Мокшэрзянь народть сувамац Рузонь государствати

Рувики лопаста
Мокшэрзянь народть сувамац Рузонь государствати
Ащи пяльксокс: Казанскяй ханствать Россияти сувамац
Казанское ханство (присоединение Мордовии).jpg
Регионць
Поволжьясь
Хронологиясь
XIV вексь — XVI вексь
Туфталхне

мокшэрзянь модатнень шабракс ащемасна Рузонь государствать и Казанскяй ханствать ёткса;

мордовскяй княжестватнень политическяй явомасна.
Этапне

1. XIV вексь — XV векть кучкац — шимадома ширдень мокшэрзянь модатнень пяльксснон сувафтомасна Нижегородскяй и Рязанскяй княжестватнень ёткс
2. 1485—1487 кизотне — шимадома ширдень мокшэрзятнень ётамасна Московскяй подданствав Ивана III-цеть казанскяй походонозон меле

3. 1551—1552 кизотне — шинь стяма ширдень мокшэрзянь модатнень прокс сувамасна Казаньть прамдонза меле
Последствиятне

воеводскяй управлениянь сувафтомась; 

общероссийскяй налогонь системати сувафтомась;

тиеви всероссийскяй рынкати марса арама;
тястоконь козялятнень дворянкс арамасна;
мокшэрзянь крестьянствать явошнемац;

мордвать христианизацияц.

Мордовиять сувамац Россияти  (руз. Присоедине́ние Мордо́вии к Ро́ссии) — тяниень пингонь Мордовия Республикань модатнень сувафтомасна Рузонь государствати.

Мокшэрзятнень ётамасна российскяй подданствав

Мокшэрзянь народть рузонь княжестватненди сувамасна ушедсь XIV-це векста и ётнесь мзярошка этапса. Васенда Нижегородскяй и Рязанскяй княжестватненди сувасть мокшэрзянь модатнень эзда шивалгомань ширдетне. Нижегородскяй князьсь Константин Васильевич тя модатнень отькорьста ушедсь нолдомост тевс, и 1372-це кизоня тоса путфоль Курмыш ваксарошсь руз. (крепость) од модань араламанди. 1392-це кизоня Нижегородскяй княжествась ётась Москуть кядялу, мезсь арась васенце аськолксокс мокшэрзянь модатнень сувафтомаса латцеви централизованнай Рузонь государствав. 1402-це кизоня Рязанень князть Фёдор Ольговичень и Москувонь князть Василий I-цеть ёткса сёрматфоль кагод, конань эса сембе тефнень ёткса корхтафтфоль мокшэрзянь модатнень статуссновок[1][2].

Шинь стямань ширдень мокшэрзянь модатне ульсть Казанскяй ханствать (руз.) (мок. кядялот, мезть сюнеда тя аймаксь арась вастокс, коса мольфтевсь тюремась Москуть и Золотой Орадать наследниконзон ёткса. 1487-це кизоня Иван III-цесь ушедсь кирдема контроль Казаньть лангса, но педа-пес мокшэрзянь модатне сявафтфтольхть мзярда срадсь-каладсь Казанскяй ханствась, 1552-це кизоня (мокшэрзятне кирдезь ширенц Иван Грознаень ушмовиенц, якамок мархтонза походс и лездомок рузонь армияти ярхцамбяльса)[1][2].

Регионть марс пуромомац и сувамац Рузонь государствав

Мокшэрзянь модатнень Россияв сувафтомасна вятсь ся аймаконь ломаттнень социальнай структураснон полафтомаснонды: мокшэрзянь кой-кона содаф ломаттне сувасть рузонь дворянствав, сокайхне-видихне явовсть: ульсть ясачнайхть, дворцовайхть и крепостнойхть. Засечнай китькснень строямасна и поместнай системать касфтомац-виияфтомац вяць модакитьксонь кемокстамати и мокшэрзянь модатнень хозяйствань тевс нолдамаснонды. Мольсь мокшэрзятнень Христости кемамати сувафтомасна, а стане жа синь лия нароттнень ёткс шовордамасна[1].

