Масланцясь

Б.Н. Ельцинонь лемса библиотекань материалхне

Тя статьяса материалхне нолдафт тевсБ.Н. Ельцинонь лемса Президентскяй библиотекань фондста

Б. Н. Ельцинонь лемса Президентскяй библиотекась

Тя статьясь — о славянонь койхнень колга. О Церькавса илань васьфтемать колга Ванк. Сырнай седмица.

Масланця
Типсь	Народно-христианскяй
Лиякс	Масланця недялясь
Тяфта жа	Сырнай седмицась (церк.)
Смузсь	тялоть ильхтемац
Ётафневи	шинь стямань ширень славяттне
Ушетксоц	понедельникста Мясопустта меле
Самс	Прощёнай недляши
Датась	Очижида ингольдень кафксоце недялясь
2025	11-це февральста (24-це февральста) 17-це февральста (2-це мартста)
2026	3-це февральста (16-це февральста) 9-це февральста (22-це февральста)
2027	23-це февральста (8-це мартста) 1-це мартста (14-це мартста)
Васьфтевомац	народнай гуляндаматне
Койхне-обуцятне	пицемс пачат, сырникт, тиендемс вареникт, якамс инжикс, кочксемс шра лангс, курькснемс нурдса и нурдоняса, наряжакшнемс, плхнемс ила калмосемс Масланцять чучеланц
Сотф	Очижинь постть мархта
Масланцясь

Масланцясь (руз. Ма́сленица ) — шинь стяма ширдень славяттнень тундань народнай иласна. Васьфневи мекольце недялять Оцю постта инголе, ладяй церькавонь ковгярьксть Сырнай седмицанцты. Ладяй Куя шавшити и карнавалти, конат васьфневихть коень коряс католическяй и протестантскяй масторхнень эса. Масланцянь обуцятне ванфтсазь кой-кона пялькснень, конат ульсть Христости кемамада ингольде.

Масланцянь шись полафнесы эсь вастонц эрь кизоня, тя ащи Очижинь илать шить эзда. 2026-це кизоня Масланцянь недялясь ушедсь февральть 16-це шистонза и аделсеви 22-це февральста.

Руснень каванямбяльсна — пачатне и цюкорнятне, а белоруснень и украинецнень — вареникне и сырникне. Украинскяй и белорусскяй народнай культураса ули тяфта жа налхксемань кой, конань вельде наказакшнезь аф рьвяяф цёратнень и рьвакс апак лисьф стирьхнень — колодка.

Тяниень пингть Масланцянь васьфтемста ётафнихть гуляндамат и плхнихть чучелат.

Семантикась

Масланцясь рузонь коень культураса няфнесы велень хозяйстваса од кизоть ушетксонц. Тя пингонь койхне сотфт кафта фкя-фкянь мархта сотф тематнень мархта: раштамать-шачфтомать (аграрнай, оргиастическяй, фертильнай, матримониальнай) и атянь-атятнень (шисоннетнень и кулофнень) почитандамаснон мархта.

Сяс мес Масланцясь ладяй православнай церькавонь ковгярьксть Сырнай седмицати, масланцянь весялготкшнемась тяфта жа шарьхкотькшневи кода ушеткс Великай постть пингста прянь кирдемада инголе.

Илань недялять вииямац касондсь пети. Васенце шитнень анокласть коень налхксематненди и весялготкшнематненди, конат ушеткшнесть шуваланяста, мзярда сашендсь «Кели Масланцясь».

Масланцянь кучка темакс, Владимир Проппоньмяленц коряс, ащи модать касыксонь раштамац, кона кемоста сотф народнай архаическяй шарьхкодемаса атянь-атяньконь почитандамаснон, ритуальнай ярхцамать, ломанень фертильностть и вообще рьвяямать-рьвакс лисемать мархта. Масланцянь койхне-обуцятне пуропнесазь марс ня мотифнень. XXI-це векть ушетксонцты ламотне ня обуцятнень эзда ванфтовсть аньцек рудиментарнайста и илань ётафтомась арась туфталкс содафтомс народнай культурань башка элементтнень мархта, аф кода марнек кизонь циклань эрявикс элементокс. Эрь шинь эряфса ванфтовихть койхне-обуцятне якамс инжикс и ярхцамс пачада, а тяфта жа Прощеннай недляшиста анамс фкя-фкянь кядьста прощение.

