь ня памятникнень, улема, путсть кядь муромать арамаса, но прябалась ащи тоса, што городецкяй культурань памятникне юмсихть минь эрань II-це векть малава, а муромань памятникне эвондакшнихть од эрань I тёжянь кизотнень омбоце пялестонза. Исследовательхненди аф удалси мумс соткс ня культуратнень ёткса. Муромань од культурать эсь лацонь ширец ащи сянь эса, што лама калмама вастта, конат тяда ингольдень пингть аф содафт. Улема, сяда кунардонь эряйхне калмосезь ломанцнон аф модать потмос, а путнезь модать лангс, кепотьксонди, «кулофонь кутт» содафт дьяковскяй культурать коряс. П. Н. Третьяков арьси, што тяфтама памятникнень эвондамасна сотф волго-камскяй пляматнень Ока ляйть алдонь территорияв шинь стяма ширде самаснон мархта. Улема, тяфта жа ульсть кельме-шинь стяма ширети Ока ляйть кучкаста финнонь пляматнень эряма ётамасна, синь шовордафт балтскяй элементонь мархта, лиякс мярьгомс, мощинскяй культурать мархта сотф пляматнень. Тяфта, этническяй общностть кочкавомаса-тиемаса путозь кядьснон кой-мзяра компонент, конат сотфтольхть эсь ётковаст.

Кизефкссь муромать малашинц колга финно-угрань лия нароттненди кепси спорямат. Кой-кона исследовательхне муромать лувсазь малакс эрзятненди, синь примасть участия тяниень пингонь эрзя народть тиевомаса-пуроптомаса. Ня мяльхне-арьсематне сайхть И. Р. Аспелинонь и А. М. Тальгренонь работаснон эзда. Сяда меле синь ширеснон кирдезе П. Д. Степанов. В. Н. Мартьянов и Д. Т. Надькин арьсихть, што муромась примась участия эрзянь народть пуроптомаса. XX-це векть ушетксста С. К. Кузнецов азсь мяль муромать малашинц мерять и мари-черемиснень мархта. В. Ф. Генинг путнезень марить, мерять и муромать мерянскяй народонь общностень пяльксокс. Ламоц исследовательхне шарфнихть мяль мурома народть эсь лацонь характеронц лангс (А. Е. Алиховонь, А. П. Смирнов). Е. И. Горюновась арьси, што муромась и мокшэрзятне молихть городецкяй культурань народть марстонь юрста, но VII-це векста ни синь арасть башка народкс[3].

Куване эрясть-ащесть

Муромась эрясь тяниень Рязанскяй, Владимирскяй и Нижегородскяй областтнень эса.

Кельме ширеса муромась эрясь шабракс мерять мархта, шинь стяма ширеса — эрзятнень и мариецнень мархта, лямбе ширеса — тяфта жа эрзятнень мархта, шинь валгома ширеса — мещерать, кона ламос ульсь муромать кядяла.

Муромань археологиянь памятникнень оцюшкасна ащихть Ока ляйти кержи ширде прай Ушна, Унжа ляйхнень и види ширде Теше ляйхнень ёткса модатнень эса. Тя вастть кучкаса ащи Муром ошсь. Тя аймаксь аф оцю, малава 30 х 50 вайгяльбе. Сонь фталонза ащихть башка памятникт, коса муромскяй культурань элементтне сотовихть перьфпяльдень пляматнень культураснон мархта, мезсь корхтай, што тяса эрясть эрь кодама культурань ломатть[3].

Кода лядяфоль эряфсна

Муромать общественнай строец минь эрань Х-це векти ульсь патриархально-родовой обществать мекольце ступеньса. Ломаттне ульсть аф фкя лацот козяшинь и социальнай ширде, явовсть ремеслат. Но пцтай сембе алятнень ульсть вооружениясна, алаша мархта авань калмаматне корхтайхть свободнай общинниконь обществать колга.

Велетне путневсть вярьгок вастова ляень маласа ащи лугатнень вельхксса. Экономикать юрса ульсь жуватань кирдемась, касфнесть тувот, оцю сюра мархта жуватат, сяда кржа учат. Башка васта занцесть алашатне, конат касфневсть тяконь лувксса и сиволенди. Соксеви-витцеви пакся алу вирень плхтамась (руз.) (мок. ульсь аф васенце вастса. Охотась водендафоль питни кедень добувамати.

Ремеслатне кассть-вииясть оцю уровенц (шуфтста тиемась, пакарь лангса керсемась, кедень тиемась, кедьста паршиень тиемась), но ашесть лисенде сяда ичкози тястонь вешфкснень пяшкодемада башка. Гончарнай кругсь аф содафоль и сёвонцьта сяканят тиендсть, улема, аватне. Металлургиясь и ювелирнай искусствась ашесть лисенде семьянь вешфкснень вельф. Аньцек X—XI векста металлуркне и кузнецне явондовсть кода профессионалхт.

