Финно-угрань мифологиясь

Финно-угрань мифологиясь (руз. Финно-угорская мифология) — финно-угрань нароттнень мифологиянь марстонь шарьхкодемасна, конат эвондакшнесть минь эрадонк ингольдень III—II тёжянь кизотнень пингста.

Саамонь барабан

Марстонь мотифне и мифне мирть-масторть тиеманц колга и шкаень марстонь лепне корхтайхть финно-угратнень марстонь мифологияснон колга. Тяфта, прибалтийскяй и поволжскяй фиттнень и зауральскяй угратнень ванфтовсть мифсна ведьге уенди нармонть колга, кона чёпафни мировой океанть потмаксс и таркси тоста мода, тянь тиендсы шкайть-тиить мярьгоманц коряс. Сяда шуроста васьфневихть мифт нармонень колга, кона алыясь ал, конань эзда тифоль мирсь-масторсь (саапнень, карелхнень и прибалтийскяй лия фиттнень, комитнень). Финно-угратнень, вирень эряйхнень, озондома иняру вастсна ульсть кевбанттне, вирень поратне.

Эрямопингсь

Минь эраньконь I и II тёжянь кизотнень ёткста ушедсть эвондакшнема башка, но мала фкя-фкянди культурань и мифологиянь койхть ши валгома прибалтийско-финскяй нароттнень ёткса — фиттнень, карелхнень, эстоттнень, ливнень, вепснень, водитнень, ижоратнень; поволжскяй финнонь кялень нароттнень — мокшэрзятнень и мариецнень; пермскяй нароттнень — комитнень и удмурттнень, а стане жа обскяй (зауральскяй) угратнень — ханттнень и мансихнень. Эсь зауральскяй уграснон эзда явф венгратне ётасть эряма Европать кучкас, ванфтомок аньцек аф ламода кунардонь мифнень. Финно-угрань мифологияти малат саамонь (лопарень) мифне.

Финно-угорскяй мифологиясь, кона мала самодийскяй и лия урало-алтайскяй нароттнень мифологияснонды, а тяфта жа башка мифологическяй койхне полафневсть лиятнень эзда и синцьке полафнезь шабрань нароттнень мифологияснон. Няевикс полафкст састь иранскяй, тюркскяй, славянскяй и балтийскяй мифологиятнень эзда, касомань-вииямань мекольце этапса — исламскяй и христианскяй мифологиятнень эзда.

Марстонь мотифне и мифне

Масторть-мирть тиевоманц колга мифне

Кунардонь марстонь финно-угрань мифологияса фкакс лувовихть масторть-мирть тиевоманц колга мифне. Шкайсь-демиургсь (коминь Ен-сь, марийскяй Кугу-Юмось, удмуртскяй Инмар-сь, обскяй угратнень Нуми-Торумсь и стак тов) мярьгонди ведьге уенди нармонти или нармонькс араф дуганонцты (коминь Омэль-сь, марийскяй и удмуртскяй Керемет-сь, мансийскяй Куль-отырсь и лиятне), кона уенди иневедть (океанть) эзга, таргамс иневедть потмаксста мода. Сонь эздонза шкайсь тиезе Модать и семботь эрявиксть, и цебярть сонь лангсонза. Сонь брадоц модать эзда, конань кяшезе кургсонза, тисыне панттнень и сембе кальдяфнень. Ули тяфтама арьсема, кле, финно-угратнень мифсна масторть-мирть тиевоманц колга тиевсть богомильскяй и лия койхнень корява, конат лисендсть иранскяй дуалистическяй мифненди. Масторть-мирть тиевоманц колга лия вариантсь — сембось тиевсь нармонень алста (финнонь, эстононь, саамонь, коминь мифологияса).

