Хейкки Паасоненонь мокшэрзянь валксоц
Хейкки Паасонен суом.: Heikki Paasonen — содаф фольклористсь, этнологсь финн-грань и лия кяльхнень и культураснон тонафнисна.
Эрямокиц
Х. Паасонень шачсь Миккели ошса (Финляндия) 1865-це кизоня. Тонафнесь Гельсингфорсскяй университетса, коса тонафнезе философиять, кялень и лия наукатнень. 1893-це кизоста сявомок философиянь докто и доцент финно-угроведениянь кафедрать эса, 1904-це кизоста сявомок — финно-угорскяй языкознаниянь профессор Хельсинкскяй университетса, коса покодсь куломозонза (кулось 1919-це кизоня). 1908-це кизоста сявомок Финляндскяй наукань академив афкуксонь сувафтфсь.
Научнай покодеманза
1899-це кизонь февральста сембода келиста Хейкки Паасонен ушедсь покодема мокшетнень и эрзятнень ёткса кялень и фольклоронь материалть кочкманц коряс. Сон ульсь эстонь Россиянь кафкса губернияса — Пензенскяй, Нижегородскяй, Тамбовскяй, Саратовскяй, Оренбургскяй, Самарскяй, Симбирскяй И Казанскяй. Покодеманц сон вятезе 1912-це кизоти самс. Кочкафоль лама материал, конат меле ульсть сёрматфста лихтьфт Финно-угорскяй обществань публикациятнень ёткса. Кода кялень вяти сон ванондозень марстонь кизефкснень родствань коряс уральскяй кяльхнень эса, финно-угорскяй и тюркскяй кяльхнень ёткса соткснень, вайгяльксонь ладяфксть видексонь касоманц. Васенце саманц пингста мокшетнень и эрзятнень ширес, Х. Паасонен ёрась кочкамс аф аньцек фольклоронь материал и и валлувксонь кочкама, меколи диалектологиянь валксонь пуроптоманкса-ладяманкса, мезсь меколи и арась сонь 4 томса Мокшэрзянь валксоц руз.: (Мордовский словарь) эвондаманцты.
Тя валкссь ащи 4 томста диалектнай лексикань и фольклоронь эсь лацонь материал мархта. 2700 лопа лангса максф 100 000 вал[1]. Тя валксть ули кода лемдемс диалектологическяйкс — сравнительно-сопоставительнайкс. Эзонза сувафтф сёрматфксста ули мезе сявомс стаконь морафтыти, исследовательти-диалектологти, лексикологти, и кялень историянь кизефксонь ванондыти:
1) аф эрек пеьфпяльсь (модась, мода лангакссь, модать лангса уликсне;
2) касыксне;
3) кудонь и дикай ракшатне, нармоттне;
4) калхне, модать ланга якайхне-шашнихне, унжатне и ся, мезсь сотф тянь мархта;
5) ломанць, сонь ронгонь-пондонь ладяфксоц и сембось ся, мезсь сотф ломанть мархта;
6) ломанень и жуватань урматне;
7) лоанть мархта сотф покодемась;
8) рьвяямать и рьвакс тумать мархта сотф лепне и койхне-обуцятне;
9) ломанть ваймама пингонь ётксь;
10) шарьхкодематне, конат сотфт ломанть куломанц мархта;
11) ломанть мишендема-рамама тевтиеманц и ярмакнень;
12) религиять и социальнай улематнень;
13) перьфпяльдень уликснень и лепнень, конат сотфт ведть мархта;
14) перьфпяльдень пинкнень, суткать пяльксонзон;
15) этнонипне;
16) абстрактнай шарьхкодематне
Тяфтама крхка материалсь лезды няфтемс и шарьхкодемс мокшень и эрзянь кяльхнень эсь лацонь и марстонь шиснон, диалектснон козяшиснон. Валксса ладяф материалсь лезды диалектологти тиемс-ладямс васттнень (ареалхнень) ётама киснон фкя лацонь ширеснон формас и смузень коряс фонетикань явлениятнень изофоттнень, изоморфатнень, имолексематнень и изосематнень, сембось тя ладямс лингвистическяй карта лангса, изоглоссань ладямаса. Тяда башка, тя корхтай нинге сянь колга, што Х. Пасоненонь валксса нинге апак нолдакт тевс диалектологияса и лексикологияса кялень уликсне, конатнень крхкаста тонафнемасна лезды мумс ся ширетнень, конат нинге крхкаста апак ватт мокшень и эрзянь кяльхнень эса. Фонетистсь -диалектологсь муй тя валксста эсь лацонь ширет диалектнай гласнайхнень и согласнайхнень тевс нолдамаса, синь вариативностснон валть эрь кодама пялкссонза ащемста. Лексиколгсь муй пефтома эь лацонь шире диалектнай валть смузенц, валонь форматнень, синонимиять и ламоть лиять коряс. Сембось тя пяк оцю вешфкс сравнительно-сопоставительнай кизефкснень ваномаса. Х. Паасоненонь валксса материалсь пяк важнай аф аньцек диалектологиянь, лексикологиянь и кялень историянь кизефкснень коряс синхроннай , но и диахроннай аспектса, сембода пяк этимологиять эса, лия кяльста суваф валхнень эрямопингснон и эвондамаснон шарьхкодемаса. "Мокшэрзянь валксть" питнец нинге тоса, мес лезды штафтомс мокшень и эрзянь кяльхнень эса синь валлувксснон эрямопингонь кизефкссень.
