Кльхченге
Кльхченгясь (Кльхчянясь, Кщяльнясь Ирдан) руз.: Крещение Господне – христианскяй кемгафтува оцю илатнень эзда фкясь, кона ётни 19-це январьста. Тя илать мархта аделсевихть Роштува мельдень илань кемгафтува шитне. Кльхченгясь аф кадонцы эсь шинц. Тя илась ванондови лятфнеманкса, кода ульсь кстиндаф Иисус Христос Иордан ляйса. Евангелиять коряс, тя шиня Иисус Христос сувась Иордан ляйть ведензонды, коса лангозонза гуляня лаца валгсь Иняру Ваймопожфсь[1].
Илать колга
Шкайть кстиндаманц колга азондсть Матфей, Марк и Лука апостолхне и сёрмдозь тя тевть Евангелиятнень эса. Евангелиять коряс Иоанн Предтеча пророксь, кона лама якась-шяйсь шава модава, инголькиге пачфтсь куля Иисус Христость саманц колга. Иоаннонь щамоц ульсь верблюдонь понаста, перьфксоц карксафоль шнань карксса. Ярхцамбялькс теенза ульсть паксянь циледихне и вирень медсь. Теенза сашендсь пяк лама ломань Иерусалимста, сембе Иудеяста и Иордан ляйть перьфста. Сон кстиндакшнезень ломаттнень Иордан ляйса, мзярда синь виденцякшнесть эсь пежесост[2].
Мзярда Иисус Христости топодсь 30 киза, сон сась Иордан ляйть видес и пшкядсь Иоаннонди эняльдема мархта кстиндамс сонь[3][4][5].
(Матфеень коряс Евангелиясь 3: 4-6) Эста Иисус сась Галилеяста Иорданть трвас Иоаннонь кядьста прянц кстиндафтома. Иоанн тяряфнесь лоткафтомс Сонь и мярьгсь: «Тя Тейть эряволь монь кстиндамс, а Тон сать тейне?» Но Иисус каршезонза мярьгсь: «Катк тяни ули тяфта; тейнек эряви тиемс ся, мезе ёрай эздонк Шкайсь». Эста Иоанн тяфта и тись. Кстиндамда меле Иисус эстокиге лиссь ведьста, и панжевсь Теенза менельсь, и няезе Шкаень Ваймопожфть, кона гуляня лаца валгсь Сонь лангозонза. И менельста кулевсь вайгяль: «Тя монь кельгома Цёразе, Монь кенердема вастозе»(Матфеень коряс Евангелиясь 3: 13-17)[6][4].
Илань койхне
Кльхченгянь алдонь шиня 18 январьста ломаттне ваныхть пост. Стане жа Кльхченгянь алдонь шиня и Кльхченгяста церькавга ётафневихть службат[1][2][7], святендафнихть ведь. Тя ведть ванфнесазь кизоньберьф, симондихть эздонза вачень седихть прасфераня мархта, шобдавань озксонь морафтомда меле.
Марнек Россиять эзга тя шиня эшелякшнихть аньцемаса.Тя аньцемать святиндакшнезе священниксь.Меле верондай ломаттненди ульсь кода марамс мзяра кельк святиндаф ведь[8].
Инголи Кльхченгянь карша мокшень велетнень эзга ётафневсь тяфтама ила-кой. Эрявсь панемс Шяйтанць. Сембе илань шитнень сон, кле, ломаттнень ётксоль, кштись, гуляндась, тяни эряви панемс. Панемстонза велеряйхне эрьхнесть шава ведаркас, тазняс, пачкалгс. Сяда лама шумда, сяда курок Шяйтанць паневи. Кудазорхне палы шужярня мархта шарондозь кудснон, кардснон, штоба козовок афоль кяшев шобда вийсь. Меле марса лисендсть веле пети, марса юватькшнезь панцезь аф парть сяда ичкозиня велеть эзда. А тяда меле ни мртцесть куду. Кой-кона койхне ванондовихть тячити самс мокшень велетнень эса. Кепотьксонди, Краснослободскяй аймаконь Зайця велеса Кльхченгянь алдонь шиня вальмятненди и кенкшненди содса, пурса путнихть крёст, кле, тяфта аф сувайхть шяйтаттне куду, карду и стак тов. А Кльхченгянь илять плхнихть ташта шарыхть и аф эрявикс щапт-каряпт. Оттне тиендихть факелхт и мархтост якайхть ульцява. Темникавонь Пакся Ордаж велеса, кепотьксонди, цёратне вальсесазь ловса стирьхнень. Шайгавонь Сарга велеса, кепотьксонди, Кльхченгяста од ломаттне арнихть алашань нурдса, щакшнихть эрь кодане, кле, стане шяйтаттнень пильгснон синнесазь.
