Малав

Веле
Малав
54°17′43″ с. ш. 43°57′51″ в. д.
Странась	Россия
Федерациянь субъектсь	Мордовия
Историясь и географиясь
Ушетф	XVII вексь
Центрать серец	84 метра
Частонь каркссь	UTC+3:00
Эряйхне
Эряйхне	▼295 ломань (2025)
Национальносттне	мокша 96% (2002)
Официальнай кяльсь	Мокшень и эрзянь, рузонь
Цифрань идентификаторхне
Телефоннай кодсь	+7 +7 83453
Почтовай индекссь	431331
Код ОКАТО	229 838 001 89 229 838 001
Код ОКТМО	89629438101
ГКГН -са номерсь	0085301
Малав Москва Саранск Малав

Малав Малавеле (руз. Мамолаево) — мокшень велесь Мордовияса, Ковылкинскяй районца.

Мамола́ево (мокшекс Малав, Малавеле) — веле Ковылкинскяй районца Мордовия Республикаса. Мамолаевань велень администрацияв сувай Од Лепию велесь (руз. Новое Лепьево) Сомазляй велесь (руз. Самозлейка).

Географиясь

Ащи Рябка (Рапца) ляйнять лангса, 60 вайгяльбе райононь центрать и Ковылкина машина кинь станциять эзда. Ландшафтонц лангоц губору, модатне шуваруфт и вельхтяфт, васток-васток сёвонюфт.

Шинь стяма ширде, шинь мадома ширде и лямбе ширде шарыхть салмоксонь и шоряф вирьхне, конат мянь тячи козят вирень ракшаса, вирень ракшаса, пангонь и иможень эрь кодама ширеса. Рябка ляйня, кона шуди велеть пачк и прашенды Мокша ляйти. Оцю водоёмонь тиеманкса, ляйсь 80-це кизотнень перяфоль плотинать мархта. Эвондась 2 вайгяльбень кувалмоса пруд, коса васьфневи щукась, карпсь, карасясь, линць, окунць. Прудсь арась аф аньцек калонь кунцихнень кельгома вастокс, но тяса тяфта жа оцю мяльса ётафнесазь пингть Перьфкаст ащи сембе велетнень и Краснослободск ошть эзда ваймосихне. Малавть шинь стяма ширде границац татаронь Устрахмановка велеть и Котракс (руз. Которск) мокшэрзянь велеть, лямбе ширде — Од Толку (руз. Новая Толковка) велеть, шинь мадома ширде — Самозляй мокшэрзянь велеть, кельме ширде — Шапкино рузонь велесь.

Эрямопингоц

Лем-антропоним: актонь документтнень эзда содаф, што 17-це векть 2-це пялестонза Тимралей мурза Усекаев, князсь Тенишев, «рамазе Мамолаева велень мокшэрзятнень Сидня Мамолаевать моданц Мокша ляйть эзга». Пензенскяй губерниянь велетнень Лувксса " (1869) Мамолаевась-Краснослободскяй уездонь 101 пирьфста казеннай веле.

