Мокшень и эрзянь кяльхне

Рувики лопаста


Мокшень и эрзянь кяльхне сувсихть уральскяй кялень семьяти, финно-угрань тарадонь финно-волжскяй группати. Мордовскяй группась ащи кафта кяльста – мокшень и эрзянь. Мокшень и эрзянь кяльхне васьфневихть Россияса, Мордовия, Чувашия, Татарстан и Башкортостан республикатнень эса, а стане жа Нижегородскяй, Оренбургскяй, Пензенскяй, Рязанскяй, Самарскяй, Саратовскяй, Тамбовскяй и Ульяновскяй областтнень эса.

Мокшень и эрзянь кяльхне Мордовия Республикаса лувовихть официальнайкс ряцок рузонь кяльть мархта. Курбскяй князть пачфтеманц коряс, мещера народть кяльсна «мордовскяй», и топониптнень корявонга, мещерань кяльсь сувси мордовскяй кяльхнень ёткс.

Классификациясь

[петнемс | Петнемс лисьмапрянц]

Инголи мордовскяй кяльхнень и марийскяй кяльхнень пуропнезь марс волжскяй группав, но тяни тя концепциять ламоц учёнайхне кадозь, и мордовскяй, и марийскяй кяльхне кочкавихть финно-пермскяй кялень кафта башка тарадс.

Корхтайхнень лувкссна

[петнемс | Петнемс лисьмапрянц]

Мордовскяй кяльса корхтайхне эрзятне, мокшетне, шокшетне, терюхаттне и каратайхне сидеста лемнесазь эсь пряснон мордвакс. Тяста и шаченды мяльсь-арьсемась, што мордвась корхтай фкя кяльса. Тянкса стака шарьхкодемс, мзяра корхтай эрзянь кяльса, мзяра мокшеннеса, сяс мес кизефнемста кафцьке кяльхне лувовихть мордовскяйкс.

Россияса 2002-це кизонь ломанень сёрматфтомать результатонзон коряс:  614 260 ломанць сёрмадозь, што корхтайхть «мордовскяй, мокша-мордовскяй, эрзя-мордовскяй» кяльса[1]; 843 350 ломанць сёрматфтозь эсь пряснон мордвакс, тяка лувксса 49 624 ломанць сёрматфтозь пряснон мокшекс, 84 407 — эрзякс[2].

Россияса 2010-це кизонь ломанень сёрматфтомать результатонзон коряс: 392 941 ломанць сёрмадозь, што корхтайхть «мордовскяй» кяльса[3]; 744 237 ломанць лемдезе прянц мордвакс, тяка лувксса 4767 ломанць лемдезе прянц мокшекс, 57 008 — эрзякс[4].

Кода няеви, ломанень сёрматфтоматнень результаснон коряс содави аньцек мокшень и эрзянь кяльса корхтайхнень марстонь лувкссна, но аф няеви, мзяра эздост корхтай мокшекс, а мзяра эрзякс.

Ethnologue даннайхнень коряс марнек мастор лангса мокшень кяльса корхтай 296 904 ломань[5]; эрзянь кяльса — 517 575, тяконь лувксса 440 000 ломань Россияса[6]. Joshuaproject даннайхнень коряс, мокшекс корхтай — 294 000 ломань[7], эрзякс — 416 000 ломань Россияса (марнек мастор лангса 469 000 эрзяда)[8].

Мокшень и эрзянь кяльса корхтамста фкя-фкянь шарьхкодемась

[петнемс | Петнемс лисьмапрянц]

Мокшень и эрзянь велетнень эса, конат ащихть Мордовияса фкя-фкянь эзда ичкозе, марстонь валда мокшень и эрзянь кяльса 73 % (кепотьксонди, рузонь и украинань кяльса — 86 %). Литературнай мокшень и эрзянь кяльса марстонь валда  —  90%. Аф ваномок  кялень аф фкя лацонь ширьхнень лангс, конат улихть фонетикаса, морфологияса и синтаксисса, мокшети и эрзяти фкя-фкянь шарьхкодемс ули кода.

