Пряхин, Иван Савельевич

Иван Савельевич Пряхин
Иван Савельевич Пряхин
Шачема шиц	30 декабрьста 1922
Шачема; вастоц	Шокш (Теньгушбуе)[d], Темниковскяй уездсь[d], Тамбовскяй губерния[d];
Кулома шиц	13 июньста 1983 (60 кизоц)
Кулома; вастоц	Олодимэр ош[d], РСФСР, СССР;
Принадлежностсь	СССР
Войскань родсь	Пехота[d]
Служама кизонза	1942—1946
Званияц	лейтенант
Частец	520-й стрелковый полк 167-й стрелковой дивизии
Сражениятне/войнатне	Великай Отечественнай война;

Иван Савельевич Пряхин (1922—1983) — советскяй военнай. Великай Отечественнай войнаса улись. Советскяй Союзонь Геройсь (1943). Лейтенант.

Эряфонь киц

Иван Савельевич Пряхин шачсь 1922-це кизоня 30-це декабрьста СССР-нь Тамбовскяй губерниянь Темниковскяй уездонь Шокша велеса (тяни РФ-нь Мордовия Республикань Теньгушевскяй райононь веле) сокаень-видиень семьяса. Шокша. Аделазе начальнай школать^[1]. Покодсь велень хозяйстваса. 1938-це кизоня Иван Савельевич ётась эряма Ивановскяй областень Ковров ошу^[2]. Покодсь Ивановскяй строительнай трестонь Ковровскяй стройконтораса модань шувикс,ульсь Горьковскяй кшнинь кинь строительно-монтажнай контораса покодикс, К. О. Киркижонь лемса Ковровскяй 2 № заводса эрь кодама тевонь тиикс^[3].

1941-це кизоня сёксенда немецко-фашистскяй войскатне врьгятнесть Москуть лангс, и советскяй правительствась сась мяльс анокламс Ковровскяй пулемётнай заводть эвакуацияти. Заводонь покодихнень группаснон мархта И. С. Пряхин кучовсь Тюмени, коса ладявихть заводонь цехне, промышленнай площадкань аноклама. Московскяй битвать пингста врагсь потафтовсь столицать стенанзон эзда, и эвакуировандамс предприятиять ашезь эрявкста. 1942-це кизоня февраль ковста Омскяй областень Тюменскяй районнай военкоматсь^[4] тердезе И. С. Пряхинонь Покодиень-сокаень-видиень Якстерь Армияв службав. Иван Савельевич шумордась младшай командиронь школа, мезьда меле кучевсь Сухой Логу, коса мольсь стрелковай 167-це дивизиять пуроптомац, и ульсь путф стрелковай 520-це полконь пулемётнай ротань станковой пулемётонь наводчикокс. 2-це июльста 1942-це кизоня стрелковай 167-це дивизиясь пачкодсь Воронежскяй фронту и сувафтовсь генерал-лейтенантть Н. Е. Чибисовонь оперативнай группазонза. Васенцеда бойс Иван Савельевич лиссь 21-це июльста 1942-це кизоня Малай Верейкать ваксса. Воронежско-Ворошиловградскяй оборонительнай операциять ушетксста дивизиянь часттне араласть Воронеж ошть эзда аф ичкозе ащи Оцю Верейка велеть, 1943-це кизоть самс 38-це армиять видеса кирнезь позицияснон. Воронежско-Касторненскяй операцять ушетксста Иван Савельевич уш ульсь пулемётнай расчётонь командиркс.

