Алёшкин, Андрей Степанович

Рувикиса улихть статьят лия ломанень колга, конань фамилияц Алёшкин.

Андрей Алёшкин
Шачема шиц	10-це февральста 1959
Кулома шиц	26-це февральста 2021
Кулома вастоц	Саранск
Жанрась	живопись, графика
Казненза	Сиянь медаль Художествань академиянь (1988)
Званиятне	Мордовия Республикань и Россиянь заслуженнай художник

Алёшкин, Андрей Степанович (10.02.1959 – 26.02.2021)— живописецсь, графиксь, педагогсь, сценографсь, сценаристсь, писательсь. СССР-нь Художниконь Союзу сувафтфсь (1989). Россиянь и Мордовия Республикань заслуженнай художниксь (2007). Мордовия Республикань Государственнай премиянь лауреатсь (1995, 2005, 2015). Мордовиянь Художниконь союзонь председательсь (1988-1991). Мордовия Республикань масторкотфть арьсиец.

Эряфонь киц

Шачсь 1959-це кизоня Челябинск ошса. Тядяц - Атаева Антонина Михайловна (1937-2019) — эрзява. Аляц - Алёшкин Степан Васильевич (1926 - 1997) - мокша. Андрей Степановичень бабанц мархта атяц мокшет. Атяц тяниень Атюрьевскяй райононь Крхтаж велеста, а бабац Атерьста. 20-це кизотнень синць тусть Сибири. И пингонь ётазь ёрасть мрдамс шачема ширезост, но тянди шорясь Великай Отечественнай войнась. Андрей Степановичень ули ёмла брадоц, Алексей Степанович. Алексей тячиень шить служай «Вельмема церькавса пасторкс».

Шачемок Челябинскяйса, тонафнемок Ленинградса (тяниень Санкт-Петербургса), Андрей Степанович вестевок ашезень юксне эсь юронзон- сотксонзон мокшэрзянь народть мархта, конат ульсть мокшэрзят терюхант. 1988-це кизоста сявомок эрясь Саранск ошса. Мзярда кармась эряма Саранскяйса, сон ушедсь крхкаста тонафнема мокшэрзянь национальнай культурать и, кода художниконь, сонь сембода пяк салазе мяленц мокшэрзянь национальнай орнаментсь. Андрей Алёшкин панжезе тайнать пялес юкстаф мокшэрзянь национальнай орнаментонь символикать колга. Сон тись эстенза шарьхкодема: мокшэрзянь сёрматфксне и шуфтть лангса керсеф тяштьксне пяк малат рунатненди, коряваст ули кода морафтомс юкстаф алфавитонь бта букватнень. Лисенди, тя тяштьксне, бта прдафтольхть щапнень лангса тиф национальнай орнаментттнень потмос и мокшэрзятнень кудъётконь кунардонь уликснень лангса. Эрь кодама тяштькст, или рунат, ули кода мумс сире мокшэрзянь калмотнень лангсовок. Эрь родть-плямать ульсь сонцень тяштьксоц. Андрей Степанович ушедсь кочкама тяфтама тяштькснень эса, нинге педа пес апак содак, мезе сон кочкай. А меле лятфтазе, кода весть, молемок бабанц мархта, тона теенза няфнезень мокшэрзянь родонь тяштькснень видеста менельста, тяштень пуромкснень очертанияснон коряс. Эрь родть ульсь «сонцень тяштень пуромксоц». Андрей Степанович шарьхкодсь: менелень тя «тяштьксне» путфтольхть мокшэрзянь рунатнень юрс. Художниксь виденцякшнесь, сон ламос ашезе мушенда панжеманять орнаментти, мзярс ашезь ара финно-угорскяй народъётконь фондти президентокс. Андрей Алёшкин ушедсь тонафнема финно-угрань раднянь нароттнень культураснон, койснон-обуцяснон. Сон оцю мяль шарфнесь мирть-масторть, перьфпяльть колга атянь-атяньконь шарьхкодемаснон лангс, тонафнесь финно-угрань мифологиять эса, нолдась «Боги мордвы» книга, коса максфт мокшэрзянь мифологиянь персонашне. Ня обраснень сон пуроптозень этнографическяй экспедициятнень пингста сире ломаттнень азондомаснон вельде. Сон рисавазень Кудатять, Кельматять, Боботь и стак тов.

