Свияжск ваксарошсь
| Ваксарош | |
| Свияжск ваксарошсь | |
|---|---|
| 55°46′20″ с. ш. 48°39′32″ в. д.GЯO | |
| Странась |
 Россия |
| Ащема вастоц | Свияжск, Татарстан |
| Архитекторсь | Иван Выродков |
| Мзярда пуроптф-тиф | 1551 кизось |
| Состоянияц | одкстоптф |
 |
|
Свияжск ваксарошсь (руз. Свияжская крепость) — Свияжскть шуфтонь ваксарошец, кона 1551-це кизоня путфоль ниле недяляста, опорнай пунктокс Казань ошть сявоманцты анокламста. Тя ваксарошсь сяда оцюволь эстонь Москувонь кремлять и лия рузонь оцю ваксарошнень коряс[1].
Кодамоль сон
Свияжск ваксарошсь ащесь кремляста (шуфтста путф ошста) и перфканза стяфтфоль оржаптф пе мархта шочконь перяфкс. Кремлясь занцезе Покаряв пандть тёкшенц и планть лангса ульсь кода овал. Сонь 2,5 вайгяльбе кувалмоса тумоста стяфтф стенац ащесь 420 шочкста. Ваксарошть стенанзон вельхксса кепотьфоль 16 башня, вететне эздост ульсть пачкаст суваманди. Мекольцетне лемневсть Роштувань, Никольскяй, Сергиевскяй (Сиянь), Можайскяй Миколань и Пятницкяй. Лядыкс башнятнень пачкаст аф ётават, тяда башка, ульсть нинге ляцендема ниле вастт . Тяфта жа крепостной стенаса ульсть башняфтома кафта ортат (калиткат) — Жилецкяйхне и Адашефне. Щучья и Свияга ляйхненди валгсть кафта салавань кяшема вастт[2].
Кремлять потмоста няевсь Роштувань соборть тёкшец и путфоль мзярошка шуфтонь церькав. Тяфта жа тяса ульсть кафта монастырьхть: Успенско-Никольскяйсь (Богородицкяйсь) кевонь Успенскяйть и Никольскяй церькавонь ярхцама вастонь мархтось и Троице-Сергиевскяй монастырсь кафта фкя лемса храм мархтось. Синдедост башка ваксарошса ульсть оцязоронь куд, дьячай куд и казеннай пирьф, коса ванфневсть пушкатне, порохсь и ядратне. Сёронь-кшинь паршись ванфневсь утомса. Ня кутта башка ваксарошса ульсть кафта тюрьмат. Лядыкс куттне ульсть воеводань, стрелецонь, пушкарень, церькавса служаень и посадскяй лия ломаттнень кудсна, ёткозост сувсесть мишендемань ниле лавкат. Ошень инь оцю площадсь таргавсь Роштувань ортатнень кафцьке ширеваст — пялец кремляса, пялец посадса[2].
Кремлять перьф панда шамава и сонь алонза келемсь посадсь, кона перяфоль оржаптф пе мархта шочконь перяфксса, эсост ульсть и ортатка. Посадаса ульсть ниле церькафт, оцязоронь кутт и лама эряма вастта, конатнень эса эрясть служилай и посадскяй ломаттть, сембоц 1100-да ламоль. Тяса жа тяльгондсь мишендема-рамсема пирьфсь, косотольхть таможнясь, таваронь укстамань вастсь, утопне и ошень торгавамань вастсь, конань эса ульсь 254 лавка. Лавкатнень рядсна валгондсть Свияга ляйти, косоль пристанць. Оржаптф пе мархта шочконь перяфксть фтала ульсть колма слободат — Ямской, Жилецкяй и Архимандричьянь[2].
Эрямопингсь
Казанть маласа строямс ваксарош — тя мяльсь сась Иван Грознай оцязорти 1550-це кизонь аф удалафста Казаньть лангс молемада меле. Ваксарошсь арьсефоль кода Рузонь войскань база Казанскяй ханствать лангс врьгятемста. Тянкса кочкафоль пяк пара васта Покаряв панда пряса Свияга ляйть прама вастсонза, конань ульсть крута ширенза и пцтай сембе ширде шудесь перьфканза ведь. Сяс мес рузонь модатнень эзда ичкоздень вастса, аф эсь мода лангса, ошень путомась тевсь пельксоль, то, улема, васенцеда рузонь ваксарошень зодчестваса нолдазь тевс сборнай строительствань методть, конанди ушеткс путсь дьяксь Иван Григорьевич Выродков. 1550—1551-це кизотнень сон кучфоль Угличскяй уезду Ушатых князть вотчинав, коса чаптфтольхть стенатне, башнятне и мянь сай пингонь ошень церькафне. Сембе шочкне марафтольхть венчс и оцю войскань видеса Шах-Али (Шигалейть) вятеманц ала Рав ляйть эзга ускфтольхть сай пингонь ваксарошть вастс. Штоба казанецне афольхть шоря ошть строяманцты-кеподеманцты, Казанть алу кучфоль князсь Петр Серебряный, кона апак учсек врьгятсь и тапазе казанскяй посадть[2].
