Чигодайкин, Иван Васильевич
| Чигодайкин, Иван Васильевич | |
|---|---|
| Шачема лемоц | Иван |
| Шачема вастоц | Сире Синдру, Краснослободскяй районць, МАССР |
| Кулома шиц | 21 ноябрьста 1985 |
| Кулома вастоц | Саранск ошсь |
| Гражданствась | СССР |
| Тевонь тиемац | поэт |
Иван Васильевич Чигодайкин – мокшень содаф поэтсь. Шачсь 11-це сентябрьста 1920-це кизоня Мордовия Республикань Краснослободскяй аймаконь Сире Синдрова велеса. 1935-це кизоня аделазе велень школать и поступась Краснослободскяй педучилищав[1], сяда меле тонафнесь Мокшэрзянь госпединститутонь литературнай факультетса. И. Чигодайкин Великай Отечественнай и советско-финляндской войнаса улись.
1943-це кизоня - армейскяй журналист, литработник «Боевая красноармейская», «Гвардеец» дивизионнай газетатнень эса, ульсь «Мокшень правда» газетаса собственнай корреспондентокс. 1948-це кизоста сявомок 1950 кизоти молемс И. Чигодайкин тонафнесь Горьковскяень областной партшколаса журналистикань отделенияса, конань аделамда меле покодсь мокшэрзянь радиокомитетса политвещаниянь редакторкс, «Строитель» газетаса ответственнай секретарькс.
Поэтть творчествац
Поэтть васенце стихонза лисендсть мокшень кяльса, 1938-це кизоня, «Колхозонь эряф» («Колхозная жизнь») журналса, «Мокшень правда», «Комсомолонь вайгяль» («Комсомольский голос») газетатнень эса. И. В. Чигодайкин фронтсовок тяштьсь очеркт, стихт, и синь печатлакшневсть фронтовой печаттнень эса. 1954-це кизоня «Красная звезда» газетаса нолдафоль сонь васенце стихотворенияц «Щорс». 1951-це кизоня поэтть лиссь васенце стихонь сборникоц «Шачема мастор» («Земля родная»), коса сон тяшти мокшэрзянь крайть, сонь ломанензон колга. Мокшэрзянь книжнай издательстваса 1958-кизоня башка книгакс лиссь «Кши и сал» («Хлеб и соль») поэмац.
1965-це кизоня тя поэмась нолдафоль рузонь кяльса, ётафтозе И. Пиняев, а 1967-це кизоня лиссь украинскяй кяльса, ётафтозе В. Ткаченко. «Хлеб и соль» - поэмась видешить колга. Сонь эсонза азондови, кода мокшэрзянь ломаттнень якасть В. И. Ленинонди, Советскяй властень ся пингонь вождти. Поэмать эса няфтевихть афкуксонь улемат, конат ульсть 1920-1930-це кизотнень пингста Краснослободскяй райононь Колапа руз. (Колопино) велеса.
1972-це кизоня Мокшэрзянь книжай издательстваса лиссь стихонь сборникоц «Ёндолсь кфчядсь» («Блеск молнии»), козы сувасть поэтть войнада мельдень стихотворениянза. 1980-це кизоня лиссь сонь «Кшить таньфоц» («Вкус хлеба») стихонь сборникоц.
Поэтть стихонза и поэманза печатлакшневсть эрь кодама стихонь сборникнень эса: «Соловьи над Мокшей», козы сувасть Ф. Дурновонь и И. Чигодайкинонь стихсна, конатнень эса няеви аф аньцек войнань, но и войнада мельдень пингсь, «Красота человека» стихонь сборникса, козы сувасть П. Любаевонь, М. Трошкинонь, И. Чигодайкинонь стихсна, а тяфта жа коллективнай сборникнень эса «Антология мордовской поэзии», «Здравствуй, жизнь!», «Земля моя», «Горизонты», газетатнень и журналхнень лапаняснон эса.
Лама статья И. В. Чигодайкинонь творчестванц колга тяштсть минь содавикс литературоведоньке, критиконьке.
Казненза
И. В. Чигодайкин лама сатфксонзон инкса казьф кафта Якстерь Звезда орденца, медальса.
Литературась
Лятфтамат
Ссылкатне
http://www.detskiysad.ru/raznlit/kultstroy12.html / Горьковская межобластная партийная школа