2006-це кизоста сявомок 2018-це кизоти молемс А.С. Алёшкин ульсь профессоронь должностьса Н.П. Огарёвонь лемса Мордовскяй государственнай университетса архитектурно-строительнай факультетонь интерьеронь искусствань кафедраса.

90-це кизотнень Андрей Степанович покодсь Мордовия Республикань Государственнай някань театраса главнай художниконь должностьса. А.С. Алёшкинонь кядяла аноклаф спектакльхне, сувасть театрать репертуарозонза и лядсть тячити самс. Ладяфкссь «Полторы горсти» (Вероскять таколфты кельгомац эсь тядянцты) пяк туф мялезонза ёмла ваныть. Сонь спектакляц «Приключения охотника Дамая» аф весть ульсь казьф театрань эрь кодама фестивальхнень эса («Ен Дзирд» (Божественная искорка) III международнай финно-угорскяй театральнай фестивальсь, «Радуга» Поволжьянь някань театрань II фестивальсь и лиятне). Андрей Степанович аф кржа вийда путсь, штоба мокшэрзянь масторса Шкаень валсь кулеволь эрзянь и мокшень кяльса. Тянкса ульсь стяфтф «Вельмема» церькавонь кудсь, коса служителькс покоди сонь ёмла брадоц Алексей.

Тонафнема кизонза

Шумордазе В.А. Серовонь лемса Ленинградскяй художественнай училищать (1979, педагогсь — Ю.А. Гариков), Живописень, скульптурань и архитектурань И.Е. Репинонь лемса СССР-нь Художествань Академиянь Ленинградскяй институтть (1988, педагогсь — В.А. Ветрогонский).

Творчествац

1979-це кизоста сявомок ульсь республиканскяй, региональнай, всероссийскяй, всесоюзнай, зарубежнай, международнай выставкатнень эса. Ульсь авторкс ламоц персональнай экспозициянди. Андрей Степановича Алешкинонь произведениянза ванфтовихть С.Д. Эрьзянь лемса изобразительнай искусствань Мордовскяй республиканскяй музейса и омба масторонь частнай коллекциятнень эса. Андрей Алёшкин эсь творчестванц мархта лятфнесы тееньк, китама минь и коста минь саме, кода эрясть минь атянь-атяьке, мезе синь арьсесть перьфпяльть и эряфть колга.

• 
• 
• 

• Алёшкин, Андрей Степанович. Моя Масторава: [по материалам мордовского эпоса] / Андрей Алешкин. — Саранск : Изд. Константин Шапкарин, Центр образовательных технологий, прикладной и профессиональной этики, 2013. — 45.
• Алешкин, Андрей Васильевич.Единство традиций Текст : Народ и личность в морд. эпич. поэзии. - Саранск : Морд. кн. изд-во, 1978. - 191 с.

Казненза

• Лауреат Государственной премии РМ (1995. 2005, 2015).
• Художествань Академиянь сиянь медаль (1988).

Ванк нинге

• Мордовия Республикать масторкотфоц

Литературась

• Мордовия, XX век. Культурная элита. Ч.1. Саранск, 2010. С. 22-23.

Ссылкатне

• https://theatre-museum.ru/persons/14312195 Театральные музеи и архивы России

и Русского Зарубежья

• https://erzia-museum.ru/ Мордовский музей имени С.Д. Эрьзи
• https://cyberleninka.ru/article/n/etno-napravleniya-v-iskusstve-mordovii-parametry-videniya-etnicheskogo-proshlogo/viewer /Этно-направления в искусстве Мордовии: параметры видения этнического прошлого
• https://ru.ruwiki.ru/wiki/%D0%A6%D0%B5%D1%80%D0%BA%D0%BE%D0%B2%D1%8C_%C2%AB%D0%92%D0%B5%D0%BB%D1%8C%D0%BC%D0%B5%D0%BC%D0%B0%C2%BB_(%D0%A1%D0%B0%D1%80%D0%B0%D0%BD%D1%81%D0%BA)