Саранскяень курось
Саранскяень курось руз. Саранская улица анг.: Saranskaya street — куронь лем Саранск ошса. Саранск ошса лама курода. Синь лемснон лувкссна пачкотькшни 290-ть малава [1]. Синь аф фкя лацот. Куротнень сяда ламоснонды максфт ломанень лепт. Кой-конат лемтьфт национальностьс коре: Мокшень курось, Эрзянь курось, Грузинонь курось, Мокшэрзянь курось, Алтаень курось, Афганскяй курось. Фкя куроть лемоц Саранскяень курось.
Куроть эрямопингоц
Саранск ошть 1900-це кизонь планцонза няфтьфт Предтеченскяй церькавсь и ульцясь. Синь ащихть ошть алда ширесонза Саранка ляйть трвасонза кучка вастть эзда шимадома ширесонза. Сядонголе тоса ащесь шуфтонь церькав. Церькаву сашенды ломаттнень путф вийснон вельде стяфтфоль кевонь храмть эса ульсть петфтафт нинге кафта куднят. Фкя куднять ИоанПредтечить лемс лемтьфоль сонць церькавсь, а вакссонза Предтеченскяй ульцясь. Церькавсь сувсесь Спасскяй соборть лувксс. «1817-1819-це кизонь Саранк ошень эряйхнень лувксснон коряс книгаса» Предтеченскяй ульцяса ащесь 9 кутт, коса эрясть мещанонь кафта семьят, цеховойда – кота и Богословскяй церькавонь пономарсь – Леонтий Андреев (4-це Богословскяй ульцясь малаткшнесь Саранка ляйть кержи ширдень трвазонза). Цеховойхнень ёткса эряйхнень эзда ульсть Ларион Огнев, Герасим Катлов, Максим Улатомцев, Яков и Петр Абудеефне, Гаврила Полдомасов, конат сташендсть варягат и тиендсть ашкт. Герасим Катлов опеннай комитетть пуромксонц эзда ульсь коякаф пчкафтыти лездыкс (подлекарькс). 1878-це кизонь уликс сёрматфкснень эса лятфневи Саранка ляйть туркс Предтеченскяй седть колга. 1912-це кизоня ульсть кафта тяфтама сетть: Гуменнай куроть и 3-це Успенскяй (тяниень пингонь Грузинскяй и Николаевонь куротне).
ХХ-це векть ушетксста Предтеченскяй куроса ащесть Полякофнень, Гладышефнень, Ворониттнень, Ивениттнень, Ашмариттнень, Бурыкиттнень, Самойлофнень усадьбасна. Октябрьскяй революцияда меле 1918-це кизонь 1-це ноябрьста Предтеченскяй ульцять лемонц полафтозь Саранскяй лемть лангс. Советскяй пингть курось ламода кувалгодсь таргави шинь стяма ширде шинь мадома шири Красноармейскяйть эзда Титовонь куроти самс. Ламоц куттне стяфтфт 20 – 30-це и войгада мельдень кизотнень.
1940-це кизоня ульсь стяфтф 15-це № школась.
Великай Отечественнай войнань кизотнень пингста 1942-це кизонь июльста 1943-це кизонь июльти самс тяса ащесь Саранскяй военнай пехотнай училищань батальонць. Конань вятнезе А.С. Борисов майорсь. Батальонтть фронту тумдонза меле школаса ушедовсть вятевома занятиятне 12-це № школаста ётафтф тонафнихнень мархта, конань зданияса ладяфоль эвакуационнай госпитальсь. Сядонгольдень Предтеченскяй церькавть кудса (63 кудсь) ащи кшинь пидема 4-це№ заводсь и техническяй 7-це № училищась) Тяниень пингть тя куроть видеса стяфтф Мокшэрзянь пирьфсь. А.С. Пушкинонь лемса ваймамань паркть колма сувама-лисема васттнень эзда фкясь ащи куроть ширде. Сонць парксь ащи ошть кучкаса, ялга молезь 10-шка минутат Иняру Фёдор Ушаковть кафедральнай соборонц эзда[2].
Лятфтамат
- ↑ Список улиц в г. Саранск, Республика Мордовия от А до Я
- ↑ Парк отдыха имени А. С. Пушкина в Саранске (рус.). Тонокости туризма—энциклопедия курортов. Дата обращения: 3 декабрьста 2025.
Литературась
Куклин В.Н. Биографии саранских улиц. – 2-е изд. прераб и доп. – Саранск: Мордов. кн. изд-во, 1990. – 320 с.
Саранск столичный / авт.-сост.: Н. М. Арсентьев, Т. С. Баргова, Е. С. Руськина и др. — Саранск: Издатель Константин Шапкарин, 2012. 48 с.
Сссылкатне
- https://dom.mingkh.ru/mordoviya/saransk/streets/ Улицы в Саранске