Научнай трудонза
• Heikki Paasonen. Die Türkischen Lehnwörter im Mordwinischen. Helsingfors, 1897
• Heikki Paasonen. Mordvinische lautlehre. Helsingfors, Druckerei der Finnischen litteraturgesellschaft, 1903
• Heikki Paasonen. Die finnisch-ugrischen s-laute. Helsinki, Société finno-ougrienne, 1918
• Heikki Paasonen. Beiträge zur Aufhellung der Frage nach der Urheimat der finnisch-ugrischen Völker. Turku, Turun Suomalaisen Yliopiston Kustantama, 1923
• Heikki Paasonen; Kai Donner. Ostjakisches Wörterbuch, nach den Dialekten and der Konda und am Jugan. Helsingfors, Société finno-ougrienne, 1926
•
Heikki Paasonen; M E Evsevʹev; Suomalais-ugrilainen Seura. Mordwinische Volksdichtung. Helsinki, Suomalais-ugrilainen Seura, 1938-<1981>
• Heikki Paasonen. H. Paasonens Ost-Tscheremissisches Wörterbuch. Helsinki, Suomalais-ugrilainen Seura, 1948
• Heikki Paasonen. Eino Karahka; Martti Räsänen. Gebräuche und Volksdichtung der Tschuwassen. Helsinki, Suomalais-ugrilainen Seura, 1949.
• Heikki Paasonen. Çuvaş sözlüğü. İstanbul : İbrahim Horoz Basımevi, 1950.
• Heikki Paasonen. Mordwinische Chrestomathie mit Glossar und grammatikalischem Abriss. Helsinki, Suomalais-ugrilainen seura, 1953
• Heikki Paasonen. Eino Karahka. Mischärtatarische Volksdichtung. Helsinki, Somalais-ugrilainen Seura, 1953
• Heikki Paasonen; T Janurik. Tschuwaschisches Wörterverzeichnis. Szeged: Universitas Szegediensis de Attila József Nominata, 1974
• Heikki Paasonen; Kaino Heikkilä; Paavo Ravila; Martti Kahla. Mordwinische Volksdichtung Bd. 5. Helsinki Suomalais-Ugrilainen Seura 1977
• Heikki Paasonen. Edith Vértes. H. Paasonens südostjakische Textsammlungen. Helsinki, Suomalais-ugrilainen Seura, 1980
• Heikki Paasonen; Kaino Heikkilä; Hans-Hermann Bartens; A P Feoktistov; G I Ermushkin; Martti Kahla. H. Paasonens Mordwinisches Wörterbuch. Helsinki, Suomalais-ugrilainen seura, 1990-1996
• Heikki Paasonen; Edith Vértes. H. Paasonens surgutostjakische Textsammlungen am Jugan. Helsinki, Suomalais-Ugrilainen Seura, 2001
Литературась
Мордовские языки : энциклопедия. — Саранск: НИИ гуманитарных наук при Правительстве Республики Мордовия, 2012. — 383 с.
Лятфтамат
- ↑ Лексика мордовских языков: проблемы и перспективы развития [Текст : материалы международной научно-практической конференции, посвященной юбилею Хейкки Паасонена, Саранск, 17-19 декабря 2009 г. - Search RSL]
Ссылкатне
Хельсинкский университет Архивная копия от 26 мартста 2015 на Wayback Machine