Марийскяй Кугу-Юмось и сонь Йын (Керемет) брадоц атя-яксяргокс арафста иневедть ланга тиихть масторть мирть эса

Космологиясь

Сембе финно-угрань нароттнень ульсь шарьхкодемасна, што мирсь-масторсь ащи колма вастста. Мифологическяй масторсь явондовсь колма пяльксова. Вярдень, менелень пяльксть, кучкакс лувовсь Полярнай тяштсь. Кучка пяльксокс ульсь Модась, кона кельме ширде шарф мировой океанть ведензон мархта. Лямбе ширде кельме шири, масторть потмаксу — кельмонь и шобдань тонашити — шудесь пяк оцю ляй (лямбе ширде кельме шири шудихть Обь и Кельме ширдень Двинась — финно-угратнень оцю ляйсна). Полярнай тяштти токсесь модань петькольсь — пандсь, столбась или пяк оцю шуфтсь.

Лямбе ширесь, лямбонь и валдонь масторсь, «Нармонень масторсь», путневсь каршек Кельме ширти, кона лувондовсь масторть потмаксокс, шобдань масторкс. Ня кафта масторхнень сотозень марса модать ланга шуди оцю ляйсь, а менельге — Каргонь кись. Мартста-апрельста Каргонь кись шарфтф кельме ширьста лямбе и ши валгома шири, куване лиендихть лямбе шири тушенды нармоттне. Сон тяфта и лемневи: фиттнень — Линнунрата, эстонецнень — Линнутее. Лия финно-угрань нароттнень тя лемсь конкретизировандави: Кайыккомбо корно — мариецнень, Дзо-дзог туй — коми-зыряттнень, Вирь мацееньк ки — эрзятнень, Каргонь ки — мокшетнень, Луд зазег сюрес — удмурттнень, ётафтови «Мацинь ки».

Мирть-масторть вярдень пяльксоц

Вярдень масторсь лувондовсь менелень шкайхнень вастокс, васендакиге демиургонди, мирть-масторть тииенцты, а тяфта жа атямань-ёндолонь шкайхненди и стак тов. Финно-угрань нароттнень менелень шкайснон лемсна малат и няфнесазь менельть, кожфть, ушеть. Улема, ня шкайхнень образсна маладыхть прафинно-угрань шкайти, конань лемоц сотф менельть лемонц мархта (*ilma): тя финнонь и карелонь Ильмаринен-сь, саамонь Ильмарис-сь, удмуртонь Инмар-сь, коминь Ен-сь и лият. Марстоннекс лувондови менелень шкайть и лия лемоц, кона няфти кожф (*juma)— финонь Юмала, эстононь Юммал, саамонь Юбмел, педа-пес аф содаф биарматнень Йомали, коминь Йомаль, марийскяй Юмо (Кугу-Юмо).

Марийскяй менелень стирсь Юмын удыр

Мирть-масторть кучка пяльксоц

Менельса ули варя, конань пачк мирть-масторть тииец ваны Модать мельге и нолясыне алу ёмла шкайхнень — ломаттнень ваныснон-лездыснон. Модати шкайкс ульсь шкайавась, кона сидеста ульсь менелень шкайти полакс: Нуми-Торум и Калташ-эква мансихнень, улема, Укко и сонь рьвац фиттнень, Ванаиса и Маа-Эма эстоттнень, тяфта жа тяза улихть кода путомс саамонь Маддер-акка-ть, мокшень и эрзянь Мастор-авать и лият. Кода и ламоц лия нароттнень, шкайсь, кона няфнезе Модать, лемневсь «Тядя-Масторкс»— Маан-Эмойнен фиттнень, Маа-Эма эстонецнень, Маддер-акка саамтнень, Мых-ими ханттнень, Мастор-ава мокшетнень и эрзятнень. Менелень шкайсь муворшинкса прафтозе сонь Модать лангс. Сон арась лездыкс (модалангонь) хтоническяй эряйхненди — эрь кодама пеке лангса шашнихненди, куйхненди, ватракшненди и стак тов, конат сяка пингть лездыхть шачфтомати-раштамати и сотфт модать, ведть, модань потмаксть мархта. Тя шкайавась эряй масторонь ляйть вярдень трвасонза (или алуцеса). Сон лезды шачфтыхненди и иттненди, максси теест шкайги, казенди шаматтненди маштомошит.