Документальнай уликсне велеть эрямопингонц колга

Малав велесь ушеткшни XVI векста сявомок. Ковылкинань краеведческяй музейть архивнай документонзон эса ули тяфтама сёрматфкс: «Мамолаево Велесь ушетфоль 1595 кизоть самс мокшэрзянь поселенецнень мархта. Фамилияса эвондамань лем». XVII векть омбоце пялестонза актовай документтнень эса лятфневи Мамолаево велень мокшэрзятнень Сидней Мамолаев. Степан Хрущёвонь темниковскяй писцовай книганзон эса 1622 кизоня тяштьф Мамолаево велеть колга, конань эса лувондови 20 мокшэрзянь пирьф. Мордовскяй АССР — ть топонимическяй валкссонза сёрматф: «Мамолаевась (Малав, Малав веле) — мокшень веле Ковылкинскяй районца. Ащи Рябка (Рапця) ляйть лангса». «Пензенскяй губерниянь велетнень Лувксса (1869 к.) Мамолаевась — Краснослободскяй уездонь 101 пирьфста казеннай веле. Лем-антропоним». Нинге фкя лятфнема актовай документтнень эзда : «…XVII векть омбоце пялестонза Тимралей мурза Усекаев князсь Тенишев мордвинть кядьста рамась Мамолаевскяй Сидня Мамолаевать велеста мода Мокша ляйть эзга». Сембе ня документальнай материалхне кемокснесазь тястоконь сёрматфнень эзда. 1887 кизоня шачемань коря инь сире учительть Клоковонь Григорий Николаевичень и Рыбкинскяй райононь милициянь ингольдень начальникть, Мамолаево — Араповонь 1889-це кизоня Советскяй властть ладяманц коряс активистть эвондаманц колга. Ф. П. Араповонь сёрматф материалонза азонкшнесазь, што атянь-атяньке эрясть тяниень эряма вастть эзда сисем вайгяльбень вастса Мокша ляйть трваса, Ош-Панда ваксса. Вастт перень сёротненди ашесть ляткшне, сяс мес эрьхкне и вирьхне пяшкодезь модать оцюшка пяльксонц. Сяс эряйхне мусть ладяй васта Рябкать трваса перетненди. Но валондомс синь 7 вайгяльбеса Ош-Панда ширде аф пара, сяс эряйхне валом-валом ушедсть эряма лия вастова сяда малати, мезсь мокшэрзянь кяльс ётафневи «малав», эсь пересост. Тяфта тиевсь эряма васта, конань лемоц Малав, рузоннетне тиезь Мамолаевакс. XIX векть омбоце пялестонза сявомок Малавсь арси азорондамань центракс, конань пингста ульсь азорондамань управления, кона ульсь волостной старшинать мархта, кочкаф сембе волостень велетнень эзда. Волостти сувсесть перьфкеиащи велетне: Малав, Од Лепиюсь, Од Потьмась, Од Толкусь, Од Сомайсь, Вирень Сазанць, Запищева, Шапкинскяй заводсь, Рябка велесь, Од Зубарева, Шейнинась, Самозляйсь. Власттнень лангса ащесь земскяй начальниксь, конань путнезе Краснослободскяй уезднай земскяй съездсь. Грамотностсь велеса пяк ёмлаль. Кой-кона иттнень питнеда тонафнезь церькавонь служительхне. Павазонди малавэряйхнеди велеса эвондась дьячок-Голубев Иван Степанович, кона лама тись просвещениянь ушедоманкса.

Мамолаевскяй инородческяй однокласснай училищась строяфоль 1872-це кизоня. Васенда арьсефоль тя училищать строямс Рыбкина велеса. Но Рыбкинань модань обществась училищать алу «свободнай» модань аф улемать инкса, или 406 цалковай ярмак, атказась строительствать эзда. Эста Голубев И. С. Мамолаевскяй обществать и лия ломаттнень эняльдемаснон коряс уезднай училищнай Советти путомс сонь Мамолаево велеса. 1872 кизонь 5 мартста ушедсть тонафнихнень мархта занятиятне. Сембоц тонафнихнень васенцеда примазь 50 цёраня, конатнень эзда 46 тонафнись — мокшэрзянь итть, 4 — руст. Васенце учителькс Ульсь И. С. Голубев. XIX векть пенцты училищаса ульсь 678 ломань, эздост 615 цёраня и 63 стирня. 678 ломаньцта педа пес курсть аделазь 146 ломанць. Школаста лисендсть лац тонафни итть, конат тяда меле ульсть васенце мировой войнаса 1914-1917-це кизотнень. Кой-конат эздост арасть младшай командиркс, телефонистокс, сапёркс, артиллеристокс, ламотне ётасть аноклама фельдшерскяй школатнень эса. Еткозост сувсихть Милушкин Ефим Ефимович, Арапов Архип Иванович, Торопов Кузьма Сидорович, Шумкин Григорий Ефимович, унтер — офицерхне Василькин Тихон и Прокофий, Арапов Лука Яковлевич, Чупейкин, кона прозвищацоль «Чупа» и лиятне.

1914-це кизоня алянь ломаттне сявфтольхть войнав. Сявондсть ломатть, алашат, крандаст, сбруйхть. Сёксенди ушедсть тернемост ополченецнень и васенце разрядонь запаснойхнень, коза повсть ламоц велеряйхне, тяконь лувксса И Арапов Иван Архипович, Арапофне Семён Яковлевич и Лука Яковлевич. Иван Архипович Арапов Пензань ялга якай дружинать фкя ротасонза, кона путфоль Краснослободскяйса, ульсь ротнай писарькс. Иван Архиповичень семьясост служасть Никита и Пётр-фельдшерхт, а Михаил восьмой ополченческяй корпусса омбоце скорострельнай батареяса, коса ульсь сяда 1914-це кизоня Мамолаевась ульсь волостной центракс, коза сувсесь 13 поселения. Войнась тарксевсь сяда ламос и вешсь ломанень коль сяда лама жертва, ламоц фронтовикне шавовсть, кой-конат мрдасть куду калечендафста и аф кондястикс нльне мирнай трудонди. Эряйхнень эряфсна пяк кальдявгодсь, ламотне кармасть тушендома лия губерниява, особенна Самарскяй и Оренбургскяй. Мольсь хозяйстватнень расслоениясна имущественнай положениять коряс.