Мокшень и эрзянь кяльхнень диалектсна

[петнемс | Петнемс лисьмапрянц]
Мокшень и эрзянь кяльхнень диалектсна Мордовия Республикаса

  Мокша

*M-I Центральнай группась *M-II Ши валгома ширень группась *M-III Лямбе-шистяма ширень группась

  Эрзя

*E-I Центральнай группась *E-II Ши валгома ширень группась *E-III Кельме-шивалгома ширень группась *E-IV Лямбе-шистяма ширень группась

  Шокша

*E-V Шокшень диалектсь

Эрзянь кяльсь:

  • центральнай диалектсь — васьфневи Мордовиянь ши стяма ширеса (Атяшевскяй, Чамзинскяй и васток-васток Ичалковскяй аймакнень эса).
  • ши валгомань ширень (приинсарскяй) диалектсь — васьфневи Инсар ляйть Алатырь ляйти прама аймакнень эса.
  • кельме-шивалгома ширень (приалатырскяй) диалектсь — васьфневи Алатырь-Меня ляйхнень ёткса, а стане жа Алатырь ляйть алдонь шудеманц шире. Тя диалектонь аймакти сувсихть Мордовиянь Ардатовскяй и Большеигнатовскяй райоттне и шабра Чувашиять Алатырскяй и Порецкяй райононза.
  • лямбе-шистямань ширень (присурскяй) диалектсь — васьфневи Сура ляйти прай притокнень ёткса (Мордовиянь Большеберезнековскяй, Дубенскяй и васток-васток Кочкуровскяй аймакнень эса). Кельме-шистяма ширеса тя диалектти шабракс ащихть ся васттне, коса шовордавсь кяльть ёткс и центральнай диалектонь корхтамась.
  • Шокшень (башка ащи) диалектсь — васьфневи Мордовиянь кельме-шивалгома ширеса Теньгушевскяй аймакса. Тя диалектса корхтай ломаттне эряйхть башка лия эрзятнень эзда, а эряйхть мокшетнень ёткса. Сяс мокшень кяльть эзда лама сявовсь тя корхтамати и пяшкодсь тястонь кяльсь лама эрь кодама фонетико-морфологическяй эсь лацонь ширьда.

Мокшень кяльсь:

  • центральнай диалектсь (корхтамась) (кой-коста теенза мярьгихть краснослободско-темниковскяй диалект) — васьфневи Мордовиянь мзярошка аймаксара.
    • кельме ширень корхтамань группась — Ельниковонь, Сире Шайговань и Темникавонь аймакне.
    • кельме-шивалгома ширень корхтамань группась — Атерень и Темникавонь аймакнень кой-кона пялькссна.
    • ши валгома ширень корхтамань группась — Атерень аймаксь
    • лямде-шистямань ширень корхтамань группась — Ковылкинскяй аймакть оцюшка пяльксоц.
    • кучкань корхтамань группась — васьфневи ня ошнень ётка васттнень эса: Краснослободск - Сире Шайгова - Рузаевка . Эсост ули кода васьфтемс лия диалектонь ширетка.
  • ши валгома ширень диалектсь (корхтамась) — Зубунь аймаксь и Торбеевань аймакть пяльксоц.
    • кельме-шивалгомань ширень корхтамань группась
    • лямбе-шивалгомань ширень корхтамань группась
  • лямбе-шистямань ширень диалектсь (корхтамась) — Инсаронь, Кадошкинань, Ковылкинань и Рузаевкань аймакне.
  • переходнай диалектсь (корхтамась) — васьфневи ши валгомань и кельме-шистямань ширень диалекттнень ёткса, эсонза улихть кафцьке корхтамань ширетне.
  • шовордаф корхтаматне — васендакиге нят мокшень корхтаматне, конат васьфневихть аф Мордовияса, и конат ащихть эрзянь корхтаматнень мархта шабракс, или ащихть сембонь эзда башка.

Кяльхнень кодсна

[петнемс | Петнемс лисьмапрянц]

Мордовскяй подгруппань кяльхненди максфт тяфтама котт:

Стандарт Мокшень Эрзянь
ГОСТ 7.75–97 (рус.) мок эрз
ГОСТ 7.75–97 (лат.) mok erz
ГОСТ 7.75–97 (циф.) 455 835
ISO/DIS 639-3 mdf myv