«Масланцять пингста народнай гуляндаматне Адмиралтейскяй площадьса Петербургса». К. Е. Маковский, 1869.

Тяниень фольклористть А. Б. Морозонь мяленц коряс, аш туфтал азомс, што Масланцясь — тя ила, кона сась язычестваста. Масланцянь койхне няфтьсазь сянь, мезе мярьги церькавсь. Тяфта, постсь шарьхкотькшневи коень культурать мархта кода танцти и вай ярхцамбяльда аф ярхцамась, сяс постть ушедомда инголе эряви сивомс сяда лама. Масланцять «языческяй» смузец няеви чучелань тиемаса и плхтамаса. Но афкукс тя чучелась мзярдовок ашезь лувонда кода идол, а койть юронза молихть налхксематнень эзда.

Койхне

Кулофнень лятфнемасна

Масланцянь кой-кона ила-крдатнень ули поминандамань характерсна. Тунда кулофнень поминовандамасна, тяшкстафт церькавонь ковгярьксса колма родителень ёткшиса (сивольфтома и кафта оцю постонь), народнай ковгярьксса улихть койхть крьвяснемс толмархт, ярхцамс пачада, якамс калмотненди, ётнемс кудга наряжафста Масланцять мархта, щашендомс и калмосемс чучелат.

Пачатне и лия каванямбяльхне

Кунардонь пинкнень ломаттне верондасть, што кулофне, улемок модать потмоса, маштсть касфтомс модать раштамань виенц. Пачатне ульсть поминандамань ярхцамбялькс, синь каннезь калмотненди или кадондозь кулыхненди вальмя лангс, штоба анамс кядьстост лезкс сокамань-видемань тевса. Пачатнень макссезь ашуфненди или ярхцасть кулофнень лятфнеманкса. Масланцянь мекольце шиня — Прощёнай недляшиста — якасть «прощандама» калмолангс.

Сяка пингть пачатне лувондовихть сембода архаическяй ярхцамбялькс, конат тёждят пидемс, тёждяста канневихть вастста вастс и тяка пингть сатомшка топоцьта и ваи ярхцамбяльсь. Ня колма факторхне тиендьсазь пачатнень илань инь эрявикс гастрономическяй пяльксокс. Тяда башка, церькавонь ковгярькссь аф мярьгонди сивольда ярхцамс Сырной седмицаста, сяс илань шрать лангса ашет сиволень ярхцамбяльхть. Мярьгондеви ярхцсемс калда, алда и лофцонь ярхцамбяльда.

Масланцяста вельф ярхцамась, кона сотф, Проппонь арьсеманц коряс, стане жа модать раштаманц мархта, а стане жа сон ащи од кизонь васьфтемать лятксокс, кона васьфневсь мартста 1348-це кизоти самс. Тунда магическяй од кизоста вельф ярхцамась илать ётафтомдонза мелевок ашезь юма. Тяда башка, каванямась ульсь стане жа эрек раднянь каванямакс. Марстонь илань ярхцамась кемокснезень социальнай соткснень и лездсть сувафтомс эзонза од семьятнень. Вельф ярхцамась и винада симондемась стане жа лездсть валхтомс этическяй перяфкснень корхнемаса эрь кодама кизонь алятнень и аватнень ёткса, мезсь лувондовсь кода продуцирующай ушетксонь эреклафтома.

Ф. В. Сычков. Кштима. 1911

Од рьвяяйхненди честень путомась

Масланцясь канни оцю смузь рузонь рьвяямань койса и няфнесы кизонь свадьбань циклать шумордаманц. Одс рьвяяйхненди лемтьф койхне ётафневсть кизонь лия шистовок (Очижиста, Иванонь шиста и Пятруста). Альберт Байбуринонь арьсеманц коряс, ня практикатнень марстонь смузьсна ащи социальнай ширде кемокстамаса и од рьвяяйхнень статусснон полафтомаса, а тяфта жа башка свадьбать сувафтомаса местнай сообществать календарнай и социальнай ритмас.

