Мордовия Республикань Правительствать видеса гуманитарнай наукань институтсь

Рувики лопаста
Мордовия Республикань Правительствать видеса гуманитарнай наукань научно-исследовательскяй институтсь
(НИИГН)
НИИГН при Правительстве Республики Мордовия.jpg
Тядонгольдень лемоц НИИ языка, литературы, истории и экономики (НИИЯЛИЭ)
Пуроптф 1932
Директорсь Галина Александровна Куршева
Ащема вастоц  Россия, Саранск
Юридическяй адресоц Республика Мордовия, г. Саранск, ул. Л. Толстого, д. 3.
Сайтсь niign.ru
Казненза Орден «Знак Почёта»

Мордовия Республикань государственнай казеннай учреждения «Мордовия Республикань Правительствать видеса гуманитарнай наукань научно-исследовательскяй институтсь» (НИИГН) (руз. Государственное казенное учреждение Республики Мордовия «Научно-исследовательский институт гуманитарных наук при Правительстве Республики Мордовия» (НИИГН)) — академическяй лаца наукань учреждения, Мордовияса гуманитарнай наукань центра, финно-угрань научнай оцю центра. Кочкайкс-пуроптыкс арась Мордовия Республикась. Институтсь тиф научно-исследовательскяй и научно-образовательнай тевонь тиеманкса, кона водендаф Мордовия Республикать касоманц-виияманц прябаланзон коряс фундаментальнай и прикладной исследованиятнень ётафтоманди, а стане жа научнай продукциянь нолдаманди[1].

Институтть эрямокиц

Институтсь пуроптфоль 1932-це кизоня кода мокшэрзянь культурань тонафнемань центра. Сонь кочкамац и сяда товонь касомац видеста сотфоль мокшэрзянь автономиять пуроптоманц мархта, кона вииста мольфтевсь 1930-це кизотнень ушетксста. Наукань учрежденияса панчфтольхть секцият историять и практикать коряс, национальнай политикать, культурать, эрямать-ащемать и этнографиять, революциянь молемать коряс и партиянь историять, литературать, кяльть и искусствать коряс. Институтса покодсть 23 научнай сотрудник, синь ётксост ульсь фкя профессор и ниле доцентт. 1935-це кизоня институтть видеса панчфоль аспирантура, кона аноклась учёнайхть кафта направлениянь коряс: «Историясь и этнографиясь» и «Мокшень и эрзянь кяльхне и литературась». 1935-це кизоста сявомок институтсь вятевсь МАССР-нь покодиень, сокаень-видеень и солдатонь депутатонь Советонь ЦИК-ть мархта, 1938-це кизоста сявомок вятезе МАССР-нь СНК-сь, 1942-це кизоста сявомок — МАССР-нь просвещениянь Наркоматсь, 1946-це кизоста сявомок — МАССР-нь Министрань Советсь [2].

1937-це кизоня Мокшэрзянь культурань НИИ-сь полафтфоль Кялень, литературань и историянь НИИ-кс, а 1940-це кизоня — Социалистическяй культурань НИИ-кс. Тя кизоня институтть структурасонза лиссть оцю полафкст. Тяда инголи вятеви секциятнень вастс тифтольхть кой-мзяра сектор: историянь, мокшень и эрзянь кялень, литературань и фольклоронь, велень хозяйствань, издательскяй. 1951-це кизоня институтть полафтфоль лемоц, сон арась Кялень, литературань и историянь НИИ-кс, 1953-це кизоня — Кялень, литературань, историянь и экономикань НИИ-кс (НИИЯЛИЭ).

Институтонь тевкс арась Мордовиять касоманц-виияманц социально-экономическяй моделень тиемась, академическяй трудонь нолдамась, Модань кадастрань тиемась. 1970 — 80-це кизотнень арасть содафокс фольклористтнень работасна, конат лиссть народъётконь вастс («Мокшэрзянь народть устно-поэтическое творчествац» лама томонь сериясь, «Мокшэрзянь народонь музыкальнай искусствань памятникне» теварьсефкссь). Арась содафокс «Мордвась» историко-этнографическяй очерксь. 1990-це кизотнень институтсь нолдазень «Мокшень-рузонь валкс» и «Эрзянь-рузонь валкс» книгатнень, конат одкстоптозь мокшэрзянь языкознаниянь тевть[3].

