Никон (Москувонь патриархсь)

Ванф Российскяй Наукань Академияса

Ванф
Ванф Российскяй Наукань Академиять видеса

Сяда крхкаста

Ванф Российскяй Наукань Академияса

Ванф
Российскяй Наукань Академиять вельде

Сяда крхкаста

Б.Н. Ельцинонь лемса библиотекань материалхне

Тя статьяса материалхне нолдафт тевсБ.Н. Ельцинонь лемса Президентскяй библиотекань фондста

Б. Н. Ельцинонь лемса Президентскяй библиотекась

Никон Патриархсь
Москувонь и марнек Русень Патриархсь
25 июльста (4 августста) 1652 — 12 (22) декабрьста 1666
Интронизациясь	25 июльста (4 августста) 1652
Церькавсь	Рузонь православнай церькавсь
Новгородскяй и Великолуцкяй митрополитсь
11 (21) мартста 1649 — 25 июльста (4 августста) 1652
Лемоц шачемста	Никита Минин (Минов)
Шачемась	7-це (17-це) майста 1605-це кизоня Вельдеманова велесь, тяни Нижегородскяй областень Перевозскяй районць
Куломась	17-це (27-це) августста 1681-це кизоня (76 кизоц) Тропинскяй слободась, Ярославль ошсь
Калмаф	Новоиерусалимскяй монастырьса, Истра ошса
Автографсь
Никон

Ни́кон патриа́рхсь (руз. Никон (патриарх Московский); мирской лемоц Ники́та Ми́нин (Минов); 7-це [17-це] майста 1605-це кизоня, Вельдеманова^[d], Нижегородскяй уездсь^[d] — 17-це [27-це] августста 1681-це кизоня, Ярославль) — Москувонь патриарх, конань ульсь официальнай титулоц «Шкайть кельгоманц вельде оцю азор и оцязор, Моску ошса азорондай архиепископсь и оцю, и ёмла, и акша Россиянь и сембе кельме ширень странатнень и помориять и ламоц государстватнень Патриархсна» 1652-це кизонь 25 июльста (4 августста) сявомок 1666-це кизонь 12 (22) декабрьти молемс ульсь «Оцю Оцязор» титулоц.

Никон патриархть церькавонь реформанза, конатнень сон ушедозень 1650-це кизотнень, ульсть шарфтфт ся пингонь ладяф обрядонь койть полафтоманкса, кона ульсь Рузонь Церькавса. Улеза сон фкя лаца греконнеть мархта. Тя вятсь Рузонь церькавть явоманцты, сире койхнень коряс эряйхнень эвондамаснонды. 1666-це кизоня сон ульсь валхтф патриарх вастста и арась простой монахокс, хуш сонь реформанза мольфтевсть сяда тов.

Од кизонза

Никононь идькс и одкс пингонц колга содатама эряфонь азксста, конань Никононь куломда меле сёрмадозе иподьяконць Иван Шушерин. Шушерин нинге одста повсь Никононди служайкс и сонь ширесонза кассь.

Сай пингонь патриархсь шачсь 1605-це кизонь майста Нижняй Новгородть маласа Вельдеманова велеса (тяни Нижегородскяй областень Перевозскяй районць). 24-це майста цёранять кстиндазь и лемдезь Никитакс преподобнай Никита Столпниконь лемса. Тядянза-алянза ульсть сокай-види ломатть, Мина аляц и Мариама тядяц. Литератураса нолдась юрхт ся мяльсь, што синь — мокшэрзят . Васенцеда тя мяльть азозе, аф кучемок кодамовок ссылкань лангс, писательсь Павел Мельников-Печерский «Очерки мордвы» (1867) книгасонза. Протопопсь Аввакумсь, кона тяка вастса казозе серенц, корхнесь, кле, Никитань аляц ульсь черемис, лиякс мярьгомс, мариец, а тядяц — «русалка» (рузава).

