Мордовия Республикань Конституциясь

Мордовия Республикань Конституциясь
Видсь	Конституция
Государствась	Мордовия (Российскяй Федерациянь субъектсь)
Прняндаф	Мордовия Республикань Государственнай Пуромксть вельде 1995-це кизонь 21-це сентябрьста

Мордовия Республики Конституциясь (руз. Конституция Республики Мордовия) — Российскяй Федерациять лувксса юрса ащи Мордовия Республикать законоц.

Сувафтф 1995-це кизонь 21-це сентябрьста. Эзонза сувафтфтольхть полафткст 28-це февральста, 27-це ноябрьста 1997-це кизоня, 7-це октябрьста, 17-це декабрьста 1999-це кизоня, 9-це ноябрьста 2000-це кизоня, 5-це, 10-це январьста, 28-це майста, 12-це ноябрьста 2001-це кизоня, 7-це июльста 2003-це кизоня, 28-це январьта 2004-це кизоня, 30-це мартста, 23-це декабрьста 2005-це кизоня, 26-це апрельста, 26-це июньцта, 5-це октябрьста 2006-це кизоня)

Ащи:

• преамбуласта «Минь, Российскяй Федерациянь лама национальнай ломаньтналонь полномочнай представительхне, Мордовия Республикаса эряйхне,
  • ответонь кандомань эзда граждаттнень цебярьста эрямаснон-ащемаснон инкса,
  • кемокстамок эсь мяленьконь Российскяй Федерациять фкя пяльксокс ащеманц ванфтоманц,
  • кирдемок принципы демократическяй, правовой обществань принципнень ширеснон, кемокстамок ломанень праватнень и свободатнень, гражданскяй сетьмошить и согласиять,
  • таколдозь ломантналонь эсьлацонь ширетнень ванфтомаснон и кирдемаснон, конат эряйхть сонь территориясонза,
  • кирдемок мяльть Мордовиять колга, кода Россиять аф явоштови пяльксоц,
  • прняндасаськ Мордовия Республикань Конституциять»
• 10 главать
• и 112 статьять

Эрямопингонь справкась

Мордовия Республикань Конституциясь примафоль Мордовия Республикань Конституционнай Пуромксть вельде 1995-це кизонь 21-це сентябрьста. Сембоц сувафтф пцтай 15 петькс. Мекольцетне сотфтольхть Республикань Оцюнять кочкаманц мархта. Тяни Конституциясь марнек отвечай федеральнай законодательствати и свободнайста ноляви тевс Мордовия Республикать территорияса.

Мордовскяй АССР-нь Конституциясь социализмать пингста

30-це августста 1937-це кизоня Мордовиянь Советонь 2-це Чрезвычайнай съездсь примась постановления «Мордовскяй Автономнай Советскяй Социалистическяй Республикать Мордовскяй Автономнай Советскяй Социалистическяй Республикать Конституциянц (Основной Закононц) кемокстаманц колга». Мордовиянь конституциясь ащесь 11 главаста и 113 статьяста. Сон законодательна кемокстазе МАССР-нь пуроптомать (1934 кизонь декабрьста), сонь общественнай и государственнай устройстванц. 1937-це кизонь Конституциять коряс, МАССР-сь суваст РСФСР-ть ёткс автономнай республикань праватнень коряс. тянь вельде полафтсь сонь правань статусоц. МАССР-ть вятемаса, кирдемок мяльса национальнай эсь лацонь ширетнень, сявфоль кирдемс мяльса лама кизефкста эряфонь политическяй и социально-экономическяй эрь кодама ширде: национальнай государственнай строямань ширде (МАССР-нь Конституциянь анокламась, сонь ванфтоманц мельге ваномась; административно-территориальнай явфтомань ладямась РСФСР-нь ВС-ть мархта соглосованиять коряс), хозяйственнай и социально-культурнай касфтомать (народно-хозяйственнай планонь, республикань бюджетонь кемокстамась и синь пяшкодемаснон коряс латта азомась; райононь, ошень и велень Советонь бюджетонь вятемась, СССР-нь и РСФСР-нь законодательствать коряс государственнай и тястоконь налокнень и стак тов), республиканскяй законодательствать и контролень вятемась СССР-нь и РСФСР-нь закоттнень эряфс сувафтомаснон мельге, граждаттнень государственнай порядкань и правань аралмасна, автономнай республикаса судебнай органонь пуропомась. МАССР-нь государственнай символкс лувондовсть РСФСР-нь гербсь масторкотфсь рузонь, мокшень кяльса и эрзянь кяльса сёрматфкс мархта. 1978-це кизоня 30-це майста МАССР-нь Верховнай оветонь аф очередной 9-це сессиясь прняндазе Мордовиянь од Конституциять, кона ащесь 10 пяльксста, 16 пряфксста, 161 статьяста, конатнень эса ульсть од положеният. «Социальнай касомась и культурсьа» пряфксса ульсь азф, што МАССР-ть социальнай юронц кирдьсазь рабочайхнень, сокайхнень-видихнень м интеллигенциять аф явоштови соткссна. 1-це пряфксонь 6-це статьясь кемокснезе обществаса КПСС-ть вяти и шарфты вастонц. 2-це пяльксса «Государствась и личностсь» ащесь граждаттнень правань лемлувкссна. 5—6-це пялькснень эса макссевсь характеристика высшай и тястоконь азорондай оргаттненди и вятихненди — МССР-нь ВС-ть и СМ-ть фкя палатань, народнай депутатонь Советтненди ошнень, райоттнень и ёмла веленятнень эзга.

