Андрей Гуляйкин

Андрей Гуляйкин — Рига ошста композиторсь, кона сёрмды арьсемань, ронгонь лафчепты и ваймонь озафты, инструментальнай, ваймопожфонь (духовнай), Нью–Эйдж и космосонь музыка.

А. Гуляйкин

Юронзон содаманза

Афкуксонь лемоц – Андрей Яромир Гуляйкин анг.: Andrei Yaromir Gulaikin. Шачсь Рига ошса 1974 (тёжянь вейхкса сятт сизьгемонь нилеце) кизоня. Космическяй музыкань кельгихненди и кулхцондыензонды содаф Gulan лем ала.

Тяниень композиторть эряфонь юронза вятихть Пензенскяй областень Белинскяй райононь Тарханы вели. Тоста шачемань коряс сонь бабац, Нина Ивановна Рыбакова, кона лиссь рьвакс атянцты, Владимир Прокопьевич Гуляйкинонди, кона эрясь Казахскяй ССР-са Усть-Каменогорск ошса. 1951-це кизоня шачсь аляц. Алянц шачемдонза меле атяц шавовсь, конанди ульсь аньцек 26 киза. И, ужяленди, сембе сотксне Гуляйкиттнень юрснон мархта сязевсть.

Пингонь ётазь бабац лиссь рьвакс омбоцеда. Мирдец служась гражданскяй авиацияса и сонь кучезь работама Ригав. Вов тяфта сонь раднянза повсть Латвияв.

Тядяц, Валентина Васильевна Грачунова, кода и бабац, Тарханы велеста. Сай пингонь композиторть тядянза-алянза васедсть Пензенскяй областьса. Тядяц тонафнесь и аделазе В. Г. Белинскяень лемса Пензенскяй государственнай педагогическяй университетть филологическяй отделениянц (школаса покодсь 45 киза рузонь кялень и рузонь литературань тонафтыкс). Рьвяямда меле аляц сявозе тядянц Ригав, коса и шачсь Андрей. Мзярс тядянза-алянза вешендсть тоса покодема и эряма васта, Андрей эрясь бабанц ширеса, Тарханы велеса. Теенза Тя седиге кельгови уженяса ушедсь якама и корхтама.

Меле тядянза-алянза сявозь меки Рига ошу, коса эряй тячемс. Тяфта ни лиссь, што Андрей кассь руз ломань ёткса. Перьфканза стане жа ульсть латышт, еврейхть, эстонецт, литовецт, полякт, украинецт. Тядянза-алянза эряфоньберьф лувозь пряснон сембе ширде руз ломанькс.

Сай пингонь композиторть ульсь мялец сяда лама содамс атянь-атянензон и шачема юрснон колга, сяс кучезень ДНК-тестснон (сонценнеть и тядян, алянц) Family Tree DNA американскяй лабораторияв. Результаттне няфтезь, што Гуляйкиттнень родсна кандови финно-угорскяй группань народти — мокшетненди. Тяфта синь содазь эсь афкуксонь юрсонон колга.

Музыкать мархта эряфонь сотомац

Музыкась салазе мяленц нинге идькс пингста. Сисем кизоса ушедсь тонафнема фортепианаса морама.Сиинь кудсост фалу кайгсь музыкась. Аляц морсель гитараса. Сонь ульсь сонцень звукозаписень студияц. Нинге шабакс педезь-педсь вярикс касы Андрейть седизонза электроннай вайгяльксненди кельгомась. Мзярда тонафнесь Пушкинскяй лицейса, содафтсь пара вайме ломанть, музыкань преподавательть Зигмунд Бриедисонь мархта. Сон тонафтозе Андреень синтезаторса аранжировкань тиема. Тяда башка, А. Гуляйкин пара мяльса ванондозень научно-популярнай фильматнень, сяс мес тоса сидеста кайгсть космическяй вайгялькс (звук) мархта мелодият.

80-це кизотнень содафтсь «космическяй эмбиент» музыкань стильть мархта, кона пяк токазе седиенц и салазе мяленц. Тяфтама музыкась эвондафты кулхцондыть эса космость колга арьсемат.

90-це кизотнень, мзярда улендень йогать коряс тренингса, содафтсь медитативнай музыкать мархта. Медитативнай музыкась лезды ломанти лафчептомс пря. Тяфта сонь творчествасонза шачсть музыкань кафта жанрат: космическяйсь и медитативнайсь.

А. Гуляйкинонь музыкац тячи

Гуланонь музыкац ноляви сядот радиостанциява (США-са, Великобританияса, Южнай Кореяса, Хорватияса, Данияса, Австрияса и лия масторхнень эса). Сонь мелодиянзон сявондсазь Россиянь, Словениянь, Индиянь, Пакистанонь, Румыниянь телеканалхне. Синь кайгихть театрально-танцевальнай постановкатнень и мюзиклатнень эса.

Интернетть вельде музыкантть треконзон кулхцонкшнесазь миллиотт ломань. Сонь лемозонза азф аф кржа шнама вал продюсерхнень, радиодиджейхнень и критикнень эзда.

Эряфсонза кунардонь пингть вастоц

А. Гулякинонь эряфса мялень салайкс ащи сембось ся, мезть мархта сотф мокшэрзянь наротть эряфоц-ащефоц, культурац, коенза-обуцянза. Сяс мес сон эряй ширдень вастса эсь юронзон эзда, сяс и лезксонди теенза ащи Интернетсь, коста сон кочкась лама фотографияда национальнай щамса щаф мокшаватнень мархта. И сонцьке интернетса максси материал мокшень койхнень-обуцятнень, музыкать, культурать, мокшавань мазы щамть, марнек народнай стильть, эрямать-ащемать колга. Седиень таколдозь ванондсыне видео-материалхнень, коса корхтайхть и морайхть мокшетне.

Режиссёрть Никита Захаркинонь мархта (сон стане жа мокша, сонь ичкоздень радняц) арьсекшнихть ётамс Мордовиянь и Пензенскяй областень мокшень велетнень эзга и тиемс художественнай фильмань мзярошка серия мокшэрзятнень эряфснон-ащефснон колга, штоба мокшэрзянь мазы перьфпяленц, национальнай козя культуранц, кяленц эсь лацонь ширенц и пара вайме мокша ломаттнень колга содаль сембе масторсь.

Интернетса мзярс аф сатомшка фото и видеоматериалонь мокшетнень колга улемать инкса, А. Гуляйкин, арьсекшни тиемс цебярь качества мархта фотографият, конатнень улельхть кода нолямс тевс публикациятнень эса, коса азондови народоньконь и сонь культуранц колга.

Литературась

Тарханы. Лермонтовский музей-заповедник:Путеводитель. — Ленинград: Лениздат, 1971. — 22

Ссылкатне

• https://ru.ruwiki.ru/wiki/%D0%A2%D0%B0%D1%80%D1%85%D0%B0%D0%BD%D1%8B_(%D0%B7%D0%BD%D0%B0%D1%87%D0%B5%D0%BD%D0%B8%D1%8F)
• https://tarhany.ru/service/magazin/books_souvenir/tarhany Государственный Лермонтовский музей-заповедник