Тялонда 1943-це кизоня И. С. Пряхин сержантсь ульсь Касторнать ваксс вермахтонь 2-це армиянь частень куродомань и машфтомань операцияса, сяльде тюрсь Харьковть Колмоце бойса. 1943-це кизонь март ковста Сумскяй областень Сумскяй районца Курскяй дугань юго-западнай фасса стрелковай 167-це дивизиясь ащесь оборонаса. 1943-це кизоста кизоть самс Иван Савельевич арась старшай сержантокс и путовсь эсь полксонза стрелковай 3-це батальононь пулемётнай отделениянь командиркс. 19-це июньцта 1943-це кизоня Битица веть инкса бойса марнек батальонц цебярьста няфтезь пряснон. Батальононь ламонц боецне казевсть «Отваганкса» медальса, синь лувкссост и старшай сержантсь И. С. Пряхин, пулемётонь толса машфтсь вермахтонь 27 солдатт и вражескяй толонь нолдамань вастть. 1943-це кизоня август ковста Иван Савельевич ульсь Белгородско-Харьковскяй наступательнай операцияса, конань пингста стрелковай 167-це дивизиясь сязезь Великай Чернетчина велеть маласа карша тюрихнень оборонаснон и лиссть Псёл ляйть рубежс, кяшезь Воронежскяй фронтонь моли вийхнень виде флангснон. Старшай сержантсь И. С. Пряхин цебярьста няфтезе прянц Днепрать инкса тюремста.

Срафтомок Курскяй битваса немецко-фашистскяй войскатнень, Якстерь Армияс пцтай апак лотксек ушедозе Левобережнай Украинать идеманц коряс операциять, конань видеса Воронежскяй фронтонь войскатне ётафтсть Сумско-Прилукскяй фронтовой операция. 1-це сентябрьста 1943-це кизоня стрелковай 520-це полконь пулемётнай ротась васенцетнень ёткса форсировандазь Великай Чернетчина велеть ваксса Псёл ляйть и занязь Пиже Гай велеть маласа высотать, мезсь лездсь полконь вийхнень оцю пяльксснон ётафтомаснонды. 2-це сентябрьста 1943-це кизоня полксь сявозь Сумыть эзда севернай ширеса ащи Топали хуторть, мезсь лездсь ошть севернай ширде сявоманц коряс операциять цебярьста пяшкодеманцты. Няемок маласькодкшни окруженияс повомань зиянтть, карша тюрихне эстокиге ушедсть потафнема войскаснон областной центраста, Сумысь ульсь идеф пачк. Немецкяй войскатне кармасть каршек молема аньцек Ромны ошть маласа. 15-це сентябрьста 1943-це кизоня Ромны ошть ваксса стака бойть пингтса старшай сержантсь И. С. Пряхин отделениянц мархта маштсть ёфси малас "шаштомс" карша тюрихнень позицияснонды и пулемётонь толонь апак ужяльтть машфтсть вражескяй 30 солдат. Немецне куродозь отькорь боецнень, но Пряхинонь пулемётчиконза тиезь тевснон видеста, тёждяста лиссть окруженияста боецень апак юмафтт и ванфтозь материальнай пяльксснон. Пачкодемок пцтай Ромнати лемфтома сери вастса карша тюрихне ладясть ДЗОТ, кона апак лотксек вятсь полконь подразделениятнень ланга толса ляцендема, ашесть ноля инголи. Тапамс вражескяй толса ляценди вастть анась пря старшай сержантсь Пряхин. Иван Савельевич толса аф лоткси ляцендематнень алга пачкодсь ДЗОТ-ти и маштозе сонь гранатаса. 1943-це кизоня 15-це сентябрьста илядь стрелковай 3-це батальонць форсировандазе Сула ляйть и ушедсь ошть маласа бой. Кемокстамс тейст тоса шорясь толса ляцендемань вастсь, конань ладязе фкя кудть прясонза карша тюрись. Лисемок каршек толть лангс, Иван Савельевич маштозе вражескяй пулемётть рассчётонц мархта, мезсь лездсь батальонти кемокстамс ошть ваксса. Тяряфневсь панемс советскяй часттнень ошста, немецне вятьсть вии контратака. Вастти, коса старшай сержантть И. С. Пряхинонь отделенияц аралась пря, карша тюрихне нолдасть бойс роташка пехота, но аф ваномок ламода оцю лувксснон лангс синь ащесть потафтов. Толса ляцендемань средстватнень видеста ладяманкса и личнай составонь кемешинкса Иван Савельевич боецензон мархта полконь оцю вийхнень самс кирдезь заняф васттнень. 1943-це 15-це сентябрь ковонь веть самс Ромны ошсь идевсь немецко-фашистскяй захватчикта.

