Мокшэрзятнень щамсна

Мокшэрзятнень национальнай шамсна (руз. Мордовский национальный костюм) — тя мокшэрзянь национальнай щам. Сон няфтьсы эсь культурать, койхнень и мокшэрзянь народонь эсьлацоньшить. Коень национальнай щапне касондсть-вииякшнесть кафта ширева, конат ладясть эрзятнень и мокшетнень культураснонды.

Эрямопингсь

Народнай костюмть тиеманц историяц тушенды пяк кунардонь пингти. Мокшэрзянь щамсь тиендевсь сокай-види ломаттнень ёткса. И эстокиге ни теенза максфтольхть эсьлацонь ширет. Мокшэрзятнень эряма вастснон географиясна, шабрань нароттнень мархта ряцок ащемась — тя сембось няевсь сонь пяльксонзон и мазоптоманзон эса. Мокшень и эрзянь национальнай щамсь пуропневсь Россиянь европейскяй пяльксть кучка вастсонза. Мокшэрзятнень эряма вастснон кели историческяй масторкитькссна няфтсть эрь кодама вариантт мокшетнень и эрзятнень щамса. Тяконь лувксса эсь лацонь ширетне аерфнесазь щамснон Кода Мордовиять потмоса, стане Пензенскяй, Ульяновскяй , Нижегородскяй, Саратовскяй, Самарскяй, Оренбургскяй, областтнень, Чувашиять, Татариять, Башкириять.

Башка мяль шарфнихть авань щапне. Лангозост мялень шарфтомась теенза ульсь аф аньцек российскяйхнень, но и омба масторонь исследовательхнень и путешественникнень. Мокшэрзянь нарядть колга васенце кулятне васьфневихть XVIII-це векста. Учёнайхнень-путешественникнень И. Г. Георгинь, И. И. Лепехинонь, П. С. Палласонь и лиятнень работасост. Синь салсезень мяльснон васендакиге ня щамонь тиихнень козя арьсемасна и мазы сюреса сёрмадомась. Мокшэрзятнень народнай асушисост сюреса сёрмадомась занци башка васта. Кунардонь пингста сявомок тячиень шити самс тя мокшаватнень и эрзятнень кельгома тевснон эзда фкясь. Мокшэрзянь сёрматфксонь коень тюсне-сенем (или равжа сенем тюсса) и шобда-якстерь тюжя и сянгяря мархта. Мокшэрзянь щамса цебярь ширеть виияфтоманкса и узорти рельефностень максоманкса сёрмады аватне сёрматфкссост ноляйхть тевс эрь кодама тюсонь крганят, блёсткат, лентат, серень бляшкат, понань помаланят и стак тов.

Сюреса сёрмадома кода мокшаватне, стане и эрзятне кярьмотькшнесть инголькиге, а оцю кизоснонды теест эрявсь кочкамс эсь эрьвакс тумань паршиснон мзярошка панарста, нардамаста, руцяста и стак тов. Сюреса сёрмадомань кой-кона тяштькснень ульсть синцень лемсна. Эрь кодама сёрматфксть эса ульсь лама ширет. Эрявсь сёрмадомс и вадявста и крёскянь, тяштенянь, фонарикть, рубчикть, стафть-пялес крёзть тиендезь. Сёрматф узорхнень эзда няеви символикась, кона моли народть кунардонь кемаманзонды. Синь ульсь сакральнай характерсна, ащихть ванфтома вастокс. Сюреса сёрмадоматне, кода фалу тиендевсть илань щамса. Кядьса тиф илань щапне кородозь ванфневсть и макссевсть наследствас коре бабаснон эзда стирьснонды и унокснонды. Мокшэрзянь эряйхнень эрь кодама эряма вастсост сёрматкшневи тястоконь орнаментсь и эрь кодама техническяй покодемань приёмтнень тевс нолдамасна. Тяфта, финцнень сидеста васьфневсть оцю сеткава перевитьса и ацазь ацави строчнай сёрматфкссь, мережкась. А лиятнень сяда сидеста васьфневсть геометрическяй фигуратне(квадрат, ромб, треугольниксь).

