Ингушетия Республикась

Ванф Российскяй Наукань Академияса

Ванф
Ванф Российскяй Наукань Академиять видеса

Сяда крхкаста

Ванф Российскяй Наукань Академияса

Ванф
Российскяй Наукань Академиять вельде

Сяда крхкаста

Российскяй Федерациянь субъектсь
Ингушетия Республикась
ингуш. ГӀалгӏай Мохк
Котфоц Содафксоц
Ингушетия Республикань гимнась 🎤 🎵
43°10′00″ с. ш. 44°49′00″ в. д.
Масторсь	Россия
Сувси	Кельме ширень-Кавказскяй федеральнай округсь Кельме шиирень-Кавказскяй экономическяй районць
Пряошец	Магас
Оцюнясь	Махмуд-Али Калиматов
Правительствань Оцюнясь	Владимир Сластенин
Народнай Собраниянь Оцюнясь	Магомет Тумгоев
Историясь и географиясь
Площадец	3123 (82 вастсь)
Часовой каркссь	MSK (UTC+3)
Сембода оцю ошне	Назрань, Малгобек, Карабулак, Сунжа
Экономикась
ВРП	55,5 миллиард цалковай (2018)
• вастсб	79 вастсь
• на душу населения	112,6 тёжянь цалковай
Эряйхне
Эряйхне	↗515 564 ломань (2021) (73 вастсь)
Плотностсь	165,09 ломань/км²
Национальносттне	ингушт (93 %), чечетт (2,4 %), руст (0,6 %)
Государственнай кяльхне	ингушень, рузонь
Цифровой идентификаторхне
Код ISO 3166-2	RU-IN
Код ОКАТО	26
РФ-нь субъектть кодоц	06
Преемственностсь ← Чечено-Ингушскяй АССР-сь
Официальный сайт​(руз.)
Ингушетия Республикась

Ингушéтия (руз. Ингушетия), официальнай лемоц — Ингуше́тия Республикась (руз. Республика Ингушетия) — Российскяй Федерациянь субъект, эзонза сувси республика. Сувси Северо-Кавказскяй федеральнай округти, ащи пяльксокс Северо-Кавказскяй экономическяй районти.

Пряошец — Магас ошсь.

Шинь мадома ширеса ащи шабракс Кельме ширень Осетиять мархта, шинь стяма ширеса — Чеченскяй Республикать мархта, лямбе ширеса — Грузиянь Мцхета-Мтианети крайть мархта, конань мархта масторкитьксонь участкась тяка пингть ащи Российскяй Федерациянь государственнай масторкитьксть участкакс.

Тиевсь-пуроптовсь 1992-це кизонь 4-це июньста.

Площадень коряс Российскяй Федерациянь инь ёмла регионць, аф путомок лувксс федеральнай смузь мархта ошнень.

«Ингушетия» ракетань ёмла венежсь

Этимологиясь

Республикать лемоц моли народть рузонь лемстонза —ингушт (ингушскяй Áнгушт велень лемста) и грузинскяй суффиксста -éти, мезсь марса няфти «васта коса эряйхть ингушне». Научнай литератураса регионть няфтеманкса тяфта жа нолявсть тевс тяфтама лепне, кода: «Дзурдзукетия», «Кистетия», «Глигви», «Гелиа», «Галга», «Ингушия». «Ингушне» этнонимсь кармась нолневома тевс сявомок XVII-це векста. Народсь эсь прянц лемнесы галгай-кс (гӀалгӏай), сонь тиевомац моли кунардонь пинкненди. Сон сяда сидеста сотневи «га́ла» (гӏа́ла) — башня терминть мархта и ётафтови кода «строитель/башняса эряй». Кой-кона исследовательхне арьсихть, што тя этнонимсь эвондась кунардонь ингушень Гела или Гала шкаень лемста. Тяфта жа азонкшневсь мяльсь галга терминть сотксонзон колга шумерскяй кяльса этнонимть мархта, конань мархта шумерхне лемнезь Шумера ломаттнень, содаф наукаса кода су, субир, хурритт, мезсь няфти — «смузю ломатть».

Россиянь почтань маркатне

2009-це кизось

2020-це кизось

Физико-географическяй характеристикац

Географиясь

Ингушетияса Кавказонь панттне

Ингушетиясь ащи Оцю Кавказскяй панда карязть кельме ширдень пандонзон инголе ащи вастса (кучка пялькссонза) и маласонза ащи Терскяй, Сунженскяй и Скалистонь ёмла пандонь каряснень эса. Кувалмоц кельме ширде лямбе ширети тии 144 вайгяльбе, шинь мадома ширде шинь стяма шири — 72 вайгяльбе.

КПП-сь Кельме ширень Осетия-Алания Республикаста Ингушетияв сувамста

Рельефсь

Казбек пандть няемац (Башлоам-корт)

Столовая пандсь (Мятлоам)

Кельме ширдень аймакнень эса рельефсь степной, лямбе ширеса — пандонь, кона ащи панда карязста, конат явфт лаймоса (руз. долина) и ущельяса. Кельме ширдень аймакнень эса ащихть Сунженскяй и Алханчуртскяй лаймотнень пялькссна, кучкаса — Сунжа и Асса ляйхнень лашмосна, республикать лямбе ширдень пяльксоц заняф Кавказскяй панттнень мархта.

Россиянь Банкть мяляфтомань монетац 10 цалковаень номиналса (2014)

Сембода сери вастсь — Шан пандсь (4451 метра). Пандонь Ингушетияса лия сери васттне: Цейломсь (3171 метра), Цорейламсь (3000 метра). Кавказскяй панттнень кувалмосна — 50 вайгяльбе.

• 

  Ингушетиянь пандонь пейзашне

• 

  Ассинскяй ущельясь

• 

  Цейломскяй панда карязсь

• 

  Армхи ляйть лаймоц

Частонь пояссь

Ингушетиясь ащи МСК-нь (пингсь Москуть коряс) частонь зонаса. Пингть шаштомац UTC-ть эзда +3:00 .

Климатсь

Климатсь континентальнай, сери пандонь; ащи морять уровененц эзда сереть эзда. Январть кучка температурац — +3-ста +10 °C-ти, июльть— +21…+23 °C. Пиземда кизоти 1200 мм самс.

Гидрографиясь

Фуртоугскяй ведень прама вастсь

Сунжа ляйсь

Назранка ляйсь

Гидрографическяй объекттне, конат ащихть марнек или пялькссна Ингушетия Республикать моданзон лангса, синь аф фкя лаца явфтт и пяк аердыхть физико-географическяй условиятнень коряс, мезсь сотф сянь мархта, што Ингушетиять рельефоц пяк аф фкя лацонь — республикать пяльксонц занцесазь панттне и вярьгок ащи васттне, а лия пяльксонц — арся васттне и алгак васттне. Рельефсь няфнесы и Ингушетиять перьфпялень аймакнень эсь лацонь ширеснон — лямбе ширде кельме ширети молемс синь полафнихть сери панттнень эзда пялес пустынятненди. Республикань ведень ресурсне сидеста нолявихть тевс ломанть хозяйственнай тевсонза, а тяфта жа гидротехническяй ширде тиендевихть-латцевихть — Ингушетиять кельме ширесонза ули вии ирригационнай система.

Ляйхне

РФ-нь Государственнай ведень реестрать коряс Ингушетиянь сембе ляйхне сувсихть Терек и Рав ляень ётконь Каспийскяй морять ляень бассейназонза (цифрань кодсь — 02), кона кандови Ши валгома ширень-Каспийскяй бассейнань округти (цифрань кодсь — 07). Ингушетиянь правительствань даннайхнень коряс, республикать моданзон лангса ащи аф пяк оцю и ёмла ляень 720 бассейна, республикань сембе ляйхнень марстонь кувалмосна 1350 вайгяльбеда лама, средняйста эрь квадратнай вайгяльбень площадти сашендови 590 метрада лама ляйда. Гидрографическяй ня показательхне лувондовихть инь оцюкс РФ-нь Кельме ширень-Кавказскяй федеральнай округса.

Кельме-Ши стямань ширень Кавказонь ведень инь оцю артериякс ащи Терексь, но, Ингушетиява тя ляйсь шуди аньцек аф оцю вастова республикать лямбе ширесонза Кельме ширень Осетиять мархта масторкитьксть кувалмос (лямбе ширде кельме шири; Джейрахскяй районць). Ингушетиянь ляйхне — Теректи прай Сунжа ляйсь (оцю и эрявикс ведень хозяйстваса объектсь; шуди шинь валгома ширде шинь стяма шири; Назрановскяй и Сунженскяй райоттне, а тяфта жа Магас, Назрань, Карабулак ошень окрукне), Сунжи ляйти прай Асса ляйсь (шуди лямбе ширде кельме шири; Сунженскяй и Джейрахскяй райоттне). Шудихть тяфта жа ляйхне: Фортанга, Армхи, Ачалук, Джоли, Гулойхи, Футан, Чемульга, Камбелеевка. Ляйхнень бассейнаснон марстонь площадец 3073 квадратнай вайгяльбе.

Ведень прама васттне

• Ляжгинскяй ведень прама вастсь
• Фуртоугскяй ведень прама вастсь
• Эка-чожинскяй ведень прама вастсь
• Шоанскяй ведень прама вастсь

Мода алдонь эрявикс козяшитне

Сянь колга, што модась, сонь козяшинза и перьфпялень лия ресурсне нолявихть тевс и ванфневихть Ингушетия Республикаса кода эсонза эряй нароттнень эряфснон и тевснон юрсна кемокстаф Ингушетия Республикань Конституциянь 10-це статьяса. Тяфта жа, прьняндаф республиканскяй закон «О недрах» (1996-це кизонь 8-це февральсь), кона няфтьсыне фкя-фкянь ёткса ладямань основной принципнень, конат эвондакшнихть республикань мода алдонь козяшитнень геологическяй тонафнемста, тевс нолнемста и ванфтомста, а стане жа горнодобывающай и мархтост сотф перерабатывающай производствань ляткснень машфтомста. Пуроптф Ингушетия Республикать эзга перьфпялень ресурсонь Комитет, кона эсь полномочиянзон коряс вятьсы Ингушетиянь недрань государственнай фондть. Ладяф лицензированиянь порядкась месторождениятнень освоенияснон пингста.

Минерально-сырьевой базась ащи нефтань ащема вастста (муф промышленнай нефтань запасне тиендихть пцтай 11 миллион тонна, прогнознай запасне — 60 миллион тоннада лама), природнай газста, мраморста, доломитста, известнякста-ракушечникста, кирпицень сёвоньцта, термальнай пчкафтомань веттнень и «Боржоми» минеральнай веттнень эзда, пандонь лихтибрянь ару ведень запасста. Ингушетиять потмоса геолокне мусть шуроста васьфневи металлонь васта. Минеральнай сырьянь азф виттнень балансовай запассна, средняйста, тиендихть 100—150 кизот.

Нефтась и газсь ащихть инь эрявикс полезнай ископаемайкс, республикань топливно-энергетическяй комплексти юркс. Ингушетия Республикать территорияса нефтать таргамац мольфтеви 1915-це кизоста сявомок, мзярда ульсть панчфт нефтань васттне Малгобекскяй районца. 50 — 60-це кизотнень нефтань таргамась курокста кассь, сяс мес панчфтольхть нефтань оцю вастт. Нефтань и газонь вастонь вешемать и нефтань васттнень разработкаснон мольфтьсыне «ГО Ингушнефтегазпром» ГУП-сь.

Республикать эзга ётни Баку-Новороссийск магистральнай нефтепроводсь Вознесенскяй нефтеперекачивающай станциять пачк (ВНПС), конань кувалмоц 12,7 вайгяльбе, d = 700 миллиметра. Нефтань качандамать кизоньберьфонь объемоц ВНПС-ть пачк пачкотькшни 3 миллиотт тоннати молемс.

Флорась

Касыксне: кельме ширеса — вирень и вирень степонь, лямбе ширеса панттнень эса (1800 метрань серес) — кели лопань вирьхть, сяда вяре ащихть субальпийскяй и альпийскяй лугатне. Панда бокнень синцень эсь лацонь микроклиматсна. Кельме ширень Кавказса аш лия республика, коса ванфтоволь ба тняра аф фкя лацонь касыксонь вид, конат касыхть шабракс фкя-фкянь мархта. Панттнень ала (2200 метрань серес) касыхть кели лопань и салмоксу шуфтонь козя вирьхть.

Вирень фондть моданзон марстонь площадьсна 84,4 тёжянь гектар, тяконь лувксса площадсь, кона вельхтяф вирень касыксса — 75,6 тёжянь гектар. Кели лопань шовордаф вирьхне (бук, тума, чинара) занцихть 140 тёжянь гектар мода. Марнек древесинань запассь — 11 миллион м³.

Фаунась

Ингушетияса эряйхть 60-шка лофцта потяй ракшань вид, 150 нармонень вид, 24 амфибиянь вид и 8 рептилиянь вид. Сембе синь серцек эряйхть фкя-фкянь мархта панттнень и равнинатнень эса. Улихть шеерхт-порихть и куйхть-ёзмолдыхть. Нармоттнень эзда — дрофа, вирень яксяркт, мацихть, ляень лаймотнень эса — кавказскяй фазан, альпийскяй лугатнень эса — равжа пря гриф, кавказскяй пандонь индейка, кавказскяй вирьзарас. Панттнень эса эряйхть кевонь и вирень шимотть (руз. куница), бурай офтт, вирень тувот, косулят, вирень катот, безоаровай сяват, ловонь барст и лия ракшат. 2008-це кизоня ульсь кочкаф Ингушетиянь Якстерь книгась. Эсонза сувасть 136 юмси ракшань вид и 89 касыксонь вид, конат ванфтовихть.

Эрямопингсь

40000 киза минь эродонк инголе

Ломаттнень васенце эряма вастсна равнинань Ингушетияса ульсть Назрани аймакса. Муф орудиятне тиендевсть тостонь породаста. Тя вастса мустьень эпохаста, улема, ульсь аф оцю мастерской кевонь петемать коряс. Ся пингонь памятникне ульсть муфт стане жа Барсуки, Экажево и Плиево велетнень маласа .