Модать лангса эряйхть тяфта жа шкайхть, конат лездыхть эрь кодама кядь тефненди.

Алдонь мифологиясь

Модать лангса эряйхть и алудонь ваймопожфне — перьфпяльть азоронза (вирялясь, ведятясь и стак тов), пирьфнень и эряма васттнень, родонь-плямань ванфтыхне и стак тов. Мокшэрзянь, маринь, удмуртонь, саамонь и эстононь мифологиятнень эса улихть ваймопожфт — перьфпяльть и сонь виензон тядясна: вирть, ведть, толть, вармать и стак тов. Алудонь мирса эрясь шкайть каршек ащиенц, кяжень тиись, сондедонза башка тоса эрясть кяжи ваймопожфне и кулофне.

Аф кунара нинге комитне кемасть ваймопожфненди — виряляти и лиятненди.

Умдурттнень алудонь ваймопожфснон ёткс сувси ву-мурт ведятясь, кяжи тяфтама ваймопожфне — кереметтне (лудтне; Инмар шкайть каршек ащиенза — Керемет, Луд), шяйтаттне, конатнень Инмарсь панцесыне ёндолса, перитне, конат кой-коста улендихть воршудань ваймопожфненди урекс, урмань ваймопожфне кутысь или мыж, эпидемиянь ваймопожфне чер и лиятне.

Мокшэрзянь мифологияти эсь лацонь ширекс ащихть духонь обрасне — "перьфпялень, касыксонь явлениятнень тядясна (авась) и стак тов: Вирь-ава — вирть тядяц, Ведь-ава — ведть тядяц, Варма-ава — вармать тядяц, Мода-ава — модать тядяц, Тол-ава — толть тядяц, Норов-ава — паксять тядяц, Юрхт-ава — кудть тядяц, Нар-ава — лугать тядяц и лият. Ульсть тяфтама жа алянь персонашт, атят.

Маринь мифологияса Киямат тонашинь азорсь ащи кяжи ваймопожфненди оцюнякс (куломань шкайсь Азырен и лият). Мариецнень шкайснон — Кугурак-ть или Кугуен-ть кядяла лама ваймопожфта. Шкайда башка перьфпяльдень явлениятнень няфтьсазь лама эрь кодама ваймопожф — «тядят» (ава): вют-ава — ведень ваймопожф, кече-ава — шинь ваймопожф (семьянь ванфтысь), мардеж-ава — вармань, шочын-ава — шачфтомань-раштамань ваймопожф, тул-ава — толонь, мланде-ава — модань и лият. Ваймопожфонь лия категориятне — водыж-хне: кудо-водыж — семьянь ванфты, вют-водыж — ведень азор, курык-водыж — пандонь азор и стак тов.

Ханты-мансийскяй пантеононь алудонь уровенть эса лама ваймопожфта, хантыхнень — лунга-тне. А мансихнень аф фкат ваймопожфсна-ванфтысна и атянь-атянь ваймопожфне — пупыга-тне фкя ширде, и кяжи ваймопожфне и урматнень няфтисна — куль-тне — лия ширде . Демоническяй персонашнень эзда инь содафне — вирьса эряй менква-тне, ломаньда ярхцайхне, конат каба конашкат серьс-келес. Вирьса эряйхть стане жа ломанень аф кельгихне учч-не (учи, очи). Менкватнень лангс шарыхть ломаттненди паронь арьсихне мис-не (миш,мысь).

Венгрань мифологияса эрь кодама ваймопожфнень и алудонь лия персонашнень колга шарьхкодематне малат шабра европейскяй нароттнень мифологияснонды: шопачатне , лидерц ваймопожфсь, эрь кодама вардатне: босоркань, Луца — аф няеви существа, кана няйсы-содасы сай пингть, Вашорру-баба — баба-ягась и лиятне.

