Зайця

Веле
Зайця
54°16′32″ с. ш. 43°40′31″ в. д.
Странась	Россия
Федерациянь субъектсь	Мордовия Республика
Историясь и географиясь
Частонь каркссь	UTC+3[d]
Эряйхне
Эряйхне	▼73 ломань (2020)
Национальносттне	мокшет
Цифрань идентификаторхне
Телефоннай кодсь	+7 88342
Почтовай индекссь	431341
Код ОКАТО	89234812003
Код ОКТМО	89634412106
Номерсь ГКГН	0085320
Зайця

Зайця велесь (руз. Зайцево) — велесь Мордовия Республикаса Краснослободскяй районца. Велеть лемонц шачеманц колга аш фкя мяль. Зайця (руз. Зайцево) мокшень велеть вакска шуди Кранжей ляйнясь, кона прай Лепнь ляи (руз. Леплейка) ляйть ваксса.

Велесь ащи 18 вайгяльбе вастса Краснослободск ошть эзда, Краснослободск — Ковылкина ардома кить — 4-шка вайгяльбет.

2024-це кизонь уликснень коряс эряй ломаньда — 68, хозяйствань вяти кудта — 29. (2024-це кизонь уликсне сявфт Ефаевань администрациянь велень советонь хозяйственнай книгаста).

Пензенскяй губерниянь эряма вастонь лемлувксть (1686 к.) коряс Зайцясь Краснослободскяй уездонь казеннай веле, эсонза 63 пирьф. Лемоц сотф мокшень служилай ломаттнень Зайцефнень фамилияснон мархта. Зайцев Яков Осиповичень кядяла ульсь 200 чета мода, "1669-1670 кизонь Атемарскяй десятинаса" лятфневи служилай ломанць Гаврила Иванович Зайцев.

Велеть лемоц

Васенце лятфнематне Зайця велеть колга улихть Мордовскяй Государственнай Центральнай архивса. Тоса 1647 кизонь судебнай описьса азондови несчастнай случайть колга, кона лиссь помещикть Рахманиновонь именияса «Зайцево, кона ащи Рахманка ляйть лангса». Тяни тя ляйсь Рахманка лемтьф Кранжей, кона шуди Зайця велеть вакска.

Нинге ули лятфнема Зайцять колга «Пензенскяй десятняса 1696 кизоня» азондови, што Яков Осипов, Зайцевонь цёранц, ульсь кафта сятт четей модац.

1869-це кизоня 63 пирьфоль.

1913-це кизоня велеса 101 пирьфоль, 753 ломань.

«Атемарскяй десятняса 1669 кизоня» лятфневи служилай ломанць Гаврила Иванов, Зайцевонь цёрац. Тястоконь краеветтне толкавасазь, што велеть лемоц тиевсь личнай дохристианскяй лемста. Синь арьсихть, што велеть тииц мокша ломанць Зайця(Сайця). Сире ломаттне велеть лемонц сотнесазь кстиндамань сядонгогольдень Сайця мокшень лемть мархта. Легендатнень коряс, конат тячемс ванфтовсть тястонь сире эряйхнень мялямса, велесь эвондась модать лангс тяфта. Кунардонь пинкнень велеть вастса кассь туста тумонь вирь. Тяса ульсь охотникнень лагерьсна и лемдезь нумолонь вастокс, сяс мес тяса ульсь пяк лама нумолда. Охотада башка синь яксесть Мокша ляи калонь кунцема. Ляи молемста охотникне васьфнесть варсиень полга, ся вастть лемдезь варсиеннекс. А ся пакшть ляйть ваксса, коста кунцесть лама калда, лемдезь калоннекс. Сяльде тя васттнень мельге кемокставсть тяфтама лепт: Зайцево, Ворона, Рыбкино.

Кунара-кунара, шаржу кизотнень пингста, велеть вастса кассь оцю вирь. Тя вири сашендсь охотендама – нумолонь шавома – козя рузаля. Сонь мялезонза тусть аф аньцек пукшу нумолхне, но и тястонь вирьса касы шуфттне. Сон кармась маластонь велетнень эзда сивотькшнема таза мокшалят – вирень керыхть. Васенда вирень керыхне эрясть модань кудняса – времянкаса. Но козялясь ульсь ломанць ёню и ёжу. Сон пандсь сивотьфненди покодеманкса аф кальдявста, штоба синь, вирень керыхне, рамальхть кядьстонза кудонь путомс шочкт. А, кода содаф, мокшетнень кудонь чапомс усолсна нинге кунардонь пинкнень сатомшкаль. Сяс пингонь ётазь пялес модас кяшф куднятнень вастс кеподсть шуфтонь кутт. Тяфта кочкавсь-пуроптовсь мокшень велесь. Виде, козялясь велеть лемдезе рузкс. И макссь лем Зайцево, сяс мес велеть шачеманцты, сонь койсонза, туфталкс ульсь нумолсь. Пингта меле ни мокшетне велеснон лемдезь эсь лацост – Зайця(-кс), (Сайця-кс). 1880-це кизоня, сире ломаттнень азонднмаснон коряс, велеса ульсь пяк оцю пожар. Васенда крьвязсь фкя куд, но сяс мес куттне ульсть пяк малацект и ся пингть ульсь пяк вишке варма, палсть нильгемоньшка куд. Тя ульсь кизонда. Сембе ломаттне, сиреда и шабада башка, работасть паксяса. Фкя эпилепсияса сяряди алясь курендась и ёрдаф цигарканц эзда крьвязсь велесь. Тя пожарса палсть кафта ломатть: фкясь сонць крьвястись, омбоцесь сувась палы кудозонза паршиенкса и меки ашезь лисев. Мзярда ётафтсть ведь велеть эзга, шувомста мушендсть палф тёст. Велеряйхне ушедсть строяма оду.