«Повесть о водворении христианства» сёрматфкссь, кона кочкафоль аньцек XVI-це векста, корхтай, што иняру князть Глебонь куломдонза меле муромась ляткшнесть казяма язычникокс. Сельмонь урматнень синь пчкафнезь башка эшиняса, конатнень ульсть, синь кемамаснон коряс, чудань тии вийсна, ёрямок эшинятненди сиянь ярмакт, кода озксказне. Синь повфнесть эрь кодама шуфтонь ундонь вельхксс руцят или нардамат, конатненди сюконякшнесть, эсь шкайснонды озксказнекс каннесть алашат; кулофть мархта синь путнесть калму шнаста кодаф карькст, конатнень вельде ульсь кода куцендемс шуфттнень ланга; ётафнесть кулофнень лемс эсь лацонь тризнат (руз.) (мок., конатнень пингста тюрендсть, иськорясть фкя-фкянди шамат, тянь вельде няфнезь кулофть инкса пичедемаснон. Муромецнень ёткса ульсь и мусульманонь кемамась, лемнемок «сквернай Моамефть» эсь прорококс, конань мархта синь содафтсть волжскяй болгархнень вельде. Муромскяй калмотнень башка ширесна ульсть сянь эса, што ломаттнень калмосезь марса алашатнень и кой-коста тракснень мархта.

Кода ладяфоль кучка веконь лия поволжскяй фиттнень, калмамста поминандамань ярхцамбяльхнень ёткса ульсть жуватань пакарьхть. Алашатнень калмосезь башка, овстафста и кильтьфста, путнезь сонь калму стане, бта сон эрек, ащи пеккедь лангса, пильгонза мянтьфт и пряц кепотьф (сонь путнезь калму куцеманя лангс)[11].

Оружиясь качествань коряс маластонь аймакнень эса ульсь инь цебярсь, а ювелирнай мазоптомбяльхне, конатнень эзда лама муфт калмотнень эса, аердыхть лиятнень эзда эрь кодама формань коряс и тифт пяк лац. Муромать ульсть эсь лацонь дугакс мянтьф прянь мазоптомкасна, конат кодафтольхть алашань шяярьста и кедьста, конат спираль лаца пельтьфтольхть бронзань сереса. Мяль салай ся, што тяфтапт лия финно-угрань пляматнень ёткса аф васьфневихть.

XI-це векть ушетксонцы Муромсь кенерсь ни арамс Кельме-Ши стямань ширень Русьса торгавамань оцю вастокс и вятсь торгавамань тефт волжскяй болгархнень (руз.) (мок. мархта. Окась оцю ведензон мархта макссесь кели ки болгархненди сашендомс Мурому венчень оцю караван мархта: Муромса питни кеттнень, медть и штать полафнезь Шинь стямань ширень паршихнень лангс — парьхциень котфнень, ожнатнень, крганятнень и эрь кодама кшнинь изделиятнень. Болгарда башка тяза сашендсть мишендема-рамсема ломатть Киевста и Черниговста[3].

Археологиясь

Муромань материальнай культурань памятникне сяда лама содафт калмама васттнень шувондомаснон коряс. Калмама васттнень эрязста ушедсть тонафнемост XX-це векть ушетксста. Шувфтольхть Пятницкяй, Муромскяй, Максимовскяй и Урвановскяй калмотне. 1914-це кизоня В. А. Городцов кочкамок марс итокнень Подболотьевскяй могильникть археологическяй исследованиянц коряс, кона тифоль 1910-це кизоня, кочказень марс муромскяй культурать основной признаконзон. Сяльде калмама васттнень шувондомасна мольфтевсть сяда тов. Сембоц шувф 800 малава калма. Аф фкя пингонь материалхне лездсть тиемс типохронологическяй колонка мокшэрзятнень культураснон VI—VII-це векста сявомок XI-це векти молемс касоманц-виияманц колга.

Могильникнень улемстост тевс нолявсть калмамань кафта метотт: сяда шуроста васьфневсть ловажань плхтамась (руз.) (мок., конань мельге ляткснень калмосезь модати и сяда сидеста васьфневсь ловажань модать потмос калмамась. Муромскяй калмотнень эсь лацонь ширеснон ёткста явфнихть сянь, што калма лоткне ульсть кувакат, 3-4 метрань кувалмосот, кулофнень прясна шарфтфтольхть кельме шири. X-XI-це векста калмоть кувалмоц кири ловажать кувалмонцты. Калмосесть лазксфтома, кулофнень керса ашкоткшнемась ульсь финно-угрань нароттнень эсь лацонь койкс. Сяда инголи калмотненди путнесть алашат. Содафт и аньцек алашань и сяда шуроста траксонь калмот. Ракшатнень калмосна юмсихть X-це векть омбоце пялестонза.

