Городецкяй культурась

Городецкяй культурась Кшнинь вексь
Географическяй аймаксь	Равкужесь
Пингсь	(минь эрадонк ингольдень VII-це вексь — минь эрань II вексь)
Кит	волжскяй фиттне
Полафнемась
Текстильнай керамикань культурась← Бондарихинскяй культурась← → Рязано-окскяй калмотнень культурасна Кунардонь мокшэрзянь культурась Кунардонь марийскяй культурась

Городецкяй культурась (руз. Городецкая культура) — кшнинь веконь археологическяй культурась (минь эрадонк ингольдень VII-це вексь — минь эраньконь II-це вексь), конань памятниконзон мушендсазь Пензенскяй, Рязанскяй, Самарскяй, Саратовскяй, Тамбовскяй, Липецкяй и Воронежскяй областтнень эса, а стане жа Марий Элса, Мордовияса и Чувашияса. Кой-коста сотови Геродотонь тиссагетонзон мархта.

Культурась лемтьф сянь коряс, што 1898-це кизоня В. А. Городцов музе модать потмоста Городецкяй ошпандть (руз. городище) Спасск-Рязанский ошть маласа. Лия лемоц — «рогожнай керамикань» ошпанттнень культурасна.

Эрямопингсь

Городецкяй культурась касондсь-вииякшнесь текстильнай керамикань культурать и бондарихинскяй культурать юронзон лангса вирень степонь зонаса. Сонь эздонза кельме шире (Ока ляйть фтала) ульсть теенза мала дьяковскяй культурань памятникт, конатнень эвондамасна стане жа сотф текстильнай керамикань культурать мархта, но бондарихинскяй пляматне сонь тиевомасонза, улема, ашесть примсе участия. Ули туфтал арьсемс, што городецкяй культурань инь кунардонь памятникне ащесть Дон ляйть бассейнаса, коса содаф сядода лама апак кемокстак городецкяй веле и аньцек 14 ошпанда. Ошпанттне (кемокстаф эряма васттне) эвондакшнихть аф ламода сяда меле и синь эвондамасна, кой-кона исследовательхне сотнесазь «военнай демократиять» пингонц мархта, кона сашенды вирень зонань модатнень лангс ингольдень кшнинь векста. Ошпанттнень строямасна сотф сянь мархта, што эрявсть араламс кудонь жуватань стадатне, конатнень лангс каясть сельме шабратне. Лия кодамовок козяшисна синь ашель. Ошпанттнень эса пцтай аф мушендовихть клатт, ингольдень городецкяй памятникнень эса муфнень ёткса кшниста тиф паршида пяк кржа, лама пакарьста тиф орудияда. Минь эрадонк ингольдень VI — V-це векнень городецкяй пляматне мартрафтольхть скифнень мархта и паньфтольхть Дон ляйть маластонь модатнень лангста. Пялькссна ётась Ока ляйть маластонь модатненди, лядыхне Саратовскяй Рав кужеть видес, коста синь меколи панезь сарматтне. Городецкяй кунардонь пингоннеть канниснон песна сотфт кунардонь пингонь мокшэрзянь пляматнень тиевомаснон мархта, коса синь афкукс примасть участия, сяс мес мокшэрзянь сембода кунардонь памятникне эвондакшнихть городецкяй модатнень лангса. Но аф ваномок уликс мяльхнень лангс, вряд ли синь рольсна тя процесса ульсь оцюкс, сяс мес кунардонь пингонь мокшэрзянь могильникнень эса тя пингс апак мук фкявок городецкяй кядьгоня текстильнай орнамент мархта, а городецкяй памятникнень ёткса аф содаф фкявок калмама васта. Городецкяй пляматнень ашель койсна калмосемс модати и сон афкукс сявфоль лия наротть эзда, конатне эвондасть минь эраньконь ушетксста городецкяй пляматнень эряма вастсост. Финцне арьсихть, што нят ульсть Кама ляйть маласа эряй пляматне (пьяноборскяй культурась), лиятне путнесазь тяза сарматтнень, колмоцетне арьсихть, што ульсь саргатскяй культурань пляматнень миграциясна.

Культурась

Культурась няфтеви аф оцю кемокстаф ошпандса, сяда шуроста — панжада велеса, жертвенникса, калмама васттне аф содафт. Эряма васттнень эса панчфт модань куднят, пялес модань куднят, модань лангонь кутт. Рогожань и котфонь пильгоки мархта керамикась вадяв казяма, сяда мельдень пингть — пиндолды. Синь содазь кшнить металлургиянц, но кшнинь орудиядост ульсь нинге пяк кржа. Сяда келиста нолявсть тевс пакарьста тиф паршихне, тяконь лувксса налонь и гарпунонь петне.

Тефне

Ломаттне якасть охотендама, кунцесть калхт, добувасть медь вирень мешнень эзда, кирдсть жуватат, касфтсть перень сёрот мотыгаса модать шувоманц вельде; кирдсть соткст скифнень, дьяковскяй культурань пляматнень, Кама ляйть малань модатнень мархта.

Этническяй атрибуциясь

Ламоц исследовательхнень мяльснон коряс, городецкяй культурань эряйхне ульсть сяда лама волжскяй фиттне (мокшэрзятнень и мариецнень атянь-атясна). Но, кда корхтамс мокшэрзятнень колга, тя арьсемась ащи аньцек сянь лангса, што кунардонь пингонь мокшэрзянь калмотне и городецкяй памятникне кой-конашкада ащихть сяка васттнень эса. Тя мяльсь-арьсемась кемокстась 1930-це кизотнень, мзярда советскяй археологияса азорондась автохтоннай теориясь, конань коря тиевсть ламоц нароттне, конат кунардонь пингть эрясть тяниень Россиять моданзон лангса. Мокшэрзятнень автохтоннай эвондамасна кемокстафоль А. П. Смирновонь мархта, кона кандозень городецкяй культурати и III—V веконь мокшэрзянь калмама васттнень .

Лятфтамат

Литературась

• Миронов В. Г. Городецкая культура : состояние проблемы и перспективы изучения // Археологические памятники Среднего Поочья : сб. науч. тр. / Отв. ред. В. П. Челяпов. — Рязань: НПЦ по охране и использованию памятников истории и культуры Ряз. обл., 1995. — Вып. 4. — С. 68—89.
• Сарапулкина Т. В. Городецкая культура на Верхнем и Среднем Дону : диссертация ... кандидата исторических наук : 07.00.06. — Воронеж, 2010. — 329 с.
• Смирнов А. П., Трубникова Н. В. Городецкая культура. — М.: Наука, 1965. — 39 с. — (Археология СССР. Свод археологических источников. Вып. Д1-14).
• Ставицкий В. В. О границах распространения и локальных вариантах городецкой культуры // NovaInfo.Ru : научно-методический журнал. — 2016. — № 56, т. 4. — С. 121—128.
• Ставицкий В. В. Проблема происхождения городецкой культуры // Вестник НИИ гуманитарных наук при Правительстве Республики Мордовия. — Саранск, 2010. — № 1 (13). — С. 7—16.
• Ставицкий В. В. Проблема хронологии и периодизации городецкой культуры // NovaInfo.Ru : научно-методический журнал. — 2016. — № 57, т. 4. — С. 129—139.