Эста, мзярда кяльхне ванондовихть кода фкя кялень диалектт («кяль или диалект» прябалась), тяфтама кяльхненди макссихть котт и, тяда башка, максихть марстонь код оцю кяльти, коза синь кандовихть. Финно-угрань кяльхнень ёткста марстонь кодсна улихть марийскяй кяльть (chm) и коми кяльть (kv), тя марстонь кодть башка, нинге улихть кодсна (mhr, mrj, jmy и kpv, koi ). Мордовскяй группань кяльхнень улихть эсь кодсна, но марстонь кодсна синь аш аф стандартса ISO/DIS 639-3, аф российскяйса ГОСТ 7.75–97. Тяста лисенди, што комиссиятне, конат латцихть кяльхненди котт, путнесазь мокшень и эрзянь кяльхнень башка кялькс, а аф фкя кялень вариантокс. Сяс сембе арьсематне «мордовскяй кяльть колга» прашендыхть фкя мяльс: тя терминць аньцек пуроптсыне марс радня кяльхнень, но тяфтама кяль аш. [9]

Сёрмась

[петнемс | Петнемс лисьмапрянц]

Мокшень и эрзянь кяльхнень сёрмасна шачсь XVIII-це сяда кизоть омбоце пяльксстонза, теест юркс арась кириллицась (руз.) (мок.. Тя кяльхнень тяниень пингонь алфавитсна марнек фкя лаца рузонь алфавитть мархта.

Литературась

[петнемс | Петнемс лисьмапрянц]
  • Евсевьев М. Е. Основы мордовской грамматики. — М., 1928; Очерки мордовских диалектов : в 5 т. — Саранск, 1961—1968;
  • Кузнецов С. К. Русская историческая география. Мордва. — Курс лекций, читанных в 1908-09 уч. году в Московском археологическом институте. — М.: Издательство А. И. Снегиревой, 1912. — 74 с.
  • Орнатов П. Мордовская грамматика, составленная на наречии мордвы-мокши. — М., 1838;
  • Шахматов А. А. Мордовский этнографический сборник. — СПб., 1910;
  • Феоктистов А. П. Очерки по истории формирования мордовских письменно-литературных языков (ранний период). — М., 1976;
  • Грамматика мордовских (мокшанского и эрзянского) языков. Фонетика и морфология. — Саранск, 1962. — Ч. 1;
  • Грамматика мордовских языков: Фонетика, графика, орфография, морфология. — Саранск, 1980;
  • Лексикология современных мордовских языков. — Саранск, 1983;
  • Современные мордовские языки. Фонетика. — Саранск, 1993;
  • Мокшень кяль. Морфология. — Саранск, 2000;
  • Эрзянь кель. Морфология. — Саранск, 2000;
  • Budenz J. Moksa- és erza-mordvin nyelvtan // Nyelvtudományi közlemények. — Budapest, 1876. — Bd. 13;
  • Paasonen H. Mordwinische Lautlehre. — Helsingfors, 1903;
  • Keresztes L. Geschichte des mordwinischen Konsonantismus. — Szeged, 1986—1987. — Bd. 1—2.

Лятфтамат

[петнемс | Петнемс лисьмапрянц]
  1. ↑ Перепись-2002: Распространённость владения языками (кроме русского). Дата обращения: 30 ноябрьста 2007. Архивировано 14 апрельста 2012 года.
  2. ↑ Перепись-2002: Национальный состав населения. Дата обращения: 30 ноябрьста 2007. Архивировано 13 апрельста 2017 года.
  3. ↑ Перепись-2010: Население Российской Федерации по владению языками. Дата обращения: 17 декабрьста 2011. Архивировано 6 октябрьста 2021 года.
  4. ↑ Перепись-2010: Национальный состав населения Российской Федерации. Дата обращения: 17 декабрьста 2011. Архивировано 23 декабрьста 2021 года.
  5. ↑ Ethnologue and bibliography information on Moksha. (анг.)
  6. ↑ Ethnologue and bibliography information on Erzya. (анг.)
  7. ↑ Joshuaproject. Mordvin-Moksha. Дата обращения: 19 июльста 2011. Архивировано 16 октябрьста 2013 года.
  8. ↑ Joshuaproject. Mordvin-Erzya. Дата обращения: 19 июльста 2011. Архивировано 20 октябрьста 2013 года.
  9. ↑ Феоктистов А. П. Мордовские языки. Основы финно-угорского языкознания. Прибалтийско-финские, саамский и мордовские языки. М., 1975
Сявф"https://mdf.ruwiki.ru/w/index.php?title=Мокшень_и_эрзянь_кяльхне&oldid=262431"-ста