8000 киза минь эродонк инголе

Васенце эряма васттне Ингушетиянь панттнень эса.

6000 киза минь эродонк инголе

Муфт ингольдень бронзовай веконь памятникт Мужичи велеста пандонь Ингушетиянь Ассинскяй ущельяса (Лугань калмама вастсь). Регионца содаф керамикась.

4000 киза минь эродонк инголе

Кельме ширень Кавказса мушендсть васта ингольдень бронзовай веконь археологическяй культуратне: майкопскяй и куро-аракскяй, конатнень туркс ётамань вастса ащихть Ингушетиять моданза. Тяса муф ингольдень бронзовай веконь памятникнень кой-кона пяльксснон улихть синкретическяй шамаликсна. Майкопскяй культурать мекольце пингонцты (минь эрадонк ингольдень III-це тёжянь кизоть пец — минь эрадонк инголе II-це тёжянь кизоть ушетксоц) кандовихть Ингушетиянь мзярошка курган: Аби-гув (Насыр-Корт), Мурад-Боарз (Али-Юрт), Альтиевскяй курганць (Альтиево) и лият.

Инь содаф куро-араксскяй культурань памятникне Ингушетияса нят: Лугань эряма вастсь, Экажевскяй эряма вастсь, Эгикальскяй калмама вастсь, Эзмийскяй кевонь-ящичнай калмама вастсь.

2000 киза минь эродонк инголе

Келемкшнихть кучкань бронзань эпохань фкя-фкянди мала археологическяй культуратне, конат кассть-вииясть ингольдень бронзовай веконь культуратнень юрса и наукаса получасть «кельме ширень-кавказскяй культурно-историческяй общность» марстонь лем. Ингушетиять моданзон лангса средняй бронзань эпохась няфтьф кой-мзяра памятникса, конат тонафнеф пцтай сембе сонь физико-географическяй зонасонза. Тяза сувсихть кода тифтень-тифтень муф паршихне, стане жа тя пингонь и калмамань, и эрямань памятникне.

Кельме ширень кавказскяй культурать юрса минь эрадонк ингольдень II-це тёжянь кизотнень кучкаста Ингушетияса и Кельме ширень Кавказонь лия региоттнень эса ушеткшни латцевома Кобанскяй культурась. Ингушетиянь панттнень эса стройсевихть циклопическяй постройкат и калмоланкт Эгикалса, Леймиса, Дошхакласа и лия вастса. Антропологическяй ширде кобанскяй культурань каннихне ульсть кавказионскяй типонь представителькс , а стане жа, кой-кона исследовательхнень мяльснон коряс, ульсть нахоязычнайкс.

Сёрмадомок тя пингть колга, кунардонь грузинскяй хроникатнень эса кобанецне лемневихть кавказионкс и дзурдзукокс. Синь эряма вастснон границац — Андийскяй панда карязть эзда сявомок шинь стямань ширеса адыгскяй пляматнень эряма вастснонды молемс — ладяй кобанскяй культурань каннихнень эряма вастснонды. Античнай источникнень эса (Лукиан Самосатский, Клавдий Элиан) кобанскяй культурань пляматне лемневихть «махли» (махлиецт, махалхт).

Кунардонь пингонь Эгикал ошсь

Дзурдзукетиясь

Кавказонь картась, 1676-це кизось. Дзурдзукиясь французонь кяльса тяштьф кода «Zuirie»

Дзурдзуки, кистатне и глигватне Вахушти Багратиони картаса. 1745 кизось.

Минь эрадонк ингольдень I-це тёжянь кизотнень омбоце пяльксста кобанскяй пляматне тисть плямань политическяй оцю марстомома, кона содаф античнай источникнень коряс Малх (Махли, Махелония) лем ала, грузинскяй источникнень коряс — Дзурдзукетия. Ся пингти тя ульсь сатомшка вии государства. Дзурдзукетиясь кирдезе эсь кядьсонза главнай кавказскяй ётамать — Дарьяльскяй ущельять и кирдсь кеме политическяй соткст кунардонь грузинскяй государствать мархта. Леонтий Мровелинь сёрматфксонзон коряс Грузиянь васенце оцязорсь Фарнаваз ульсь рьвяяф авань лангс «дзурдзуконь плямать эзда, Кавказонь потомкатнень» и синь шачсь цёрасна Саурмаг (ингуш. «сармак» — «дракон»). Сон арась грузинонь престолс алянц куломдонза меле, а содамок сянь колга, што сонь ёразь шавомс грузинонь эриставтне, тядянц мархта кяшендсь эсь щенянзон ширеса Дзурдзукетияса. Античнай писательть Лукианонь сёрматфонзон коряс содаф кунардонь кобанецнень политическяй марстомомаснон вятиснон эзда фкять лемоц — Адирмах, конань Абхазскяй исследовательсь Гумба Г. Д. ингушскяй кяльть вельде этимологизировандасы кода «шить виенц азороц».

Минь эрадонк ингольдень II-це векть ушетксста Кельме ширень Кавказть лангс врьгядсь селевкидскяй оцязорть Антиох III и кобанскяй пляматнень политическяй марстомомасна ульсь тапаф. Сонь срадомдонза меле сёрматфнень эса лотксихть васьфневома марстонь кобанскяй лепне и сяда тов — минь эродонк ингольдень I-це векста — и минь эрань I-це векста кобанецнень уноконь уноксна содафт сёрматфнень эса башка плямань или этнотерриториальнай группань лем ала: «хамекитт», «сьербат», «двалхт», «троглодитт», «санархт/цанархт», «хотт», «масах/машах», «исадикт» и лият.

Улема, кобанскяй культурань пляматнень мархта сотф «гаргареи» («гаргары») этнонимсь, конань колга лятфни кунардонь греческяй географсь Страбон эсь «Географиясонза» (минь эрань I-це вексь) кода кельме ширень кавказонь народонь колга, кона эряй амазонкатнень ваксса. Археологическяй и лингвистическяй уликснень коряс, кепотьксонди, сотомок сонь ингушскяй «гаргар» («радня»/«мала») терминть мархта, кой-кона ученайхне путнесазь фкакс гаргарейхнень ингушнень мархта.

Лия этнонимсь, конань лятфтазе Страбон — «гелы» («гелай»), кой-кона учёнайхнень ёткса тяфта жа сотови ингушнень (галгайть) мархта.

«Дзурдзукетия» и «дзурдзуки» лепне лятфневсть сёрматфнень эса мекольдень Кучка векнень самс, тяка пингть кда ингольдень Кучка векнень тя лемса лемнезь сембе вайнахнень, то мекольдень Кучка векнень «дзурдзуки» терминть этническяй содержанияц полафтсь и няфтсь аньцек ингушнень лангс. Ламоц исследовательхне мушендсазь дзурдзукнень вастснон пандонь Ингушетияса и путнесазь синь ингушненди.

Аланиясь

Кучка веконь ингушень ушманонь ваксарщам. Муф Оздиг велень склепса. Фотось 1921-це кизонь

Минь эрань васенце векнень эзда сявомок сёрматкснень эса эвондакшни «аланы» этнонимсь, конань мархта кемоста сотфт ингушнень и Ингушетиять историясна. А ингольдень Кучка векнень пингста Кельме ширень Кавказса тиевсь Аланскяй государства. В VII — VIII-це векнень крвязькшнихть арабо-хазарскяй войнат, конатнень эса тюрсть алаттне. Тя пингти кандови «Сулейманонь Орёлоц» ― орёлть бронзань фигурац Эрзи башеннай поселенияста пандонь Ингушетиянь Кистинскяй ущельяса. Улема, сон повсь тяза военнай трофейкс. Орёлсь служась Арзинь/Эрзинь (ингушень кяльса «Орёл») аулти гербокс и макссевсь родста-плямас семьянь инь оцю ломанти. Тячиень шити орёлонь тя фигурась лувондови кунардонь пингонь точна датированнай исламскяй искусствань бронзань изделиякс.

VIII — IX-це векнень Ингушетиянь панттнень эса стяфтф Тхаба-Ерды храмсь.

Магас

Аланиять пряошец ульсь Магас ошсь. Васенцеда лятфневи арабскяй авторть Масудинь работасонза 943-це кизоня. Сонь ащема вастонзон эзда фкясь — тяниень тяка лем ала Ингушетиянь пряошть (Магас) вастоц и маласа ащи велетне: Яндаре, Гази-Юрт, Экажево, Али-Юрт и Сурхахи. Тя васта, коса ащихть аланскяй пингонь лама памятникт, синь ётксост лама аланскяй ошпантт. Исследовательхне китькстазь, што ламоц ошпанттне тяса ащихть маронь-мар или «пизонь» фкя-фкяндт няеви вастса. Кой-кона ня группатнень эса няеви инь оцюсь, конанди венемихть сяда ёмлатне. «Пиза лаца» ошпанттнень ащемасна сотф родонь-плямань вии пережиткатнень мархта тя обществаса. В. Б. Виноградовонь мяленц коряс, памятниконь тя аймаксь — инь оцюсь Кельме ширень Кавказса.

«Магас» топонимть лемонц этимологияц мушендови ингушень кяльть вельде. «Магас» валса «ма» слогсь няфти «ши», а «га»/«го» слогсь шарьхкодеви «шаркс, диск». Тяфта «мага»/«маго»-ть смузец — «шить шарксоц, шить дискоц». Валть песа «с» буквась — ингушень топоформант, кона эвондась «са» валста — «мода, васта». Тяфта «Магас»-сь шарьхкодеви кода «модась, шить вастоц», а кда тя ошть лемоц, эста — «шить ошец». Ингушнень атянь-атясна озонкшнесть шити кунардонь пингста сявомок исламти самс и, абхазскяй исследовательть Г. Д. Гумбать арьсеманзон коряс, тя кадсь Кельме ширень Кавказса мзярошка «тяфтама топонимиконь тиевомада „малх“ — ляйсь Малка (Малха), Малка, Малкана васттне (Малк-ан), Малхар, Малгобек (Малк-/о/бек) Кельме ширень Осетияса; Малгобек, Малка ляй, Малхиста (Малх-иста) аймаксь Чечено-Ингушетияса». Тяка жа топонимонь рядти, конат эвондасть шить лемста, можнат кандомс топонипне «Магас», «Маго-Ерд» — Ингушетиянь панттнень эса Мегате аймакса храмсь. «Магас» и «Магате» топонипнень эса ули фкя и сяка «мага» юрсь («с» и «те» суффиксне ащихть топоформантокс). «Магате» лемсь стане жа фкя Магас лемть мархта, кунардонь пингонь хроникатнень эса — Мегет. Тяфта, «Магас» топонимсь (лия вариантса) ули и пандонь Ингушетиять территорияса. Ингушень айнемаса «Сеска Солса» лятфневи Мацагате вастсь. Тя айнемать коряс, Сеска Солса ащи галгаень масторти вятикс, тюремань вятикс, ули сонцень военнай дружинац, сонць галгай и эряй Мацагатса. Улема, тя вастсь шарьхкодеви Магас ошкс, кона ульсь Аланиянь оцюнятнень эряма вастсна.

1238-це кизонь сёксеня монголхне Менгуть вятеманц ала ушедсть врьгятема Аланиять лангс. Тя походса инь оцю тевкс ульсь Магас ошть сявомац. Джувейни, Рашид-ад-Динонь, «Юань ши» и лиятнень куляснон коряс, лиссь пяк вии тюрема инксонза. Монголхне ламос кирнезь аланскяй пряошть, кой-кона уликснень коряс осадась мольсь 1 ков и 15 ши, лиятнень коряс — 3 кофт. Мекпяли Магас ошсь ульсь марнек калафтф. Джувейнинь сёрматфксонц коряс, врьгятихне кадозь Магасть эзда «аньцек лемонц и добувасть тоста лама паршида».

Дедяков

Содаф нинге фкя ош Аланияса — Дедяков. 1238—1239-це кизонь тапамда-срафтомда меле, мзярда аланскяй ломаттнень оцюшка пялькссна ворьгодсть панттненди, алаттнень эзда кой-кит лядсть эряма монголхнень кядяла. Тянь колга корхтайхть рузонь летописне, конат азондыхть аланскяй «Дедяков» ошть колга, или «Дадаков». Ингушень кяльть коряс ошть лемоц лувови кода «Оцюнянь (вятиень, оцязоронь) ош», тяфта жа «Дада», или «Дедя», может улемс кодама-бди ломанень лемкс, тяфтама вариантсь нинге сяда пяк ладяй ингушень мекольдень койти велетненди лемонь путнемать коряс. Кой-кона исследовательхнень мяльснон коряс Дедяковть ащема вастоц, конань колга азондови рузонь летописнень эса, сембода пяк ладяй ошпандонь оцю комплексть ащемац Сунжа и Назранка ляйхнень ётка вастса Назранень Гамурзиевскяй и Насыр-Кортскяй административнай окрукнень модаснон лангса.

1277-це кизоня Дедяковонь эряйхне кеподсть ордань люпштамать каршес. Кой-кона исследовательхне арьсихть, што тя кеподемась ульсь аф ошень, а сяда оцю населённай областень, конанди кучкакс ульсь Дедяков ошсь. Лиякс стака шарьхкодемс, мес кеподемать тапама лиссь сонць Менгу-Тимур каназорсь эсь ушмовиенц мархта и серьгядезень нинге рузонь княснень: Андрей Городецкяень, Глеб Ростовскяень цёранц и племянниконц, Фёдор Ярославскяень и лиятнень эсь дружинаснон мархта. Мекпяли ошсь ульсь сявф и марнек калафтф, а кеподемась тапаф. Монгольскяй завоеваниять пингста ульсь машфтф Аланскяй государствась.