Тяни куттнень строязь фкя-фкянь эзда ичкози, келептезь куроть. Велесь кассь. Коза можналь строямс, стройсесть, панжевсь нинге фкя кура, конань лемдезь Выселкакс. Мокша ляйть тона бокса улихть велет: Од Толку, Од Лепию. Сире ломаттнень азксснон коряс ульсь тоса и веле Од Зайця. Зайця велеста ломаттне ётнесть тоза эряма. Модатне ся шире ульсть кальдяфт,сяс тунда видьмонкса сашендсть Зайця вели. Сяльде велесь ушедсь шамома. Мзярда Сибири строяфоль машина кись, лама Зайцяряй семьянек тусть тоза эряма вербовкас коре. Макссесть транспорт, штоба тумс. Велеть пялешкац тусь. Туфталда ульсь лама. Васенце туфталсь: семьятне ульсть пяк оцюфт, комозьшкань ломань эрясть марса. Омбоце туфталсь: велесь оцюволь, а строямс ашель ков. Фкя ширеса шудесь ляйнясь, омбоце ширеса ульсть карафт, ведсь ичкозель.

Туф ломаттне кармасть эряма Тюменскяй областьса. Но тостонь эряйхне аф пяк мяль вельде васьфтезь сайхнень. Мархтост тюрендсть. Шавозь Шутов Михаил Никифоровичень, сонь брадонц, брадонц рьванц. Кой-кона зайцяряйхне меки мрдасть эсь велезост. Тяфта Шутова Акулина Ивановна мрдась цёранзон мархта меки, сяс мес пельсь шавсазь цёранзон. Конат илядсть вели, рамсезь туйхнень юрхтснон и стройсесть.

Васенце мировой войнав сявондезь сембе шумбра алятнень. Эрясть велеса колма брат, фамилиясна Циликин и колмоцьконь сявондезь войнав.

Фкясь эздост, Циликин Иван Матвеевич, повсь пленц Пруссияв. Кафта ялганзон мархта косьфтасть салаване сухарнят и ворьгодсть. Ся маласа шудесь ляйня, а ляйнять туркс ульсь седня. Ворьгодихне мольсть ведьге, штоба афолезь му пильгокиснон коряс. Кодак шарьхкодсть, што вешендихть эсост, синь кяшсть седнять алу. Тяфта синь ашесть мув.

А мянихне тусть сяда тов. Ветемба мольсть шинь стяма шири, а шитемба мушендсть шужярень капанят, сувсельхть потмозост и тоса утцельхть. Синь щафтольхть полосатай щамса. Весть тяфта удость капанять потмоса, а капанянь азорсь мольсь алашаса шужяренкса. Пленникне эводсть, но ашесть ту.

Аф лама пингта меле алясь мрдась, усксь колмонц щапт, а синнетнень тозк плхтазень. Сяльде синь мольсть и шитемба. Пачкодсть Польшав, тоса ульсь сяда тёждя. Сувсесть край куднятненди, коса ломаттне аннелезь.

Сась тундась. Ушедсть шадаветтне. Ляйхнень эзга ётнесть шобдава, сяс мес тя пингть ведьта сяда кржаль. Мольсть алуветть и пачкотькшнесть омба беряку. Тяфта Циликин Иван Матвеевич пачкодсь Зайця велезонза, сувась эсь кудозонза, пульзясь шкайнятнень инголи, палсезень и мярьгсь: «Монь Богородицась пачфтемань». Иван Матвеевичень кафцьке брадонза мрдасть войнаста, но аньцек сяда меле.

Васенце мировой войнаса ульсь казьф Георгиевскяй Крёзса зайцяряйсь Петряков Егор Трофимович. Разведкаса улемстонза сон вятсь «ценнай» пленнай-немец.

