Пургасонь волость
Ванф Российскяй Наукань Академияса
Ванф Российскяй Наукань Академияса
Российскяй Наукань Академиять вельде
| Историческяй государствась | |
| Пургасонь волость | |
|---|---|
|
XIII — XIII
|
|
| Пряош | Саровонь ошпандсь (улема) |
| Эряйхне | мокшэрзят, руст |
| Азорондайсь | |
| • XIII-це вексь | Пургас |
Пургасонь волость (руз. Пурга́сова во́лость) — мокшэрзянь плямань марстомомась, кона эвондась XIII-це векть ушетксста Ока и Темниково-Водскяй вирьхнень ёткса Мокша ляйть алуце шудеманц эзга.
Эрямопингсь
Тя вастса эрясть аф аньцек мокшэрзят, но и рузонь сокайхт-видихть, конат ворьготькшнесть маторксть и люпштамать эзда. Синь велеснон лемнезь Пургасонь Русь. Пургасонь волостсь лемтьф теенза оцюнякс ащи мокшэрзянь инязорть (князть) Пургасонь лемонц коряс[1]. Улема, Пургасонь волостть кучкацоль Саровонь ошпандсь[2]. Сонь моданц келец-кувалмоц 44 гектаршка, кона ащесь мода нярьса, конань тиезь Саровка и Сатис ляйхне, и вакссонза ащи террасаса, кона грабафоль и срафтфоль XIII-це векть васенце пялестонза.
«Волостть» колга, кунардонь рузонь кяльса, «Мокшэрзянь масторса» инязор Пургасонь удельнай княжестванц колга, азонды Никоновскяй летописсь[3]. Кафта оцязорхнень колга «мокшэрзятнень оцязорондамаса» — Пургасонь и Пурешень колга лятфни 1230-це кизотнень путешественниксь Юлиан Венгерский[4]. Пургасонь и Пурешень ёткса мольсь коданга аф сетьми тюрема, а синць княсне ульсть ся пингть каршек ащи ширетненди союзникокс — Пурешсь ульсь князть Юрийть шире ащикс, а Пургасонь волостсь ащесь Волжско-Камскяй Булгариять мархта[1][5].
Лаврентьевскяй летописьса 1228-це кизоть ала азф[5]:
«Муромскяй князсь Гюрги Давыдовичь, сувамок Мокшэрзянь мастору, Пургосовонь волостенц плхтазь, розть тапазь и жуватаснон пикссезь, пяшксе кучезь меки, а Мокшэрзятне ворьгодсть вири эсь кяшема вастозост, а кит исть ворьгоде, сятнень пикссезь, Гюргевинь сафонза од ломаненза, январть 4-це шистонза. Няемок тянь, од Ярославльхне, Васильковне и Всеволжне, салава шобдава тусть вирть потмос, а Мокшэрзятне макссь теест ки, а синць вирьса ётазь перьфкаст, пикссезь кяшема вастозост ласькихнень, сятнень тоса пикссезь, и князеньконди аш кинь мархта арась тюремс»
Эсь моданц тапаманц инкса Пургас ёрась пандомс кяж Нижняй Новгородть лангса[6]. 1229-це кизонь апрельста сон маштсь аньцек плхтамс ошень ваксонц и перьфпяльдень велетнень, но ваксарошть ашезе сяве[5][1]:
Апрель ковста састь Мордватне Пургасонь мархта Нижняй Новгородти, и тусть эздост Новгородецне, и крьвястезь Иняру Богородицань монастырть и церькавть, кона ульсь ошть эзда ширеса, сяка шиня и тусть шири, сявозь эсь пикссефснон оцю пяльксснон. Сяка кизоня сяськозе Пургасонь Пурешень цёрац Половецнень мархта, пикссезе Мордвать и сембе Пургасонь Русть, а Пургас кода аф кода ворьгодсь.
XIII-це сядокизоть кучкаста Пургасонь волостсь повсь ордань маторксть алу[1]. Батыйть ушмовиенза лиссть 1236-це кизоня, но врьгятнема кармасть аньцек кизонда 1237-це кизоня[7]. Юлиан Венгерскяй монахсь, кона 1237-це кизонь кизоть песта ульсь мокшэрзянь масторса, сёрмадсь, што эрзянь князсь «… аф лама ломань мархта тусь лац аралаф васттненди, штоба араламс пря, кда сатыхть виенза »[8]. Сяськф модатнень оцюняснон ёткса, конат сашендсть Ордав азорондомань ярлыконкса, Пургасонь лемоц аф лятфневи.