Кучка веконь Ингушетиясь

Картась, конань кочказе американь картографсь Джозеф Колтон (Colton, G. W.) 1855-це кизоня. Ингушетиянь и Чечнянь модатне сёрматфт кода «Gelia». Картаса няфтьфт Назрань и Владикавказ ошне, а стане жа Грознай ваксарошсь

«Борга-Каш» мавзолейсь (XV-це векть ушетксоц) Ингушетияса

Глигватне (галгай) Жан Анвилень картаса, 1751-це кизось

ХΙV-це векть песта (1395-це кизонь сёксеня) Кельме ширень Кавказть ланга ётась среднеазиатскяй завоевательсь Тимур Шаморсь. Тимуронь врьгятнеманзон маршрутонзон кельме ширень кавказса эряйхнень каршес тонафнемста исследовательхне нежетькшнихть кафта хроникатненди — «Зафар-намэ» («Сяськоматнень книгасна») Низам-ад-дина Шаминь, кона ульсь Тимуронь современникоц и секретарец, «Зафар-намэ» («Сяськоматнень книгасна») Шереф-ад-дина Йездинь, кона эрясь ХV-це векть васенце пялестонза. Ингушскяй исследовательхнень коряс именна Ингушетиять моданзон лангса может улемс хроникатнень эса азф «Буриберд» аймаксь, коса оцюнякс ульсь Бураканць, и конань каршес Тимурсь тиезе эсь фкя походонц аланть лангс (хроникатнень текстснон эса — «эльбурзцы»). Тяфта, тя аймаксь малады тяниень ингушень Троицкая-Яндаре-Плиево-Барсуки-Гази-Юрт велетнень маласнонды. Лемсь «Буриберд» (ингуш. «бурой берд» — «ваксарошень ляй трва»), улема, эвондась Сунжа ляйть сери виде трванц лангс ванозь, кона шуди азф велетнень пачк. Тя ляй трвать эзда сяда вяре ётни сери вастсь, коса ащихть лама аланскяй ваксарошт (ингуш. «бур-борз» — «ваксарошень кургаттне»). Тя ляй трвась таргави аф фкя кемонь вайгяльбень кувалмоса. Лама вастова улихть эсь тийф лоткт. Улема, кунардонь пинкнень тя ляй твась ульсь пяк кемокстаф араламань рубежекс. Тяса жа, тя модатнень эса, Борга-Каш мавзолейть улемац (XV-це векть ушетксоц) корхтай сянь колга, што тяса, пади, калмаф «БоргІа» (Борохан, Буракан) оцюнясь.

Аланиять срадомац и тостонь ломаттнень панттненди эряма тумасна, конат кемокстасть Дарьялть эзда шинь стяма, ши валгома ширеса и ушедсть путнема-стяфнема ваксарошт, мезсь и арась юркс этнотерриториальнай од марстомомань тиевоматненди, мезсь вятсь тяниень кельме ширень кавказонь нароттнень тиевомаснонды. Тяка пингть, сявондемок мяльс, што кучка веконь Аланиясь ульсь полиэтничнай государственнай образованиякс, эряви азомс, што кельме ширень кавказскяй равнинать кучка пяльксонц, кона сувсесь Аланияти, занцезь ингушень кяльса корхтай общносттне (пляматне). Кобанскяй культурань кода виде наследникт, синь ащесть основной кельме ширень кавказскяй пяльксокс тя государственнай образованияса. Тянди логическяй кемокстамакс ащи ся обстоятельствась, што эряйхне Оцю Кавказть кучка пялькссонза, шинь валгома шири молемс, стане жа, кода и шинь стяма шири, Дарьялть эзда сявомок, лувондовсть ингушень кяльса корхтайкс, мезсь кемоксневи материальнай культурань элементса, конат ванфтовсть тя модатнень эса, и ингушнень и осетиттнень айнемаснон вельде. Аньцек ушедомок XVI-це векть омбоце пялестонза, няеви иранонь кяльса корхтай (осетинскяй) элементть валомне шаштомац Газалте аймакти — модатненди, кона ащи Шинь мадома ширде Дарьялти, мезсь ульсь ингушень кяльса корхтай общносттнень миграционнай процесснон следствиякс, конат мольсть лангонь факторхнень люпштамаснон ала шинь стямань и кельме ширень-шинь стямань направленияса.

Миграционнай процессне, конат сотфт ингушнень равнинав мрдамаснон мархта, улема, ушедсть сатомшка рана, эсток Тимуронь Кельме ширень Кавказста тумдонза меле. Синь, улема, инголи ульсть кода башка военно-политическяй акцият, конатнень тиендезь ингушне равниннай модатнень лангса лия вастста саф нароттнень кемокстамаснон каршес. Башка азкст, конат сотфт тя пингть мархта, ванфтовсть народнай мялямса. Ингушскяй айнемать эса, конань сёрмадозе XIX-це векста этнографсь Албаст Тутаев, няфтьсазь пряснон пандонь Ингушетиянь Галгаевскяй обществав сувсихне, конат ладяйхть айнемать главнай героенц — князть Бексултан Боргановонь мархта и примайхть участия мзярошка тюремаса, конатнень действиясна молихть виде вастса Терек и Сунжа ляйхнень трваса.

Сувамок Российскяй империяв

Кавказонь китьксть и горскяй нароттнень 1799-це кизонь картать эзда пялькссь

XVIII-це сядокизоть пингста аделсеви ингушнень мрдамасна эсь плодороднай модазост, конат ульсть Сунжа и Терек ляйхнень маласа. Тя пингть руснень и ингушнень ёткса соткс ётасть касомань-вииямань од фазас. XVIII-це векть мекольце ниле пялькссонза кой-кона ингушне (Ангуштинь обществац) ёрайхть сувамс российскяй подданствати. 1770-це кизонь 4 — 6-це мартста панда ала ащи Ангушт аулть маласа народонь оцю пуромкс ёткса «Барта-Бос» («Склон согласия») символическяй лем ала кужеса оцю авторитет мархта 24 оцюнятне торжественнайста макссть присяга. Тя иласа ульсь академиксь И. А. Гюльденштедт. Сяка кизоня путозь кядьснон российскяй подданстванц примаманц колга присягати Тагаурскяй обществаста ингушне. Ангуштань обществать мельге 1771-це кизоня российскяй администрациять мархта договорть сёрмадозь ингушскяй лия обществань представительхне — карабулакне (орстхойецне).

Ня акттне лездсть ладямс ялгань союзническяй соткст Россиять и ингушнень ёткса. Тяка пингть, кой-кона исследовательхнень мяльснон коряс тяфтама присягатне аф эрявихть ванондомс, кода тя или тона народть Россиять лувксс сувафтомань актокс. «Афкукс картинась ульсь ламода сяда стака. Кядялу сявомать и подданствань отношениятнень рузонь ширесь и сонь партнёронза сидеста вансть лангозост аф фкя лаца, и эряви кирдемс мяльса рузонь власттнень и сувафтф нароттнень аф фкя лацонь мяльснон Россияв сувамать лангс и сонь составсонза улемань статузть лангс». Афкукс жа кафцьке ширетне примазь тя присягать, кода союзть колга договорть кемокстаманц.

Терек и Сунжа ляень ётка вастсь, конань пачк ётнесь Грузияв кись, тя пингть Россиять инголе ащи стратегическяй смузь мрхта кизефксокс. Тя вастсь ингушнень кядялоль аф сяда меле XVII-це векть песта — XVIII-це векть ушетксста. И. А. Гюльденштедтонь уликсонзон коряс Сунжа и Камбилеевка ляйхнень маласа ульсь лама ингушскяй веледа. Ангуштсь ульсь аймаконь кучкакс, кона содафоль «Оцю Ингушт» лем ала. «Оцю Ингушнень» эзда лия вастс ётайхне тисть «Ёмла Ингушт» од колония, конань кучкакс арась Шолхи велесь. Сяда тов мольфтеви ингушнень Назрановскяй долинати шаштомасна.

1781-це кизоня Назранка и Сунжа ляень марс педема вастса Ангушта аймакста сафне ушетфоль Назрань (Нясаре) велесь. Рузонь армиянь квартирмейстерсь Л. Штедер сяка кизоня тя вастса няфтезе вастонц ингушень заставать. Тяфта, 1781-це кизоня Назрановскяй долинать кирдезь эсь кядялост ингушне.

1784-це кизонь майста Грузиять моданзон мархта кеме кинь тиемать эрявиксшинц сюнеда ингушскяй Заур (Заурков) велеть видеса ульсь путф Владикавказскяй ваксарошсь.

Кавказскяй войнась

Ингушне тюрсть Кавказскяй войнаса Россиять ширеса и Имам Шамильть ширеса. Кой-мзяра пинге ульсть Шамилень исламскяй государствань кафта вилайетт — Арштинскяй и Галашкинскяй.

1858-це кизонь майста-июньцта Ингушетияса ётась Назрановскяй восстаниясь. Теенза туфталкс ульсь Кавказонь военнай власттнень решениясна тиемс ёмла ингушскяй хуторхнень вастса оцю населеннай пунктт. Мекпяли восстаниясь ульсь тапаф.

Терской областень картась

1860-це кизоня Кельме ширень Кавказть военнай управленияц ульсь нолдаф и Александр II императорть указонц коряс Севернай Кавказть шинь стяма ширесонза тифоль Терскяй область, коза сувасть Чеченскяй, Ичкерийскяй, Ингушскяй и Нагорнай окрукне.

1871-це кизоня Ингушскяй округсь марстоптфоль Осетинскяй округть мархта и тифоль Владикавказскяй округокс.

1888-це кизоня панчфоль военно-казачьяй управлениясь и Ингушетиянь модатне сувасть Сунжескяй казачьяй отделть лувксс. 1909-це кизонь 10-це июльста тифоль Назрановскяй округсь, конань ставкац ащесь Владикавказса.

Горскяй республикась

Россияса Октябрьскяй социалистическяй революцияда меле, 1917-це кизонь ноябрьста азфоль независимай Горскяй республикась, кона пуроптозень марс Кельме ширень Кавказть ламоц народонзон.

Владикавказса грузинскяй школань зданияса 5-це мартста кочкавсь Ингушетиянь исполнительнай комитетсь.

Мзярда Дагестанть занязе Генералть Деникинонь ушмовиенза Горскяй республикань правительствась нолдавсь и эвакуировандавсь Тифлису. Горскяй республикась лоткась улемда.

Гражданскяй войнась

Пятигорскяйса Тереконь нароттнень II-це съездсна (1918-це кизонь 1 — 18 мартста) признандазе советскяй властть и пуроптозе Терскяй советскяй республикать РСФСР-ть составса (июльста сявомок декабрти молемс Терскяй советскяй республикась сувсесь Кельме ширень-Кавказскяй Советскяй Республикати). Сонь ульсь сонцень Конституцияц и высшай органонза — Терскяй народнай советсь и СНК-сь.

1919-це кизонь февральста сявомок 1920-це кизонь мартти молемс равниннай Ингушетиясь ульсь заняф А. И. Деникинонь Россиять Юг ширдень Вооруженнай вийнзон мархта. 1920-це кизонь мартста Ингушетияса советскяй властсь ульсь кепотьф меки.

Горскяй АССР-ть картац

Советскяй властть кемокстамдонза меле, 1920-це кизонь мартста, Терскяй областсь ульсь срафтф, а Чеченскяй (кона сотфоль Ичкерийскяйть мархта) и Ингушскяй (кона сотфоль Нагорнайть мархта) окрукне арасть эсь видень территориальнай образованиякс.

1920-це кизонь 17-це ноябрьста ульсь азф Горскяй ССР-сь, кона меле ульсь тиф Горскяй АССР-кс ВЦИК-ть декретонц коряс 20-це январьста 1921-це кизоня. Эзонза сувасть Ингушетиясь и Чечнясь марса Карачаево-Черкесиять, Кабардино-Балкариять и Кельме ширень Осетиять мархта.

Сувамок СССР-ти

Ингушскяй АО-сь, 1931 кизось

ВЦИК-ть декретонц коряс 1924-це кизонь 7-це ноябрьста Горскяй АССР-сь ульсь нолдаф, сяс ульсь тиф Ингушскяй АО-сь РСФСР-ть лувксса.

15-це январьста 1934-це кизоня ульсь тиф Чечено-Ингушскяй автономнай область, кона 5-це декабрьста 1936-це кизоня арась Чечено-Ингушскяй АССР-кс.

Великай Отечественнай войнась

Германиять врьгятемац, 1942 кизонь июльсь-ноябрьсь

1942-це кизонь августть песта вермахтонь ушмовиенза сувасть Прохладный, Моздок, Ищерская рубежти. 1 — 28-це сентябрьста советскяй ушмовийхне ётафтсть Моздок-Малгобекскяй араламань операция. Мекпяли немецкяй командованиять планонза ульсть колафт — немецненди ашезь удала сувамс Закавказьяв и керомс СССР-ть Кавказскяй регионть эзда.

Ингушнень депортациясна

Лия васту ломаттнень эряма ётафтомать коряс платтне — «Чечевица» операцияти — ушедсть аноклама нинге 1943-це кизоть песта. Эста васенда арьсекшневсь ётафтомс депортированнайхнень Сибири — Новосибирскяй и Омскяй области, а стане жа Красноярскяй краи и Пандонь Алтаи. Меле сафоль мяльс депортировандамс Казахстану и Средняй Азияв.

1944-це кизонь 29-це январьста НКВД-нь оцюнясь Лаврентий Берия кемокстазе «Чеченецнень и ингушнень лия васту эряма ётафтомань порядкать колга инструкциять».

Депортациясь ушетфоль 23-це февральста 1944-це кизоня. Васенце суткаста жа велетнень-ошнень эзда ульсь ускф 333 739 ломань, тя лувксть эзда эшелону озафтфоль 176 950 ломань.

7-це мартста 1944-це кизоня автономиясь ульсь машфтф. Ингушетиять оцю пяльксоц (Пригороднай районть пандонь пялькстонза башка, кона тусь Грузинскяй ССР-ти) сувась Северо-Осетинскяй АССР-ти Назранскяй районкс.