Сире ломаттнень азондомаснон коряс каземась ётась тяфта. Егор Трофимович ульсь ранендаф и ащесь госпитальса. Оцязорсь Николай II ётась госпитальге и казендезень геройхнень. Егор Трофимович серьс ульсь ёмланя, сянкса виздсть няфтемс оцязорти. Вастозонза няфтсть оцю ломань. А мзярда оцязорсь тусь, казнеть максозь азоронцты. Тя казненц инкса сяда тов (колхозонь пуроптомда меле) колхозсь эрь ковня макссесь пяле пуд сёра.

Велеса ульсь пожар. Конань пингста палсь и Егор трофимовичень кудоцка, толть потмос юмась Георгиевскяй Крёстске. Но пожарда меле атясь уноконц мархта кулуфнень ёткста музь тя казнеть, а куломстонза путозь лазксосонза.

Велеть эряма пингоц

1880-це кизоня, сире ломаттнень азонднмаснон коряс, велеса ульсь пяк оцю пожар. Васенда крьвязсь фкя куд, но сяс мес куттне ульсть пяк малацект и ся пингть ульсь пяк вишке варма, палсть нильгемоньшка куд. Тя ульсь кизонда. Сембе ломаттне, сиреда и шабада башка, работасть паксяса. Фкя сяряди эпилепсияса алясь курендась и ёрдаф цигарканц эзда крьвязсь велесь. Тя пожарса палсть кафта ломатть: фкясь сонць крьвястись, омбоцесь сувась палы кудозонза паршиенкса и меки ашезь лисев.

Мзярда ётафтсть ведь велеть курова, шувомста мушендсть палф тёст. Велеряйхне ушедсть строяма оду. Тяни куттнень строязь фкя-фкянь эзда ичкози, келептезь куроть. Велесь кассь. Коза можналь строямс, стройсесть, панжевсь нинге фкя кура, конань лемдезь Выселкакс. Мокша ляйть тона бокса улихть велет: Од Толку, Од Лепию. Сире ломаттнень азксснон коряс ульсь тоса и веле Од Зайця. Зайця велеста ломаттне ётнесть тоза эряма. Модатне ся шире ульсть кальдяфт,сяс тунда видьмонкса сашендсть Зайця вели. Сяльде велесь ушедсь шамома. Мзярда Сибири строяфоль машина кись, лама зайцяряй семьянек тусть тоза эряма вербовкас коре. Макссесть транспорт, штоба тумс. Велеть пялешкац тусь. Туфталда ульсь лама. Васенце туфталсь: семьятне ульсть пяк оцюфт, комозьшкань ломань эрясть марса. Омбоце туфталсь: Велесь оцюволь, а строямс ашель ков. Фкя ширеса шудесь ляйнясь, омбоце ширеса ульсть карафт, ведсь ичкозель. Туф ломаттне кармасть эряма Тюменскяй областьса. Но тостонь эряйхне аф пяк мяль вельде васьфтезь сайхнень. Мархтост тюрендсть. Шавозь Шутов Михаил Никифоровичень, сонь брадонц, брадонц рьванц. Кой-кона Зайцяряйхне меки мрдасть эсь велезост. Тяфта Шутова Акулина Ивановна мрдась цёранзон мархта меки, сяс мес пельсь шавсазь цёранзон. Конат илядсть вели, рамсезь туйхнень юрхтснон и стройсесть.

Велеть эряфоц 30-це-40-це кизотнень

Революцияда меле НЭП-ть пингста кой-кона Зайцяряйхне козякодсть. Тяфта, Циликин Иван Матвеевич алясь мастяроль, строясь суронь пянгодема. Суроть эзда тиендсь ямкст. Сембе велесь сашендсь теенза пянготьфтема и нльне лия велестовок. Очередьса ащихненди азорхне пицесть суронь пачат и стак аннелезь. Омбоце брадсь Циликин Павел Матвеевич — торгавакшнель. Сон якаль алашаса Москуву пал мима. Колмоце брадсь Циликин Осип Матвеевич кирдсь лама жувата, касфнесь сёра. 1927-це кизоня Павел Матвеевич прась алашаста и трагически шавовсь. Козякодсть кафта браттне, явсть. Путсть колма кутт: кафтнень эстеест, колмоцеть – брадавати. А тяса ушедсь раскулачиваниясь. Раскулачендаф сокайхне-видихне:

• Циликин Иван Матвеевич
• Циликин Осип Матвеевич
• Петряков Пётр Николаевич
• Пугачёв Яков Васильевич
• Пугачёв Семён Васильевич
• Пугачёв Семён Радионович
• Петрякова Марфа Петровна
• Петряков Никита Иванович
• Петряков Григорий Иванович
• Петряков Ефим Радионович
• Середнёв Андрей ?
• Кечкин Дмитрий ?
• Середнёв Михаил ?
• Шутова Фёкла ?
• Шутов Дмитрий ?

