Финно-угрань кяльхне
| Финно-угрань кяльхне | |
|---|---|
| Таксон | тарад |
| Шачема вастоц | Урал |
| Ареал | Венгрия, Норвегия, Россия, Финляндия, Швеция, Эстония и лият |
| Классификациясь | |
| Категориясь | Евразиянь кяльхне |
| Уральскяй семьясь | |
| Состав | |
| угорскяй ёмла тарад, финно-пермскяй ёмла тарад | |
| Аердомань пингсь | вторая половина 3 тысячелетия до н. э. |
| Фкя лацонь процентсь | 34 % |
| Кялень кужень коттне | |
| ГОСТ 7.75–97 | фиу 742 |
| ISO 639-2 | fiu |
| ISO 639-5 | fiu |
Финно-угрань кяльхне (васьфневи стане жа вариант у́гро-фи́ннонь кяльхне; руз. Финно-угорские языки) — фкя-фкянди мала кялень группа, конань тарадоц сувси уральскяй кялень семьяти. Ня кяльхне васьфневихть Венгрияса, Норвегияса, Россияса, Финляндияса, Швецияса, Эстонияса и лия масторса.
Статуссь
Ладявсь ни кой арьсемс, што атянь-атянь (кунардонь) уральскяй кяльсь явсь кафта тарадга — финно-угрань и самодийскяй, сяс мес самодийскяй лексикась пяк аф фкя лацонне лия уральскяй кяльхнень ёткста. Но ламоц тяниень пингонь лингвисттне аф кемайхть, што ульсь финно-угрань кунардонь кяль кода башка этап, сяс мес апак мук сембе финно-угрань кяльхнень эса марстонь од сувафкст фонологияса, морфологияса и лексикаса. Самодийскяй кяльть лексикань коряс эсь лацонь ширец лувондови сатфксокс сяда курокста моли лексикань полафтомать финно-угрань кяльхнень коряс — улема, тя лисендсь субстратнай или адстратнай аф содаф кяльхнень эзда валонь сявомань инкса.
Тяниень пингть финно-угрань этапть кирдьсазь ширенц уралисттне Юха Янхунен и Владимир Напольских, эста ащихть каршек Тапани Салминен, Анте Айкио, Янне Саарикиви, Яакко Хаккинен, Юхо Пюстюнен и Михаил Живлов.
Кялень тонафнемать эрямокиц
Уральскяй нароттне васенцеда лятфневихть кунардонь Римонь историкть Публий Корнелий Тацитонь «Германиясонза», коса корхтави «фенни» народть колга (сидеста тя народть путнесазь кунардонь саамтнень ёткс) и корхтави нинге кафта финно-угрань плямань колга, конат эрясть Скандинавиянь ичкоздень аймакнень эса.
XV-це векть пестонза Европань исследовательхне китькстазь «Хунгария» и «Югрия» (аймак, кона ащи Уралть эзда шинь стяма шире) лепнень фкя лаца ширьснон. Синь няйсть соткс, но ашесть му лингвистикань ширде кемокстамат. 1671-це кизоня шведонь учёнайсь Георг Шернъельм (1598—1672) сёрмадозень фкя ширьснон саамонь (лапландиянь), финнонь и эстононь кяльхнень, и стане жа мусь мзярошка фкя лацонь вал финнонь и венгрань кяльхнень эса. Тяка пингть немецонь учёнайсь Мартин Фогель теряфнесь мумс фкя лацонь шит финнонь, саамонь (лапландиянь) и венгрань кяльхнень эса. Тяфта лисенди, тя кафта исследовательхне арасть васенцекс, кит няфтьсть сянь лангс, мезть сяда мельдень пинкнень ушедсть лемнемонза финно-угрань кялень семьякс.
1717-це кизоня шведонь профессорсь Улоф Рудбек ёмлась (1660—1740) кочкась сядоть малава этимологиянь соткс финнонь и венгрань кяльхнень ёткса, конатнень эзда 40-шкась тячити самс лувовихть видекс (Коллиндер, 1965). Сяка кизоня немецонь учёнайсь Иоганн Георг фон Экхарт (конань работац нолдафоль Лейбницонь «Collectanea Etymologica»-са) васенцекс азсь мяль финно-угрань и самодийскяй кяльхнень ёткса соткснень колга.
Сембе кяльхне, конат сувсихть финно-угрань кялень семьяти, содафтольхть ни 1770-це кизоти, лиякс азомс, 20 кизода индоевропеистикать эвондамдонза инголе. Но исследованиянь результаттне аф эсток примафтольхть: кепотьксонди, венгрань интеллигенциять ёткса якасть мяльхть-арьсемат, кле венгрань кяльсь эвондась тюрскяйхнень эзда, тянь колга Рюлен 1987-це кизоня мярьгсь тя «эпохань дикай и аф кирдеви романтизмать» пильгокинза. Но аф ваномок мезеньге лангс, венгрань иезуитсь Янош Шайнович 1770-це кизоня няфтсь венгрань и лапландиянь (саамонь) кяльхнень ёткса уликс соткснень лангс. 1799-це кизоня венгрась Самуэль Дьярмати лихтезень печатьс ся пингонь исследованиятнень финно-угрань кяльхнень колга.