Мирть-масторть алдонь пяльксоц

Алудонь мирса эряй менелень шкайть ёмла брадоц и каршек ащиец, кяжень тиись, конань перьф кочкафт кяжи ваймопожфне и кулофне. Мода потмаксста варя пачк сон кучси Модать лангс урмат и кулома. Сяс мес ляйхне финно-угратненди ульсть якамань-шяямань кикс, куване ульсь кода пачкодемс коза-повсь, мифнень коряс, синь тяфта жа вятьсть тонашити, мода потмаксти.

Вирсь эрь кодама мифологияса ульсь кода охотендазь козяшинь добувама вастокс, стане и кяжи ваймопожфонь эряма вастокс, а тяфта жа тонашикс (калмамань вастокс). Сяс финно-угратнень озксонь шуфтонь порасна сидеста каннесть марстонь лепт вирень кяжи ваймопожфнень мархта — хийси карелхнень, фиттнень и прибалтийскяй лия нароттнень; луд, керемет удмурттнень, мариецнень и лиятнень. Инь кунардонь иняру вастокс ульсть рисунка-сёрматфкс (или петроглиф) мархта кевбанттне.

Марстонь лия мифне

Зауральскяй (обскяй) угратнень мифснон эса Уралсь лувондови шкаень карксокс. Шкайсь, кона тиезе мирть-масторть, ёрдазе эсь карксонц модать лангс. Коминь мифнень эса сон лувови атямонь оцюдонга оцю нармонень толгакс.

Уралсь. В. В. Переплётчиков

Тайгань и тундрань охотникне полафнезь добуваф вирень ракшань питни кедьнятнень жуватань кирдемать и сокамать-видемать эзда сявф паршихнень лангс, а ушедомок бронзань векста, — и металлургиянь парши лангс, полафнесть лямбе ширдень шабраснон, индоевропеецнень мархта. Обско-угорскяй мифологиянь главнай геройхнень эзда фкясь — Мир-сусне-хум, кона лемневи «Вярдень и алудонь масторонь купецокс».

Марстонь финно-угорскяй мифненди сувсихть тяфта жа мифне офтть колга, кона валгсь менельста и арась сембонди атянь-атякс; мифсь оцюдонга-оцю оленть или сярдть лангс менелень охотать колга; мифсь мода потмаксса эряйхнень кядьста валдонь добувамать колга и стак тов.

Тонафнемасна

Финно-угрань мифологиять реконструкциянц мархта заняфт филолокне и фольклористтне — венгрань исследовательсь М. Хоппал, россиянь ученайхне Е. А. Хелимский, В. В. Напольских и лият.

Башка мифологиятне

• Карело-финнонь мифологиясь

• Эстононь мифологиясь
• Ливонь мифологиясь
• Вепсонь мифологиясь
• Саамонь мифологиясь
• Мокшэрзянь мифологиясь
• Маринь мифологиясь

• Коминь мифологиясь
• Удмуртонь мифологиясь
• Хантыень-мансиень мифологиясь
• Венгрань мифологиясь