Чечено-Ингушскяй АССР-ть одукс кеподемац

СССР-нь Верховнай Советонь Президиумть указонц коряс 16-це июльста 1956-це кизоня «Чеченецнень, ингушнень лангста спецпоселениянь ограничениять валхтоманц колга» валхтфтольхть депортированнайхнень лангста перяфксне и теест ульсь кода мрдамс меки шачема вастозост.

1957-це кизонь 9 январьста СССР-нь и РСФСР-нь Верховнай Советтнень Президиумсна примасть указт депортированнай нароттнень автономияснон одукс кеподемаснон колга, сяконь лувксса, чеченецнень и ингушнень.

Депортированнай эряйхнень мрдамаснон мархта Чечено-Ингушскяй АССР-сь ульсь мрдафтф меки.

Сувамок Российскяй Федерацияв

Республикань пуроптомась

Марнек ингушскяй народонь референдумсь ётась 1991-це кизонь 30-це ноябрьста государственностень мрдафтомань кизефксть коряс Ингушскяй Республикать РСФСР-ть лувксса тиеманц вельде. Референдумть коряс комиссиять уликонзон коряс, конат нолдафтольхть СМИ-са, 92 тёжянь ломаньцта (ингушнень оцю ломаньцнон 70 %) мяльть, тиемс эсь республикаснон, кемокстазь 97,4 % референдуму сайхнень эзда. 4-це июньцта 1992-це кизоня РФ-нь Верховнай Советсь прьняндась Закон «Ингушскяй Республикань тиевомать-пуроптомать коряс Российскяй Федерациять лувксса». Республикать тиевомац-пуроптомац сувафтфоль Российскяй Федерациянь народнай депутатонь Съездти кемокстаманди. 10-це декабрьста 1992-це кизоня народнай депутатонь Съездсь кемокстазе Ингушскяй Республикать тиевоманц и тись эрявикс полафткс Российскяй Федерациянь — Россиянь (РСФСР) Конституцияти 1978-це кизоня, Чечено-Ингушетиясь официальна ульсь явф Ингушскяй республика лангс и Чеченскяй республика лангс. Тя законць ульсь нолдаф 29-це декабрьста 1992-це кизоня «Российскяй газетаса» и сувась вийс 9-це январьста 1993-це кизоня официальнайста нолдамань шиста 10 шида меле. 25-це декабрьста 1993-це кизоня сувась вийс сембе народонь вайгялень максомать вельде прьняндаф Российскяй Федерациянь Конституциясь, кона кемокстазе Ингушскяй Республикать улеманц.

1992-це кизонь Осетино-ингушскяй конфликтсь

Депортацияста мрдамста меле ингушне вешсть мрдафтомс теест Кельме ширень Осетиянь Пригороднай районть.

1991-це кизонь 26-це апрельста РСФСР-нь Верховнай советсь примась «Репрессированнай нароттнень реабилитацияснон колга» закон, конань коряс ванондовсь ингушнень территориальнай реабилитациясна.

1992-це кизоня сёксенда модатнень явомаснон инкса кеподсь вооруженнай конфликт. Меколи ингольдень масторкитькссь ванфтовсь, а Кельме ширень Осетиянь пцтай сембе ингушненди (1989-це кизоня эряень сёрматфтомать коряс цють 35 тёжяньда лама ломань) савсь ётамс одукс тиф Ингушскяй Республикав эряма.

Боевикнень сувамасна Ингушетияв (2002)

2002-це кизонь сентябрьста Грузиять территорияста Ингушетияв сувасть Руслан Гелаевонь боевиконь отрядонза 300 ломаньда аф сяда кржа и ушедсть тюрема 58-це армиянь мотострелковай 19-це дивизиять частензон мархта; меле синь явсть сяда ёмла отрядга и кяшсть Чечняв.

Протесттне Ингушетияса (2018)

2018-це кизоня сёксенда Ингушетияса эвондасть каршек молемат Соглашениять каршес региоттнень ёткса масторкитькснень кемокстамаснон коряс, конань алу путозь кядьснон Ингушетиянь оцюнясь Юнус-Бек Евкуров и Чечнянь оцюнясь Рамзан Кадыров 26-це сентябрьста 2018-це кизоня, а тяфта жа сонь ратификациянц каршес Ингушетия Республикань Народнай Собраниянь депутаттнень мархта. Территориальнай кизефксть колга содафтомда меле, Российскяй Федерациянь Конституционнай судсь кадозе вийса уликс соглашениять, мезсь вятсь од марстонь таколдоматненди.

Эряйхне

Аф ваномок стака социально-экономическяй обстановкать и эряень оцю плотностть лангс, официальнай уликснень коряс Ингушетияса сембода вишкста касы эряйхнень лувкссна марнек Россиять коряс. Тяса китькстама: информациясь эряйхнень лувксснон коряс, кона максф 1936—1944-це кизотнень коряс и 1957—1989-це кизотнень — даннайхне Чечено-Ингушетиять коряс.

Эряйхнень лувкссна

1926	1931	1959	1970	1979	1987
75 133	↗81 900	↗710 424	↗1 064 471	↗1 153 450	↗1 235 000
1989	1990	1991	1992	1993	1994
↗1 275 513	↘189 340	↗192 642	↗194 105	↗195 821	↘194 171
1995	1996	1997	1998	2000	2001
↗263 092	↗282 342	↗291 209	↗296 294	↗340 028	↗445 443
2002	2003	2004	2005	2006	2007
↗467 294	↗468 773	↗475 645	↗481 565	↗486 970	↗492 669
2008	2009	2010	2011	2012	2013
↗499 502	↗508 090	↘412 529	↗414 524	↗430 495	↗442 255
2014	2015	2016	2017	2018	2019
↗453 010	↗463 893	↗473 340	↗480 474	↗488 043	↗497 393
2020	2021	2022	2023	2024
↗507 061	↗509 541	↗511 316	↗519 078	↗527 220

250 000

500 000

750 000

1 000 000

1 250 000

1 500 000

1926

1987

1993

1998

2004

2009

2014

2019

2024

Республикань эряйхнень лувкссна, Росстатть уликсонзон коряс, 515 564 ломань (2021). 2021-це кизоня ётафтф эряень сёрматфтомать даннаензон коряс республикаса эряйда ульсь 510 тёжянь. Эздост ошень эряйда 279 тёжянь (55 %), велеряйда — 231 тёжянь (45 %). Эряйхнень плотностьсна — 165,09 ломань/км² (2021). Ингушетияса Российскяй Федерациянь субъекттнень ёткса инь оцю шабань шачемась; тяфта, 1992-це кизоня республикаса эряйда ульсь 211 тёжянь ломань, 1998-це кизоня — 313 тёжянь, 2002-це кизоня — 467 тёжянь, 2021-це кизоня — 510 тёжянь ломань,.

Эряфонь кувалмось

Ингушетиять эряензон эряфсна сяда кувакат Российскяй Федерациянь лия субъекттнень коряс. 2024-це кизонь майста Россиянь президентсь Владимир Путин Республикань оцюнять Махмуд-Али Калиматовонь мархта васедемста китькстазе, што Ингушетиясь васенце вастса эряфонь кувалмоть коряс рейтингть эса — кучка показательсь 79,4 киза.

Интерактивнай диаграммась, коса путневи серцек аватнень и алятнень эряфснон кувалмосна РФ-нь субъекттнень эса 2021-це кизоть коряс.

Куване эряйхть

2020-це кизоня эряень сёрматфтомать коряс сембода лама ингушта — эряйхнень эзда 93 % (473 440 ломань). Лия национальносттнень ёткса инь лама — чеченецта — 2,4 % (12 240 ломань) и рузда — 0,64 % (3 294 ломань). Тяфта жа 2020-це кизоня эряень сёрматфтомать коряс — 3,6 % (18 404 ломань) ашезь сёрмада или атказасть сёрмадомс эсь национальностьснон.

Ингушне эряйхть республикать сембе вастованза. Чеченецне эряйхть аф оцю юромга Назраньса, Пседах и Аки-Юрт велетнень эса, а тяфта жа Сунженскяй районца. Русне эряйхть Сунжаса и Троицкяй, Нестеровскяй и Вознесенскяй станицатнень эса, а стане жа оцю ошнень эса. Туркатне эряйхть Вознесенскяй станицаса и Малгобекскяй районца. Лия этническяй юропнень аш эряма вастсна, коса эздост лама.

Национальнай составсь

Инь оцю этноссь — ингушне. Рузонь эряйхнень ламошкасна кадозь Ингушетиять XX-це веконь 90-це кизотнень песта; эсь ширдест, 1990-це кизотнень и 2000-це кизотнень васенце пялестост Ингушетияв састь лама ворьгодида (руз. беженец) Чечняста и Кельме ширень Осетияста, меле 2000-це кизотнень эзда 28 000 малава ингушта мрдасть меки Кельме ширень Осетияв, тяфта жа Чечняста ворьгяйхнень ламошкасна мрдасть меки.

Основной национальносттне:

Народ	Лувкссь, ломань (2002)	%	Лувкссь, ломань (2010)	%	Лувкссь, ломань (2020)	%
Ингушне	361 057	77,27 %	385 537	93,46 %	473 440	93 %
Чеченецне	95 403	20,42 %	18 761	4,55 %	12 240	2,4 %
Русне	5559	1,19 %	3215	0,78 %	3 294	0,64 %
Туркатне	903	0,19 %	732	0,18 %	242	0,047 %
Азербайджанецне	123	0,03 %	83	0,02 %	86	0,018 %
Кумыкне	136	0,03 %	118	0,03 %	82	0,017 %
Лезгиттне	108	0,02 %	76	0,02 %	72	0,015 %
Осетиттне	106	0,02 %	74	0,02 %	72	0,015 %
Кабардинецне	38	0,01 %	41	0,01 %	71	0,014 %
Аварецне	102	0,02 %	101	0,02 %	63	0,013 %
Балкарецне	39	0,01 %	41	0,01 %	50	0,012 %
Грузиттне	323	0,07 %	100	0,02 %	40	0,007 %
Украинецне	189	0,04 %	91	0,02 %	34	0,006 %
лиятне	3087	0,66 %	632	0,15 %	1351	0,26 %
ашезь тяште	262	0,06 %	2897	0,70 %	18 404	3,6 %
марнек	467 294	100,00 %	412 529	100,00 %	509 541	100,00 %

Кяльхне

Конституциять коряс официальнай кяльда республикаса кафта — ингушень и рузонь.

Административнай явомась

Ингушетиять административнай явомац (2018 кизоста сявомок)

Райоттне (муниципальнай райоттне) и республикань ошне (ошень окрукне)

№	Лемсь	Административнай центрась
1	Джейрахскяй районць	Джейрах велесь
2	Малгобекскяй районць	Малгобек ошсь
3	Назрановскяй районць	Назрань ошсь
4	Сунженскяй районць	Сунжа ошсь
I	Карабулак ошсь	Карабулак ошсь
II	Магас ошсь	Магас ошсь
III	Малгобек ошсь	Малгобек ошсь
IV	Назрань ошсь	Назрань ошсь
V	Сунжа ошсь	Сунжа ошсь

Эрямопингсь

Тяниень Ингушетия Республикать государственностенц одукс кеподемста и тиевомста эзонза сувсесть ингольдень Чечено-Ингушетиянь колма административнай райотт: Сунженскяй, Малгобекскяй и Назрановскяй. 1992-це кизоня Республикань Оцюнять Руслан Аушевонь указонц коряс тифоль стане жа Джейрахскяй районць.

Пряошсь

Республикать тиемдонза меле сонь административнай центрац ульсь Назрани ошса. 2000-це кизоня Ингушетиянь пряошекс арась тянкса строяф Магас ошсь.  — Российскяй Федерациянь субъектть сембода кржа эряй мархта административнай центрац.

Эряма васттне

Ингушетияса 122 населеннай пункт, тяконь лувксса 5 республикань ошт и 117 велет.

Эряма вастт, коса 5 тёжяньда лама эряйда.

Назрань	↗122 350	Экажево	↗27 224	Яндаре	↗9999
Сунжа	↘62 078	Кантышево	↘16 783	Магас	↗13 601
Карабулак	↗43 037	Плиево	↗16 440	Верхние Ачалуки	↘8506
Малгобек	↘36 480	Сурхахи	↗13 153	Галашки	↘7285
Нестеровская	↘17 981	Барсуки	↘7601	Долаково	↗7158
Троицкая	↗23 078	Сагопши	↗12 663	Инарки	↗7383

Кода лядяф государствась и политикась

Конституциясь

Конституциясь — Ингушетия Республикать основной законоц. Примаф марстонь вайгялень максомать вельде 27-це февральста 1994-це кизоня. Васенда ащесь 114 статьяста. Ингушетиянь Конституциять башка ширензон эзда фкясь ащи сянь эса, што ся пингть сон тякосель странать сембе региональнай конституциятнень эзда, кона примафол сембе народть мархта, лиякс мярьгомс, референдумса, а аф кодамовок законодательнай (представительнай) органца.

Оцюнясь

Президентонь оцю кудсь Магас ошса.
Тяса ащи Ингушетия Республикань Оцюнять администрацияц.

Республикань инь оцю должностьса ащи оцюнясь, конань кочксесазь Ингушетия Республикань Народнай пуромксонь депутаттне 5 кизос.

Народнай пуромкссь

Ингушетия Республикань народнай пуромкссь — Ингушетиянь законодательнай орган (парламент), ащи 21 депутатста. Кочксеви марстонь вайгялень максомать вельде. Народнай пуромксти оцюнякс ащи Народнай пуромксть председателец.