Мокшень и эрзянь кяльхнень, литературать, историять тонафнемаснон инкса, культурать и просвещениять касфтомаснон-виияфтомаснон инкса институтсь казьфоль «Почетонь знак» орденца СССР-нь Верховнай Советонь (руз.) (мок. Президиумонь Указонь коряс 1982-це кизонь 19-це августста.

1992-це кизоня НИИЯЛИЭ-нь ингольдень секциянза ульсть полафтфт отдел лангс: мокшэрзянь языкознаниянь, историянь, литературань (руз.) (мок. и фольклоронь, археологиянь и этнографиянь, социально-экономических прябалань, мокшэрзянь энциклопедиянь. 2001-це кизоня институтть полафтфоль лемоц, сон арась Гуманитарнай наукань НИИ-кс, коса 2002 кизоста сявомок ульсть отделхт: мокшэрзянь краень историянь, общественно-политическяй исследованиянь, филологиянь и финно-угроведениянь, Мордовиять социально-экономическяй касоманц-виияманц коряс, редакционно-издательскяй, исследованиятнень информационно-аналитическяй ширде вешфксонь пяшкодемань коряс.

Институтть видеса республикаса ладявсь энциклопедизмась, кода Мордовияса гуманитарнай содамашитнень касомаснон-вииямаснон итоксна и перспективасна. XXI-це векть ушетксста лисьф «Мордовия» энциклопедиясь арась республикати эсь лацонь визитнай карточкакс. Аноклафоль сонь электроннай версияц, сон ётафтфоль мокшень и эрязянь кяльхненди[3]. Институтть эрямопингстонза ётафтфоль 50-да лама фольклоронь и кялень экспедиция, 130-ть малава археологиянь, 50-нда лама этнографиянь экспедиция.

2002-це кизоста сявомок 2017-це кизоти молемс наукань исследованиятнень итокснон коряс лиссь 170 лама монография (руз.) (мок., статьянь кочкафкс, валкс, конференциянь материал, учебно-методическяй тев и стак тов.

2013-це кизоня институтсь васьфтезе 80 кизонь юбилеенц.

Вятиенза

Институтти оцюнякс ульсть:

И. И. Куликов (1932—1934); П. В. Галаев (1934—1935); И. С. Поздяев (Сибиряк) (1935—1937); Н. И. Абушев (1937); Ф. И. Лазарев (1937); Е. В. Базунов (1937); В. И. Самаркин (1938—1942); Д. Г. Наумова (1942—1944); к.и.н. Г. Я. Меркушкин (1944—1947); к.фил.н. Н. Ф. Цыганов (1947—1948); к.и.н. М. В. Дорожкин (1948—1950; 1967—1978); д.фил.н. В. В. Горбунов (1950—1959); к.филос.н. А. Л. Киселёв (1959—1963); С. И. Циркин (1963—1967); к.и.н. М. Ф. Жиганов (1978—1992); к.и.н. П. Д. Грузнов (1992—2001); Россиянь и Мордовия Республикань наукань заслуженнай деятельсь, д.и.н., профессорсь В. А. Юрчёнков (2001—2017)[2].

2019-це кизоня НИИ-нь директоркс путф д.и.н., профессорсь Г. А. Куршевась[4].

Тяниень пингонь структурац

Институтсь ащи 7 научнай отделста и 2 лабораторияста, коса покодихть 45 научнай сотрудник, синь ётксост 10 докторхт и наукань 23 кандидат:

• Историянь отделсь

• Археологиянь отделсь

• Кялень наукань отделсь

• Литературань и фольклоронь отделсь

• Региононь исследованиянь и этнологиянь отделсь

• Теориянь и культурань историянь отделсь

• Исследованиятнень информационно-аналитическяй обеспеченияснон коряс отделсь.

  • Информатизациянь лабораториясь
  • Редакционно-издательскяй лабораториясь

Научнай школатне

Институтса улихть научнай школат.

1) Научнай школань ушедысь — историческяй наукань докторсь, профессорсь В. А. Юрчёнков. Тонафнемань ширетне: ХХ-це веконь российскяй и региональнай историясь; ХХ-це веконь историографиясь; региональнай историографиясь; мокшэрзянь народть историянц источниковеденияц; краеведческяй исследованиянь методикась; региональнай культурологиясь; Россиянь финно-угрань нароттнень историясна и культурасна[5].