Мордовиянь Конституциясь советскяй пингта меле

1985-1995-це кизотнень странаса демократическяй реформатнень ётафтомста тиевсть радикальнай полафткст политическяй и социально-экономическяй сфераса: народонь властть приоритетоц, многопартийностсь, эрь кодама собственностень форматнень равноправиясна, предпринимательскяй деятельностень свободась и лият. Ня положениятне мусть васта РФ-нь Конституцияса (1993 кизонь декабрсь), конань коряс 1995 кизонь 21-це сентябрьста МР-нь Конституционнай Собраниясь примазе Мордовиянь Конституциять. 2002-це кизоня нолдафоль од редакцияса (мяльс сявозь полафтксне и полатксне, сувафтфт МР-нь 1997 к., 1999—2001 кк. законца). Ащи кафта пяльксста: 1-цеть эса 12 глава и 119 статья, 2-цеса улихть пети пачкотьф и ётконь кирди положеният. 1-це главаса сёрматфт основы республикать конституционнай ладяфксонь юронза; 2-цеть эса кемокстафт ломанть и гражданинть праванза и свободанза, эряфс нолдамань синь гарантиясна; 3-цеса няфтьфт Мордовия Республикать государственнай статусоц и административно-территориальнай ладяфксоц; 4—6-цеса няфтьф сембода сери государственнай азорондамань системась: Мордовия Республикань Оцюнясь кода сембода сери вастса ащи должностной лицась вятьсы Мордовия республикань высшай исполнительнай органть и ащи гарантокс Мордовия Республикань Конституцияти; Мордовия Республикань Государственнай пуромкссь ащи Мордовия Республикань сембода сери законодательнай (представительнай) азорондайкс; Мордовия республикань Правительствась лувондови фалу тевонь вяти государственнай азорондамань сембода сери исполнительнай органкс; 7-цеса ладяф путомань (кочкамань) порядкась и мировой судьянь тевонь вятемась; 8-цесь ёрдаф; 9-цесь ункстасы адвокатурань и нотариатонь статусть; 10-цесь кемокснесы тястоконь эсь коряваст покоди организациянь правовой юрхнень; 11-цесь кочкасыне государственнай символхнень и Мордовия Республикань пряошть; 12-це главась латцсесы Мордовиянь Конституциять эса одукс ваномань и полафтксонь сувафтомань порядкать. Мордовиянь Конституцияв полафтксне сувафневихть сяда ламонь мяльснон коряс, аф сяда кржа 3/4 пяльксть вайгялень максомать коряс Государственнай Пуромксонь депутаттнень марстонь лувксснон эзда, или мяльс самать коряс, кона прняндави Мордовия Республикань референдумть вельде. Мордовия Республикань Конституциять одукс ваноманц эрявиксшинц од теварьсефксть прняндасы-ванцы Мордовия Республикань Конституционнай Пуромкссь сяда лама вайгялень максомань лувксть сувафтоманц вельде, 2/3 пяльксть аф сяда кржа марстонь ащихнень лувксснон эзда.

Литературась

• Конституция (Основной Закон) Мордовской Автономной Советской Социалистической Республики. — Саранск, 1938;
• Конституция (Основной Закон) Мордовской Автономной Советской Социалистической Республики. — Саранск, 1978;
• Мордовия в период реформ. — Саранск, 2001; Конституция Республики Мордовия. — Саранск, 2002.
• Энциклопедия Мордовия, Ю. И. Сальников.

Ссылкатне

• Конституция Мордовии