Раскулачивандафнесть тяфта. Васенда путнельхть налокт. Ломаттне паннелезь. Тага путнесть налокт, тага паннелезь. И тага путнесть налокт, конат уже ашесть паннев. Синь прважсезь семьянек Сибири, Казахстану. Раскулачендафнень ёткса и кафта браттне Циликиттне, туфталсь тянди: цебярьхть кудсна, лама жуватасна, ули суронь пангодемасна. Фкя братть Циликин Осип Матвеевичень вов кода ладявсь шкайгиц. Семьянц мархта сонь прважазь Казахстану. Тоса пяк кальдяфтольхть эрямань условиятне. Тянкса пяле кизода меле Осип Матвеевич кулось. Аф лама пингта меле кулось рьвацка. Илядсть тоза кафта шабасна Матрёна и Михаил. Ужялькс арасть шабатне ляпе седи ломаненди. Ускозень синь Ковылкинав, кизефтезень: «Тяни велезонт тяста кить мусасть?» «Мусаськ»,– отвечась стирнясь и азондозе, кода пачкодемс Зайця вели. Тяфта шабатне пачкодсть эсь велезост и эрясть радняснон шире. Раскулачендафнень паршисна ётась колхозти, а кудсна арсесть изба-читальнякс, лавкакс, школакс. Утомсост ванфтовсь колхозонь сёрось.

1931-це кизоня Зайця велеса тиевсь колхоз «Мазы пакся», председателькс ульсь Перякин Фёдор Евдокимович. Модась, кона ульсь частникнень кядьса, арась марстоннекс. Но кой-кит ашезь макса модаснон, ашесть сува колхозу. Нят: Кисняшкин Ефим Гаврилович, Кисняшкин Фёдор Гаврилович, Кисняшкин Иван Родионович, Петрякова Пелагея Архиповна. Но кафта кизода меле единоличникнень модасна ётасть колхозу. Сире ломаттне лятфнихть тяфтама случай. Ламос ашезь решандав кизефкссь Кранжей ляйть фталда модать колга. 1917-це кизоти молемс сон ульсь Варанань помещикть кядьса. Помещиксь мизе тя модать Варана велень озондомань кудти. А революцияда меле модась ётась Варанань крестьяттненди. Мзярда колхоснень ёткса тиендевсть межат, Зайцянь и Варанань крестьяттнень ёткса ня модатнень инкса лиссь сялондомат. Штоба решандамс тя кизефксть, тердсть Краснослободскяй земельнай комитетста ломань. Мзярда ункстась модать эса, (ушесь кельмоль) Зайцяряйхне макссть ункстайти варягат, коза путсть ярмак. Ну и модань ункстайсь максозе паксять сяда оцю пяльксонц Зайцянь колхозу. 1946-це кизоня тя межать вакска видесть церят, конатнень эзда кассть тумонят.

Колхозть видеса тиевсь ферма. Сон тифоль плетеньцта. Фермать строязь раскулачендаф крестьяттнень плетеньцта тиф калдазстост. Васенда, мзярда ашель ферма, траксне ульсть местнай активисттнень калдазса. Колхозонь стадась тиевсь «кулакнень», единоличникнень, колхозста лисьф ломаттнень кядьста сявф тракснень эзда. Алашаснон тяфта жа сявондезь кядьстост колхозу. Тяда башка видьмотне, сельхозинвентарсь и лия паршись колхозу кочкавсь велеряйхнень вельде. 1935-це кизоста сявомок колхозникненди мярьгондевсь 41 сотка пере, а единоличникненди- 25 сотка. Штоба андомс оцю семьяснон, единоличнекненди сашендовсь покодемс ширеса. Колхозонь паксятне соксевсть алашаса,паксятне витцевсть и урятцевсть кядь вельде. 1941-це кизоня велеса появась васенце шары мархта трактор сёронь видема мархта. Трактористокс ульсь Перякин Яков Яковлевич. Председателькс ульсь Одышев Филипп Васильевич.

Колхознай эряфста сире пингонь ломаттне лятфнихть тяфтама случай. Сире Потьмась, Сире Лепиюсь, Зайцясь ульсть башка колхозкс. Районцта видемс эрь колхозти макссть трактор и мярьгсть нолдамс сонь видема. Сире Лепиюнь, Зайцянь колхозонь руководительхне тяфта и тисть: алашаса сокасть, а тракторса видесть. Сире Потьмань председательсь Полынов Гаврил тись эсь лацонза. Тракторть нолдазе сокама, а сеялкать повфтазе алашати, путомок тя тевти ответственнай цёра, кона рана шобдава кильнезе алашать и ушеткшнесь видема. И Сире Потьмась васенцекс аделазе видемать.

