Азрапкин, Юрий Никитич

Азрапкин, Юрий Никитич
Шачема лемоц	Юрий
Шачема вастоц	Колапа велесь
Гражданствась	СССР, РФ
Тевонь тиемац	валморайсь, кялень содайсь

Юрий Никитич Азрапкин - мокшень содаф писатель(1939 - 1996)

Эряфонь киц

Юрий Никитич Азрапкин шачсь 1939-це кизоня 15-це октябрьста Краснослободскяй аймакса Колапа руз. (Колопино) мазы мокшень велеса. Средняй школать аделамда меле поступась Н.П. Огаревонь лемса Мордовскяй государственнай университетсь филологическяй факультетонь мокшэрзянь отделенияв. Тонафнесь аспирантураса. Университетса тонафнемок кармась стихонь сермадома и печатлакшнемост синь «Мокша» журналса и «Мокшень правда» газетаса.

Творческяй киц

Васенце оцю аськолкс Юрий Азрапкинонь творчествасонза арась «Павазсь морай» марстонь стихонь сборниксь (1964 к.). Лама стихт Ю. Азрапкин сермадсь иттненди и иттнень колга. Стихонзон эса сон мушенды стама валхт, конат пяк шарьхкодевихть и курокста мяляфтовихть шабатненди.

1966-це кизоня Мордовскяй книжнай издательстваса лиссь Ю. Азрапкинонь «Чак-чак-чак!» васенце сборникоц, коса поэтсь маштозь нежетькшни фольклоронь сюжеттненди, нолясыне тевс валмуворкснень, содама ефкснень. Юрий Азрапкинонь книганянза аф оцюфт, а эсост сняра ваймопожф, сняра пеедема и рахама, аф кирдят - тага лувсайть. Лемсновок эреклафтсазь шабать: «Чак-чак-чак!», «Марса Бобикть мархта Марсса» руз. («Вместе с Бобиком на Марс»), «Шумбрат, вирняй!»руз. (Здравствуй, мой лес!), «Шись и кшись»руз. День и хлеб. «Чак-чак-чак» (руз. («Тук-тук-тук») и «Шумбрат, вирняй!» («Здравствуй, лесочек!») книганза нолдафт рузонь кяльса. Синь ётафтозень рузонь содаф поэтсь Борис Соколов. Юрий Никитичень стихонза сувафневихть мокшень кялень тонафнема и морафтома книгатненди.

2022-це кизоня Мордовскяй книжнай издательстваса Ю. Азрапкинонь «Марса Бобикть мархта Марсса» книгац лихтьф оду. Ю. Азрапкинонь стихонзон лангс лама мора ладясь мокшэрзянь содаф композиторсь Г. И. Сураев-Королёв.

Юрий Никитич Азрапкин кулось 1996-це кизоня июнь ковста. Калмаф Самарскяй областень Смышляевка станцияса.

Башка нолдафксонза мокшень кяльса

• 1. Чак-чак-чак: стихт ёмлатненди. - Саранск: Мордовскяй книжнай издательствась, 1966. - 24 с.
• 2. Шись и кшись: ёфкс. - Саранск: Мордовскяй книжнай издательствась, 1968. - 16 с.
• 3. Шумбрат, вирняй!: стихт. - Саранск: Мордовскяй книжнай издательствась, 1969. - 24 с.
• 4. Марса Бобикть мархта Марсса: стихт. - Саранск: Мордовскяй книжнай издательствась, 1975. - 32 с.

Башка нолдафксонза рузонь кяльса

• 1. Тук-тук-тук: стихи / пер. Б. Соколова. - Саранск: Мордов. кн. изд-во, 1967. - 24 с.
• 2. Здравствуй, лесочек: стихи / пер. Б. Соколова. - Саранск: Мордов. кн. изд-во, 1970. - 24 с.

Литературась

Ваймонь лихтибрят. «Мокшеть» и «Якстерь тяштенять» книгасна. Саранск,1994. С.7 - 9