Конституциять коряс, Ингушетия Республикань Народнай пуромксть тевонзонды кандови:

1. Ингушетия Республикань закоттнень примамасна;
2. Ингушетия Республикань Конституцияти полафтксонь сувафтомась, тя Конституциять васенце главанц башка;
3. Местнай самоуправлениянь оргаттненди кочкамань ётафтомань порядкать ладямац и эсь полномочиянзон коряс местнай самоуправлениянь оргаттнень тевонь вятемань порядкаснон ладямац;
4. Ингушетия Республикать административно-территориальнай устройстванц ладямац и сонь порядканц полафтомац;
5. Республиканскяй бюджетть и сонь пяшкодеманц колга отчётть кемокстамасна;
6. Ингушетия Республикань социально-экономическяй виензамань программатнень кемокстамасна;
7. Ингушетия Республикань Оцюняти согласиянь максомась, конань коряс теенза ули кода путомс Ингушетия Республикань Правительствати Оцюня;
8. Ингушетия Республикань Конституционнай судонь Председательть, председательть полафтыенц и судьятнень путомасна;
9. Ингушетия Республикань Верховнай судонь, Арбитражнай судонь, районнай судонь председателень и председателень полафтыень должносттненди путоманди кандидатурань согласованиясь;
10. Ингушетия Республикань договорхнень кемокстамаснон и лоткафтомаснон, а стане жа Ингушетия Республикать масторкитьксонь полафтомать колга соглашениянь кемокстамась;
11. Ингушетия Республикань оцюнянь и Ингушетия Республикань Народнай пуромксонь депутатонь кочкамань шить ладямац;
12. Ингушетия Республикань Избирательнай комиссияв сувсихнень пялеснон путомасна;
13. Ингушетия Республикань референдумть ладямац случайста и порядкста, конат ванфт республикань конституционнай законца;
14. Налогонь и кочкафксонь путомась, конат федеральнай законть мархта кандовихть Российскяй Федерациянь субъекттнень компетенцияс, а стане жа синь сявомань порядкаснон ладямасна;
15. Ингушетия Республикань аф бюджетнай и валютнай фонттнень тиевомань и покодемань порядкатнень ладямасна, ня фондонь средстватнень карьхцямаснон колга отчеттнень кемокстамась.;
16. Ингушетия Республикать собственностенц мархта управлениянь и распоряжениянь порядкась;
17. Федеральнай закоттнень, Конституциять и Ингушетия Республикань закоттнень коряс лия полномочиятнень тиемасна.

Правительствась

Государственнай властень высшай исполнительнай органкс ащи Ингушетия Республикань Правительствась. Правительствань оцюнясь — Ингушетия Республикань Правительствань председательсь, кона путневи Ингушетия Республикань Оцюнять мархта Ингушетия Республикань Народнай пуромксть согласиянц коряс. Ингушетия Республикань Правительствав сувсихть Ингушетия Республикань председательсь, сонь полафтыенза и министратне.

Ингушетия Республикань Правительствась:

1. Вяти эсь полномочиянзон коряс Ингушетия Республикань исполнительнай властень оргаттнень лангса руководствать.
2. Арьсекшни и ётафни эряфс Ингушетия Республикать социально-экономическяй и национально-культурнай ширде виияфнеманц коряс программат.
3. Аноклакшнесы и пяшкотькшнесы эряфс республиканскяй бюджетть.
4. Тиенди тефт Ингушетия Республикать марстонь социально-экономическяй касоманц-виияманц коряс, ётафни государственнай фкя политика финанснень, наукать, тонафнемать, здравоохранениять, социальнай обеспечениять и перьфпяльть ванфтоманц эса.
5. Законодательствать мяльса кирдезь примси мерат ломанть и гражданинть праванзон и воляшинзон эряфс ётафтомаснон, обеспечендамаснон и араламаснон коряс, общественнай порядкать ванфтоманц и преступностть каршес тюремать коряс.
6. Вятьсы и азорондай Ингушетия Республикать собственностенц лангса, а стане жа федеральнай собственностть, кона максф Ингушетия Республикать кядялу.
7. Кемоксни исполнительнай властень федеральнай оргаттнень мархта договорхт вятематнень и полномочиятнень явомаснон колга, а стане жа соглашеният эсь полномочиянзон пяльксснон максомаснон колга.
8. Вятьсыне лия полномочиянзон, конат вановихть Ингушетия Республикань Конституцияса и законца, исполнительнай властень федеральнай оргаттнень мархта соглашениятнень эса, конат вановихть Российскяй Федерациянь Конституциять 78 статьясонза.

Судебнай властсь и прокуратурась

Ингушетия Республикаса ули Ингушетия Республикань Конституционнай Суд, Ингушетия Республикань Верховнай Суд, Ингушетия Республикань Арбитражнай суд, районнай судт и мировой судьят.

Моданза

Моданкса сялондоматнень инкса республикать площадец эрь кодама источникнень эса няфневсь аф фкя лаца 2600 км² сявомок 3800 км² молемс, тяка пингть сяда сидеста —3400 — 3600 км². 2017-це кизонь официальнай даннайхнень коряс республикать площадец ульсь 3628 км². Ингушетиянь и Чечнянь оцюнятнень ёткса масторкитьксть колга соглашениять алу кядень путомада меле 2018-це кизоня республикать моданзон площадец арась 3123 км². Ингушетия Республикать официальнай сайтса сяда товонга макссеви 3600 км².

Модань инкса сялондомась Кельме ширень Осетиять мархта

Севернай Осетиять и Ингушетиять ёткса ули моданкса сялондома — Ингушетиясь сялонды Пригороднай районть шинь стямань ширень историческяй пяльксонц инкса, Владикавказ ошть види трванц и Моздокскяй районть пяльксонц инкса, лиякс теенза мярьгихть «Кескемскяй коридор» или «Моздокскяй коридор» — тяйняня мода васта, кона явфтсы Ингушетиять Кабардино-Балкариять эзда и конань лангса ащи ингушень Кескем велесь.

Ингушетиянь Конституциять 11-це статьясонза кемокстаф, што государствать инь эрявикс тевоц «Ингушетиять эзда аф закононь коряс нелькф территориять политикать вельде мрдафтомац и Ингушетия Республикать моданзон ванфтомасна».

Грузиять мархта масторкитькссь

Ингушетиять Грузиять мархта масторкитьксоц пцтай 45 вайгяльбе. Сон ётни Главнай Кавказскяй панда карязть эзга, Республикань Джейрахскяй районть лямбе ширдень границанзон эзга. Тяса масторкитьксть ваксонь ущельятнень эса ащихть велетне инь оцю ингушскяй фамилиятнень-тейпнень мархта: Барахоефнень, Баркинхоефнень, Гелатхоефнень, Евлоефнень, Картоефнень, Коккурхоефнень, Оздоефнень, Хамхоефнень, Холухоефнень, Цороефнень, Шанхоефнень и лиятнень.

Республикань символхне

Масторкотфсь

Ингушетиянь масторкотфсь

Масторкотфть арьсемац ушедсь 1994-це кизонь январьста, республикать тиемдонза меле кафта кизонь ётазь. Кемокстафоль сон 15-це июньцта 1994-це кизоня. 1999-це кизоня масторкотфсь аф ламода полафтфоль.Масторкотфть арьсезе писательсь, профессорсь, академиксь, учёнай фольклористсь, Ч. Ахриевонь лемса НИИ-ть директороц Дахкильгов Ибрагим Абдурахманович:

«1-це статьясь. Ингушетия Республикань государственнай масторкотфсь ащи акша тюсонь прямоугольнай котфокс, конань кучкаса путф якстерь покаряв формаса солярнай знак, конань эзда молихть колма сюролдат, эздост эрьсь аделави кругонь апак аделак контурса. Масторкотфть келец и кувалмоц фкя-фкянди кандовихть — 2:3. Флагть вярце и алце пяльксонц кувалмосонза улихть сянгяря тюсонь кафта китькст, эрсь эздост флагть келенц фкя котоцекс пяльксонц келец. Солярнай тяштьксть потмоширдень кругонц радиусоц тисы флагть келенц фкя кефкиеце пяльксонц. Солярнай тяштьксть сюролданзон песа апак аделак шарксть радиусоц тисы флагть келенц фкя комсь ветиецекс пяльксонц. Китьксть келец, кона тии солярнай тяштьксть шарксонц перьф, тисы флагть келенц фкя кефкиеце пяльксонц. Солярнай тяштьксть сюролданзон келеснон тисы фкя комосьцекс масторкотфть келенц пяльксонц.

Солярнай тяштьксть сюролданзон эзда фкясь ащи вярде алу масторкотфть кувалмонц коряс и ащи Ингушетия Республикань Государственнай масторкотфть вярце пялькссонза. Аф аделаф шарксть вярце точканц ёткса сюролдатнень песа и солярнай тяштьксть лангонь кругонц ёткса ётксь тисы флагть келенц фкя вейхксоцекс пяльксонц. Сюролдатне ащихть фкя лаца солярнай тяштьксть сембе шарксонц эзга и ладяфт частонь стрелкать молеманц каршес».

Гербсь

Ингушетиянь гербсь

Примазе Республикань Народнай Пуромкссь 1994-це кизонь 26-це августста. Ингушетия Республикань Государственнай гербть колга Законть коряс:

«Ингушетия Республикань государственнай гербсь няфти шаркс, конань кучкаса келептьф паця мархта куцькан, — благородствань и аф пелемань, смузьшинь и верностень символ. Гербть кучкаса вярде алу Кавказонь панттнень фонца ащи Овлуронь боевой башняц, кона тяштькстасы кунардонь и од Ингушетиять. Овлуронь башнянц кержи ширеса няфтьф Столовай пандсь („Маьт лоам“), види ширеса Казбек пандсь („Башлоам“). Панттнень и башнять вельхксса няфтьф шить пялец, кона ащи менель тёкшса, конань эзда лисихть алу сисем виде сюролдат. Ёмла шарксть алуце пялькссонза няфтьф солярнай тяштькс, кона няфнесы Шить и Модать пефтома шаромаснон, семботь ёткса сотксть и пефтомошить. Солярнай тяштьксть дугакс ащи сюролданза шарфтфт частонь стрелкать молеманц каршес. Оцю и ёмла шаркснень ёткса сёрматфкс: вяре — „Ингушетия Республика“, ала — „ГӀалгӏай Мохк“. Ингушетия Республикань государственнай гербсь архтф вете тюсса: акша, валда-сенем, сянгяря, якстерь и зрнянь-тюжя. Акша тюссь тяфти ару мяльхть и тефт, конат ладяйхть Ингушетиянь народти; валда-сенемсь — менельть, космость символоц; сянгяря тюссь няфтсы Ингушетиять моданц природанц, козяшинц и плодородиянц, а стане жа — тя Исламть символоц; якстерь тюссь — тя символ ингушскяй народть лама сяда кизонь кувалмоса тюреманцты эряфть инкса; тюжя тюссь — Шить тюсоц, кона кази эряф ломанти и перьфпяльти».

Гимнась

Ингушетиянь гимнась кемокстаф 1993-це кизоня. Музыкань сёрмадысь — Р. М. Зангиев. Тя гимнать валонзон сёрмадозень ингушскяй поэтсь Рамзан Цуров. Сяльде, 2005-це кизоня, кемокстафоль Ингушетиянь од гимнась. 2010-це кизоня официальна ульсь мрдафтф 1993-це кизонь гимнать вариантоц.

Культурась

Мялень салай мазы васттне

Ингушетияса лама аф фкя лацонь мялень салай мазы вастта: пялесна эздост ащихть виде (пандфтома) васттнень эса, а пялесна — Пандонь Ингушетияса. Республикаса тиендевихть туристическяй маршрутт, штоба сяда лац содафтомс регионть культуранц и историянц мархта.

Мемориалхне и мялямгефне

Назраньца мяляфтомань и славань мемориал

Республикаса инь оцю мемориальнай комплекссь тя — Мялямонь и славань мемориалсь, кона ащи Назраньса и лемтьф инь эрявикс мяляфтомань шитненди, Ингушетиять эрямопингонц трагическяй и торжественнай событиятненди. Мемориалонь ансамбльса лац сотфтф марс архитектурась и природась. Комплексонь мялямгефне и композициятне няфнесазь историческяй событиятнень и няфнесазь содаф ломаттнень, конат путсть оцю путкс ингушскяй государственностть тиевоманцты и виияманцты. Сон тяфта жа няфтьсыне Ингушетиять эрямопингонц основной этапонзон: Россияти сувамста тячиень шити самс.

Мялямонь и славань мемориалти пяльксокс, кона кеподи кучка вастса, ащи лия мялямгевсь Репрессиянь жертватненди мемориальнай комплекссь. Сон ушетфоль нинге тяда инголе, 1997-це кизонь февральста. Экспозициять юрса — материалхт (картинат, фотографият, документт) 1944-це кизоня нароттнень депортацияснон и 1992-це кизонь осетино-ингушскяй конфликтть колга. Комплекссь строяф вейхкса ингушскяй башня лаца, конат сотфт марса и ашкотфт сялги сереса, кона няфти вейхкса депортированнай нароттнень лангс. Мемориалсь сувафтф Россиянь художествань Академиянь реестрав.