Райкомонь секретарсь ашезь веронда и сась проверяма. Кочкасть пуромкс, и председательсь азондозе эсь (потмомяленц) секретонц. Райкомонь секретарсь председательть прянцка вадердасы, копоренцка лапасы. Пяк тусь мялезонза.

Великай Отечественнай Войнась зайцяряйхнень эряфса

Великай Отечественнай войнав сявондезь Зайця велеста сембе служама кондясти алятнень. Войнать ушедоманц колга кулять эряфкшу ломаттне лятфнихть тяфта: «Шобдава ранакиге сембе велень ломаттне ульцясот, ащесть таяскотфста. Корхтамасост аньцек и кайгсь «война, война» валсь.» Ушедсь войнась. Сембе тефне илядсть аватнень лангс. Тейст лездсть шабатне: кочксесть паксяста розь, тозербрят; касфнесть табак; лезнесть шавф воиттнень тядяснонды, аваснонды: Шутова Аграфена Владимировнати, Чегодаева Фёкла Яковлевнатми, Перякина Пелагея Ефимовнати и лиятненди. Тяфта жа шабатне лезнесть кочксемс лямбе вещат воиттненди.

1943-це кизоня февраль ковста велень комсомолецне лездсть кундамс диверсанттнень. Вов кода тянь колга лятфнесь Анна Андреевна Петряковась, войнань пингонь колхозонь комсомольскяй организациять секретарец.

Мольсь 1943 кизось. Февралень васень шитнень ульсть вишке буратт, но эстонь Рыбкинскяй райононь Зайця велеса работатне ашесть лоткафнев. Веленьке ащи панда пряса, маласонза аш вирьхть; но ловсь сяка вельхтязень куттнень, ферматнень, утопнень крышазост молемс.

Буранда меле ломаттненди савсть ароптомс ловть эзда кудонь вальмятнень и кенкшнень, панжемс кинят эшихненди, шабраттнень шири, ёрямс ловть жуватань карттнень, утопнень, школьнай зданиять перьфста. Тяда башка эрявсь андомс и симдемс колхозонь жувататне, анокламс видьмот тундань видемати. Работасть однек-сиренек шоподемати молемс. Сяльде сембе пуромкшнесть кудга. Вальмятнень паннезь шужярень пулфса, штоба афоль няев тол валдсь. Велесь удось. Аньцек ашесть уда комсомолецне, конат дежурясть велеть разнай вастованза. Рана шобдава велеряйхне сргозсть самолётонь увнамать эзда. Комотнесть вастстост, арьсесть, аф ли фашистскяй самолетт лийсть. Дуборфсь лоткась. Синь таяскодсть. Эряфкшу аватне ушедсть уштома пянакудснон, штоба кенерьфтамс завтрак и тумс работама. Од стирьхне и аватне тусть работама ферматненди, атятне и цёратне коннай двору букань и алашань кильдема, штоба молемс лугав тишенкса, паксяв шужяренкса.

Вете частса шобдава эрь шиня правленияв пуромкшнесть колхозонь председательсь, сире коммунистсь Ф. В. Одышев, велень Советонь председательсь Петрякова Александрась, бригадирхне Лёвина Мариясь, Циликина Мариясь, комсомольскяй организациянь секретарсь Петрякова Аннась, медпунктонь заведующайсь Ильева Мариясь, учительницатне и вень дежурнайхне.

Дежурнайхне азонкшнезь вень происшествиятнень ферматнень, утопнень и сембе велеть эса. Совещаниять панжезе колхозонь оцюнясь Филипп Васильевич Одышев и азондозе, што сонь кенкшезонза ниле частса шобдава чакасть аф содаф «инжихть». Мзярда панжезе кенкшть, инголенза ащесть кафта наряжафт русскяй солдатокс «лётчикт». Синь эняльдсть Филипп Васильевиченди, штоба лездоль ускомс велеть эзда аф ичкозде паршиснон и нолдалезень кудозонза. Аф содафне азозь, што валгсть самолётста парашютса, а самолётсна кольсь и кати-коза прась.

Атясь сявсь нурдоня, сявозень уноконзон и ветенест тусть аф содафнень вещаснон инкса. Паршидост ламоль, цють усковсть.

Аф содафне, мзярда куляксазь, што Филипп Васильевич работай колхозонь председателькс, анасть кядьстонза подвода ускомс паршиснон аф ичкоздень машина кинь станцияти . Сон надияфтсь тейст максомс алаша и ускомс «лётчикнень» Ковылкинав. Васенда эрявсь тейст ваймамс. Синь андозь. «Лётчикне» анасть вина, симсть. Фкясь иредсь, кяжиясь ялганц лангс и ушедсь автоматса ляцендема. Шабатне эводсть и кучезень атясна шабраснон шири. Курокста инжихне матодовсть.

