Родькина, Полина Егоровна

Родькина, П.Е. мокшень щамса

Родькина, Полина Егоровна — мокшень сказительницась; мокшень коень, сире моронь содайсь; ёфксонь, азксонь, сёрмадысь. Содафокс арась ХХ-це веконь 90-це кизотнень.

Эряфонь киц

Шачсь 7-це октябрьста 1925-це кизоня Пензань губернияса Торбеевань уездса (тяни Мордовиянь Торбеевань аймаксь) Сире Пяцёра руз.: (Старые Пичуры) велеса сокаень-видиень лама идень семьяса, ульсь вейхксоце шабась семьяса. Сонь тядянза-алянза, сазоронза-альняканза ульсть асу ломатть, сембе кельгозь музыкать, маштсть морама. Аляц, Егор Тимофеевич Асташкин, покодсь велень старостакс, содась грамотас, лама лувондсь. Тядяц, Александра Гавриловна, пяк маштсь сюреса сёрмадома и мазыста морама. Оцю альнякац, Пётр Егорович, тонафнесь Саранскяень музыкальнай училищаса и 40-60-це кизоттнень морсесь Мордовскяй музыкально-драматическяй театраса. Сонь ульсь мазы баритон вайгялец. Михаил брадоц инь цебярь гармостистсоль велесост. Полина Егоровнань идькс и одкс пингоц повсь коллективизациянь стака кизотненди и Великай Отечественнай войнань пингти. Аделамок шачема велеса 7 класст, сонь мялецоль тонафнемс сяда тов. Ушедсь тонафнема Салазгорь шабра велеса, кона ащесь 25 вайгяльбе вастса сонь веленц эзда. Но стакодонга стака пингсь кошардозе кадомс тонафнеманц и ушедомс покодема. Теенза ульсь 16 киза, мзярда сон ушедсь работама колхозса счетоводкс, а меле шачема велесонза почтальонкс. Ломаттненди, конат ашесть машта лувома и сёрмадома, сон лувондозень фронтста саф сёрматнень и тяшнесь каршезост. Сашендовсь каннемс и "похоронкат"... Полина Егоровна эсь мирденц Егор Терентьевичень мархта касфтсть 4 итть. 1963-це кизоня Родькиттне семьянек ётасть эряма велеста Саранскяи. Кулось Полина Егоровна 14-це декабрьста 2018-це кизоня. Калмаф Саранскяйса.

Творчествац

Саранскяйса, сон содафтсь мокшень писательхнень мархта. Полина Егоровна содась мокшень лама ёфкс, содазень народонц коензон-обуцянзон, няйсь аф няемат-нужат, сяс теенза ульсь мезень колга тяштемс. Сонь сёрматфонза ушедсть лисендема "Мокша" и "Якстерь тяштеня" журналхнень эса, "Мокшень правда" газетаса. Полина Егоровна сёрматкшнесь азкст. Васенце азксонза сувасть "Эрясть-ащесть атят-бабат" марстонь сборникс. Васенце книгац "Кшить питнец "лиссь 1988-це кизоня.Тяза сувасть сонь азксонза, конат лемтьфтольхть иттнеди и оцюфненди. Полина Егоровнань улихть и валморонзовок. Сонь стихонзон лангс сёрмадсь музыка мокшэрзянь содаф композиторсь Нина Васильевна Кошелевась. "Кельме роса" моронц морсесы "Умарина" ансамбльсь. Мзярда пуроптовсь "Масторава" обществась П. Е. Родькинась сувась эзонза васенцетнень ёткса. Стане жа сувсесь "Юрхтава" мокшавань пуромксу. Мзярда Саранскяйса панчфоль Мокшэрзянь церькавсь (1991), сон ульсь учредительхнень ёткса . Коса афоль уле Полина Егоровна, сембе вастова сон азонкшнесь мокшетнень колга, морсесь кунардонь мокшень морот, кельгозе и содазе шачема кяленц. Сон пяк маштсь ёфксонь азондома, маштсь инжиень васьфтема-каваняма, шранц лангса фалу аноктольхть мокшень пачат.

Казненза

• МАССР-нь Верховнай Советонь Президиумонь Почётнай грамота

Книганза

• "Кшить питнец" (азкст) руз.: "Цена хлеба" (1988)
• "Толгафтома атякш" (ёфкст, азкс) руз.: "Петух без перьев" (1995)

Ссылкатне

https://cyberleninka.ru/article/n/duhovnaya-kultura-mordvy-i-zadachi-obschestva-mastorava-tezisy-doklada-na-pervom-sezde-mordovskogo-kulturno-prosvetitelnogo-obschestva ДУХОВНАЯ КУЛЬТУРА МОРДВЫ И ЗАДАЧИ ОБЩЕСТВА «МАСТОРАВА» (Тезисы доклада на Первом съезде Мордовского культурно-просветительного общества «Масторава»)