Пингонь ётазь Саранскяйсь сотовсь мишендемань-рамамань тевса кучка Россиянь ошнень мархта (Москуть, Владимирть, Ярославльть) и Поволжьянь (Казаньть, Астраханть, Саратовть), а стане жа лия аймакнень мархта[3].

Казанскяй ханствать срадоманц мархта Россиянь границатне келемсть Приуральяв и казахонь степненди. Штоба араламс модатнень ногаецнень и Кубанень, Крымонь татархнень врьгятнемаснон эзда мокшэрзянь лямбе ширень модатненди тертьфтольхть эряма служилай ломатть мокшэрзятнень, татархнень, руснень и чувашнень ёткста. XVI-це веконь 70-це кизотнень аделавсь кемокстамань китькснень строямасна, конат мольсть Тетюшста Рязанти и Тулати молемс, конат ванондовсть гарнизонца и дозорнайса[4].

Лямбе и шистямань ширдень модатнень, коса кржаль эряйда, тевс нолдамасна вятевсь Темникавонь- Алатырень китьксть тиеманц вельде. Велет шачендсть Сура, Мокша, Инсар и лия ляйхнень кувалмос. Мода китькснень араламасна арась итнернациональнай койкс: тяза макссесть модат баяронь иттненди и эвондакшнесть рузонь служай ломаттнень велесна мокшэрзянь велетнень ваксса[4].

XVIII -це векти мокшэрзятнень оцюшкасна канфтфтольхть ясачнай сокаень-видиень категорияти, конатне 1719-це кизонь указть коряс, ётасть государствань сокаень-видиень разрядс, конатненди эрявсь пандомс эрь ваймонкса дацьке, тя тиезень ровнакс правань коряс рузонь тягловай сокайхнень-видихнень мархта. Мокшэрзятнень пялькссна, конат эрясть дворцовай вотчинаса, мзярда тиевсть уделхне 1797-це кизоня ётасть удельнай ведовствать кядялу. Кой-кона мокшэрзятне тяштьфтольхть монастырьхнень мельге и промышленнай предприятиятнень мельге (винокуреннай, металлургическяй и лия заводонь мельге)[2][3].

2012-це кизоня Рузаевка ошса ульсь панчф «Равжа тюльпан» мялямгевсь мокшэрзянь народть Рузонь государствати суваманц 1000 топодемань шитнень пингста.

Лятфтамат

  1. ↑ 1 2 3 История Мордовии с древнейших времён до середины XIX века / по ред. Н. М. Арсентьева и В. А. Юрченкова. — Саранск, 2001. — С. 83—103.
  2. ↑ 1 2 3 Народы Поволжья и Приуралья. Коми-зыряне, Коми-пермяки, Марийцы, Мордва, Удмурты. — М.: Наука, 2000. — С. 339—345.
  3. ↑ 1 2 Мордва: Историко-культурные очерки / отв. ред. В. А. Балашов. — Саранск, 1995. — С. 46—50.
  4. ↑ 1 2 История Мордовии с древнейших времён до середины XIX века / по ред. Н. М. Арсентьева и В. А. Юрченкова. — Саранск, 2001. — С. 128—133.

Литературась

  • Зимин А. А., Хорошкевич А. Л. Россия времени Ивана Грозного. М.: Наука. 1982. С. 59—67.
  • История Мордовии с древнейших времён до середины XIX века / по ред. Н. М. Арсентьева и В. А. Юрченкова. Саранск. 2001.
  • Мордва: Историко-культурные очерки / отв. ред. В. А. Балашов. Саранск. 1995.
  • Народы Поволжья и Приуралья. Коми-зыряне, Коми-пермяки, Марийцы, Мордва, Удмурты. М.: Наука. 2000. С. 339—345
Сявф"https://mdf.ruwiki.ru/w/index.php?title=Мокшэрзянь_народть_сувамац_Рузонь_государствати&oldid=418135"-ста