Ся пингть велеса телефотт ашельхть. Совещанияса арьсефоль кучемс комсомолец Рыбкинскяй партиянь райкому, штоба азомс латта «лётчикнень» колга. Стане и тифоль. Кемгафтувоце частса Рыбкинаста састь кемонь ломатть ниле подводаса. Правленияса ломаттне учсть эсост. Колхозонь председательсь азондозе сембонь Рыбкинань сафненди. Алашатнень лоткафтозь шабрань кудть эшксс. Синць валомне кружазь колхозонь председательть кудонц. Сувасть куду. «Лётчикне» удость аф пелезь. Синь арьсесть, што ичкоздень тяфтама веленяста кивок аф кундасыне. Рыбкинаста сайхне васендакиге фатязь чемодаттнень лангста автоматтнень и пешкодсть: «Кядентень вяри!»

Сире фашистсь комотсь и ёрась фатямс автоматть, но ульсь ни поздна. Синь арестовандазь и сявозь Рыбкинав, а тоста прважазь Саранскяи. Однясь курокста виденцясь. Колма шида меле минь получаме сёрма эстонь партиянь райкомонь васенце секретарть Иван Максимович Кшнякинонь эзда, коса азфоль тейнек благодарность оцю преступникнень кундамаснон инкса.

Кода сяльде содафоль, што фашистскяй ня диверсанттне кучфтольхть Мордовияв машина китнень сязендема и лия кальдявонь тиендема.

Войнать пингста Зайця велеса, кода и лия странаньконь уженянзон эса, народсь ульсь сизеф, вачеда. Пицесть кшит тума лопаста, марожста. Кда марожсь ульсь кенерьф, ся пяк пара. А пиже марожень кшитненди ломаттне таргозькшнесть. Колхозонь паксяста тунда кочксесть эйндаф модамарьхть, томбсезь и пицесть эздост пачат. Пяк лама нужада няйсть!

А вов кода лятфнесазь зайцяряйхне войнать аделаманц колга кулять. Шувихть аватне колхозонь паксять эса. Колхозса техникась ашезь сатне, ламоц тефне тиендевсть ломанень кядьвийса. Ваныхть ластя алашаса арды ломань. Тя ломанць ульсь Рыбкинаста, эста тосоль районнай центрась. Сон ичкоздекиге юватькшнесь: «Аделавсь войнась! Аделавсь войнась!» Аватне ёрязь каймоснон, ушедсть кштима, морама. А меле сязевсть вярьгак вайгяльхть явсемаса шавф мала ломаньцнон инкса. Тяфта явсезь, а пингонь-пингонь кштизь-моразь сувасть синь вели. А велеса эряфкшу аватне, кинь ашесть шавов войнаса маластонь ломаньцна, лихнесть ульцяв поза и симнезь ётайхнень-потайхнень.

Войнада меле ушедсть мртцема алятне, конатнень кядьсна пяк эрявсть велети. Странась эрявсь меки тиемс, стяфтомс пильге лангс. Эрявсь анокламс уштомбяль. Ламоц Зайця велень аватне, кода войнать пингста, стане и войнада меле, тушендсть торфонь таргама. Кой-кона аватне ульсть советскяй солдаттнень калмамаса паксянь урядамаса, руинатнень шорямаса Смоленскяй областьса.

40-це кизотнень песта тисть ки Краснослободск – Ковылкина всенароднай стройкань методса. Эрь организациять мельге ульсь кемокстаф эрь-кодама участка. Тя стройкаса ульсть зайцяряйхне.

Эрь ломанти максфоль шинди тяфтама норма: алятненди кеподема мода 8 метрань кувалмос, аватненди – 6 метрань. Эрь ломанти эрявсь покодемс кемгафтува ши.

Велеть церькавоц

Зайця велеса ульсь церькав. Сире ломаттне лятфнесазь, кода сон строявсь.

1917-це кизоня велень старшинась Циликин Леонтий Иванович тись кемгафксува тёжяньда шуфтонь церькавонь рамамань-мимань кафта ширдень согласия Пурдошанскяй райононь Ямищи велень церковнай служительхнень мархта. Кафта ширдень согласиять тиемда меле Леонтий Иванович макссь ярмаконь задатка и сявозень мархтонза распятиять и платянищать. Тяда меле нюрьхкяня пингонь ётазь Россияса ётафтфоль ярмаконь реформа, и церькавть питнец кирсь кемгафксува сардонянь коробкань питнешкас. Церковнай служительхне атказасть максомс церькавть тяфтама питнеса. Тевсь пачкодсь судти. Судть решениянц коряс Ямищи велень церькавсь мифоль ингольдень ладяф питнеть коряс.