Депортациянь жертватненди мялямгев

Архитектурань памятникне

Тхаба-Ерды храмсь

• Тхаба-Ерды храмсь (ингуш. Ткъобӏа-Ерды) — Российскяй Федерацияса кунардонь христианскяй храм, архитектурань памятник, кона эвондась VIII — IX-це векнень малава. Реставрациянь проектть авторонц Л. А. Химсашвилинь мяленц коряс сооружениясь аф весть полафнесь и минь пингозонк пачкодсь стамкс, кодамокс сон ульсь XIV—XVI-це векнень пингста. Храмть карнизонза и арканза мазоптфт эрь кодама сёрмаса — касыксонь плетёнкаса, тя орнаментонь вид, кона келиста васьфневи грузинскяй архитектураса. Храмть лама эсь лацонь ширедонза (тяфтапт кода, интерьерсь, стрельчатай аркаса явомась, шинь стяма ширень стенать барельефоц, кода марафт кефне и лиятне), конат тяфтамот жа, кодамот пандонь Ингушетиянь культовай сооружениянза. Храмть кудбряц инголи ульсь кафта пяльксонь и ащесь шифернай сланецста и мзярошка кевонь плитаста. Улемок тяфтама инь оцю сооружениякс пандонь Ингушетияса, Тхаба-Ерды храмсь няфнесы ингушскяй и грузинскяй зодчествань культовай зданиянь архитектуратнень ёткса сотксть. Храмсь лама пинге ульсь инь оцю культовай сооружениякс пандонь Ингушетияса, сонь духовнай и культурнай центракс.
• Борга-Каш мавзолейсь (ингуш. Боргӏа-Каш) — Ингушетияса сембода кунардонь мусульманонь памятникнень эзда фкясь, кона ванфтовсь. Борга-Каш мавзолейсь — федеральнай смузь мархта эрямопингонь и культурань памятник, кона аралави государствать мархта. Ащи Плиева велеть кельме и ши валгома ширень уша-песонза, Сунжи ляйть кержи трвасонза, панда шамаса, кона ащи Сунженскяй панда карязти отрогокс (оцюведть уровененц вельхксса сересь 652 м), содаф Ингушетияса кода Шейхонь пандоц. Ланга ванозь мавзолейсь ащи правильнай формань кубкс полушариянь формаса купол мархта. Сувама вастоц арка лаца.
• Мятцелень иняру вастсь — колма культовай сооружениятнень эзда фкясь, конат ащихть Маьт-лоам панда пряса. Сонь улихть виде ужа мархта юроц и ступенчатай кафта шири валги кудбряц, бокова ширде — кафта сувама вастонза-арканза.
• Вовнушки велесь — XVI — XVII-це веконь башня лаца кутт, сооружениянь комплекс, кона сувси Джейрахско-Ассинскяй государственнай историко-архитектурнай и перьфпялень музейти-заповедникти.
• Мецхал велесь — башня лаца сооружениянь комплекс, кона ащи Маьт-лоам пандть острогсонза. Башнянь тя комплекссь ульсь административнай и культурно-экономическяй кучка вастокс мекольдень кучка веконь Джейрахско-Мецхальскяй пандонь-ингушскяй обществати.
• Эрзи велесь — Эрзи (ётафтови кода «куцькан») лувондови аф фкя кемотть эряма и боевой башнят, конат вачкафт кевста и путфт видеста материкть лангс. Боевой башнятнень сересна 25-30 метрат, алуда стенатнень келесна 6 метрати самс.

Ингушетиянь мялень салай мазы васттне

Эрзи аулть боевой башнянза.		Ляжги велеть вельхксса башнятне Армхи лаймоса.		Таргим аулсь.		Вовнушки замоксь-ваксарошсь.

Заповедникне

• Джейрахско-Ассинскяй государственнай историко-архитектурнай и перьфпялень музейсь-заповедниксь — эзонза сувсихть пандонь васттне, и перьфпялень тяфтама памятникне, кода Таргимскяй лаймось, Армхи и Асса ляйхнень лотка вастсна.
• Эрзи — заповедниксь Джейрахскяй аймакса. Панчфоль 21-це декабрьста 2000-це кизоня. Ащи Оцю Кавказть кельме ширдень панда шамасонза, Джейрахско-Ассинскяй котловинца и сонь вакссонза ащи кельме ширеста Скалистскяй панда карязть пандонзон эса. Келец-кувалмоц — 5 970 га.

Заказникне

• «Ингушский» заказниксь — ащи Ингушетиянь Сунженскяй и Джейрахскяй райоттнень эса. Тоса аралавихть, ванфтовихть юмамада-арамада: зубрсь, турсь, вирень тувось, косулясь, сернась, безоаровай сявась. Заказникть видеса тяфта жа ванфтовихть эрямопингонь и кунардонь культурань памятникне. Заказникть келец-кувалмоц 70 000 гектар.

Театратне

• И. М. Базоркинонь лемса государственнай драмань театрась
• «Современник» государственнай рузонь музыкально-драматическяй театрась
• Ёмла ваныень ингушень театрась.

Музейхне

• Т. Х. Мальсаговонь лемса краеведениянь ингушень государственнай музейсь
• Тюремань и покодемань славань Малгобекскяй музейсь
• Репрессиянь жертватненди лемтьф мемориальнай комплекссь
• С. Орджоникидзень музеец-квартирац
• Г. С. Ахриевонь мемориальнай кудоц-музеец
• Геройть Шериповонь кудоц-музеец
• Назрань ошень тюремань и покодемань славань музейсь

Литературась

Ингушскяй кяльть сёрмац тифоль Россияса Октябрьскяй революцияда меле (васенда арабицать коряс, меле латиницать и мекпяли, кириллицать коряс, кона ноляви тевс тяниень пингти самс). Ингушскяй литературась арась советскяй литературати пяльксокс. Васенце произведениятне каннесть тонафтомань характер. Васенце ингушскяй писательхнень ёткста ули кода явфтомс Чах Ахриевонь. Сяльде ушедсть лисендема прозань жанраса произведеният (тяфтапт, кода Х. Осмиевонь очерконза («Алятне и иттне»), «Шобдаста валдти» и «Зиян» Идрис Базоркинонь азксонза и стак тов), пьесатне (Заурбек Мальсаговонь «Кяжень Пандома» пьесац). Тя пингть тяфта жа касонды рузонь кяльста ингушскяйти ётафтф произведениятнень лувкссна. Эсь тёкшенц ингушскяй литературась сатозе 1930-це кизотнень, мзярда ульсть печатлафт тяфтама драматическяй произведениятне, кода Орцхо и Дошлуко Мальсагофнень «Перелом» пьесасна, Х-Б. Муталиевонь «Культармеецт» пьесац, Д. Д. Мальсаговонь «Арамхи» историческяй поэмац и Х.-Б. Муталиевонь «Керда хьаьший» («Од инжихть») поэмац. Ня кизотнень эвондакшнихть и ават-литераторхт, синь ётксост стирень моронь морайсь Фатима Мальсагова. 1930-це кизотнень песта, Великай Отечественнай войнать ушедомда инголе популярнай жанракс арасть шачема-касома масторть и шачема перьфпяльть колга поэзиясь. Ингушскяй литературать касомац-вииямац ульсь сязьф и ламос лоткась ингушнень депортациядост меле 1944-це кизоня. Кой-мзярошкада эрекламась ушедсь аньцек Чечено-Ингушскяй АССР-ть одукс кеподемдонза меле 1957-це кизоня.

Музыкась

Ингушень музыкальнай фольклоронь жанратне явондовихть колма видга: башка инструментальнай музыка (ингуш. ладугӏа йиш); кштиманди, якаманди, джигитовканди музыка (ингуш. халхара йиш) и вайгяльса морамань музыка (ингуш. илли). Илли — вайгяльса морамань традиционнай жанратнень эзда фкясь, нят — героическяй, эпическяй, военнай тематикань коряс моронь кой-кодама напеват. Илли морайть лемоц илланча, иллиалархо. Кода ладяф «илли» морави кодамовок морамбялень коряс (конань вельде морай сонць морайсь). «Илли» — «Мора», «Ашар» — «Музыка», «Мукъам» — «Мелодия», «Йиш» — «Напев», «Агаилли» — «Нюрямонь мороня». Традиционнай морамбяльхне — дахчан пандар (мерза-пондар) (щипковай колма струнаса), 1атхьокх-пандар (ч1ондарг) (смычковай колма струнаса), гармоника (ингуш. кахат-пандар), баян, аккордеон, зурна, барабан-доуль (ингуш. фата, гавал), бубен (ингуш. жирг1а, жиргиа, теп.)

— Государствань бюджетонь учреждениясь «А. Э. Хамхоевонь лемса филармония»

Кштимась

Ингушетия Республикань кштимань содаф коллектифне:

• «Ингушетия» народнай кштимань государственнай ансамбль
• «Сунжа» идень-од ломанень кштимань ансамбль
• Ингушетиянь зорятне

Ярхцамбялень пидемась-панемась

Ингушнень и чеченецнень фкя инь эрявикс и основной ярхцамбяльсна — сивольсь. Ярхцамбяльхнень ламошкасна аноклакшневихть учань сивольста, траксонь сивольста или нармоньцта. Кельгома симомбяльсь — туста и пси чайсь.

Лама ярхцамбяльда аноклакшневи кукурузаста, мичкста, тикласта, черемшаста. Гарнирхне сидеста перень сёрот и ямкст.

Ламоц ярхцамбяльхненди кайсихть шурьхкя, чеснок, перец. Кода и Кавказонь нароттнень лия кухнясна, ингушскяй ярхцамбялень пидемась-панемась лама ноляй тевс кяжи приправат и тишенят.

Кшись — сяда сидеста, акша.

Ингушненди пяк кельговихть шапаксста ярхцамбяльхне-пярякатне, потмозост путневи мичке, модамарь, тикла (чапилгаш (чӏаьпилгаш — инг.), хынгалыш), кукурузань почфста цюкорнят (сискал), конат сивондевихть мичке и вайвелез мархта (тлоа-берх) или мичке и шяняфтф вай мархта (кӏолд-даьтта, кӏодар (кӏодар — инг.)). Тяфта жа содафт сиволь мархта галушкатне — дулх-хьалтӏам, конат сивондевихть чесноконь, черемшань соус мархта и «берх» модамарень соус мархта.

Киноиндустриясь и киноискусствась

• «Магасфильм» киностудиясь
• «Магас» кинокомпаниясь
• Творческяй пуромкссь — «Зокх»
• «Барт» театрань и кинонь студиясь

Кемамась

Келиста васьфневи кемамась — суннитскяй толконь исламсь, тяфта жа улихть православнайхть. Регистрировандаф 15 мусульманскяй община, 45 мечеть, 26 медресе — синь касомаснон-вииямаснон инкса отвечай Ингушетиянь мусульматтнень Духовнай управлениясна. Сунжаса ули Исламскяй институт, а Малгобекса — «Хаматхана-Хаджи Барзиевонь лемса Ингушскяй исламскяй университет».

Республикаса улихть колма православнай храпт: Сунжаса, Карабулакса и Троицкяй станицаса.

Ингушскяй тейпне

Тейпсь — тя вайнахскяй народонь (ингушнень и чеченецнень) родонь-плямань организациянь единица. Тейпсь — тя фкя-фкянь мархта сотф мзярошка род (ингуш. гӏар), кода лидеста ладяф ни, географиянь принцип коряс. Ингушень фамилиятнень сидеста, но аф фалу, улихть лемсна наькъан. Цёранза и уноконь уноконза лемневихть къонгаш. Ингушетияса азорондай суфийскяй исламсь, конань лама тарадонза. Эрь тяфтама тарадсь аф фалу сотф кодама-бди тейпти и лемневи вирд.

Ингушне кода народ явондовсть XIX-це векть самс мзярошка обществава (шахарова), конат и тиезь ингушень народть. Ингушень народсь тиевсь тяфтама обществаста:

1. Галгаевскяй (ГӀалгӏай — инг) или Хамхинскяй ломаньтналсь (ГӀалгӏай шахьар)
2. Цоринскяй ломаньтналсь (Цхьорой шахьарсь)
3. Мецхальскяй (Фяппинскяй) ломаньтналсь
4. Джейрахань ломаньтналсь (Дж1айрхой шахьар)
5. Орстхоевскяй шахарсь

XIX-це векста тейповай марстомоматнень — шахархнень вастс састь территориальнай обществатне — Назрановецне, Галашевецне и Лоамаройхне.

Хамхинскяй ломаньтналсь ащесь лама тейпста Хамхой, Барахой, Леймой, Тумхой, Баркинхой, а тяфта жа тяфтама фамилияста кода Аушефне, Ужахофне .

Цхьорань ломаньтналсь аф фкя лацоль. Тоза сувсесть эрь кодама тейпт, конат ашесть уле Цхьорой тейпонь ломанькс. Кепотьксонди, Циздой, Йовлой, Оздой и лиятне. Сяс сонць Цхьорой тейпсь аф лама лувксонь коряс, хуш сонь лама родовой тарадонза (ингуш. наькъаш).

Фаьппинскяй ломаньтналсь ащи стане жа аф фкя тейпста. Фаьппинскяй ломаньтналста лисикс лувондови и Юнус-Бек Евкуровонь Ингушетиянь ингольдень президентть тейпоц (Ольгеттхой тейпсь).

Джейрахань ломаньтналсь ащи 5 плямаста: Ахриефнень (Охр-наькъан), Борофнень (Бор-наькъан), Льянофнень (Льян-наькъан), Цурофнень (Чур-наькъан) и Хаматханофнень (Хаматхан-наькъан).

Сембода лама ломаньда ингушень тейпса — Евлоефне (Йовлой), омбоцесь лувксс коре —Оздоефне. Тя тейпсь Цхьоринскяй шахарста. Тяфта жа васенце вететненди сувсихть тейпне — Хамхой, Леймой, Баркинхой и лиятне.

Тяниень пингть тейпненди Ингушетиять эряфса путф оцю васта. Аф кунардонь пингти республикаса властть кирдезь кядялост Аушефнень тейпсна — Оувша-наькъан (Р. С. Аушев) и Борофнень — Бор-наькъан (М. М. Зязиков, Мурат Магометович каннесы тядянц фамилиянц, хуш сонць Боровонне). Но «улемс властекс» Ингушетияса лувондови относительнай понятиякс, сяс мес республикать территорияса тянемс работайхть адатт и республикань оцюнятнень кочксесыне аф народсь, а путнесыне Кремлясь.

Экономикась

Марстонь характеристикась

Ингушетиясь — аграрно-индустриальнай республика. Модатнень эзда 60 % нолдаф велень хозяйствати, синь эздост пялесна — соксеви модат.

Экономикась — лафча и вельф дотация лангса. Эсь доходонь пялькссь Ингушетия Республикаса пачкотькшни аньцек 15 %. Велень хозяйствань продукциянь нолямань объёмтнень коряс Россияса занцесы 37-це вастть. Валовай региональнай продуктть коряс (ВРП) российскяй региоттнень лемлувксса Ингушетиясь занцесы 85-це вастть. 2021-це кизоня Ингушетиясь сёлгозе РФ-нь региоттнень рейтингснон работафтома ащи ломаттнень коряс 30,5 %.

Велень хозяйствась

Ингушетия Республикаса модатне равжет, лац раштайхть. Климатсь континентальнай. Природно-климатическяй условиятне ладяйхть велень хозяйствать виияфтоманцты. Велень хозяйствати лемтьф модатне занцесазь территориять 60 %, синь эздост пцтай пялесь — соксеви мода.