Иисус Христость кстиндама вастоц
Ведеста Иисус Христость кстидама вастоц аф содаф. тячити самс тянь колга вятевихть спорямат. Евангеляса Христость кстиндама вастоц лятфневи аньцек весть: «Тя ульсь Вифавараса Иорданть видеса». Вифавара (Бейт-Абара) лемсь арамейскяй кяльса, конань коряс корхтась Христоссь и Иоанн Крестительсь, ётафтови кода «шкаймаряйхнень ётама вастсна»[9].
Археологсь Рустом Мджян арьси, што Иоанн тя вастть Идить кстиндаманцты аф стак, сяс мес аф ичкозе Иорданть эзда ульсь панда, коста, преданиять коряс, Илия Пророк кеподсь менели. И пандть ваксса ульсь модаваря, коса эрясь Иоанн Предтеча, и тястоконь эряйхне мянь арьсекшнесть, што Илия мрдась ширезост. Исследовательть мяленц коряс, Иоанн ётафнезень эсь проповедензо, сявомок кепотьксс Илиянь эзда, Иорданть шинь стяма ширдень трвасонза. Ся пингти тя ульсь аф пелькс васта, сяс мес тоса ашельхть римлятт[9].
Лятфтамат
- ↑ 1 2 Олеся Роженцова. Крещение Господне: дата и история христианского праздника. Главная современная традиция — крещенские купания. Крещение Господне в 2024 году отметят 19 января: история и традиции. РБК (19 декабрьста 2023). Дата обращения: 15 январьста 2024.
- ↑ 1 2 Нина Рыкова. История и традиции Крещения Господня. Как и когда праздник Богоявления отмечают в 2024 году. Lenta.ru (5 январьста 2024). Дата обращения: 16 январьста 2024.
- ↑ Крещение-2024: традиции праздника и правила купания в проруби. Крещение Господне в русском православии отмечают 19 января. РЕН ТВ (8 январьста 2024). Дата обращения: 15 январьста 2024.
- ↑ 1 2 Обязательно ли окунаться в прорубь на Крещение? Журнал Фома (14 январьста 2019). Дата обращения: 16 январьста 2024.
- ↑ Начало общественного служения Иисуса Христа. Дата обращения: 16 январьста 2024. Архивировано 8 июльста 2016 года.
- ↑ Юрий Смитюк. Крещение Господне: история и традиции праздника. ТАСС (19 январьста 2023). Дата обращения: 15 январьста 2024.
- ↑ Крещение Господне в 2023 году: дата, как принято отмечать праздник. РИА Новости (11 январьста 2023). Дата обращения: 16 январьста 2024.
- ↑ Крещение: когда и как празднуют, нужно ли купаться в проруби. Коммерсант (9 январьста 2024). Дата обращения: 16 январьста 2024.
- ↑ 1 2 "Иордана тут нет". Где на самом деле крестили Иисуса Христа. РИА Новости. Дата обращения: 16 январьста 2024.
Ссылкатне
- Святое Богоявление. Крещение Господа Бога и Спаса нашего Иисуса Христа
- Крещение Господне: иконы и фрески
- Православное аудио
- Праздник Крещения Господне в церковных песнопениях
Литературась
- Крещение Господне в русской поэзии и живописи // Россия и Христианский Восток
- Крещение Господне // Жития святых на русском языке, изложенные по руководству Четьих-Миней свт. Димитрия Ростовского : 12 кн., 2 кн. доп. — М.: Моск. Синод. тип., 1903—1916. — Т. V: Январь, День 6.