1917-це кизонь февральскяй революциять Мамолаеваса васьфтезь кенярдезь. Солдаттне, конат ульсть отпускса, ёрясть вяри вазьснон и «ура» юватькшнемаса приветствовандазь «воляшить». Сембе учсть войнать аделавоманц эса.

Малавсь советскяй азорондамань кизотнень пингста

1917-це кизонь октябрьста властти састь большевикне, конатнень вятезень В. И. Ленин. Мамолаеваса кочкафоль Волостной Совет, конанди председателькс арась Романов Кузьма, кона активнайста участвондась велеса и волостьса Советскяй властть ладямаса.

Краснослободскяйса пуроптовсь Якстерь гвардия. Велень эряйхне, конатнень мяльсна улемс сонь рядсонза, получсесть рекомендация велень Советть эзда. Велестонк васенцекс сувасть Прошкин Степан и Никита Шумкин. Романовда меле волостной Советонь председателькс арась Тришев Иван Тихонович.

Пинкне Советскай властти арасть таколфтыкс, сяс мес Краснослободскяйса и лама волостьса, уездса кирдсть оцю влияния эсерхне, конат Ульсть Учредительнай пуромксонкса. Тяконь шовор синь вятсть подрывной деятельность Краснай Армияв мобилизациять каршес, эвфнемок крестьяттнень штрафса большевикнень шири синь сувамаснон пингста. 1918 кизонь кизонда ульсь кепотьф эсерхнень мархта восстания Краснослободскяйса Советскяй властть валхтоманц инкса, конань эса ульсть 4-цьке волостень кой-кона эряйхневок, тяконь лувксса И Малавста. Малавста Советскяй властть активнай сторонникоц Петянин Никифор Евдокимович веть пачкодсь Краснослободскяи и пачфтсь уезднай Советти аноклай восстаниять колга. Шить восставшайхне пуромсть духовнай семинариянь зданиять ваксс и вешсть мобилизациять лоткафтоманц и власттнень отставкаснон. Но тястоконь власттне, содамок аноклави мятежть колга, инголькиге арьсеф планть коряс Малинкин военкомть вятеманц кядяла, пулемётста апак тарксек ляцендезь прважасть кеподиень толпать. Тяфта аделавсь тяряфнемасна шорямс эсерхнень мобилизационнай планцнон большевикнень. 1918-це кизонь сёксеста ушедсь Якстерь Армияв массовай мобилизациясь, васенда сявозь артиллеристтнень и кавалеристтнень, а сяльде сявозь кафта кизос унтер-офицерхнень. Гражданскяй войнаса активнай участия примасть: С. Я. Арапов, Л. Я. Арапов, Г. М. Торопов, Велькин, Чупейкин, Н. С. Петянин, Т. И. Большаков.

Армиянь солдатта башка эрявсь и кши. 1918-це кизонь самай тундать эзда Сявомок Мамолаевскяй волости сась Ярцев уполномоченнайсь, кона якась велетнень ланга, ванць паксятнень мельге, сотцезе, мзяра ули кода кочкамс сёрода и мзяра максомс государствати. Пуроптфоль 17 ломаньцта продовольственнай отряд, конанди командиркс Ульсь Тюрькин Семён Фёдорович. Синь кочксесть сёра и прважсезь сонь государствав. Государствати шумонь пандома тевсь арсесь коль сяда стака, сянкса кармасть путнема оцю налокт кулакнень ланкс.

Гражданскяй войнась аделавсь. Ингольдень фронтовикне кярьмодсть мирнай эряфти.Мамолаеваса ульсь тиф партийнай ячейка, коза васенда сувсесь 20 ломань, но сянкса, мес партийнай билетсна ашельхть, парта ячейкась курок срадсь. 1922-це кизоня Арапов С. Я. пуропни комсомольскяй ячейка. Комсомолецекс ульсть Кечин В. И., Вракнень С. А., Арапов Ф. Я., и Володя Одаринский, попть Вячеславонь цёрац. Культурно-массовай работань вятемати панчфоль изба-читальня, коза работада меле пуромкшнесть од ломаттне. Лама тисть школань учительть культурнай работасонза: синь анокласть хор, путнесть спектакльхть, выступандасть политинформация мархта.

1921-це кизось ульсь аф урожайнай, но сюконямок велеряйхненди эсь прянь аф ужяльдезь покодемати, озимойхне видесть эсь пингстонза и 1922-це кизоня получасть аф кальдяв урожай и эсь пингстонза пандсть государствать мархта. 1924-це кизонь урожайсь средняйда ёмлаль, сяс государствась лездсь Мамолаевскяй волостти, конанди председателькс арась Арапов С. Я., ссудакс и видьмокс озимонь видемс (1500 пуд розь).