Основной велень хозяйствань культуратне нят — сёротне, шиньжаромась, перень сёротне, модамарьсь. Вииякшни тяфта жа винамарень и табаконь касфнемась, кукурузань, тозеронь, пинемонь, шужень, сахарнай якстеряпсонь касфнемась. Экономикань государственнай секторть пяльксоц тии 25 % аф сяда лама, лядыкс пялькссь сашендови собственностень лия форматнень лангс. Республикаса покоди пцтай 900 сокаень-видиень фермерскяй хозяйства. Велень хозяйствань модатне келемкшнихть 222,2 тёжянь гектарс, тяконь лувксса соксеви паксятне 112,2 тёжянь гектарс, лама кизонь касыксне 2,5 тёжянь гектарс, лядема васттне — 9,6 тёжянь гектарс, жуватань ванома васттне — 97,9 тёжянь гектарс. Республикаса лувондови велень хозяйствань 115 оцю и средняй предприятия.

2008-це кизоня Ингушетиясь примась участия «Зрнянь сёксе-2008» российскяй агропромышленнай выставкаса.

Жуватань касфтомась

Жуватань кирдемась ащи оцю сюра мархта жувататнень касфтомаста лофцонди и сиволенди, а стане жа учань и сявань кирдемась.

2021-це кизонь февральть пенцты оцю сюра мархта жуватада 68 531 пря (+2,0 %), тяконь лувксса 35 341 тракс (+5,5 %). Учатнень и сяватнень лувкссна 285 896 пря (+32,1 %), мезсь сотф личнай подсобнай хозяйстватнень лувксснон касомать мархта, конат заняфт тя жувататнень касфтомаса. Нармонень лувкссь 348 тёжянь пря (+2.6 %). Февральста Ингушетияса ульсь нолдаф 8 928,9 тонна лофца (11,3 % сяда лама), лофцть оцю касомац сотф стадать одкстоптоманц мархта (сембе категориянь хозяйстватнень эса вешевихть лафча жувататне и вастозост рамсихть лама продуктивнайхть).

Сёронь касфтомась

2020-це кизонь 10-це августти сёрось ульсть тяляфт 23,5 тёжянь гектар площадьса (43,6 %), сёронь валовай урядамась ульсь 61,1 тёжянь тонна средняй урожайностсь пингста 25,9 центнер гектарста (2019-це кизоня средняй урожайностсь ульсь 12,5 центнер гектарста). Аделаф озимой шужть урядамац: урядаф 8,1 тёжянь гектар, тяляф 23,2 тёжянь тонна сёра средняй урожайностть коряс 28,7 центнер гектарста (кизода инголе 6,1 тёжянь гектарста кочкафоль 8,4 тёжянь тонна шужярь 14,9 центнер гектарста урожайностть пингста). Аделсеви озимой тозеронь урядамась: тяляф 12,4 тёжянь гектар, или 91,4 % планть эзда, кочкаф 33,9 тёжянь тонна сёра средняй урожайностть коряс 27,4 центнер гектарста (кизода инголе 13,0 тёжянь гектарста сявфоль 17,2 тёжянь тонна тозер, урожайностсь ульсь 14,2 центнер гектарста). Урядави озимой рапссь, конань алу тядде максф 488 гектар (2019-це кизоня рапс регионца ашесть витце). Урядаф ни 75 гектар, кочкаф 82,5 тонна тя культурада, средняй урожайностсь 11,0 центнер гектарста.

Марлювонь сад

Садонь касфтомась

Ингушетиясь сувась иможень и фруктань касфтомать коряс Россиянь основной региоттнень ёткс.

2022-це кизоня иможень-марень культурань валовай кочкамась пачкодсь 64,4 тёжянь тоннати, мезсь 71,9 процентта сяда оцю 2021-це кизоть коряс. Эздост марьда кочкафоль 64,1 тёжянь тонна. Марень рекорднай урожай касфтсь «Сад-Гигант Ингушетия» ООО-сь (58,1 тёжянь тонна марь 680 центнер гектарста урожайностть пингста). Тяда башка, пакарня мархтотнень урожайсна (абрикость, черешнять, сливать) ульсь 165 тонна (касомась 92,3 процентта). Тяфта жа инезида кочкафоль 126 тонна (касомась 36,9 процентта).

Бахчевой культуратнень валовай кочкамасна 2022-це кизоня пачкодсь 3 тёжятть тоннати, тя кафксть сяда лама 2021-це кизоть коряс (арбузда — 2 тёжянь тоннада лама; дыняда — 1 тёжянь тонна).

Промышленностсь

Ингушетия Республикань промышленностсь лафча. Сембода вии нефтань таргамань («Ингушнефть»), нефтехимическяй, химическяй («Химпром») промышленносттне, газоперерабатывающай и металлообрабатывающай промышленностсь («Вилс» тёждя сплавонь заводсь). Промышленнай производствань объемть эзда 74,6 процентта лама прашенды нефтепромышленнай комплексть лангс. 2003-це кизоня нефтань таргамась лиссь кизоньберьф 300 тёжянь тоннать малава, но мекольце кизотнень (2009-це кизонь уликснень коряс) нефтань таргамась прась 50 тёжянь тоннати.

Ингушетиять моданзон лангса нефтань таргамась мольфтеви 1915-це кизоста сявомок.

Республикань промышленностть ёткса омбоце вастса ярхцамбялень тиемань отраслясь, сон ащи тястоконь велень хозяйствань ресурснень лангса.

Тяфта жа ладяфт трикотажнай и ярхцамбялень предприятиятнень работасна.

Лия предприятиятне — «Россия» (Малгобек) кондитерскяй фабрикась, полиграфическяй комбинатсь (Назрань), кудонь строямань комбинатсь, кирпицень завоттне (Назрань ошсь и Нестеровскяй станицась), ёмла мощностень электродвигателень заводсь (Назрань), мебелень фабрикась (Сунжа), кшинь панемань заводсь (Назрань).

Энергетикась

Ингушетиясь Россиять кафта региононзон эзда фкясь, коса аш электростанцият; тяфта, регионца ётафтови-кархцяви электроэнергиять марнек объемоц сявондеви ширеста. 2020-це кизоня Ингушетиясь сявсь энергияда 827 миллион кВт·ч, сембода вии — 141 МВт.

Инфраструктурась

Ингушетиять эзга ётни Северо-Кавказскяй машина кить пяльксоц и федеральнай значениянь «Ростов-Баку» автомобильнай кить пяльксоц, конань кувалмоц 40 вайгяльбе. Автомобильнай китнень марстонь кувалмосна 900 вайгяльбеть малава, тяконь лувксса асфальтобетоннай вельхкс мархта — 651 вайгяльбе, гравийса вельхтяф — 250 вайгяльбе. Сяда тов мольфтеви «Магас» аэропортть строямац. Улихть телефоннай связь, радио и телевидения.

Инвестициянь таргамась

Ингушетия республикась сувси региоттнень ёткс, конатнень интегральнай индекссна пяк ёмлат. Регионть инвестиционнай рейтингоц — 3D (ёмла потенциалсь — экстремальнай риск). Региоттнень инвестиционнай рейтингсост республикась занцесы 84-це вастть инвестиционнай рискть коряс и 78-це вастть инвестиционнай потенциалть коряс. Инь ёмла инвестиционнай рисксь — экологическяй, инь оцюсь — финансовай. Инь оцю инвестиционнай потенциалсь — инфраструктурнайсь.

1994-це кизоня Ингушетияса ульсь тиф Экономическяй Благоприятствованиянь Зона (ЗЭБ), меле Предпринимательствань виензамань центра (ЦРП). Тянь вельде ульсь нолдаф тевс инвестициянь получамань механизмась — Ингушетиясь получась статус миронь сембода цебярь офшорнай зона мархта васттнень эзда фкясь. ЗЭБ-ть и ЦРП-ть покодемаснон пингста (1994—1999) льготнай режимса покодсь 7000-да лама предприятия и кепотьф 100-да лама эрь кодама объект. Россиянь офшорнай васенце центрась ульсь тиф и покодсь «„Ингушетия“ международнай бизнесонь центрать колга» № 16-ФЗ Федеральнай законть коряс, кона нолдафоль 30.01.96 (юмафтозе виенц 2005-це кизонь 1-це январьста).

Сянкса, штоба государствать ширьде араламс предпринимательскяй деятельностень субъекттнень праваснон и законнай интересснон Ингушетия республикать территорияса, и тянь мархта виияфтомс инвестиционнай и деловой климатть регионца, Республикань Оцюнять Указонц мархта кемокстаф 25-це июльста 2012-це кизоня Ингушетия Республикаса предпринимательхнень праваснон коряс Уполномоченнаень должность.

Финансонь ширде кемоста ащемась

• Финансонь ширде кемоста ащемаса— ламошкада алу валгома;
• Экономикань ширде кемоста ащемаса — алу валгома;
• Социальнай ширде кемоста ащемань рейтингсь — алу валгома;
• Антикризиснай ширде кемоста ащемань комплекснай рейтингсь — касома.

2024-це кизоня коське кизоль

2024-це кизонь кувака коське пингсь, кона ульсь кизонда, республикаса тись оцю зиян озимой и яровой видеф культуратненди: юмась урожайсь 26 тёжяньда лама гектар лангса (38 % сембе видемань модатнень эзда).

2024-це кизонь 14-це августста ульсь сувафтф ЧС-нь режим.

Социальнай сферась

Социально-экономическяй няфтематне

Россиять коряс Ингушетияса инь лама ламаньда, конат ащихть работафтома — 30%-та ламось. Республикаса базовай услугаса обеспечендамань показательхне странаса инь ёмлатнень эзда фкятне, сяс мес ломаттнень лувкссна курокста касы, а ошень центратне аф касфтфт-виензафт.

Ингушетиясь Российскяй Федерацияса фкя-тяка субъектсь, коса аш сире ломанень кутт, сяс мес ингушскяй обществаса синь аф эрявихть.

Шумбрашинь ванфтомась

Ингушетияса инь лама шачфнихть шабат Российскяй Федерациянь субъекттнень ёткса. Республикаса пчкафтомань-профилактикань лезкс макссеви 73 пчкафтомань учрежденияса — больницяса, диспансерса, поликлиникаса и стак тов. Мекольдень пингть няеви квалифицированнай кадрань и медицинскяй оборудованиянь аф сатнемась. 2008-це кизоня азфоль, што Магас ошса кармай строявома Республиканскяй многопрофильнай больниця поликлиника мархта и Перинатальнай центра.

Республикань Джейрахскяй районца тяфта жа ащи «Джейрах» пчкафтомань-шумбрань кемокстамань комплекссь, коза сувай «Солнечная долина Армхи» курортсь. Комплекссь строяф 1999-це кизоня.

Тонафнемась и наукась

Ингушскяй государственнай университетть главнай корпусоц Магас ошса

Школась Хамхиса. 1930-це кизось

Высшай

Республикань инь оцю высшай учебнай заведениясь — Ингушскяй государственнай университетсь (ИнгГУ), кона панчф 1994-це кизоня. ИнгГУ — Россияса инь од университеттнень эзда фкясь; тоса тонафни 10 тёжянть малава студент. ИнгГУ-ть лувксса вейхкса факультетт: агроинженернай, медицинскяй, педагогическяй, физико-математическяй, филологическяй, финансово-экономическяй, химико-биологическяй, экономическяй и юридическяй, а стане жа 43 кафедра.

Средняй

Эряйхнень оцю касомаснон сюнеда, Ингушетияса эряйхнень колмоце пялькссна — итть. Республикаса покоди 106 школа; тя лувкссь аф сатни и маряви школаса вастонь аф сатнемась. Школатнень компьютеризацияснон коряс государственнай программать коряс республикав рамафоль 400 лама компьютер и одкстоптфоль 80 школа.

Назраньса, Карабулакса и Малгобекса работайхть школа-лицей, школат-гимназият, Горскяй кадетскяй корпус, гуманитарно-техническяй и медицинскяй колледжт.

Спортсь

Спортть виияфтоманц-касфтоманц мельге ваны Физическяй культурань и спортонь республиканскяй министерствась. 1996-це кизонь 21-це майста примаф «Физическяй культурать и спортть колга» Ингушетия Республикань Закон.

Ингушетияса ули «Ангушт» футболонь клуб. Ингушскяй спортсметтне сяськсть стане жа дзюдоть и боксть коряс Россиянь первенстваса. 2002-це кизоста сявомок спортть лемс республикань ассигнованиятне кассть 3-ксть и тяни лувондови 25 миллионда лама цалковай.

Строяфт сисем физкультурно-оздоровительнай комплекст, ниле спортивнай школат. Васенце вастса спортонь виень няфтемань виттне — греко-римскяй тюремась, вольнай тюремась, восточнай единоборстватне, бокссь, дзюдось, стака атлетикась.

1988-це кизоня Сеулса Олимпиадаса штангистсь Исраил Арсамаков сявозе зрнянь медальть; Олимпийскяй чемпиоттне тяфта жа Назир Манкиев (тюремась) и Рахим Чахкиев (бокссь), конат Пекинца Олимпиадаса 2008-це кизоня сявозь эсь медальснон. 2016-це кизоня Хасан Халмурзиев сявозе зрнять Рио-де-Жанейроса Олимпиадаса. Ваха Евлоевонь ули вольнай тюремать коряс Европань чемпиононь лемоц. Миронь вете-крдань чемпионкс боксть коряс ащи Ахмед Котиев — тяниень пингонь физическяй культурать и спортть министрсь республикаса. Васенцетнень эзда, ингушнень ёткста, дзюдоть коряс Казахстанонь чемпион и дзюдоть коряс СССР-нь чемпионатонь бронзовай призерсь Леймоев Алихан Мусаевич. 2010-це кизоня Сингапурса ётни Кизонь юношескяй Олимпийскяй налхкоматнень эса Руслан Аджигов кандозе Россияти васенце зрнянь медальть, сяськомок греко-римскяй тюремать коряс турнирса 85 килограммань сталмонь категорияса, арамок тяфта Од ломанень васенце Олимпийскяй налхкоматнень эса васенце российскяй чемпионкс. 2021-це кизонь 3-це августста Токиоса Олимпийскяй налхкоматнень эса Муса Евлоев, кона шачсь Ингушетияса, сяськомок финальнай схваткаса Рио-де-Жанейронь действующай олимпийскяй чемпионть (2016) 98 килограммань сталмонь категорияса Арменияста спортсменть Артур Алексанянонь, кандозе Россияти Олимпиадань греко-римскяй тюремаса фкя тяка зрнять.