Ванк стане жа

• Самодийскяй мифологиясь
• Палеоазиатскяй мифилогиясь

Лятфтамат

Литературась

• Гондатти Н. Л. Следы язычества у инородцев Северо-Западной Сибири. — М., 1888.
• Смирнов И. Н. Черемисы. — Казань, 1889.
• Смирнов И. Н. Вотяки. — Казань, 1890.
• Смирнов И. Н. Мордва. — Казань, 1895.
• Богаевский П. М. Очерки религиозных представлений вотяков // В кн.: Этнографическое обозрение. — Кн. 4—5, 7. — М., 1890.
• Харузин Н. Н. Русские лопари. — М., 1890.
• Сидоров А. С. Знахарство, колдовство и порча у народа Коми. — Л., 1928.
• Религиозные верования народов СССР. — Т. 2. — М.-Л., 1931 (лит.).
• Чернецов В. Н. Вогульские сказки. — Л., 1935.
• Фольклор народа Коми. — Т. 1. — [Архангельск], 1938.
• Чарнолусский В. В. Саамские сказки, пер. с саамского. — М., 1962.
• Мокшин Н. Ф. Религиозные верования мордвы. — Саранск, 1968.
• Владыкин В. Е. К вопросу о дохристианских верованиях удмуртов // Записки Удмуртского научно-исследовательского института истории, экономики, литературы и языка. — 1970. — В. 22.
• Ярыгин А. Ф. Современные проявления дохристианских верований марийцев. — Йошкар-Ола, 1976.
• Munkaesi В., Vogul nepkoltesi gyujtemeny, kot. 1—4, Bdpst, 1892—1952.
• его же, Volksbrauche und Volksdichtung der Wotjaken, Hels., 1952.
• Karjalainen K. F., Die Religionen der Jugra-Volker, t. 1—3, Hels., 1921—27 (Folklore Fellows * * Communications, v. 8, № 41, v. 11, № 44, v. 20, № 63).
• Holmberg U., Finno-ugric, Siberian, Boston, 1927 (The mythology of all races, v. 4).
• Loorits O., Estnische Volksdichtung und Mythologie, Tartu, 1932.
• Itkonen T. I., Heidnische Religion und spaterer Aberglaube bei den finnischen Lappen, Hels., 1946.
• Fokos-Fuchs D. R., Volksdichtung der Komi (Syrjanen), Bdpst, 1951.
• Harva U., Die religiosen Vorstellungen der Mordwinen, Hels., 1952.
• Sebeok Th. A., Ingemann F. J., Studies in Cheremis. The sypernatural, N. Y., 1956.
• Kannisto A., Materialien zur Mythologie der Wogulen, Hels., 1958 (Suomalais-ugrilainen seuran toimituksia, v. 113).
• Paulson I., Hultkrantz A., Iettmar K., Die Religionen Nordeurasiens und der amerikanischen Arktis, Stuttg., [1962].
• Roheim G., Hungarian and Vogul mythology, Seattle—L., [1966].
• Haavio M., Suomalainen mytologia, Porvoo—Hels., 1967.
• Paulson I., The old Estonian folk religion, The Hague, [1971].
• Honko L., Finnische Mythologie, в кн.: Worterbuch der Mythologie, Lief. 6—7, Stuttg., [s. a.], Ancient cultures of the Uralian peoples, Bdpst, [1976].
• Бернштам Т. А. Христианизация в этнокультурных процессах финно-угорских народов Европейского Севера и Поволжья (сравнительное обобщение) // Современное финно-угроведение. Опыт и проблемы. Сборник научных трудов Гос. музея этнографии народов СССР. — Л., 1990. — С. 133—140.
• Мировоззрение финно-угорских народов. — М., 1990.
• Напольских В. В. Древнейшие этапы происхождения народов уральской языковой семьи: данные мифологической реконструкции. М., 1991.
• Сагалаев А. С. Уpaло-алтайская мифология. — Новосибирск, 1991.
• Федянович Т. Л. Семейные обычаи и обряды финно-угорских народов Поволжья. — М., 1997.
• Бонгард-Левин Г. М., Грантовский Э. А. От Скифии до Индии. — М., 2000.
• Петрухин В.Я. Мифы финно-угров / Петрухин.В.Я. — Москва: Изд-во АСТ : Транзиткнига, 2003. — 463 с. — ISBN 5-17-019005-0 (АСТ).

Ссылкатне

• Напольских В. В. Миф о нырянии за землёй (А812) в Северной Евразии и Северной Америке: двадцать лет спустя.
• Хелимский Е. А. Рец. на: Напольских В. В. Древнейшие этапы происхождения народов уральской языковой семьи: Прауральский космогонический миф.
• Иранские элементы в финно-угорской мифологии.
• К реконструкции мифологических представлений финно-угорских народов