XIX-це векть ушетксонцты финно-угрань кяльхне тонафнефтольхть сяда лац индоевропейскяйхнень коряс, но индоевропейскяй кялень стравнительнай лингвистикать касомац-вииямац шарфтсь эсь лангозонза сяшкава оцю мяль, што финно-угрань кяльхнень тонафнемасна кадовсь фталу. Венгриясь ся пингть ульсь Европань тяфтама аймакокс (сон сувсесь Габсбургонь Австрийскяй империяв), конань улель мялец тонафнемс финно-угрань кяльхнень (сяс мес Финляндиясь и Эстониясь ся пингть сувсесть Российскяй империяв) ломаттнень ёткса сепаратистонь мяльхнень якамаснон инкса. Но политикань обстановкась ашезь макса ки сравнительнай лингвистикать касоманцты. Няевсть инголи кой-кодама аськолдамат, мзярда лиссь немецонь лингвистть Йозеф Буденцонь работац, кона 20 кизонь кувалма ульсь Венгриянь инь оцю специалистокс финно-угрань кяльхнень коряс. XIX-це векть пестонза путфкс кялень тонафнемаса кандсь венгрань лингвистссь Игнац Халас, кона 1890-це кизотнень нолдась оцю материал финно-угрань и самодийскяй кяльхнень колга, коса ванондовсть синь фкя лацонь ширьсна. Сонь тевоц путсь ушеткс тя кяльхнень маластоннекс лувомати, тя мяльсь келемсь ломаттнень ёткова. Улихть аф фкя мяльхть Мокша гидронимть эвондаманц колга. Фкя версиять коряс, кона ванондови Мокша (ломатть) статьяса, кодама кяльста сась мокша гидронимсь видеста апак содак, и ащи реликтокс тячиень шиня аф содаф кулоф финно-угрань кяльса.
Эсь лацонь ширьхне
Сембе финно-угрань кяльхнень улихть марстонь эсь лацонь ширьсна и марстонь валсна. Тя эсь лацонь ширьхне сявондсазь эсь ушетксснон гипотетическяй прафинно-угрань кяльста. Кочкафоль тя кялень 200-шка вал, сяконь лувксса валъюрхт тяфтама понятиянди, кода радня ломанень лепне, ронгонь пялькснень лемсна, числительнайхне. Тя марстонь валлувксти, Лейлонь Кэмпбеллонь коряс, сувси 55 валда аф сяда кржа калонь кундамать коряс, 33 — охотендамать, 12 — сярттнень коряс, 17 — касыкснень, 31 — технологиятнень, 26 — строямать коряс, 11 — щамбяльхнень, 18 — климатть коряс, 4 — обществать, 11 — религиять, 3 — мишендемать-рамамать коряс.
Ламоц финно-угрань кяльхне кандовихть агглютинативнайхненди, конатнень марстонь ширьсна ащи сянь эса, што валхне полафневихть суффикс вельде, конат поладовихть валърхтти и предлокнень васт молихть валмельгакст, а стане жа суффикснень синтаксическяй координациясна. Тяда башка, финно-угрань кяльхнень эса аш грамматическяй родонь категория, сяс ули аньцек фкя 3-це лицань местоимения (конань эса «он», «она» и «оно» местоимениятнень смузьсна), кепотьксонди, hän финнонь кяльса, tämä водскяйса, tema эстононнеса, ő венгрань кяльса, ciйӧ коминь кяльса, тудо маринь кяльса, со удмуртоннеса.
Ламоц финно-угрань кяльхнень эса притяжательнай прилагательнайхне и местоимениятне, тяфтомотне кода «монь» или «тонь», нолявихть тевс шуроста. Кинне тя или тона предметсь няфневи склонениянь вельде. Ся кяльхнень эса, конат тусть флективнайхнень шири, штоба няфтемс кинне тя или тона предметсь нолявихть тевс личнай местоимениятне родительнай падежса. Кепотьксонди, «монь пинезе» эстононь кяльса кармай mu koer, финнонь корхтамаса — mun koira, кельме ширень саамонь кяльса — mu beana (собака меня) или beatnagan («пине-зе»), коми кяльса — менам пон («монь пине») или менам понмӧй.
Лия кяльхнень эса тяса нолявихть тевс суффиксне, кой-мзярда генетивонь падежса местоимения мархта: «монь пинезе» финнонь кяльса кармай minun koirani (меня собака-моя), koira «пине» валста. Стане жа маринь кяльса мыйын пием, пий «пине» валста. Венгрань кяльса иминительнай падежса местоимениясь моли валть мархта, конань ули притяжательнай суффиксоц. Кепотьксонди, «пине» — kutya, «монь пинезе» — az én kutyám («(тя) мон пине-зе», az — определённай артикль) или тяфта a kutyám («(тя) пине-зе»). Но аф ваномок тянь лангс, венгрань кяльса улихть притяжательнай местоимениятка: enyém («монь»), tiéd («тонь»), и стак тов. Синь стане жа маштыхть склоняндавома, кепотьксонди, enyém (им. п.), enyémet (вин. п.), enyémnek (дат. п.), и стак тов. Тя местоимениятне нолявихть тевс именной сказуемайкс: аф видеста кармай азф enyém kutya, но кизефксть лангс Kié ez a kutya? («Кинне тя пинесь?») ули кода мярьгомс Ez a kutya az enyém («Тя пинесь— монь») или тяфта Az enyém («Монь»).