Пара койхненди можнат кандомс кельме ширень рузонь вьюнишниксь (вьюнишник)(моронь морамась од рьвяяхнень шумбрандафтомаснон мархта), целовниксь (од рьвяяхненди инжикс якамась, од рьвять каванямац и палсемац), од мирдть панда пряста курькснемац, и сембода содаф койсь авозть пачанза — мзярда од рьвяяхне якайхть инжикс рьвянять тядянзон-алянзон пяли. Якасть стане жа крёстнай тядятненди-алятненди и лия раднятнень пяли. Тяка пингть сяда сире раднятнень пяли якамась ули кода сотомс атянь-атянь почитандамать мархта.

Мзярда киньге мархта ашесть ванондов ладяф эряфонь койхне, масланцянь недяляста тянкса наказакшневсть коень колай ломаттне. Тяфтама обрядонь цебярь кепотьксокс ули кода лемдемс украинань и белоруссонь койсь, мзярда аф рьвяяф цёратненди и рьвакс аф ащи стирьхненди «повфнесть колодкат», сяс мес синь ашесть лисе рьвакс ётай кизоть.

Наряжакшнемась и налхксемась

Масланцяста щамась-карямась ащи илань пяк эрявикс пяльксокс, кона маласькофнесы сонь карнавалхненди. Российскяй и советскяй этнографнень пачфтемаснон коряс, наряжакшнесть ракшакс (алашакс, сявакс, букакс, офтокс, саразкс), аф ару кальдяв вийкс (шяйтанкс, вирятякс, кикиморакс), кулофокс (атякс, бабакс, конат сафольхть тона шиста) или бокста сафокс (бродягакс, ашукс, бабакс, мельникокс, цыганкс, туркакс). Ряженайхнень велева якамасна ульсь кода ширде саф ломанень парад, мезть вельде няфневсь хаосонь картинась, кона эряви мирть тундань одкстоптоманцты и мирозданиять структуранц одукс ладяманцты. Наряжаматненди тёкшекс ульсть Масланцять калмамац, кона няфнесы эсь мархтонза сиреть юмаманц. Тя няевсь, кепотьксонди, койса, мзярда Масланцянь чучелать щафнезь сире и ташта щамса.

Ф. В. Сычков. Илань налхксема

Наряжамада башка, масланцянь коень налхксематне сотфт толть и вишкешить мархта. Тяза кандовихть толмархне, конат, улема, сотфт «кулофнень эждемаснон» койть мархта, палы шарыхне, алашаса кильтьф нурдса курькснемась и пандста курькснемась, нюрямась, перьф кштиматне (хороводсь, колось), масланцянь моронь морсемась, сидеста визькс вал мархта или сокамать-видемать колга (кепотьксонди, «иляназти»). Ошень культураса келиста васьфневсть масланцянь балагаттне, офтонь рахсематне, клокса тюрематне и военнай налхксематне, тяфтапне кода «ловонь ошкять сявомац». Весялготкшнематнень и модать раштаманц ёткса сотксне ётафтови сотома и визькс валонь вельде. Визькс пеетькшнематне и моротне, кядьса няфнематне, нарочь кальдяв валса корхтамась, ронгонь штафнематне и щашендоматне фкя пингть рахафтыхть, а рахамать эса коень коряс ули эряфонь максы вий, и сргозьфневи производственнай ушеткссь. Фольклорнай масланцянь эротикась тяка пингть виияфнесы карнавальнай хаость эффектонц, магическяйста максси влияния модать и жувататнень раштамаснон лангс и сонь ули эсь лацонь смузец фертильнай кизонь од ломаттнень матримониальнай сотксонь перспективаса, няфнемок эсь вельденза рьвяямда ингольдень налхксемань форма.