Материальнай памятникнень эзда мазыхть и эсь лацоннет авань мазоптомкатне, сембода пяк пряс путоманнетне. Улихть дугакс мянтьф пряса канневи мазоптомкат, конат тифт алашань шяярьста и кядень шнаняста, конат спиралькс ашкотфт бронзань сереса. Лия финнонь нароттнень тяфтама элементсна аш.

XI—XIII-це веконь славянонь курганнай калмолангонь и селищань шувондоматне макссихть кой-кодама материал территориять славянскяй колонизациянц процессонзон тонафнемаснонды. Улихть башка муфкст, конат корхтайхть аймакть торгавамань и экономическяй сотксонзон колга[3].

Славянскяй колонизациясь

Славянскяй колонизациянь процесснень эса оцю васта занцесь Муромсь, кода кемокстаф пункт княжескяй азорондомань кемокстаманди. Славянскяй азорондамась алдонь Окаса кемокстафоль 965-це кизоня Святославонь Ока-ть и Волгать лангс якаманц вельде и Владимир Святославовичень 985-це кизоня. 988-це кизоня Муромса эвондась васенце князсь Глеб Владимирович. Археологиянь уликснень коряс ошть кучка кемокстаф усадьбац ульсь строяф X-це векть омбоце пялестонза ся вастса, коса инголи кивок ашезь эря. Сон ащесь кучкаса муромонь и славянонь селищатнень ёткса.

Шинь стямань ширень Европать народонза минь эрань IX векть песта — X векть ушетксста

X и XI-це векнень омбоце пялестост Тумовскяй посёлкать и калмотнень материалснон коряс ушеды няевома славянонь культурать влиянияц, тяконь лувксса керамикать. Содафт случайхть, мзярда муромонь и славянонь селищатне эряйхть марса. Славянонь паршихнень улемаснон лангс ванозь, васенда муромать моданзон лангс сашендсть эряма кривичне (руз.) (мок.. Муромань культурась валом-валом юксневи, юмафнесы эсь лацонь шинц. Юмсихть авань прянь мазоптомкатне. XI-це векть васенце пялестонза муромать паршинзон эсь лацонь ширесна юмсихть, хоть башка синь паршисна нинге ванфневихть. Славянонь влияниятнень ширеснон эзда фкакс арась ся, што кулофнень прясна шарфнефт шинь валгома шири, а инголи прясна ванцть кельме шири.

Лятфтамат

  1. ↑ История древнего города Мурома (рус.). nicbar.ru. Дата обращения: 9 февральста 2026.
  2. ↑ Гришаков В. В., Зеленеев Ю. А. Мурома VII—XI вв.. — Марийский государственный университеn, Йошкар-Ола, 1990. — С. 77 с. — ISBN 5-230-13019-9.
  3. ↑ 1 2 3 4 5 6 Рябинин Е. А. Финно-угорские племена в составе Древней Руси. СПб.: Изд-во СПбГУ, 1997.
  4. ↑ В. С. Кулешов. О происхождении этнонима мурома и о топонимах Муромской округи (рус.). web.archive.org. Дата обращения: 9 февральста 2026.
  5. ↑ Андрей Кочуров. Озера вологодской области (рус.). Насон – История города Вологды. Дата обращения: 9 февральста 2026.
  6. ↑ Андрей Кочуров. Озера вологодской области (рус.). Насон – История города Вологды. Дата обращения: 9 февральста 2026.
  7. ↑ Напольских В. В. Этнолингвистическая ситуация в лесной зоне Восточной Европы в первые века нашей эры и данные «Гетики» Иордана 2018. Т. 15. №1 Вопросы ономастики (рус.). onomastics.ru. Дата обращения: 9 февральста 2026.
  8. ↑ Повесть о водворении христианства в Муроме // Памятники старинной русской литературы. Вып. 1. СПб.: 1860. С. 229.
  9. ↑ Андрей Кочуров. Мурм-озеро (рус.). Насон – История города Вологды. Дата обращения: 9 февральста 2026.
  10. ↑ Гончарова Н. Н., Конопелькин Д. С. Новые данные к антропологии финских племен Верхней Волги и бассейна Оки // Физическая антропология: методики, базы данных, научные результаты (рус.). academia.edu. Дата обращения: 13 февральста 2026.
  11. ↑ О. В. Зеленцова, Л. В. Яворская. К вопросу об особенностях ритуальных действий с животными в погребальных обрядах муромы (по археозоологическим материалам Подболотьевского могильника )..

Литературась

Ссылкатне

Сявф"https://mdf.ruwiki.ru/w/index.php?title=Мурома&oldid=418003"-ста