Классификациясь
Финно-угрань кялень тарадти сувсихть тяфтама группат и кяльхть:
- Угорскяй ёмла тарадсь
- венгрань кяльсь
- обско-угорскяй группась Ши валгомань Сибирьса
- хантыень кяльсь (ташта лемоц — обско-остяцкяй)
- мансиень кяльсь (ташта лемоц — вогульскяй), эрсь эздост явови лама эрь кодама корхтамас (улема, башка кяльс)
- Финно-пермскяй ёмла тарадсь
- пермскяй группась
- удмуртонь кяльсь
- коми-зырянонь кяльсь
- коми-пермяконь кяльсь
- коми- язьвинонь кяльсь
- маринь группась
- пандонь маринь кяльсь (шивалгомань ширень)
- кельме и шивалгомань ширень маринь кяльсь
- лугань маринь кяльсь
- финно-волжскяй группась
- мордовскяй подгруппась
- мерянь кяльсь †
- муромань кяльсь †
- мещерань кяльсь †
- прибалтийско-финнонь подгруппась
- Кельме ширень ёмла тарадсь
- финнонь кяльсь
- квенонь кяльсь
- меянкиели
- ижоронь кяльсь
- карелонь кяльсь
- карелонь эсь корхтамасна
- ливвиковскяй корхтамась
- людиковскяй корхтамась
- Тверень карелоннесь
- вепсонь кяльсь
- финнонь кяльсь
- Лямбе ширень ёмла тарадсь
- водскяй кяльсь
- эстононь кяльсь
- лямбе ширень эстононь кяльсь
- вырузонь диалектсь
- ливскяй кяльсь † — кельме и шивалгомань ширень Латвиясь (Курземе)
- Кельме ширень ёмла тарадсь
- саамонь подгруппась
- Шивалгома ширень самонь кластерсь
- лямбе ширень саамонь кяльсь — Норвегиясь и Швециясь
- уме-саамонь кяльсь (ууме) — Норвегиясь и Швециясь
- луле-саамонь кяльсь (лууле) — Норвегиясь и Швециясь
- пите-саамонь кяльсь (пите) — Норвегиясь и Швециясь
- кельме ширень саамонь кяльсь — Норвегиясь, Швециясь и Финляндиясь
- Шинь стяма ширень саамонь кластерсь
- бабинскяй саамонь кяльсь (аккала) † — Россия
- кеми-саамонь кяльсь † —кучка Финляндиянь саамтне
- инари-саамонь кяльсь — Финляндиясь
- йоканьгско-саамонь кяльсь (терско-саамонь) — Россиясь
- кильдинскяй саамонь кяльсь — Россиясь
- колтта-саамонь кяльсь (сколт, тяза суви нотозерскяй диалектсь Россияса)
- Шивалгома ширень самонь кластерсь
- пермскяй группась
Тянемс педа пес аф шарьхкодеви коста лиссь тяни ни юмаф биармскяй кяльсь, конань лангса корхтасть биармань народсь, кона эрясь Кельме ширень Двина ляйть келемкшни вастсонза и Акша морять шинь стяма ширень трвасонза, и кона, афкукс кандовсь финнонь кяльхненди. Финц лингвисттне, конат нежетькшесть норвежскяй сагатнень эса сёрматфть лангс, коса тяштькстаф, што «биармань народть кялец шары вирень фиттнень кяльснон лангс», каннесазь сонь прибалто-финнонь группати; лиятне сявондьсазь мяльс «Биармия» и «Пермь» лепнень фкя лаца азомаснон, сяс арьсихть биармскяй кяльсь кандови пермскяй группати, или летописень биарматнень путнесазь тяниень коми-перьмякокс. Мекольце пинкнень наукаса ушеткшни кемоксневома мяльсь, што ульсь финно-угрань народонь кельме ширень башка финнонь группа, конанди сувсесть Заволочьянь фиттне, и стане жа биарматтне.
Литературась
- Основы финно-угорского языкознания: Вопросы происхождения и развития финно-угорских языков. — Москва: Наука, 1974. — 484 с.
- Историко-типологические исследования по финно-угорским языкам / Б. А. Серебренников. — Москва: Наука, 1978. — 328 с.
- Напольских В. В. Введение в историческую уралистику. — Ижевск: УИИЯЛ, 1997. — 257 с. — ISBN 5-7691-0671-9.
Ссылкатне
- Финно-угорские библиотеки России (рус.). Портал «Финно-угорские библиотеки России». Дата обращения: 19 августста 2025.