В. И. Суриков. Ловонь ошкянь сявомась. 1891

Масланцять калмамац

Масланцянь мекольце шиня крьвяснесть оцю толмархт. Од ломаттне шарондсть пирьфова, кочксесть чепкат и таратт, каннесть пулфт — сембонь тянь марсезь марстонь марс и крьвяснезь. Толти сидеста ёрясть кархчт и ташта щапт (кепотьксонди, венчт или кептерьхть): аф эрявикс паршиень плхтамась тя кода одти ётамась, сире кизоть мархта пращандамась и одть васьфтемац. Толмарти обязательна ёрясть шужярь. Сокаень-видиень шарьхкодемаса шужярсь, кона сотфоль сёроть и кшить мархта, ульсь эсь лацонь обрядовай питнишиц.

Масланцянь калмамась лувондови сидеста васьфневи койкс, кона пуропнесыне марс кулофонь темать и урожаень темать. Содержаниянь коряс сон полафни регионцта регионти и велеста велети, но эрь мезне сувафни эсь эзонза някать или живой ломанть Масланцянь лемдемац и сонь илань васьфтемац, пародийнай «калмамань процессия» и, мекпяли, мзярда нолявсь тевс някась, сонь сязендезь пяльксова и пяльксонзон ёрязь паксять келес. Кода «калмамань процессиясь», станя и някать сязендемац ётнесть рахсезь и юватькшнезь. Масланцясь ульсь кода алянь, стане и авань персонажкс, конань эса китькстафтольхть алянь или авань ронгонь пяльксне.

А. М. Васнецов. Масланцянь чучелать плхтамац XX векть ушетксста

Меле кемокставсь койсь плхнемс чучелать. Мекпяли толмаронь или чучелань плхтамась кирдсь эсь эсонза кафта смусть: «калмамась» няфнесь сире кизоть и тялоть прважамаснон, а толть валдоц и псиц — од эряфть шачемац, шись и малаткшни лямбось.

Прощеньгянь анамась

Церькавонь койсь анцемс фкя-фкянь кядьста прощения макссь лем Масланцянь мекольце шити — Прощенай недляшити. Тя шиня сембе весялготкшнематне аделавольхть вечернять ушедомда инголе, коса ётафневсь простямань чин. Семьяса фкя-фкянь кядьста анасть прощения, ульсь кой, штоба рьвакс туф стирьсна шабаснон мархта тя шиня стане жа сашендольхть аляснонды и тумдост инголе прощандакшнельхть. Сяда ёмлатне сюконязь анасть сяда оцюфнень кядьста прощения, меле сяда сиретне ёмлатнень кядьста, и тяда меле колмоксть палсесть.

К. Крыжановский. Прощёнай шись сокаень-видиень семьяса. XIX вексь

Эрямопингонь свидетельстватне

Масланцять рузонь ингольдень койхнень колга сёрмадсть омба масторонь ломаттне, конат ульсть Москувонь Великай княжестваса. Сигизмунд Герберштейн (1526 кизось) пачфни, што Очижинь постонь васенце недялясь «московиттнень» ширеса «лемневи Syrna, лиякс мярьгомс „сырная“ (лат.: caseacea), синь ярхцайхть лофцонь ярхцамбяльда». Тяфта жа сон лятфнесы Масланцять (нем.: Faschang) илатнень ёткса, мзярда народса мярьгондеви симондемс комляв симомбяльда.

Ричард Ченслер (1553 кизось) сёрмады, што Великай постта инголе мекольце недялять русне «лемнесазь „ваень“ (анг.: Butterweek), и тя недялять синь аф ярхцайхть мезьдовок, лофцта и вайда башка. Но мон арьсян, што фкявок странаса аф уленди тяфта лама винада симондемада».