Архивнай материалхнень эзда содафоль, што Рыбкинскяй районца васенце колхозсь эвондась Мамолаево велеса «Валда Ян» (1929 к.) лем ала. Сонь организациянц эса оцю васта занясь Арапов Фёдор Павлович. Колхозонь васенце председателькс, конанди кочкафоль учредительнай собранияса, ульсь Кирксов Пётр Иванович. Васенда колхозу сувась 16 хозяйства: П. А. Аниськин , Аниськина Ульяна, П. И. Арапов , П. И. Кирксов и лият. Колхозти инь оцю задачакс арась государственнай плановай заданиятнень обязательнайста пяшкодемасна. Колхозть тиемста фкя пингоня вишкста мольсь раскулачиваниясь. Кирпичнай, цебярь куттнень эзда паньневсть кулакне, а синь кудснон заньцезь беднякне и колхознай движениять ширенц кирьдиенза. Сембода лама кулакта Ульсь Шиндяйкиттнень, пялесна Потапкиттнень и Каситтнень эзда. 30-це кизотнень пенцты пцтай сембе эряйхне сувасть колхозу. Ломаттнень еткса оцюдонга оцю политико-воспитательнай работа вятсь Мамолаевскяй школась, кона кемоста ащесь кочкаф кить видешинцты. 1927-28 тонафнема кизотнень Мамолаеваса школась ётафтфоль ШКМ-с, а 1932 кизоня-средняй кудс. 1937 кизоня ульсь васенце выпусксна кемонце классонь тонафнихненди. Директоркс Ульсь С. Д. Бояров.

1930-це кизотнень пуроптфоль откормочнай совхоз, кона тифоль ограниченнай ответственность мархта Товариществакс.

2002-це кизоста сявомок — "Мамолаевский"СХПК. 1998 кизоня, совхозть председателенц — Н. В. Тюрькинонь виень путоманц вельде, велети нолдафоль газ и тифоль водопровод.

Инфраструктурась

Велеса — основной школа, библиотека, Культурань куд, связень отделения, медпункт.

Эряйхне

Эряйхнень лувкссна

2001	2002	2010	2025
517	↘496	↘420	↘295

100

200

300

400

500

600

2001

2002

2010

2025

Эряйхнень зда

Сяда ламотне мокшет.

2025-це кизонь 1-це октябрти Малав велеса эряй 295 ломань, сяконь лувксса 6 кизосотненди молемс итть — 9 ломатть, 7 кизоста сявомок 17 кизосотненди молемс вяри касы итть (школьникт) — 14 ломань, 18 кизоста сявомок 29 кизоти молемс од ломатть — 35 ломань, 30 кизоста сявомок 60 кизос молемс оцю ломатть — 136 ломань, 60 кизоста сявомок сире ломатть — 85 ломань, 80 кизода сирет — 16 ломань.

2025-це кизоня Малавса эряйда лувондови 295 ломань, эзост 47 —итть, месь няфти 15,93 %. Мамолавса эряй 133 ава, чмезсь няфти 45,08 % и 115 аля (38,98 %) эряйхнень марстонь лувксснон эзда.

Содаф ломаттне

• Петянин Н. Е. — РСДРП-нь улись;
• Арапов Семён Яковлевич (шачсь 1896-це кизоня), колма войнаса улись , ВКП(б)-са ащись 1929-це кизоста сявомок, Мамолаеваса Советскяй азорондамать ладяйснон эзда фкясь, меле оцю партийнай и советскяй работниксь, кандидат историческяй наукань кандидатсь;
• Малькина, Мария Ивановна — литературоведсь и литературнай критиксь, филологическяй наукань кандидатсь.

Лятфтамат

Литературась

• Бахмустов, С.Б. Православные приходские храмы Мордовии. Словарь-справочник(руз.). — Саранск: Респ. тип. «Красный Октябрь», 2015. — 361 с. — ISBN 978-5-7493-1817-3.
• Инжеватов, И.К. Топонимический словарь Мордовской АССР(руз.). — Саранск: Мордов. кн. изд-во, 1979. — 221 с.
• Цыганкин, Д. В. Память, запечатленная в слове : словарь географических названий Республики Мордовия(руз.) / Д. В. Цыганкин. — Саранск: [б. и.], 2005 (ГУП РМ Респ. тип. Красный Октябрь). — 429 с. — ISBN 5-7493-0780-8.

Ссылкатне

• село Мамолаево, Ковылкинский район
• Мамолаевское сельское поселение 
• Мамолаево