Финно-угрань пластсь — сембода кунардоннесь, сон корхтай финно-угратнень культурнай койснон марстоньшиснон колга. Сон няеви щамонь керсефса, сюреса сёрмадомань орнаментальнай мотивса, декоронь колоритса. Кепотьксонди, алянь и авань панарсь керсефс коре марнек ладяй мокшень типонь панарти. Сюреса сёрмадомать тюсоц и сонь тифоц фкя лацоннет мокшэрзятнень национальнай щамснон мархта.

Тюркскяй пластсь, улема, сувась мокшэрзятнень культурас татаро-монгольскяй врьгятемань пингть. Тя влияниясь ванфтовсь авань костюмть конкретнай пяльксса. Теест кандовихть, кепотьксонди, пряпакарень мазоптомкатне — крёс килесь, мокшаватнень понкссна. Тяфтама понкст мокшень сире поколениясь каннесь XX-це векть пенцты и ули кода васьфтемс тянивок.

Славянскяй пластсь — можна няемс декоративнай элементонь тиемань техникаса и костюмонь детальса. Сембода вии влияниясь лиссь XIX-це векть песта-XX-це векть ушетксста. Мокшэрзянь щамса эвондакшнихть мокшетнень — сапонясь, рукавась — эрзятнень. Этнографнень мяльснон коряс, ня детальхне сявфт рузонь ломаттнень кядьста.

Авань национальнай щамсь

Мокшень и эрзянь аватненди панарсь фкя пингста ульсь алудонь и лангань щамкс. Хуш эрзянкатнень панарсна эсь лацоннетольхть мокшаватнень панарснон эзда, но и сятнень и лиятнень панарсна ульсь туника лаца стаф сивофтома. Котфть виде котфонза, конат тиендезь панарть ронгонц, тиендевсть эрь кодама узорса ожава, алга и пяле кувалмос. Тяфтама панарсь вешсь лама дополнительнай деталь, конат лездсть авати максомс щамти эрявикс силуэт — карязонь и мяштень мазоптомкатне. Койсь стане жа каннесь региональнай эсь лацонь ширет.

Мокшень щамти эсь лацонь ширекс ульсь козя объёмсь, кона тиендевсь повозонза ингольде нолдамать вельде. Эрзянь щамса карксэземонь мазоптомань ансамбльсь ульсь эсьлацоннекс. 13-14 кизоса, а кой-кона вастса сяда инголе, эрзянь стирнятне ушеткшнесть каряз видесост каннема пулай (пулогай, пулакш, пулокаркс). Костюмса тя ульсь кенеремань, совершеннолетиянь эсь лацонь символ. Мокшень авань щамти ладяйхть туника лаца панарсь плманжа видева сивофтома боконь путкс мархта, оцю повня (пов)

Костюм девушки-эрзянки 20-30-е гг. ХХв.

Эрзянь панарть сташендозь котфонь кафта котфста, конат мянтьфт кафтова и стафт кувалмос сюреса. Мокшаватнень панарсна аф фкатольхть керсефснон коряс и мазоптомаса. Туркс ащи сюреть эзга кафтова мянтьф котфсь ульсь панаронь станти юркс, конанди бокова сташендовсть сяда нюрьхкяня котфт. Тяфтама керсефсь тиендсь лафтуть ваксса ожанди квадратнай варя. Авань национальнай щамса башка васта макссевсь пряс путомкатненди, синь кемоста ладясть кизоснонды, семьянь положенияти, сотфтольхть костюмонь традиционнай типть мархта. Эрзятнень авань пряс путомкасна (панго, сорока, сорка, гилыган) серихтельхть, тиендевсть калгода юрса и ульсть формань вариантсна: цилиндра, пялес цилиндра, конус лаца, сяда шуроста каймонь лаца. Мокшень пряс щамкатне (панга, златнай), трапециянь формаса ляпе чепецонь род, ащесть кафта-колма пяльксста. Аф фкялацонне мокшэрзянь аватнень мяштьса каннема щамсна. Декоративнай материалхнень ламошкасна — ожнатнень, крганятнень, клянцеконь крганятнень, уськонятнень, рака куднятнень — каурить, жетоттнень, кшнинь ярмаконятнень, пайгонятнень, пайгонятнень-нолявсть тевс воротниконь, мяштьса каннемань, крганянь, гайтанонь, лафтубрянь мазоптомкань тиемста. Панар сивось сотневсь овальнай пинкс лаца, эрь кодама салмокс мархта эрзятнень и трапециянь кодяма пряжка лангса суркс — мокшетнень.