Пяк кельговихть шовордаф боевой искусстватне. Тяфта, Ингушетияса ули ни единоборствань аф фкя спортивнай клуб, тяфтапт кода «Калой» (Назрань ошсь), «Нарт» (Сунжа), «Боец» и лият. Ётафневихть республиканскяй чемпионатт. Тяда башка, [[20-це кизоста сявомок Ингушетия Республикаса эрь кизоня ётафневи международнай турнир шовордаф единоборстватнень коряс (Mixfight) «Панттнень эса тюрема», коса няфнесазь пряснон кода тястоконь спортсметтне, стане и содаф боецне Россиянь и миронь эрь кодама регионцта.

СМИ

Телевидениясь

• «Ингушетия» ГНТРК-сь — васенцесь и фкя тякось Ингушетия Республикаса синцень спутниковай каналсна;
• «Ингушетия» ГТРК-сь— ВГТРК-ть филиалоц Ингушетия Республикаса;

Радиостанциятне

Тяниень пингть Ингушетиеса улихть кафта радиостанцият. «Ингушетия» национальнай радиостанциясь нолдафоль 2014-це кизонь 31-це июльста. Радиостанциясь пачфни кулят 88,0 FM волнаса и сувафтф радиостанциянь сембода оцю порталти — TuneIn. «Radio Republic» кулянь азонды и кеняртьфни радиостанциясь пачфни 102,4 FM волнаса.

Инголи Ингушетияса ульсь радионь кельгиень коллективнай нюрьхкяня волнань радиостанция, конань вятезе Ингушетиянь радионь кельгихнень региональнай общественнай организациясь. 2010—2015-це кизотнень покодсь «Ангушт Радиось». Сон пачфнесь 104,0 FM волнаса. Радиось тонафтсь ломаттнень духовно-нравственнай ширде и эсь народонь и шачема масторонь кельгома. Ангушт Радиось ульсь пякстаф 2015-це кизоня Ингушетия Республикань Оцюнять Юнус-Бек Евкуровонь и Ингушетиянь мусульматтнень духовнай центраснон ёткса конфликтть сюнеда.

Печатнай изданиятне

• «Сердало» общенациональнай газетась (лисенди 1923-це кизоста сявомок);
• «Ингушетия» республиканскяй общественно-политическяй газетась;
• «Знамя труда» районнай общественно-политическяй газетась;
• «Народное слово» районнай общественно-политическяй газетась;
• «Голос Назрани» ошень общественно-политическяй газетась;
• «Литературная Ингушетия» журналсь;
• «Селаӏад» журналсь.
• «Сармакх» комикссь.
• «ГIалгIай» комикссь.

Интернет-ресурсне

• Ингушетия Республикань официальный сайтсь — Ингушетия.ру.
• Ингушетия Республикань Народнай Пуромксонь официальнай сайтсь — parlamentri.ru.
• Ингушетия Республикань Правительствань официальнай сайтсь — pravitelstvori.ru.
• Сембода оцю интернет-провайдерхне — «Ингушэлектросвязь» ОАО-сь и «ИТТ» ЗАО-сь.

Ингушскяй ошне-побратипне

2007-це кизонь августста сафоль мяльс Ингушетиянь и Венесуэлань региоттнень ёткса ошень-побратимонь статусонь кемокстамать колга.

2015-це кизонь 10-це майста воинскяй славань Малгобек ошсь и белорусскяй Брест ошсь арасть ошекс-братимкс.

2015-це кизонь 2-це сентябрьста Китайса сёрматфоль кагод ошекс-побратимкс арать колга Магас ошть и Шаньдун провинциянь китайскяй Дунъин ошть мархта.

2015-це кизонь 15-це октябрьста Ингушетиянь и Чечнянь пряошне Магас и Грозный путозь кядьснон ялгань соткснень колга соглашениять лангс.

Нумизматикась

• 2020-це кизонь 25-це февральста Россиянь Банксь нолдась тевс 3 цалковаень номиналса мяляфтомань сиянь ярмак «250 кизонь топодемати, кода Ингушетиясь сувась Российскяй государствать лувксс».

Лятфтамат

Комментариятне

Источникне

Источникне

Литературась (аф профильнай)

• Adrienne Mayor. The Amazons: Lives and Legends of Warrior Women across the Ancient World(анг.). — Princeton: Princeton University Press, 2014. — 519 p. — ISBN 9781400865130.
• Karl Koch. Путешествие через Россию к Кавказскому перешейку в 1836, 1837, 1838 гг : [нем.] = Reise durch Russland nach dem kaukasischen Isthmus in den Jahren 1836, 1837, und 1838. — Stuttgart, Tübingen : Druck und Verlag der J. G. Cotta'sche Buchhandlung, 1843. — Т. 2. — XII, 560 с.
• Anton Friedrich Büsching. Neue Erdbeschreibung: Des funften Theils erste Abtheilung, welche unterschiedene von Asia begreift(нем.). — Bohn, 1781. — 718 S.
• Julius Heinrich Klaproth. Reise in den Kaukasus und nach Georgien unter nommen in den Jahren 1807 und 1808, auf Veranstaltung der Kaiserlichen Akademie der Wissenschaften zu St. Petersburg, enthaltend eine vollständige Beschreibung der Kaukasischen Länder und ihrer Bewohner(нем.). — Halle und Berlin: In den Buchhandlungen des Hallischen Waisenhauses, 1812. — Bd. I. — 740 S.
• Wahl O. W. The Land of the Czar(анг.). — London: Chapman and Hall, 1875. — 417 p.
• Агиров Т. А. Горная Ингушетия(руз.). — М.: Перо, 2021. — 416 с. — ISBN 978-5-00189-087-4.
• Агусти Алемань. Аланы в древних и средневековых письменных источниках. — М.: Менеджер, 2003.
• Албогачиева М. С-Г. Демаркация границ Ингушетии // Горы и границы: этнография посттрадиционных обществ(руз.). — СПб., 2015. — С. 167—255. — 400 с. — ISBN 978-5-88431-290-6.
• Ахриев Ч. Э. Ингуши. Их предания, верования и поверья // Сборник сведений о кавказских горцах. Вып. VIII(руз.). — Издание Кавказского горского управления. — Тбилиси: Типография Главного Управления Наместника Кавказского, 1875.
• Бутков П. Г. Мнение о книге: Славянския древності // Три древние договора руссов с норвежцами и шведами(руз.). — Санкт-Петербург: Типография Министерства внутренних дел, 1837. — 398 с.
• Бутков П. Г. Материалы для новой истории Кавказа с 1722 по 1803 гг. Ч. I.(руз.). — СПб.: Императорская Академия наук, 1869. — 290 с.
• Вахушти Багратиони. География Грузии / Введение, перевод и примечания М. Г. Джананашвили. — Тифлисъ, 1904. — 290 с.
• Виноградов В. Б. Время, горы, люди. — Грозный, 1980.
• Волкова Н. Г. Этнонимы и племенные названия Северного Кавказа / Ответ. ред. Л. И. Лавров. — АН СССР. Ин-т этнографии им. Н. Н. Миклухо-Маклая. — М.: Наука (ГРВЛ), 1973. — 206 [2] с. — 1600 экз.
• Генко А. Н. Из культурного прошлого ингушей // Записки коллегии востоковедов при Азиатском музее АН СССР. — Л., 1930. — Т. V. — С. 681—761.
• Гумба Г. Д. Расселение Вайнахских племён по «Ашхарацуйцу». «Армянская География» VII века. — Ереван, 1988.
• Гумба Г. Д. Об одном общенахском этнониме второй половины первого тыс. до н. э. // Актуальные проблемы истории дореволюционной Чечено-Ингушетии. — Грозный, 1990.
• Гюльденштедт И. А. Географические и статистические описания Кавказа(руз.). — СПб.: Петербургское Востоковедение, 1809.
• Гюльденштедт И. А. Путешествие по Кавказу в 1770—1773 гг.(руз.). — СПб.: Петербургское Востоковедение, 2002. — 512 с.
• Даудов А. Х. У истоков осетино-ингушского конфликта // Вестник Санкт-Петербургского университета. Вып. 5. — 2005.
• Долгиева М. Б., Картоев М. М., Кодзоев Н. Д., Матиев Т. Х. История Ингушетии. — 4-е изд. — Ростов-на-Дону: Южный издательский дом, 2013. — 600 с. — ISBN 978-5-98864-056-1.
• Еремян С. Т. Опыт восстановления первоначального текста «Ашхарацуйца». An Attempt at Restoring the Original Text of „Aškharhacoyc“ = «Աշխարհացոյցի» սկզբնական բնագրի վերականգնման փորձ // Историко-филологический журнал = Պատմա-բանասիրական հանդես (Historical-Philological Journal). — Ереван : Академия наук Армянской ССР, 1973. — С. 261—274.
• Евлоев Муса. Как принималась Конституция Республики Ингушетия(руз.) // «Сердало» : газета. — 2014. — 27 февраля (№ 31). — С. 3.
• Ингушетия и ингуши / М. Д. Яндиева. — М., 2002. — Т. II. — 290 с.
• История народов Северного Кавказа с древнейших времён до конца XVIII в : моногр. / Ответ. ред. Б. Б. Пиотровский, ответ. ред. серии А. Л. Нарочницкий. — Утверждено Институтом истории АН СССР. — М. : Наука, 1988. — 554 с. — 14 000 экз.
• Казиев Ш. М., Карпеев И. В. Повседневная жизнь горцев Северного Кавказа в XIX веке(руз.). — М.: Молодая гвардия, 2003.
• Картлис Цховреба. (История Грузии). — Тбилиси., 2008.
• Крупнов Е. И. Древняя история Северного Кавказа(руз.) / Отв. ред. А. П. Смирнов. — М.: Издательство Академии наук СССР, 1960. — 521 с. — 2000 экз.
• Крупнов Е. И. Средневековая Ингушетия. — М.: Наука, 1971. — 208 с. — 2800 экз.
• Кушева Е. Н. Народы Северного Кавказа и их связи с Россией (вторая половина XVI — 30-е годы XVII века) : моногр. / Ред. изд-ва И. У. Будовниц. — АН СССР. Ин-т истории. — М. : Изд-во АН СССР, 2-я тип., 1963. — 372 с. — 1500 экз.
• Леонти Мровели. Жизнь картлийских царей / Отв. ред. Г.С. Мамулиа. — АН СССР. Ин-т этнографии им. Н. Н. Миклухо-Маклая. — М.: Наука, 1979. — 103 с. — 24 000 экз.
• Мартиросиан Г. К. Нагорная Ингушия. — Владикавказ: Государственная типография Двтономной Области Ингушии, 1928. — 152 с.
• Минорский В. Ф. История Ширвана и Дербента. — М., 1963.
• Мориц фон Энгельгардт, Фридрих Паррот. Посещение Энгельгардтом Галга-Ингушей // Сокровищницы Востока / Йозеф фон Хаммер. — 1814. — Т. IV.
• Мужухоев М. Б. Ингуши. Страницы истории, вопросы материальной и духовной культуры(руз.). — Саратов: Региональное Приволжское издательство «Детская книга», 1995. — 128 с. — 5000 экз. — ISBN 5-8270-0158-9.
• Муталиев Т. Х. Тернистый путь народа // Ингушетия и ингуши / М. Д. Яндиева. — М.: Новая Планета, 1992. — Т. II.
• Сотавов Н. А., Мейер М. С. Северный Кавказ в русско-иранских и русско-турецких отношениях в XVIII в. — М.: Наука, 1991. — 221 с.
• Сборник материалов, относящихся к истории Золотой Орды. / Тизенгаузен В. Г.. — М.—Л., 1941. — Т. ΙΙ.
• Яндиев М. А. Древние общественно-политические институты народов Северного Кавказа. — М.: ЛКИ, 2007. — 464 с. — ISBN 978-5-382-00285-9.
• Хайров Б. А. К вопросу ингушско-шумерских лексических соответствий // История и культура Ингушетии. Вып. 1. — Назрань: «Кеп», 2012.
• Штедер Л. Л. Дневник путешествия в 1781 году от пограничной крепости Моздок во внутренние области Кавказа // Наша старина(руз.) / Пер. В. М. Аталиков. — Нальчик, 1996.
• Яновский А. О древней Кавказской Албании // Журнал Министерства народного просвещения. Часть LII. Отд. II.(руз.). — СПб.: Типография Императорской Академии Наук, 1846. — С. 161—203. — 785 с.

Документтне

• Конституция Республики Ингушетия (рус.). Cправочно-правовая система «Гарант» (27 февральста 1994). Дата обращения: 24 сентябрьста 2022.
• Федеральный закон Российской Федерации от 24 ноября 2008 г. № 207-ФЗ. О мерах по организации местного самоуправления в Республике Ингушетия и Чеченской Республике : принят Государственной Думой 29 октября 2008 года; одобрен Советом Федерации 12 ноября 2008 года // Docs.cntd.ru : справочно-правовая система / влад. АО «Кодекс». — М., 2008.
• Постановление Правительства Республики Ингушетия от 29 октября 2014 г. № 203. «Об утверждении государственной программы Республики Ингушетии «Охрана и защита окружающей среды»» // Docs.cntd.ru : справочно-правовая система / влад. АО «Кодекс». — Магас, 2014.

Ссылкатне

•  Викисклад: Атлас: Ингушетия Республикась 
• Официальный сайт Республики Ингушетии. Главная страница (рус.). ingushetia.ru. Дата обращения: 20 январьста 2026.