Молемок потай врагть мельге, 1943-це кизоня сентябрь ковть песта армиянь 38-це подразделениясь лиссть Днепрати и Дарница районца ляйть кержи трвасонза тапазь лядыкс сисем дивизиянь лувксса немецко-фашистскяй войскатнень.1943-це кизоня 2-це октябрьста старшай сержантсь И. С. Пряхин эсь отелениянц мархта васенцетнень лувксса аралась Днепрть Вышгород велеть ваксса. Вастть сявомста пулемётонь толса сон машфтсь 50-да лама карша тюри солдатта и тапазень толонь мольфтемань ниле точкаснон. Старшай сержантть Пряхинонь отделенияц кемокставсть нельгф плацдармаса, мезсь лездсь стрелковай 3-це батальононь основной вийхненди оцю юмафксфтома форсировандамс Днепрть. Заданиянь цебярьста пяшкодеманкса, Днепр ляйть западнай трвасонза плацдамань кемокстамонкса и няфтьф отваганкса и героизманкса 13-це ноябрьста 1943-це кизоня СССР-нь Верховнай Советть Президиумонц указонц коряс старшай сержантти Пряхин Иван Савельевиченди максовсь Советскяй Союзонь Герой лемсь.

Каземанц колга Иван Савельевич кармась содама медсанбатта меле, ков сон повсь ранения мархта, конань получазе 11-це октябрьста 1943-це кизоня Од Петровцатнень ваксса бойса. И. С. Пряхинонь кучезь младшай лейтенантонь армейскяй нюрьхкяня курсонь ётама, конатнень аделамда меле сон мрдась эсь полкозонза и арась стрелковай 3-це батальононь пулемётнай ротань взводонь командиркс. Но эстокиге няфтемс прянц Иван Савельевиченди ашезь удала. Васенце бойса 1944-це кизоня 11-це февральста сон ульсь ранендаф и тага повсь больницяв. Пчкамда меле сон мрдась части, кона воявась Украинскяй 1-це фронтонь гвардейскяй 1-це армиять видеса, и ульсь Проскуровско-Черновицкяй операцияса. Западнай Украинаса Якстерь Армиять кизонь наступлениянцты анокламста стрелковай 167-це дивизиянь стрелковый 520-це полксь вятьсь позиционнай тюремат Тарнопольскяй областень Чортковскяй районца. 26-це июньцта 1944-це кизоня младшай лейтенантсь И. С. Пряхин ульсь Палашовка велеть маласа разведкаса. Мзярда карша тюрихне потафтозь разведкань подразделениять, Пряхинонь пулемётчиконза толонь апак лоткафнек кяшезь синь потамаснон и лоткафтозь врагть врьгятнеманц, машфтсть карша тюрихнень 40 солдатта и офицерда.

5-це августста 1944-це кизоня гвардейскяй 1-це армиясь ульсь максф Украинскяй 4-це фронтти. Львовско-Сандомирскяй операциять ётафтоманц пингста Иван Савельевич боецонзон мархта нельгозь врагть кядьста Дрогобыч ошть. Сяльде сон тюрсь Чехословакиять и южнай Польшать территориясост, ульсь Восточно-Карпатскяй, Западно-Карпатскяй и Моравско-Остравскяй операцияса, подразделениянц мархта макссь воля Новы-Тарг и Моравска-Острава ошненди. Иван Савельевичень боевой киц аделась 9-це майста 1945-це кизоня Прагаса. 1946-це кизоня февраль ковтса лейтенант И. С. Пряхинсь нолдавсь запасу. Мзярошка пинге эрясь Мордовскяй АССР-нь Шокша велеса, а 1954-це кизоня семьянц мархта ётась эряма Владимир ошу. Кулось Иван Савельевич 13-це июньцта 1983-це кизоня. Калмаф Владимир ошень Улыбышевскяй калмолангса.

