Рубцов, Анатолий Петрович
| Анатолий Петрович Рубцов | |||||||||||||
|---|---|---|---|---|---|---|---|---|---|---|---|---|---|
 | |||||||||||||
| Шачема шиц | 22-це майста 1914-це кизоня | ||||||||||||
| Шачема вастоц |
|||||||||||||
| Кулома шиц | 21-це августста 1954-це кизоня (40 кизоц) | ||||||||||||
| Кулома вастоц |
|||||||||||||
| Принадлежностсь |
 СССР |
||||||||||||
| Войскань родсь | авиация | ||||||||||||
| Служама кизонза | 1932—1954 | ||||||||||||
| Званияц | Полковник | ||||||||||||
| Сражениятне/войнатне | |||||||||||||
| Казненза и премиянза |
|
||||||||||||
 Анатолий Петрович Рубцов | |||||||||||||
Анатолий Петрович Рубцов (1914 — 1954) — Советскяй Армиянь полковник, тюрсь Великай Отечественнай войнаса, Советскяй Союзонь Герой (1942 г.).
Эряфонь киц
Шачсь 1914-це кизонь 22-це майста Пайгармаса (тяни - Мордовиянь Рузаевкань аймаксь). Сисем класснень аделамдост меле и фабрично-заводской ученичествань школада меле покодсь Оренбургонь паровозоремонтнай заводса. 1932-це кизоня тертьфоль служама Покодиень и сокаень-видиень Якстерь Армияв. 1935-це кизоня аделазе авиатехниконь Иркутскяень военнай школать (4 ВШАТ), 1940-це кизоня —лётчиконь Энгельсскяй военнай авиациянь 14-це школать и арась дальняй действиянь бомбардировочнай авиациянь военнай лётчикокс.
1942-це кизоня Узбекскяй ССР-нь Бухарскяй областень Карши ошса аделазе АДД-нь лётчиконь и штурманонь Высшай 1-це школать.
Великай Отечественнай войнать ушетксста ни ульсь фронтса [1].
1942-це кизонь октябрти капитанць Анатолий Рубцов вятезе СССР-нь АДД-нь 3-це авиадивизиянь 4-це авиаполконь звенать. Ся пингти сон тись 60 боевой лийкстамат, ляцендсь бомбат фашистонь тылса ащи вражескяй объекттнень лангс, тяка лувксса сон ляцендсь бомбат Берлин и Кёнигсберг, Данциг , Тильзит , Инстербург, Варшава , Бухарест , Будапешт ошнень лангс, тапась лама фашист [1].
Великай Отечественнай войнать пингста Анатолий Петрович Рубцов тись 886 боевой лийкстамат .
СССР-нь Верховнай Советонь Президиумонь «Якстерь Армиянь дальняй действиянь авиациянь оцюнятненди Советскяй Союзонь Герой лемонь максомань» указть коряс 1942-це кизонь 31-це декабрьста гвардиянь майорсь А. П. Рубцов «командованиять боевой заданиянзон фронтса лац тиеманксост и мужествань и героизмань няфтеманкса» казьфоль Советскяй Союзонь Герой оцю лемса, Ленинонь орденца и "Зрнянь Тяште" медальса 795 номер ала[1][2].
Гвардиянь майорсь Рубцов аделазе войнать Берлинца дальняй действиянь Гвардейскяй авиационнай Брянскяй Краснознамённай 6-це полконь командиронь заместителень вастса.
1945-це кизонь майста ИЛ-4 экипаженц мархта марса Рейхстагонь стенатнень лангс сёрмадозь эсь фамилияснон. Сембе войнать ётазе апак полафнек экипаженц мархта: штурманць Советскяй Союзонь Геройсь гвардиянь майорсь Рябов, ляцендись-радистсь гвардиянь орденоносецсь старшинась Левкин, гвардиянь воздушнай ляцендись старшай сержантсь Абрамов.
Войнать аделамдонза меле поладозе служаманц Советскяй Армияса. 50-це кизотнень ушеткста Краснознаменнай Военно-воздушнай академиять видеса аделась курсат. Сембе содама и маштомошинзон и козя опытонц макссезе тонафтомань тевса. Сон тонафтсь цебярь лётчикт, тянь вельде лездсь кемокстамс мастороньконь обороннай виенц.
1950-це кизоста сявомок сон 199 ОГДРАП-нь командир (199-це отдельнай гвардейскяй дальне-разведывательнай авиаполксь).
1954-це кизонь 21-це августста шавовсь авиакатастрофаса. Курскяй областьса Полевая-Лукашевка велеть маласа прась ТУ-4 ичкоздень тевтиемань стратегическяй бомбардировщиксь.
Улемок самолетса капитанкс, Рубцов макссь приказ экипаженцты (эздост 11 ломань) комотемс прай самолётста парашютса, но 5 куломада аф пели лётчикне теряфтсть араламс самолётть, лядсть эсь командирснон мархта пети самс.
Калмаф Миргород ошса. Тоса путф Геройть бюстоц.
Колганза мялямсь
- Рузаевка ошса содаф землякть лемсонза лемтьф ульця. 1965-це кизонь 9-це майста Великай Победати 20 кизонь топодемань шиня Рузаевкань эряйхнень мяльснон коряс Народнай депутатонь советсь Старо-Базарнай ульцять полафтозе лемонц и лемдезе Рубцовонь лемса ульцякс. Тя ульцяса ащи школаса тонафнихнень и тонафтыхнень вийснон вельде ульсь панчф лётчикть музеец.
- 1985-це кизоня Мордовиянь издательствась лихтсь «Геройская быль» лем ала книга, коза сувасть очеркт и зарисовкат Советскяй Союзонь Геройхнень — Мордовияса шачихнень колга.
- Великай Победати 65-кизонь топодемань шити, 2010-це кизонь 9-це майста Рузаевка ошса Сяськомань илать пингста, Мордовия Республикать и ошень администрациять лезконц вельде, ульсь панчф Славань аллея, коса путфт кота Геройхнень, Рузаевкаса шачихнень, бюстсна. Синь ётксост Советскяй Союзонь Геройть Анатолий Петрович Рубцовонь бюстоц.
Казненза
Казьфоль Якстерь Знамянь орденца, Суворовонь 3-це степенень орденца и Якстерь Тяштень орденца. Сонь улихть и медалензовок: Боевой Заслуганкса, Ленинградть араламанкса, Сталинградть араламанкса, Кёнигсбергть сявомонкса, Германиять лангса сясьманкса. Казьф медальса, кона лемтьф Советскяй Армиять и Флотть 1918—1948 к. колмонгемонце кизонц-иланц китькстаманц лятфнеманкса.
Лятфтамат
- ↑ 1 2 3 Анатолий Петрович Рубцов (рус.). Сайт «Герои страны».
- ↑ Указ Президиума Верховного Совета СССР «О присвоении звания Героя Советского Союза начальствующему составу авиации дальнего действия Красной Армии» от 31 декабря 1942 года // Ведомости Верховного Совета Союза Советских Социалистических Республик : газета. — 1943. — 8 январьста (№ 1 (207)). — С. 1. Архивировано 17 ноябрьста 2021 года.
Литературась
- Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
- Геройская быль. — Саранск: Мордкиз, 1985.