Историографиясь
Мокшэрзятнень ингольдень государствань образованиятнень колга кизефксне эвондафтыхть оцюдонга оцю пялькстомат. Васенцетнень ёткса тяряфтсь максомс питне мокшэрзянь ломаттнень 2-це тёжянь кизотнень ушеткста касомань-вииямань уровенцнонды российскяй историческяй наукаса марксистскяй направлениять ушедыец М. Н. Покровский: «XII-це векть песта мокшэрзятне ульсть кой-мзяра плямань федерациякс, конатнень центрасна ульсь сай пингонь Нижняйсь». Профессорсь М. Ф. Жиганов китькснезе, што кунардонь мокшэрзятнень ёткса ульсть политическяй марстомомат, конат ащесть вассальнай сотксса рузонь и булгаронь княснень эзда. А. В. Циркин азондсь Пургасонь волостть колга кода плямань союз, ингольдень пингонь типонь политическяй образования. Профессорсь Н. В. Заварюхин арьси, што 2-це тёжянь кизоть ушетксста мокшэрзятнень ушедсть эвондама государственнай образованиясна. Ингольдень пингонь государствань колга мяльть, кона эвондась мокшэрзянь кой-кона пляматнень фкя-фкянь мархта сотксснон вельде, мокшэрзянь феодальнай государственностть эвондаманц колга азозе профессорсь В. А. Юрченков. Башка мяль азонкшнесь профессорсь В. К. Абрамов, кона няфтсь мокшэрзянь масторса феодальнай явомать улеманц лангс XII — XIII-це векть ушеткста. Хуш кой-кона мяльхне ащихть каршек, сякокс кунардонь мокшэрзятнень обществаса улихть государственнай строительствань процесст, конат сязевсть татаро-монголхнень врьгятемаснон вельде, тянь кряс ученайхнень ёткса аш кафтолдомат[9].
Лятфтамат
- ↑ 1 2 3 4 Богуславский, В. В. Славянская энциклопедия. Киевская Русь – Московия: в 2 т. Т. 2: Н—Я. — ОЛМА Медиа Групп, 2001. — С. 219. — 781 с. — ISBN 9785224022519.
- ↑ Грибов, Н. Н. Саровское городище (по материалам археологических раскопок 1993 — 1995 гг.) « Саровский краевед (рус.). Дата обращения: 17 декабрьста 2025. Архивировано 17 апрельста 2019 года.
- ↑ ПСРЛ. Патриаршая, или Никоновская летопись. — Т. 10. М., 1965 — С. 95
- ↑ Очерки истории Мордовской АССР: В 2 т. — Т. 1. — Саранск: Мордов. кн. изд-во, 1995. — С. 42.
- ↑ 1 2 3 Смирнов, А. П. Волжские булгары. — М.: Издание Государственного исторического музея, 1951. — С. 48. — 302 с.
- ↑ Храмцовский, Н. И., Экземплярский, А. В. Краткий очерк истории и описание Нижнего Новгорода. — Нижегородская ярмарка, 1998. — С. 28. — 616 с.
- ↑ Должаев, И. П., Лузгин, А. С. Мордовский народ: что нас волнует. — Мордовское кн. изд-во, 1991. — С. 7. — 264 с.
- ↑ Грузнов, П. Д. История Мордовии в лицах: биографический сборник. — Научно-иссл. ин-т языка, литературы, истории и экономики при Совете Министров — Правительстве Республики Мордовии, 1994. — С. 160. — 256 с. — ISBN 9785759510260.
- ↑ Финно-угорские народы: генезис и развитие / под ред. д.и.н. проф. В. А. Юрчёнкова. — Саранск: НИИ гуманитарных наук при Правительстве Республики Мордовия, 2011. — С. 147—148. — 220 с.
Литературась
- Лаврентьевская летопись. (Полное собрание русских летописей. Том первый). — Ленинград, 1926—1928.
- Юрчёнков, В. А. Эрзя и Мокша в древности и современности. — 1999.