Чумаков, Иван Филиппович
| Чумаков Иван Филиппович | |
|---|---|
| Шачема лемоц | Иван |
| Шачема вастоц | Пензенскяй областень Белинскяй райононь Карсаевка велесь |
| Кулома шиц | 27 ноябрьста 1996 |
| Гражданствась | Россия |
| Тевонь тиемац | сёрмады, журналист |
| Казненза и премиянза |
Мордовия Республикань заслуженнай поэт, Россиянь Писателень Союзонь сувафтфсь |
Иван Филиппович Чумаков — содаф мокшень писательсь и журналистсь.
Эряфонь киц
Сон шачсь 1913 кизонь 20-це ноябрьста Пензенскяй областень Белинскяй райононь Карсаевка мокшень велеса. Школать аделамда меле сон сась тонафнема Саранскяйнь педагогическяй техникуму. Иван Филиппович Чумаковонь эряфоц, тевонза, творчествац кемоста сотфт Мордовиять мархта. И коза ба эряфсь афольце ёря, сон фалу мртцесь Саранскяи. А улемс тейнза савсь Иван Филиппович Чумаковонь лама вастова: етазень войнань толу китнень, тонафнесь Москуса, эрясь Узбекистанца. Нинге студентокс ушедсь стихонь сермадома. Васенце стихоц «Паксять мороц» кучфоль «Од веле» газетав 1931-це кизоня. И. Чумаков тертьфоль работама «Од веле» руз. (Новое село) газетать редакцияс, коса сон васенда ульсь литературнай работникокс, а пингонь ётазь – отделонь заведующайкс. Тяка пингть тиендезень литератураса васенце аськолкснень, серматкшнесь стихт, расскаст, зарисовкат. 1932–це кизоня Москуса нолдафоль «Васень аськолкс» мокшень писательхнень марстонь сборниксна. Сонь эзонза сувасть Иван Чумаковоньге вете стихотворениянза.
Тяка жа кизоня Москувонь «Молодая гвардия» издательстваса «Эрект» руз. («Живые»)лем ала лиссь Чумаковонь стихонь сборникоц. Сяльде, 1935-це кизоня, лиссь «Шинь гайф» мокшень писательхнень альманахсна. Тоса печатлафоль Иван Филипповичень «Тумось и поюсь» басняц. 1936-це кизоня Саранскяйса нолдафоль И. Чумаковонь «Розень пакся»руз. («Ржаное поле») омбоце сборникоц. Сонь эзонза сувасть стихотвореният, баснят, «Морот и тефт» сценка. Писательсь варчсезень виензон лия жанрасовок. 1939-це кизоня лиссь рассказонь, фельетононь и ёфксонь «Вайгяль» од сборникоц. Кассь-келемсь писательть сельмованфоц эряфть лангс, оржамкшнесь перацка.
1940 кизоня колмоце курсонь студентсь азсь мяль служамс Якстерь армияса. Писательсь ульсь сотрудникокс дивизиянь газетаса, няфтезе прянц цебярь военнай корреспондентокс. «Встреча», «Дерзость и умение», « В упор по фашистам», «Мастер своего дела» и лия очерконзон эса Чумаков кепсезе боецнень мяльснон тюремс нинге сяда аф пелезь фашисттнень каршес. Иван Филипповичень ламоц писатель ялганзонды аноклазе «Родной вайгяль» руз. («Родной голос») книгать. Тяза сувасть войнаса шавф мокшень писательхнень произведениясна. Книгась нолдаф 1948 кизоня. Войнада меле Иван Филиппович Чумаков работась Мордовскяй обкомса инструкторкс. Тяконь-шовор кирдезе мяльса пединститутса тонафнеманц, кона лоткафтфоль армияса служаманц пингста[1].
Аделамок пединститутть сон путфоль «Мокшень правда» газетать редакторонцты заместителькс. Сяльде журналистонь содамошинзон касфнема кучфоль кота ковонь курсс «Правда» центральнай газетав.
Ётафтфонза
Ульсь пинге, мзярда мокшень литератураса шарфтфоль оцю мяль рузонь писательхнень романцнон и повестьснон родной кяльс етафтомаснонды. И. Чумаков мокшень кяльс ётафтозень Д. Фурмановонь «Чапаев», Н.Островскяйнь «Синь шачфтозень бурясь», М. Горькаень «Тядя» руз. («Мать»), Г. Николаевать «Нума»руз. («Жатва»), М. Бубеновонь «Акша келу» руз. («Белая берёза»)романцнон, И. Тургеневонь «Ася» повестенц и лия произведениятнень. Аф кржа вийда писательсь путсь од поколениянь касфтомати, кенерсь няфтемс прянц кода цебярь педагог. Ульсь учителькс Краснослободскяй райононь Колапа велень средняй школаса, преподавателькс Узбекистанонь Кокандскяй пединститутса.Иван Филипповиченди максф «Узбекскяй ССР-нь народнай образованиянь отличник» лем. И.Ф.Чумаков фалу кирдсь кеме соткст кялень, литературань, историянь и экономикань Мордовскяй научно-исследовательскяй институтть мархта[2]. Фкя пинге сон тяса работась научнай сотрудникокс кялень секторса и лама тись толковай валкстьанокламста. Тяда башка, ульсь этносоциологическяй и фольклорнай экспедициятнень эса. Мокшень велева кочкась сядот мора и ёфкс. Синь лисендихть институтть фольклорнай сборниконзон эса.
Казненза
Мокшэрзянь культурать виияфтоманцты путфксонц инкса И.Ф.Чумаков казьфоль:
- МССР-нь Верховнай Советть Президиумонц Почетнай грамотаса.
Военнай журналистонь работанкса Иван Чумаков аф весть получсесь благодарность командованиять эзда, а воинскяй подвигонкса казьф*
- Якстерь Тяштя и Отечественнай войнань 2-це степенень орденца, лама боевой медальса.
Иван Филиппович Чумаков тусь эряфста 1996 кизонь 27 ноябрьста 83 кизоса.
Библиографиясь
Отдельные издания на мордовском-мокша языке
- Эрект: стихт. - Москва,1932. - 31 с.
- Розень пакся: стихт. - Саранск,1936. - 63 с.
- Вайгяль: рассказонь, фельетононь и ёфксонь сборник. - Саранск,1939. - 115 с.