Казнет

«Зрнянь Тяште» медаль (13.11.1943);
Ленинонь орден (13.11.1943);
«Якстерь Тяштень» орденонь кавалерхне (09.07.1944);
медальхнень лувксса:
- «Отваганкса» медаль (03.07.1943).

Колганза мялямсь

Мемориальная доска с барельефом Героя Советского Союза И. С. Пряхина установлена на мемориальном комплексе «Вечный огонь» в городе Владимире.
Памятная стела в честь Героя Советского Союза И. С. Пряхина установлена на Площади Победы в городе Коврове Владимирской области.

Лятфнемат

↑ Ныне МОУ «Шокшинская средняя общеобразовательная школа».
↑ 1944-це кизоня Владимирскяй областть эвондомда инголе Ковров ошсь сувсесь Ивановскяй областть состав
↑ Ныне ОАО «Завод им. В. А. Дегтярёва».
↑ С 1935 года и до образования Тюменской области в 1944 году город Тюмень входил в состав Омской области.

Литературась

Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
Геройская быль: очерки и зарисовки о Героях Советского Союза — уроженцах Мордовии / сост.: В. С. Ионова, А. Д. Ширяев; под ред. М. П. Глебова. — 2-е изд. — Саранск: Мордовское кн. изд-во, 1985. — С. 266—269. — 367 с.
Шаблон:Книга:Шёл парнишке в ту пору
Солдаты Победы: книга о фронтовиках Владимирской области — ветеранах Великой отечественной войны 1941-1945 гг. В 5-ти томах / редкол.: Е. А. Завьялов и др.; сост. Е. И. Селиверстов и др. — Владимир: Фолиант, 2005. — Т. 1. — С. 27. — 496 с.

Документтне

Общедоступный электронный банк документов «Подвиг Народа в Великой Отечественной войне 1941—1945 гг.» (неопр.)(недоступная ссылка — история). Дата обращения: 25 июньцта 2013. Архивировано 13 мартста 2012 года.

Представление к званию Героя Советского Союза и указ ПВС СССР о присвоении звания. Дата обращения: 25 июньцта 2013. Архивировано 30 июньцта 2013 года.

Орден Красной Звезды (наградной лист и приказ о награждении). Дата обращения: 25 июньцта 2013. Архивировано 30 июньцта 2013 года.

Медаль «За отвагу» (приказ о награждении). Дата обращения: 25 июньцта 2013. Архивировано 30 июньцта 2013 года.

Ссылкатне

Пряхин Иван Савельевич на www.az-libr.ru (неопр.). Дата обращения: 25 июньцта 2013.
Владимирский край (неопр.)(недоступная ссылка — история). Дата обращения: 25 июньцта 2013. Архивировано 30 июньцта 2013 года.
14 строк о Пряхине. Ковровские вести (неопр.). Дата обращения: 25 июньцта 2013. Архивировано 30 июньцта 2013 года.
Краеведческий проект «Созвездие Героев»: Пряхин Иван Савельевич

[1] Ныне МОУ «Шокшинская средняя общеобразовательная школа».

[2] 1944-це кизоня Владимирскяй областть эвондомда инголе Ковров ошсь сувсесь Ивановскяй областть состав

[3] Ныне ОАО «Завод им. В. А. Дегтярёва».

[4] С 1935 года и до образования Тюменской области в 1944 году город Тюмень входил в состав Омской области.

[1]

[2]

[3]

[4]