2) Вятись — историческяй наукань докторсь, профессорсь Л. И. Никоновась. Тонафнемань ширетне: Поволжьянь и Приуральянь нароттнень этномедицинасна; Поволжьянь и Приуральянь нароттнень этнопсихологиясна; Поволжьянь и Приуральянь финно-угорскяй и тюркскяй нароттнень эряфонь ванфтомань койсна; Российскяй Федерацияса и маластонь омба масторхнень эса мокшэрзянь диаспорать лия вастс ётафтомац и этнокультурнай процессне; Мордовия Республикань народонь традиционнай культурась; маластонь омба масторонь мигранттнень адаптациясна.

Научнай школась ётафни этнографическяй экспедицият, кода Мордовияса, стане и лия вастова — Башкортостан Республикав, Татарстан Республикав, Чувашскяй Республикав, Пензенскяй области, Самарскяй области, Калининградскяй области, Кемеровскяй области, Рязанскяй области, Красноярскяй краи, Алтайскяй краи, Хабаровскяй крайти, Приморскяй крайти и лия аймакненди[6].

3) Вятиец —историческяй наукань докторсь, профессорсь Г. А. Куршевась. Тонафнемань ширетне: XX-це веконь российскяй и региональнай историясь; образованиянь региональнай системать историяц; этнопедагогикась[7].

4) Вятиец—педагогическяй наукань докторсь, профессорсь А. М. Каторовась. Тонафнемань ширетне: школань и вузонь теоретико-литературнай тонафнемась; мокшэрзянь литературать теорияц и историяц; мокшэрзянь валморонь ладямась; художественнай ётафтомась[8].

5)Вятиец-философскяй наукань докторсь, доцентсь И. В. Лаптевась. Тонафнемань ширетне: теоретическяй культурологиянь прябалатне; лингво- и этнокультурологиясь; культурнай наследиясь и культуратнень ёткса коммуникациясь; омба масторонь кяльхнень тонафтомань методикасна; информационнай технологиятне и дистанционнай тонафнемась.

Аспирантурась

Институтть покодемаса инь оцю ширетнень эзда васенцекс ащи аспирантураса научнай и научно-педагогическяй кадрань анокламась.

Институтса аноклафоль 40-ть малава доктор и 400-да лама наукань кандидат. Выпускникнень ёткса Н. П. Огарёвонь лемса МГУ-нь президентсь Н. П. Макаркин, наукань докторсь В. А. Балашов, А. И. Брыжинский, Р. Н. Бузакова, Т. П. Девяткина, А. Б. Кузнецов, Л. И. Никонова, О. Е. Поляков, Л. Г. Филатов, В. А. Юрчёнков, Н. Г. Юрчёнкова и лиятне.

Тяниень пингть институтсь аноклакшни научнай кадрат 9 специальностень коряс: 08.00.05 — Экономикась и народнай хозяйствань вятемась (региональнай экономикась); 23.00.02 — Политическяй институтт, процесст и технологият; 10.01.02 — Российскяй Федерациянь нароттнень литературасна (финно-угрань); 10.01.09 — Фольклористикась; 10.02.02 — Российскяй Федерациянь нароттнень кяльсна (финно-угрань, самодийскяй кяльхне); 07.00.02 — Отечественнай историясь; 07.00.06 — Археологиясь; 07.00.07 — Этнографиясь, этнологиясь и антропологиясь; 24.00.01 — Культурать теорияц и историяц[9].

Аспиранттнень лувкссна 2014-це кизоть пенцты ульсь 74 ломань, тяконь лувксса 40 — очнай тонафнемаса.

Научнай журналхне

Мордовия Республикань Правительствать видеса гуманитарнай наукань НИИ-нь Вестниксь

Фалу лисенди научнай издания, конань нолясы НИИГН-сь, штоба пачфтемс научнай общественностти институтонь отделхнень покодемаснон сатфксснон колга и сувафтомс оборотс региональнай гуманитарнай наукать материалонзон. «Вестниксь» эвондась 2006-це кизоня, лисенди кизоти 4-ксть кагодонь и электроннай видса.

Инь оцю ширетне, конат ванондовихть журналса: историческяй наукатне и археологиясь; экономическяй наукатне; филологическяй наукатне.

