Финно-угрань обществась
Финно-угрань обществась (руз. Финно-угорское общество) — (ФУО; Suomalais-Ugrilainen Seura), Финляндиянь инь оцю научнай обществатнень эзда фкясь. Пуроптфоль 1883-це кизоня Гельсингфорс ошса (Хельсинки ошсь) ня учёнайхнень мяльснон коряс: Отто Доннер (1893-це кизоста сявомок — ФУО-нь президентсь)[1], И. Аспелин, А. Алквист, «Калевала» карело-финскяй эпосонь кочкайсь Э. Лённрот, поэтсь С. Топелиус и финнонь интеллигенциянь лия ломаттне.
_p545_Otto_Donner.jpg)
Обществать инь оцю тевоц— финно-угорскяй нароттнень колга содамошитнень касфтомасна (синь кяльснон, историяснон, культураснон, кудъётконь тевснон тонафнемасна). Тевть ушетксста ФУО-сь шарфнесь оцю мяль научнай экспедициятнень пуроптомаснон лангс. Архивнай тевонь якафтоманкса финно-угорскяй нароттнень эряма вастозост кучсевсть экспедицият и башка учёнайхть. 1917-це кизонь революцияда инголе уралонь кялень и культурань ламоц исследовательхне (А. Гейкель, Х. Паасонен, У. Сирелиус, Э. Сетяля, У. Харва, Ю. Вихман, А. Каннисто, К. Карьялайнен, Т. Лехтисало, Л. Кеттунен и лиятне) Россияса ётни экспедициятнень пингста кочкасть козя материал.
Мокшэрзянь народть культуранц тонафнеманцты оцю путфкс тисть тяфта жа А. Хамялайнен, А. Вяйсянен. Этнографиянь коллекциянь кочкамань тевса няфтезь пряснон М. Е. Евсевьев, А. А. Шахматов и лиятне. Н. П. Барсов 1881-це кизоня кучезень ФУО-в мокшэрзянь моротнень, конатнень сон кочказень, 1892-це кизоня Пензенскяй губерниянь картать, коса няфтьфт куваня эряйхть мокшетне и эрзятне и мокшэрзянь топонимонь сборник. Шахматов казсь валкс, конань эса 1 300 мокшень и эрзянь вал; меле ФУО-нь журналса печатлафоль сонь айнемац мокшетнень и эрзятнень эвондамаснон колга. 1886-це кизоста сявомок нолневсь журналсь, 1890 — тр. ФУО, 1901-це кизоста сявомок — «Финно-угорские исследования» сборниксь, коса финнонь, немецонь и французонь кяльса печатлакшневсть научнай работат финно-угроведениять (уралистикать) коряс. Журналть 1-це номерсонза печатлафтольхть Тюштя оцязорть колга мокшень мора, кона сёрмадозе и ётафтозе французонь кяльс В. Н. Майнов, А. Гейкелень статьяц мокшэрзянь кудть колга (финнонь кяльса), мокшэрзятнень эряма вастснон и синь лувксснон колга кулятне-содаматне, финно-угрань нароттнень эряма вастснон коряс картати полаткс, конань тиезе Отто Доннер (1885).
Тевонза тяниень пингть
XX-це векть пестонза ФУО-сь ноляй «Aikakauskirja»/«Journal» («Журнал», лиссь 92 том), «Toimituksia»/«Proceedings» («Публикацият», лиссь 262 нолдафкс), «Lexica» («Лексика», 33 нолдафкс, тяконь лувксса мзярошка пяльксста), «Kansatieteellisiä julkaisuja»/«Ethnographical Publications» («Этнографическяй изданиятне», 19 нолдафкс), «Apuneuvoja suomalais-ugrilaisten kielten opintoja varten» /«Study Aids for Finno-Ugrian Languages» («Материалхт финно-угрань кялень тонафнихненди»)[2]. Хельсинки ошень университетть мархта марса Обществась ноляй серият («Кастренианумонь публикациянза»)[2].
Хельсинки ошень университетть кафедранзон мархта марса нолни «Uralica Helsingiensia» и «Castrenianumin toimitteita»/ «Castrenianumin toimitteita» («Кастренианумонь публикациянза»), лезды «Finnisch-Ugrische Forschungen» («Финно-угрань исследованиятне») эрь кизоня лисенди изданияти . ФУО-сь максси стипендият и ярмакт научнай исследованиянь ётафтоманди и материалонь кочкаманди; эрь кизоня ётафни 9 пуромкс доклад мархта, конат лемтьфт сонь тевонзон эрь кодама аспектонзонды. 2000-це кизоста сявомок обществав сувси 800-ть малава ломань (постояннай, почетнай и омба масторонь). Председательсь — Профессорсь Улла-Майя Форсберг[2], секретарсь — философиянь лиценциатсь Р. Грюнталь.
Лятфтамат
- ↑ Большая советская энциклопедия : [в 30 т.] / гл. ред. А. М. Прохоров. — 3-е изд. — М. : Советская энциклопедия, 1969—1978.
- ↑ 1 2 3 Деятельность Финно-Угорского Общества. fulr.karelia.ru. Портал "Финно-угорские библиотеки России". Дата обращения: 25 январьста 2026. Архивировано 3 мартста 2012 года.
Литературась
- Мокшин Н. Ф. Мордва глазами зарубежных и российских путешественников. — Саранск, 1993.
- Халиков А. Х. Финно-угорское общество и его роль в изучении языка, фольклора, археологии и этнографии народов Среднего Поволжья // Древние этнографические процессы Волго-Камья. — Йошкар-Ола, 1985.
- Энциклопедия Мордовия, Н. Ф. Мокшин, Ю. Н. Мокшина.
- Suomalais-Ugrilaisen Seuran julkaisut Publications de la Société Finno-Ougrienne. 1885—2000. — Helsinki, 2000. — Vol. 8.