Церькавсь ускфоль Зайця вели. Но нинге эрявсь лама ярмак, штоба ушедоль церькавсь работама. А Леонтий Ивановичень ульсть зрнянза. Сон эрясь колма цёранзон мархта, а ярмакне ульсть атять кядьса. Церькавсь строявсь, ушедсть эса службатнь вятематне.

Ётась аф лама пинге Леонтий Иванович сярятькстсь. Цёранза кизефтезь атять зрнятнень колга. Атясь тись пря, што юмась кялец, аф корхтави. Атять ваксса ащекшнесь рьвяняц. Сонь мирдец шавовсь войнаса. Атясь азондозе рьвянянцты, што зрнятнень ётафтозень церькавонь строямати. Леонтий Иванович эняльдсь тянь азондомс цёранзонды куломдонза и поминканзон ётамдост меле, штоба цёранза афольхть вешенде зрнятнень.

Церькавсь ушедсь работама 1918-це кизоня. Васенце кстиндафсь строяф церькавса ульсь Петряков Павел Фёдорович. Церькавса васенце настоятелькс ульсь отец Григорий, шачемас коре кона ульсь Паркоста руз. (Борки) велеста, кона тяни Ковылкинскяй районца.

1937-це кизоня церькавсь сёлкфоль и тифоль колхознай сёронь складонди.

1962-це кизоня сирешинкса церькавсь калафтфоль. Калафтомста церькавсь ашкотфоль сталень тросса. Троснень песнон кемокстазь колма гусеничнай тракторхненди. Васенце кафта прафтомань попыткатне ашесть удала. Церькавсь, мярьгат, аньцек комсесь фкя шири, но велямс изь макссе пря. Ширеса ащи велеряйхне арьсесть, што церькавсь тяфта сюконякшни теест. И аньцек колмоце «сюконямда» меле сон велясь. Председателькс ся пингть Зайця велень колхозса работась Василий Тихонович Акашев (сонць эрясь соседняй велеса – Сире Сомайса). Меле сон каендась: «Мон мезевок лия кальдяв ашень тие Зайця велети церькавть веляфтфтомда башка». Церькавонь илядыксне тусть колхознай постройкатненди. Тячи ингольдень церькавть вастс строяф Михаил Архангелонь лемс од озкскуд. Эсонза мольфтевихть службат. Сонь строяманцты путсть вий сембе велеряйхне, но путоманьтефнень вятезень и вятьсыне Москувонь эряйсь, кона шачемас коре Зайцяста, Наталья Ивановна Кечкина.

Велесь Великай Отечественнай войнада меле

Эряфсь Зайця велеса валомне латцевсь. Кассть иттне, конат покодсть ряцок оцюфнень мархта. Ламоц тефне тиендевсть алашаса, но ульсь эздост пяк кржа. Сяс ломаттненди савсь бука лангса усксемс шужярьхть, культивировандамс модать. Пингонь ётазь появакшнесть эрь-кодама техника: нума, тяляма машинат, лобогрейкат. Ламода сяда тёждялгодсь тевсь, мзярда састь колхозу гусеничнай тракторхт, грузовой автомобиль ГАЗ-5 («полуторка»), конань эса покодсь Середнёв Осип Сергеевич, васенце комбайнась.

1951-це кизоня колма населённай пункттне: Сире Потьмась (колхозсь «16 партсъезд», Сире Лепиюс ь(колхозсь «Од ки») и Зайцясь ( колхозсь «Мазы пакся») шоворсть Ждановонь лемса фкя хозяйствас. Кизода меле тя колхозти ульсь примаф и Матвеевка велень колхозсь «Красное Знамя». Центральнай усадьбась ульсь Зайця велеса. Аф ламнянь–аф ламнянь ульсть полафкст ломаттнень и социальнай эряфсост. 1955- це кизоня велеса появась радиось. 11-це декабрьста 1962–це кизоня велесь ульсь сувафтф электропередачань государственнай линияти. Столбань кирдихненди лотконятнень шувондозь каймоса синць велеряйхне. Эрь шувф лотконять инкса пандсть вете цалковайхть. Васенце лампочкась крьвязсь фермать ваксса столбать эса. Аф лама пингта меле велеса появась васенце телевизорсь. Васенцекс рамась телевизор Петряков Иван Андреевич.

1960-це кизоня правлениять и школать появась телефоннай связьсна. Зайцянь эряфкшу ломаттне пара мяльса лятфнесазь ся пинкнень, мзярда велеса ульсь Ждановонь лемса колхоз – миллионер. Ся пингть школаса тонафнесть 380 шаба, эрясь велеса тёжянть малава ломань. Зайцяряйхне пара валса лятфнесазь колхозонь председательть Акашев Василий Тихоновичень. Сон покодсь Зайцяса председателькс 1959-1968 кизотнень. Василий Тихоновичень пингста строяфтольхть пилорама, ток, правления, фельдшерско-акушерскяй пункт, почта, птицеферма, клуб.

