Л.И. Воиновонь композиторть кудоц-музеец

Министерство культуры РФ

Министерство культуры Российской Федерации

Л. И. Воиновонь композиторть кудоц-музеец
Тиевома кизось	1968-це
Коса ащи	Мордовия  Россия
Директорсь	Позднякова Галина Николаевна
Сайтоц	mrkm.ru/muzey/filialy-mu…

Л.И. Воиновонь композиторть кудоц музеец (руз. Дом-музей композитора Л. И. Воинова) (лиякс — «Л. И. Воиновонь композиторть кудоц-музеец» «И.Д. Воронинонь лемса Мокшэрзянь краеведческяй музейсь» культурань бюджетнай государственнай учреждениянь филиал) — «И. Д. Воронинонь лемса Мокшэрзянь республиканскяй краеведческяй музейсь» культурань бюджетнай государственнай учреждениянь филиал. Ащи Мордовия Республикаса, Темниковскяй районца, Темникав ошса, Воиновонь куроса, 8№ кудса .

Музейсь пуроптф 5-це июльста 1968-це кизоня.

Эрямопингоц

Кудсь-музейсь, композиторть, балалаечникть и дирижёрть Леонид Иванович Воиновонь (1898—1967 кизотне) ульсь пуроптф Темникавса Мордовской АССР Министронь советть 447-це № постановлениянц коряс 5-це июльста 1968-це кизоня.

1969-це кизоня 13-це июньцта музейть торжественнайста панжемац лемтьфоль Леонид Воиновонь шачеманц 71-це кизонц топодеманцты. Кудсь ульсь стяфтф композиторть эсь шачема усадьбасонза 1954-це кизоня. Тя кудса Л. И. Воинов эрязень мекольце кемголмува кизотнень .

Музейть васенце экспозицияц ащесь кафта мемориальнай комнатаста: композиторть семьянц и выставочнай залсь, коса стенттнень и витринатнень лангса ульсть латцефт фотот и документт Л. И. Воиновонь личнай архивста. Пингонь ётазь музейть фондонза фалу поладозь пяшкотькшневсть экспонатса, конатнень макссезь-кучсезь музыканттне, радня ломаненза, ялганза и содафонза.

1971-це кизоня усадьбаса ульсь оду петьф-стяфтф Л. И. Воиновонь тядянц кудоц — Анна Николаевнань, коза ётафтфтольхть музейть выставочнай залстонза материалхне. Композиторть шамтф кудсонза, раднянзон лятфнеманзон коряс, сонь эсь вещанзон эзда сембось марнек ладяфоль станя, кода ульсь сонь пингстонза. Музейсь тяфта ладяф тячити самс.

Кизоньберьф тяза сашенды: 600-шка ломань.

Кудть-музейть директороц — Позднякова Галина Николаевна.

Экспозициятне

Сашендыхнень музейть ладяфоц содафтсыне Темникав ошса шачф композиторть Леонид Иванович Воиновонь эряфонц-ащефонц мархта. Музейть экспозицияса ванфтови-кирдеви 200-та лама подлиннай экспонат 60 м² площадьса.

Экспозициять васенце пялькссонза няфтьфт подлиннай документт и фотографият: шачемань коряс кагодоц, васенце фоткац тядянц-алянц мархта, тифоль 1904-це кизоня.

Экспозицияв лихтьфт Л. И. Воиновонь произведениянза: «Сказ о Мордовии», «Мордовский марш», «Мордовская рапсодия», «Мордовские напевы», балалайканди оркестра мархта кафта концертт(1945 кизось, 1951 кизось) и лия произведениянза.

Витринатнень эса — фотографият оркестрань эрь кодама лувксонц мархта, сонь выступандамац и гастроленза эрь кодама ошса. Башка — Л. И. Воиновонь казненза — АССР-нь Верховнай Советть Президиумонц почётнай грамотанза Л. И. Воиновонди лемонь максомать колга: «Мордовскяй АССР-нь заслуженнай артист» (1943 кизось), «Мордовскяй АССР-нь народнай артист» (1947 кизось), ««РСФСР-нь искусствань заслуженнай деятель» (1960 кизось), «Трудовой доблестенкса» медальти удостоверениясь (1967 кизось).