Няйф:Мордовский костюм (эрз) коллективный.jpeg

Няйф:Современный мокшанский костюм.jpeg

Современные мордовские национальные костюмы

Национальнай щамонь каннемань койть ули сонцень национальнай коец. Мокшэрзянь щамть силуэтоц няфнесы авать ронгонц, конань ролец модать лангса — казендемс ломанти эряф. Щамть пяльксонза корхтасть авать семьянь положениянц колга. Кда од стирень или стирнянь щамсь сувафнесь аньцек панар и каркс, одкс пингстонза эрзятненди кизос коре кенеремань няфтикс ульсь «пулайсь» карязонь мазоптомкать путомац, а мокшалятненди — алуце карязонь пяльксть «понксне». Рьвакс туф авась каннесь пякстаф пряс щамка, щамонц лангса ламоль мазоптомбяльда.

Алянь национальнай щамсь

Мокшэрзятнень алянь щамсна ашезь ява кодама-бди эсь лацонь ширеса. Эсонза ламода ульсь марстонь элементта шабрань нароттнень алянь щамснон мархта. Алянь щамть юрса ащи пяльксонза-панар (алянь панар) и понкст (понкст). Эрь шинь коень панарсь сташендовсь апак акшептт посконнай котфста, праздничнайсь жа — сяда шуваняста, сяда сидеста иляназста. Демисезоннай алянь щамкс канневсь суманць. Керсефонц коряс сон маласоль поддёвкати. Алянь коень пряс щаматне няфтьфтольхть валянай шляпаса, вазьса-мерлушкаса и стак тов.

Тяниень пингонь мокшэрзянь национальнай щамсь

Мекольдень кизотнень содаф искусствоветтне и дизайнерхне шарфнихть оцю мяль кода мокшэрзянь щапненди, стане и сонь башка вастснонды. Дизайнерхне, тевс нолямок кунардонь щамонь форматнень и орнаменттнень, тиендихть щамонь тяниень пингонь коллекцият, конат стилизовандафт мокшэрзянь кунардонь пингонь костюмонди.

Тяниень мокшень щапнень сёрматкшнесазь тяниень пингонь машты кядь аватне. Ётксост Мордовия Республикань Старошайговскяй райононь Лемдяй велеста машты кядь авась Мария Бикеева, кона тячи няфнесы самодеятельнай народнай творчествань цебярь кепотькснень эзда фкять. Коллекциясонза улихть 30 кизода инголе сёрматф щапт, а тяфта жа и отт. Сонь кядьсонза сёрматфт панархт республиканьконь эзда народнай артистти Олег Табаковонди, П. И. Чайковскяень лемса симфоническяй оцю оркестрать художественнай руководителенцты И главнай дирижеронцты Владимир Федосеевонди, французскяй актёрти Жерар Депардьенди, мзярда синь сашендсть Мордовияв. Эрь кодама региононь мокшень и эрзянь 20-да лама костюм тись эсь творческяй эряфонц пингста Россиянь художниконь союзу сувафтфсь Людмила Фёдоровна Игнатьева. Сонь щамсонза тячи морсихть «Золотое кольцо» ансамбльть солисткац эрзявась Надежда Кадышева, Мордовиянь народнай артисткась мокшавась Нина Маркова. Ламоц самодеятельнай художественнай коллектифне стане жа выступандакшнихть национальнай щамса сонь разработканзон и вышивканзон коряс.