1964-це кизоня Зайця велесь, кона инголе ульсь Рыбкинскяй районца, сувась Краснослободскяй району.

1970-це кизотнень ломаттне кармасть эстейст стройсема кутт. Шужярень вельхкс мархта сире куттне кармасть полафневома кирпицень, шуфтонь кшнинь шиферонь вельхкс мархта куд лангс.

1960-це кизотнень песта фермав ульсь ётафтф водопровод, а 1972-це кизоня — велева.

1971-це кизоня Ждановонь лемса колхозcь ульсь реорганизадаф. Ульсь тиф од хозяйства, колхоз «Дружба», коза сувасть Зайця, Сире Потьма, Сире Лепию , Матвеевка, Ефаева велетне. Центральнай усадьбакс арась Ефаева велесь. Основной велень хозяйствань объекттне ульсть Ефаева велеса. Ломаттне арасть аф эрявиксокс, ушедсть тушендома велеста эряма иля вастс. Тонафнихне аделамок школать, тушендсть ошу. Эряфсь велеса юмафнесь вий (угасала). Штоба сонь эреклафтомс, эрявсь тиемс эсень (собственное) хозяйства.

1989-це кизоня февраль ковста кочкафоль колхозникнень марстонь пуромкссна, коса примафоль тяфтама решения: Зайця и Сире Потьма велетнень территорияса тиемс колхоз «Зайцевский». Колхозти вятикс кочкафоль Петряков Василий Иванович. Тяка жа кизоня ульсь тиф асфальт велеста сявомок Краснослободск-Ковылкина трассати, а 1991-це кизоня – велеть кувалмова. 23-це октябрьста 1991-це кизоста сявомок 26-це мартонь 1996-це кизоти молемс колхозти вятикс ульсь Руськин Юрий Иванович.

26-це февральста 1992-це кизоня колхозсь ульсь реорганизовандаф СХПК «Зайцевский»

1996 –це кизоня март ковста сявомок 1997-це кизонь январти молемс колхозть вятезе Петряков Николай Иванович, 1997-це кизонь январь ковста сявомок 21-це кизонь февраль ковти молемс – Азясев Алексей Тимофеевич.

2000-це кизоть пенцты СХПК «Зайцевский» арась стака экономическяй положенияса. Сонь ульсть кафта кинза: банкротство или шоворемс кеме хозяйства мархта. Тя кизефкссь решандавсь республиканскяй уровеньца. Тифоль тяфта: колхосне СХПК «Зайцевский» и «Дружба» шовордамс марс.

Велесь тячи

Тячи велеса асфальтонь ки, куттненди нолдаф ведь, природнай газ. Зайця велесь сувси Яфай велень поселенияв. А паксянза, луганза сувсихть Яфай велень отделениянь ОООАПО «Мокша». Социальнай сфераста велеса – медпункт, библиотека,почта. Но ломаньда ляткшни коль кржа.

Велеса ломаттне эряйхть кафта курова Саксонбеса (Саксоння) и Лосюбеса (Лосюбе). Сембе инфраструктурась кольсь-каладсь: медпунктсь пякставсь, библиотекась ётафтовсь Краснослободск ошу, велень советсь тяни Яхай/ Яфай велеса руз. Ефаево, школась пякставсь. Школьникнень усксесазь Краснослободскяй райононь Гумны вели. Тя велеса шачсть-кассть Циликин Н. П. мокшень содаф Мордовия Республикань заслуженнай поэтсь, Кисняшкин М.Ф. велень хозяйствань наукань кандидатсь, конань сембе эряфонь киц сотнефоль Н.П. Огарёвонь лемса Мордовскяй государственнай университетть мархта, коса ульсь профокмонь председателькс и проректор административно-хозяйственнай покодемать коряс. Велерняйхне эсь вийснон и кочкаф ярмакснон и велень администрациять вельде одукс петезь памятникть-стеллать Великай Отечественнай войнаса шавф воиттненди. Сембоц 2025 кизонь 1 ноябрти Зайця велеса 75 эряй, ётксост 33 аля и 42 ава. Эздость покодиень кизоса 44, ломань 26 ломанць — пенсионерхт.

• 

  Зайця велесь

• 

  Памятниксь-стеллась Зайця велеса

• 

  Краснослободскяй райононь Зайця велеса церькавсь

• 

  Сире церькавсь

• 

  Сядонгольдень церькавсь Зайця велеса

• 

  Зайцяряйхне Сяськома шиня. 2025 кизось

Лятфтамат

Литературась

Инжеватов И.К. Топонимический словарь Мордовской АССР / Под редакцией В.А Никонова и Д.В. Цыганкина. — Саранск: Мордовское книжное издательство, 1979. — 221 с. — 2000 экз.

Ссылкатне

• Населенные пункты Мордовии