Сонць Никон 1655-це кизонь соборса мярьгсь эсь колганза: «Мон рузан и рузонь цёран, но монь шарьхкодемане и монь кемамазе — греческяйхть». XVII-це веконь кучкастонь синодикне пачфнесазь Никитань брадонзон лемснон (Симеон, Никифор и Григорий), атянц лемоц Василий и щятянц лемоц Гавриил. Никитань тядяц кулось шачемдонза меле, и цёранять мельге якама ушедсь кодама-бди Ксения. Курокста аляц рьвяясь омбоцеда. Кда кемамс Шушеринонди, од тядясь эсь шабанзон мархта афолезь няе Никитань, кирнезь вачеда, пикссезь и ёразь мянь шавомс.

Аляц максозе цёранять тонафнемс грамотас и Иняру Сёрматфксти. Но куду мрдамдонза меле сон кармась сёрмать юкснемонза, сяс сась мяльс тумс эряма кодамовок монастыри, штоба сяда тов поладомс тонафнемать. Шушерин пачфни, што Никита тусь Макариев-Желтоводскяй монастыри, коса эрь шиня тонафнесь Сёрматфксть эса и салазе мяленц церькавонь морамась, сидеста ляткшнесь удома церькаву пайгть алу, штоба аф нолдамс службать ушедоманц. Улихть лама версият сянь коряс, мзярда Никита повсь Макариев-Желтоводскяй обители. Улихть кулят, конатнень коряс бта сон улендсь лия монастырьхнень эсовок. Мрдамс вели Никитань кошардозе аляц, кона кучф ломань вельде пачфтсь цёраняти аф виде куля, кле пяк сярядихть аляц и бабац или кулость, эрь кодама источникса сёрматф аф фкя лаца. Курокста аляц и бабац кулость.

Шушерин эсь азкссонза нежетькшнесь сонцень патриархть и перьфпяльдень ломаттнень лятфнемаснон лангс. Кой-коста синь ульсть афкуксонь айнема лацот. Кепотьксонди, содаф предания кодама-бди татаронь или мордвинонь колга, кона азозе Никитанди сай пингонц, патриархокс улеманц колга. Митрополитть Илариононь эряфонь азондомасонза корхтави, што Никита Миновонь патриархокс араманц колга, мордвинда башка, корхтась нижегородскяй священниксь Ананий (Суздальскяй митрополитть Илариононь аляц).

Патриархокс улемда инголе

Тядянзон-алянзон эняльдемаснон коряс рьвяясь и примась озксвятиень сан. Москувонь купецнень эняльдемаснон коряс, конат содазь сонь кода лама лувонды и сёрмас машты ломанькс, 1626-це кизоть малава путфоль озксвятикс Москуву кемаень фкя пуромксу.

Елеазар Анзерский няйсь Никононь лангса куй (Никон патриархть сире коень «антижитиястонза» миниатюра, XIX вексь)

1635-це кизоня шабанзон куломдост меле Никита сась мяльс кадомс мирской эряфть. Сон корхнезе рьванц нарафтомс прянц монахинякс москувонь Алексеевскяй монастырьса, максомок инксонза путкс и кадомок ярмак тоса эряманди-ащеманди, а сонць 30 кизоса стане жа нарафтозе прянц монахокс Никон лем ала Соловецкяй монастырень Свято-Троицкяй Анзерскяй скитса. Аф лама пингонь ётазь преподобнай Елеазар Анзерский, скитонь сире озонды атясь, путозе Никононь литургиянь ётафтыкс и скитть хозяйственнай пяльксонц мельге ваныкс. 1639-це кизоня, тумок туркс Елеазаронь мархта, Никон ворьгодсь скитста и сявфоль Кожеозерскяй монастыри. 1643-це кизоня кочкафоль монастырень игуменкс.

1646-це кизоня тусь Москуву, коса саксь сюконязь, ся пингонь игуметтнень койснон коряс, од оцязорть Алексей Михайловичень инголи, и пяк тусь оцязорть мяльс. Сон мярьгсь Никононди лядомс Москуса, а Патриархти Иосифонди — путомс сонь Новоспасскяй монастырень архимандритокс.