Журналсь сувафтф Рецензия мархта российскяй научнай журналхнень лувксс, конатнень эса лисендихть наукань кандидатонь и докторонь диссертациянь сатфксне[10].

Центрась и перифериясь

Научно-публицистическяй журнал, кона лемтьф провинциальнай историянь, культурань, межнациональнай отношениянь тяниень кизефксненди, конат няфтьфт центрать и региональнай сообществать ёткса отношениянь призмать пачк. 2017-це кизоня сувафтф Россиянь Минобрнаукать видеса ВАК-ть рецензия мархта научнай изданиянзон лувксс[11].

Институтть сотксонза странань лия научнай учреждениятнень мархта

Мордовия Республикань Правительствать видеса НИИГН-ть улихть оцю сотксонза вуснень и научнай учреждениятнень мархта, конатнень ёткса Российскяй историянь институтсь (РАН), Н. Н. Миклухо-Маклаень лемса этнологиянь и антропологиянь институтсь (ИЭА РАН), а стане жа Москувонь, Санкт-Петербургонь, Самарскяй, Саратовскяй, Пензенскяй, Ульяновскяй областень, Татарстанонь, Чувашиянь, Марий Элонь ошень научнай и научно-образовательнай ведущай центратне.

Лятфтамат

  1. ↑ Устав ГКУ РМ «Научно-исследовательский институт при Правительстве Республики Мордовия» / утв. Постановлением Правительства Республики Мордовия от 29 апреля 2013 г. № 138
  2. ↑ 1 2 редкол. : А. И. Сухарев, В. А. Юрчёнков, П. П. Кузнецов и др. Мордовия : энцикл. : в 2 т. / НИИ гуманитар. наук при Правительстве Республики Мордовия. — Саранск: Мордов. кн. изд-во, 2004. — Т. 2. — С. 85.
  3. ↑ 1 2 редкол.: В. А. Юрчёнков (отв. ред.) и др. Центр гуманитарных наук: история и современность / сост. Е. В. Глазкова, А. В. Чернов. — Саранск: НИИ гуманитар. наук при Правительстве Республики Мордовия, 2008. — С. 3.
  4. ↑ Мила Мельникова. НИИ гуманитарных наук Мордовии возглавит Галина Куршева. Известия Мордовии. Дата обращения: 27 августста 2025. Архивировано 24 июньцта 2019 года.
  5. ↑ Юрчёнков Валерий Анатольевич. Дата обращения: 27 августста 2025. Архивировано 24 июньцта 2019 года.
  6. ↑ Никонова Людмила Ивановна. НИИ гуманитарных наук. Дата обращения: 27 августста 2025. Архивировано из оригинала 4 мартста 2016 года.
  7. ↑ Куршева Галина Александровна. НИИ гуманитарных наук. Дата обращения: 27 августста 2025. Архивировано из оригинала 4 мартста 2016 года.
  8. ↑ Каторова Александра Михайловна. Дата обращения: 27 августста 2025. Архивировано 24 июньцта 2019 года.
  9. ↑ Аспирантура | Научно-исследовательский Институт Гуманитарных наук. Дата обращения: 27 августста 2025. Архивировано 8 июльста 2015 года.
  10. ↑ Вестник НИИ гуманитарных наук при Правительстве РМ | Научно-исследовательский Институт Гуманитарных наук. Дата обращения: 27 августста 2025. Архивировано 24 июньцта 2019 года.
  11. ↑ Центр и периферия | Научно-исследовательский Институт Гуманитарных наук. Дата обращения: 25 августста 2025. Архивировано 24 июньцта 2019 года.

Литературась

  • Финно-угроведение в Мордовской АССР / [Ред. Д. Т. Надькин] ; Науч.-исслед. ин-т яз., литературы, истории и экономики при Совете Министров Мордов. АССР. — Саранск: Мордов. кн. изд-во, 1970. — 80 с.
  • Центр гуманитарных наук: история и современность / В. А. Юрчёнков. — Саранск: НИИ гуманитарных наук при Правительстве Республики Мордовия, 2008. — 424 с.
Сявф"https://mdf.ruwiki.ru/w/index.php?title=Мордовия_Республикань_Правительствать_видеса_гуманитарнай_наукань_институтсь&oldid=418240"-ста