Лятфтамат

Литературась

• Белицер В. Н. Нродная одежда мордвы. — М.Наука, 1973. 316 с.
• Мокша / Мокшин Н. Ф. // Большая российская энциклопедия [Электронный ресурс]. — 2017. — (Большая российская энциклопедия : [в 35 т.] / гл. ред. Ю. С. Осипов ; 2004—2017).
• Нижегородский сборник, Том 1 / Нижегородский губернский статистический комитет под редакций А. С. Гациского. — Типография Нижегородского губернского правления, 1867. — С. 220.
• Риттих Александр Федерович. Матеріалы для этнографіи Россіи: Казанская губерния, ХIV-тая. — Тип. Казанскаго университета, 1870. — С. 217.
• Семёнов Василий. Библиотека иностранных писателей о России. Том 1. — Типография III. Отделение Е. И. В. Собственной Канцелярии, 1836. — С. 155.
• Юрченков В. А. Мордовский народ: вехи истории. — Саранск, 2007.
• Brook, Kevin Alan. The Jews of Khazaria. 2nd ed. Rowman & Littlefield Publishers, Inc, 2010. ISBN 978-0-7425-4981-4
• Prichard, James Cowles. Researches Into the Physical History of Mankind, Том 3. — Sherwood, Gilbert & Piper, 1841. — 317 с.
• Royal Anthropological Institute of Great Britain and Ireland. The Journal of the Anthropological Institute of Great Britain and Ireland, Том 3. — London: Trübner & Co, 1874. — С. 291.
• The Folk-lore Journal, Том 7;Том 24 / Владелец оригинала: Гарвардский университет. — Great Britain: Published for for the Folk-lore Societ by ELLIOT STOCK, 62, PATERNOSTER ROW, 1889. — С. 66.
• Корнишина Г. А. Панар // Мордовия : Энциклопедия : в 2 т. / гл. ред. А. И. Сухарев. — Саранск : Институт гуманитарных наук при Правительстве Республики Мордовия, 2004. — Т. 2 (М—Я). — С. 142. — 704 с. — ISBN 5-900029-08-5.
• Акашкина, Р.И. Этнобренды Мордовии: каталог-путеводитель о народных промыслах и ремёслах. — Саранск: Мордов. кн. изд-во, 2022. — С. 278. — 77 с. — ISBN 978-5-7595-2099-3.
• Гейкель А. Одежда мордвы. — Хельсинки, 1899.
• Корнишина Г. А. Знаковые функции народной одежды мордвы. — Саранск, 2002. — 67 с.
• Материальная культура Средне-Цнинской мордвы VIII—XI вв. — Саранск : Мордовское книжное издательство, 1960. — 176 с.
• Маркелов М. Т. Саратовская мордва : этнографические материалы // Саратовский этнографический сборник. — Саратов, 1922. — Вып. 1. — С. 53-238.
• Мартьянов В. Н. Мордовская народная вышивка. — Саранск : Мордовское книжное издательство. — 1991. — 116 с.
• Мокшин Н. Ф. Этническая история мордвы XIX—XX вв. — Саранск : Мордовское книжное издательство, 1977. — 280 с.
• Мордовский народный костюм : альбом / составители: Т. П. Прокина, М. И. Сурина. — Саранск : Мордовское книжное издательство, 1990. — 384 с.
• Смирнов И. Н. Мордва : Историко-этнографический очерк. — Казань, 1825.
• Спрыгина Н. И. Одежда морды-мокши Краснослободского и Беднодемьяновского уездов Пензенской губернии (по материалам экспедиции 1925). — Пенза, 1928. — 47 с.

Ссылкатне

• Про костюм — История мордовского костюма
• Отражение самобытности эрзянской одежды в романе К. Абрамова «Степан Эрьзя»
• Кафтонь крда. Тя мезе? — Мокшень Правда