Жак Маржерет (1606 кизось) полаткшнесы Прощёнай недляшить колга азондомать:

Якайхть фкя-фкянь шири, палсихть, пращайхть, мирендайхть кда кяжияфтсть кодамовок валса или тевса; васьфнемста, — хуш мзярдонга тяда инголе ашесть няенде, — нльне ульцясовок шумбракснихть фкя-фкянь мархта палазь. Простямак монь, пожалняста, корхтай фкясь; Шкайсь тонь простиндатанза отвечай омбоцеть

— «Состояние Российской державы и Великого княжества Московского», Маржерет

Адам Олеарий (1647 кизось) азонды масланцянь гулянкатнень колга:

Тя постть васенце недялянц синь лемнесазь масланцякс, конань пингста синь аф ярхцсихть аф сивольда, аф алда, но аньцек вайда, лофцта и алда, тяка пингть стане симондихть эрь шиня водкада, пуряда и пивада и тяшкава каванякшнезь пекснон, што прянь аф мяляфтомшка; тяда меле усксевсть и пряснон вятезь апак арьсек, а инголи сидеста врьгятнесть фкя-фкянь лангс и шавондсть фкя-фкянь. Сай недялять синь ушедыхть эряма сетьмоста, ярхцайхть аньцек медьта и перень сёрода, симихть позада и ведьта, якайхть баняв, ливоськодыхть и штакшнесазь ингольдень недялять тиф пежеснон .

Масланцясь советскяй пингть

Октябрьскяй революцияда меле ушеткшни тюремась религиознай илатнень каршес, конатнень тяряфнихть полафтомс религиять каршес моли илатнень лангс:

Сире масланцять каршес сонь ялганзон, гуляндамать и симондемать каршес, Якстерь масланцясь ётафтови велеса культурнай налхксемаса-весялготкшнемаса и од кудъётконь тевонь пропагандаса.

— Якстерь масланцясь // Известия. 14 декабрьста 1923 кизось.

Но антирелигиознай молематне аф пяк эрявихть массовай публикати, и илась юмси официальнай ковгярьксста 1920-це кизотнень кучкаста.

Масланця лемсь ушедсь мртцема одукс 1960-це кизотнень песта. Масланцясь арси ошень марстонь илакс, конань ётафнесазь культурань работникне, конат нолясазь тевс анокс кемокстаф методическяй материалхнень. Илась арси стандартизованнайкс марнек странаса, сидеста молемок каршек тястоконь эряйхнень койснонды, конатнень ваныень рольсна, а аф участниконь. Эста жа масланцянь символхненди и койхненди калмамань-поминандамань или фертильно-оргиастическяйхнень вастс путневихть солярнай интерпретацият.

Масланцясь Белгородса, 2015-це кизось

Советскяй пингта мельдень Россияса

Кда инголи Масланцянь васьфтеманц аноклакшнезь синць ломаттне (чучелань тиемась, толмаронь анокламась, плхтамась, карнавальнай якаматне, налхкоматне), то XIX-це вектста ошнень эса сон сяда сидеста макссеви «вярде». Публичнай пространстваса, васендакиге ошень паркнень эса, ётафневихть ярмаркат и пялькстамат, пицевихть пачат и плхневихть чучелат, а мекольцесь сидеста ётафневи аф аньццек масланцянь недялять мекольце шистонза. Фкя лацонь сценарийхть няфневихть и тонафнемань учреждениятнень эса, коса шабатненди ётафневихть тематическяй.

Тяниень пингонь плхтамань практикатне, кода ни ладявсь, няфтихть сянь лангс, што чечелась наряжаф авакс и илати аф сувафнихть ингольдень пародийнай «калмамань» процессият, конат характернайхть кой-кона коень обрядонь варианттненди. Тяка пингть, хоть Масланцять ломаттне шарьхкодьсазь кода весялгофнемань мероприятияти, но сякокс улихть соткст ингольдень илать шарьхкодеманц мархта: чучелать плхтамац сотови тялоть «ильхтеманц» мархта, а толмарть лямбоц — малаткшни тундань-кизонь шить учендомаснон мархта. Тяниень пингста тя илать васьфтемац ули кода шарьхкодемс кода традиционнай ила-крдать реконструктивнай (и пялес сценическяй) формакс.