Мемориальнай кудса инжихне васенда сувамста повихть столоваи, коса кувака шрать лангса ащи композиторть кельгома кружкац и самоварсь. Кудсь содафоль инжиень васьфтмань кельги кудкс, коса пуромкшнесть художникне, композиторхне, писательхне, оркестранттне.

Фкя витринать видеса няфтьфт Л. И. Воиновонь ялганзон фотографиясна: композиторть, профессорть, СССР-нь народнай артистть Александр Борисович Гольденвейзеронь (1875—1961 кизотне) и музыкантть, балалайкаса пяк машты морайть, Борис Сергеевич Трояновскяень (1883—1951 кизотне), синь портретсна каземань тяштькс мархтот, конат казьфт Л. И. Воиновонди. Скульптурнай произведениятнень эзда няфтьф Воиновонь бюстоц, кона тиф 1989-це кизоня художникть Н. А. Рачковонь кядяла.

Кудть эса кучка вастса ащи Л. И. Воиновонь портретоц, конань тиезе художниксь Е. А. Ноздрин (1920—1977 кизотне) 1963-це кизоня. Леонид Ивановичень художниксь рисовандазе эсь кудсонза, покодема шранц ваксса вальмять видеса, кона ваны панжи саду. Тядянц-алянц мархта васенце фотоц, кона тифоль 1904-це кизоня.

1918-це кизоня рузонь народнай инструментонь Темниковскяй оркестрать шачеманцты лемтьф музейть фкя пяльксоц. Кучкаса — васенце концертнай афишань копиясь 1918-це кизонь 31-це майста, фотоса оркестраса васенце улихне: Н. П. Исаев, И. А. Мельников, Немцов Николай Петрович. Музейса ули ёмла домра, конань тиезе 1918-це кизоня оркестрантсь Николай Немцов. Басовай балалайка, конань тиезе москувонь мастерсь Семён Иванович Сотский 1910-це кизотнень. Пюпитрать лангса — Воиновонь дирижёронь байдеконяц и кядьвельде сёрматф нотанза. Ащихть клавишнай гуслят, конат аноклафт специальна оркестрати 1930-це кизотнень ушетксста Москуса. Гусляса музыкалнай произведениянь васенце морайхнень эзда ульсь Анна Ильинична Холопова.

Ламоц мокшэрзянь художникне ялгафнесть Воиновонь мархта и мяляфтоманди казендезь эсь работаснон. Работатне ладяфт няфнемс композиторть кабинетсонза. Нят В. Д. Илюхинонь (1923—2007 кизотне) и В. Д. Хрымовонь (1908—1958 кизотне) шачема ширеть колга этюдсна. Фкя этюдть лангса тяштькс: «Кельгома Леонид Ивановиченди лятфнеманди ялгафтома кизоньконь колга. 58 кизось. В. Хрымов».

Кабинетса улихть композиторть сонцень паршинза: балалайкац, пианинац, конань казезе МАССР-нь культурань министерствась оркестрать 40 кизонц топодеманцты, конань лангса композиторть Фридерик Шопенонь бюстонц ваксса семейнай реликвиясь — 1898-це кизонь карзись сёрматфкс мархта «OTTO MIGGE, London». Тязк путф чернильницась, конань казезе Воиновонди, композиторсь А. Б. Гольденвейзер. Раднянзон лятфнеманзон коряс, тяда инголе чернильницась ульсь Лев Николаевич Толстоень. Комнатаса вальмять видеса — рабочай шрац, книгань полкатне и книгатне, конат каземань сёрматфкс мархтот, семейнай альбом фотография мархта, Фёдор Шаляпинонь моронзон мархта пластинканзон мархта граммофон и лама лия, мезе ульсь ся пингть музыкантть перьфке.

Леонид Ивановичень Воиновонь композиторкс араманц колга азондыхть васенце операнц «Сказка о попе и работнике его Балде» (1924 кизось), сюитанц «Лесные сцены» (1926 кизось) и «Сахарок» (1930 кизось ) музыкальнай комедиянь кядь вельде сёрматфксне.

Лятфтамат

Ссылкатне

• Экспозиции Мемориального дома-музея композитора Л. И. Воинова(рус.). culture.gov.ru. Дата обращения: 22 июльста 2025.
• Дом-музей композитора Л.И.Воинова(рус.). https://temnikovsoe-r13.gosweb.gosuslugi.ru. Дата обращения: 22 июльста 2025.