Малькина, Мария Ивановна

Малькина, Мария Ивановна
Шачема лемсь	Мария
Шачема вастсь	Малав, Краснослободскяй районць, МАССР
Гражданствась	СССР, РФ
Покодемань тиендемац	литературнай критик, сёрмады, поэт

Малькина Мария Ивановна — литератураведсь, критиксь, поэтсь, тонафтысь.

Эряфонь киц

Шачсь 1944-це кизонь 14-це январьста сокаень-видиень семьяса ветеце идькс. Шачема велец - Ковылкинань аймаконь Малав велесь (руз. село Мамолаево). Аляц, Иван Егорович Малькин, ётазе гражданскяйть и Великай Отечественнай войнать. Коса аньцек ашезь сав воявамс теенза, Курскяй дугаса ульсь и лия вастова, но Шкабавазсь ванфтозе и 1945-це кизоня мрдась куду. И тяса эвондакшни кизефкс: Тя кода стане, аляц войнасоль и мрдась 1945-це кизоня, а стирец шачсь 1944-це кизоня. А лиссь вов кода. Курскяйть видеса сяськомда меле сяда сире солдаттнень ётафтозь обозникокс. А Иван Егоровиченди ульсь ни нильгемонь кафкса. И вов 1943-це кизонь тунданя прважазь сонь сяда юг ширдень республикав алашанкса - фронту эрявсть алашат. Ётамс савсь Ковылкинать пачк. Эрь командирсь лац шарьхкодсы, конашкава оцю мялец солдатть сувамс куду, няемс семьянц. Шарьхкодезь и Малькинонь и нолдазь фкя шис куду. Оцю кельгомась и оцю лажадомась кадозь эсь "лисьфснон". И вейхкса ковда меле Малькиттнень семьясост шачсь ветеце идсь. Архип, Паша, Володя, Татю и Маша - Иван Егоровичень и Пелагея Фёдоровнань идьсна. Кудса Машань Матюнякс лемнезь. Малькиттнень семьясост касф иттне ёньц коре удалафста шачсть. Матюнясь тонафнесь лац, хуш сёксенда и тялонда школав ашезь яка. Школав якамс ашель мезьса, ашельхть стирнять тялонь щамонза-карямонза, семьясна эрясь пяк ашуста. Хуш и лама мяннесь тонафнемань шида, сембе сяка тонафнемась теенза макссевсь тёждяста.

Тонафнемац и покодемац

Вейхксоце классть аделамда меле киза покодсь колхозса Оренбургонь областьса, тушендсь аканц пяли. Пяк лажаткшнесь стирнясь эсь шачема масторонцты и мрдась меки Малаву. Шумордазень кемонь класснень и тусь Зубувонь педучилищав тонафнема. Меле аделазе Н. П. Огарёвонь лемса Мокшэрзянь университетть филологиянь факультетть, получась якстерь диплом. Теенза панжадоль кись аспирантурав, но Мария Ивановна тусь мокшень вели, покодсь школаса тонафтыкс. Кемонь кизонь потмоста кенерсь работамс: вете кизот Од Синдрунь школаса, фкя киза Краснослободскяень РОНО-са инспекторкс, колма кизот покодсь Зайцянь школаса директоронь заместителькс, тушендсь Тульскяй областень Алексинскяй району и тоса фкя киза покодсь Поповка велень школаса завучекс.

1979-це кизоня сась Саранскяи, покодсь Кялень, литературань, историянь и экономикань научно-исследовательскяй институтса. Сёрмадсь кандидатскяй диссертация мокшень и эрзянь кяльса стихонь латцемать колга, аралазе сонь 1986-це кизоня .

А 1990-це кизоня лиссь "Мордовское стихосложение" монографияц. Мария Ивановна сёрматкшни статьят и рецензият литературань ламоц прябалатнень коряс. Сон сёрмадсь М. Безбородовонь, А.Малькинонь, С. Кинякинонь, А. Тяпаевонь, И. Кудашкинонь, И. Девинонь, В. Радинонь, В. Виардонь, В.Мишанинать и лиятнень творчестваснон колга.

Марса методистть А. И. Исайкинать мархта нодасть школанди мокшень кялень учебникт и учителенди лезксонди книгат.

1994-це кизоста сявомок М. И. Малькина ушедсь покодема "Мокша" журналса. Васенда ульсь прозань и критикань отделти вятикс. 2000-це кизоста сявомок ульсь главнай редакторти полафтыкс. 2003-2006-це кизотнень журналти ульсь главнай редакторкс. Пенсияв тусь 65 кизоса. Эряй Саранскяйса.

Книганза

1. Нила ават - ниле морот / Мария Малькина. - Таллин, 1998

2. Эряфть вайгяленза : критиконь мяльхть-арьсемат / Мария Малькина. - Саранск : Мордовскяй книжнай издательствась, 2005 (ГП Респ. тип. Красный Октябрь). - 294, ISBN 5-7595-1653-1

3. Мезе тейнек эряви? / Мария Малькина

Литературась

1. Ваймонь лихтибрят, 1994 к., Саранск, с. 127
2. Мокша журналсь, 2024 №1, с. 42-52