Бабань ям

Бабань ям илякс Бабань озкс — кунардонь мокшень тундань озкссь, коза пуромкшнесть аньцек ават ди коза сявондевсть шабатневок.

Тяфтама озксть пингста пицесть ям снавста, тозерста, пяштьста и ламоста иляста. Бабань ямть пицезь озондома вастса. Мзярошка бабань ямда калмосесть модас, ёрясть ведьс, сюлмоняс сотфста повфнесть шуфтонь тарадс. Озксонь ям сявондсть мархтост кудувок, макссезь варжамс ракшатнендивок — тяфта арьсесть теенза шумбраши, вазыяма, верозама, пурхцозама и ст. тов. Бабань озксть пингста пицесть салмат и ётафнесть Салмань озкс. Ня озкснень пингстовок печксесть ракшат. Шкайхненди няфнезь, кле, синь лемозост печксть ломаньге. Аватнень ёткста фкяти сялдаз видезонза токафнесть пеель, кле тя ломанць печкф. Тяда меле авать кой-кона щамонзон повфнезь ажия пес, сонцень авать путнезь крандазу и усксезь велеть шири. Меки озондыхнень ёткс сон ашезь мртце. Мянь XIX векть пенцты тяфтама кой ванфневсь кой-кона мокшень и эрзянь велетнень эса.

Озкста меле аватне лисендсть паксяв, тоса эняльдсть вярдень шкайхненди аф нолдамс паксятнень лангс «нармотть». «Нармонькс» озондыхне лемнезь касыксонь пори тастатнень (саранчатнень). Тясонга аватне тиендсть айнемань тефт. Нолнезь лафтуваст шяярьснон, юкссезь панар карьксснон ди ласькондсть умань туркс, бъта панцихть тастатнень эса. Пингонь ётазь тяфтама озксне полафтсть, Кристозшида меле кармасть ётафнема Паксянь кружамань озкст.

Кяльвалсь

• Орлов Н.П. Этнографические сведения о мордве Красно-слободского и Наровчатского уездов // Пенз. губерн. вед. 1876.
• Татьяна Девяткина Мокшэрзянь мифологиясь, Тартунь университет, 2002 ISBN 9985-867-24-6
• Мокшин Н.Ф. Религиозные верования мордвы. Саранск: Мордовское книжное издательство, 1998. — 254 с.