Масланцянь илат шуроста ётафневихть рабочай коллектифнень эсовок, сидеста тя иласта якайхть инжикс.

«Пачатнень индекссна»

Койс коре Масланцяда инголе СМИ-са печатлакшневихть мзяра питнесна пачатнень.

2025-це кизонь февральста «Бизнес FM-сь» лувозе, што Россиять эзга средняйста пачань порциять (потмофтома и добавкафтома) питнец 150 цалковай.

2026-це кизонь февральста Росстатсь лувозе, што марнек семьяти пачань пидеманди продуктатнень питнесна 208,9 руб.

Валмуворкст и приметат

• Аф сембось катоти Масланця, кармай и Великай пост.
• Аф сембе шиста свадьбат, аф сембось катоти Масланця.
• Пиравак и гуляндак баба Масланцяста, а постть колга лятфнек.
• Масланцясь вельф ярхцамась, ярмаконь ётафтомась.
• Симоть пуреда Масланцяста, а похмельясь синдензе Радуницада меле.
• Масланцясь — семиконь племянницац.

Лия народонь Масланця лаца илатне

• Мясопуст — славяттне-католикне
• Мясопуст или Фашанк — чехне, словакне
• Запусттне или Остаткатне — полякне
• Курентованье — словенецне
• Свадьба пичеть мархта — словенецне
• Фашник (хорв.: Fašnik) — хорваттне
• Звончархне — хорваттне
• Бушояраш — шокцатне (Венгриянь хорваттне)
• Покладе (серб.: Покладе) — серпне
• Вастлавьи — датчаттне, норвежецне, кельме ширень немецне, эстонецне, латышне
• Фастнахт — лембе ширень немецне, австриецне, швейцарецне
• Марди Гра — францмянь кяльса корхтай европеецне, американецне
• Каендама шись, или Пачань шись — англань кяльса корхтай европеецне, американецне, австралиецне
• Карнавал — ши валгомань христиаттне
• Бун Барекендан — армяттне
• Ужгавенес — литовецне
• Метени — латышне
• Апокриес — грекне
• Ласкиайнен — фиттне

Масланцясь искусстваса

• «Не всё коту масленица» — Александр Островскяень пьесац (1871-це кизось)
• «Ишь ты, Масленица!» — рисаваф мультфильма, режиссёрсь Роберт Саакянц (1985-це кизось)
• «Сибирский цирюльник» — художественнай фильма, режиссёрсь Никита Михалков (1998-це кизось). Масланцять васьфтеманц колга эпизод, Россиясь, 1885-це кизось
• «Февраль. Масленица» — «Времена года» — П. И. Чайковскяень фортепианань циклац
• «Проводы Масленицы» — Н. А. Римский-Корсаковонь «Снегурочка» операнц эзда сцена
• Народные гулянья на Масленой — И. Ф. Стравинскяень «Петрушка» балетстонза картина
• «Масленица» — Борис Кустодиевонь картинац (1916-це кизось)
• «Взятие снежного городка» — Василий Суриковонь картинац (1891-це кизось)

Лятфтамат

Литературась

• Байбурин А. К. Ритуал в традиционной культуре. СПб, 1993.
• Бахтин М. Творчество Франсуа Рабле и народная культура Средневековья и Ренессанса. М.: Худ. лит., 1990.
• Виноградова Л. Н. Зимняя календарная поэзия западных и восточных славян. М., 1982.
• Ивлева Л. М. Ряженье в русской традиционной культуре. СП, 1994.
• Пропп В. Я. Проблемы комизма и смеха. Л, 1976.
• Пропп В. Я. Русские аграрные праздники. Л., 1963.
• Толстая С. М. Полесский народный календарь. М., 2005.
• Славянские древности. Этнолингвистический словарь. В 5 т. Т.3. С. 194—199. М., 2004.
• Некрылова А. Ф. Русские народные городские праздники, увеселения и зрелища. Л., 1988.
• Шангина И.И, Некрылова А. Ф. Русские праздники. СПб, 2015.