Курокста ароптомок вирть эзда Покаряв пандть, ваксарошть путомонза-стяфтомонза ушедсть 24-це майста. Ускф шочкне сатсть аньцек, штоба тиемс пандть пяленц, лядыкс пяленц савсь строямс тястонь вирьста.
Рав ляйть панда мархта ширесонза рузонь ваксарошть эвондамац вятсь сянди, што тостонь эряйхне — черемисне, мокшетне, эрзятне и чувашне — кармасть ётнема рузонь государствав. Казаньца Свияжскяйть строямац кеподсь абондома, сяськсь Москуть мяленц коряс ладяф тевсь и Иван IV-ти кеподезе казанскяй престолти эсь ломаненц Шах-Алить[2]. Рава трвать сембе панда ширец лувафтфоль руснень кядялу, а стане жа мрдафтфтольхть полонцта 60 тёжянь рузонь ломань. Сембе сяка курок ни казанецне меки потасть Россиять эзда, а пандонь ширеса крьвязсь кеподема, кона тапафоль Семён Микулинскяй и Петр Серебрянай княснень войскаснон мархта. 1552-це кизонь августста Свияжскяи сувась рузонь войскась Иван Грознай оцязорть вятеманц ала, кона мольсь Казаньть лангс. Тоса ащесь вете шит и тусть венчса уезь Казани, коса ушедсь лангозонза врьгятемась, кона вятсь сонь сявоманцты и марнек рузонь масторти сувафтоманцты. Казанть сявомда меле Свияжскяйсь Казанть мархта ряцок служась русскяй войскань опорнай пунктокс и марс пуромома вастокс. Синь кирнезь-тапсезь казанскяй татархнень и мариецнень восстаниятнень пингста (черемисскяй войнатнень пингста).
Иван Грознайть пингста тиф ваксарошсь ащесь сядода лама киза, мезьда меле марнек срадсь-каладсь и сонь савсь строямс одукс. Од стенатне ламода сяда кальдяфтольхть ингольцетнень коряс. Шочкста вачкаф стенать вастс путсть 2322 м кувалмоса оржаптф пе мархта шочконь перяфкс, конань эса ульсь ниле башнят. 1703 — це кизоти ванфтовсть аньцек кафттне эздост. XVIII-це векть пенцты Свияжск ошень лядыкс кемакстаф перяфксне марнек юмасть. Куйбышевскяй водохранилищать стяфтомда меле 1955—1957-це кизотнень Равса ведть серец ламода кеподсь, Свияжскяйть алдонь пяльксоц ваясь ведьс, а ошть панда пряса ащи кунардонь пингонь пяльксоц, коса мзярда-бди ульсь кремлясь, арась цёнгакс[2].
Лятфтаматне
- ↑ Писцовая книга Свияжского уезда 1565-67 г. / Книга города Свияжскаго и внутри города... (Опись города) (рус.). archeo73.ru. Дата обращения: 13 сентябрьста 2020. Архивировано 21 февральста 2020 года.
- ↑ 1 2 3 4 5 6 Воротникова, Неделин, 2021, с. 212—235.
Литературась
- Воротникова И. А., Неделин В. М. Кремли, крепости и укреплённые монастыри Русского государства XV—XVII веков. — М.: БуксМАрт, 2021. — Т. 3: Крепости восточных рубежей России. — Кн. 1. — 800 с. — ISBN 978-5-907267-20-6.
- Губайдуллин А. М., Хамзин Р. Н. О крепостных сооружениях Свияжска // Археология евразийских степей. — 2020. — № 6. — С. 410—417.
- Каргер М. К. Крепостные сооружения Свияжска (материалы по истории деревянного крепостного зодчества) // Известия общества археологии, истории и этнографии при Казанском университете. — 1929. — Т. XXXIV, № 3—4. — С. 131—151.
- Медведь А. Н. И снова о Свияжской крепости 1551 г. // Археология евразийских степей. — 2023. — № 5. — С. 211—215.
- Подключников В. Н. Планировка и постройка древнего Свияжска // Архитектура СССР. — М.: Гос. архитект. изд-во, 1943. — Вып. 3. — С. 34—38.
- Валиев Р.Р., Ситдиков А.Г., Шакиров З.Г. О застройке посадской части Свияжска(по материалом раскопок 2008 г.) // Поволжская археология. — 2012. — № 2. — С. 184—210.