Арамок Новоспасскяй обительса братиятненди вятикс, Никон сувась духовнай и светскяй ломанень аф формальнай пуромксу, конань профессорсь Н. Ф. Каптерев лемнесы «благочестиянь ревнительхнень» кружококс. Тя группать главнай идеологонза — Благовещенскяй соборонь протопопсь Стефан Вонифатьев, баярсь Ф. М. Ртищев и Казанскяй соборонь протопопсь Иоанн Неронов — путнесть эсь инголест и эсь ялгаснон инголи эрявикс тев — эреклафтомс религиозно-церькавонь эряфть Москувонь государстваса, цебярьгофтомс кода ломаттнень, стане и духовенствать, прянь вятеманц, эряманц, сувафтомс эряфс тонафнемать, содамашинь мельге панемать. Москуса сувафтфоль церькавса амвонаста проповедень азондомась, кона юкстафоль ни прокс, богослуженияса «фкя мяльса улемась», оцю мяль шарфневсь богослужебнай книгатнень ётафксснон петемаснонды.

Ушедсь арнема оцязорть пяли дворецу эрь пяденцяня корхнема и советонь максома аф аньцек духовнай тефнень колга, но и государственнайхненьге квалма.

1649-це кизонь 11(21)-це мартста Иерусалимскяй Патриархсь Паисийсь, кона эста ульсь Москуса, путозе сонь Новгородскяй и Великолуцкяй митрополитонь санц.

Патриархокс улемац

1652-це кизонь 15(25)-це апрельста, Чистай шуваланяста, кулось патриархсь Иосиф. «Ревнительхне» патриархонь сантть максолексолезь Стефан Вонифатьевонди, но ся атказась, улема, шарьхкодезе кинь Алексей Михайлович ёрай няемс патриархонь престолса.

Алексей Михайлович и Никон иняру Филиппть калмонц инголет. А. Д. Литовченко, 1886

1652-це кизонь июльть ушетксста Соловецкяй монастырьста Москуву пачфтьфтольхть Иняру митрополитть Филиппонь мощанза. Мощатнень столицав ётафтысна ульсь Новгородскяй митрополитсь Никон, конанди оцязорсь Алексей Михайлович мярьгсь полафтомс иняруть калмонц инголе патриаршай престолть.

1652-це кизонь 25-це июльста (4-це августста) Никон, оцю илань ётафтозь, озафтфоль Москувонь и Марнек Россиянь патриархнень престолс. Интронизациять пингста Никон сявсь вал оцязорть кядьста аф эцемс Церькавть тевонзонды. Оцязорсь и народсь варасть «кулхцондомс сонь сембоса, кода оцюнянь и ванынь».

Реформаторскяй тевонза

Никон лама кизот кочксезень греческяй и византийскяй тексттнень и виде ваймот улендсь «Благочестиянь ревнительхнень кружоконь» васедематнень-корхнематнень эса (коза сувсесь тяфта жа и протопопсь Аввакум), сон лувондозе оцю тевкс тиемс рузонь православнай койхнень и книгатнень греческяйхнень коряс.

1654-це кизонь Церькавонь Соборсь
(Никон Патриархсь няфнесыне службань вятемань од тексттнень) А. Д. Кившенко, 1880 г.

1653-це кизонь Очижинь постть ингольде Никон мярьгондсь крёснемс пря колма сурса, мезсь мольсь каршек 1551-це кизонь Поместнай Стоглавай Соборти, кона кемокстазе кафта сурса крёснемать-озондомать. Сяда тов Никон поладозе реформать, кочксемок соборхнень. 1654-це кизонь Соборсь путсь ушеткс москувонь книгатнень греческяй книгатнень мархта фкя лаца тиемаснонды, конат печатлафтольхть Шинь мадома ширеса XVI-це векста. И кда тя Соборса арьсеф тефне ульсть нинге весть ванфт-кемокстафт тяка кизонь Константинопольскяй Соборса, конань вятезе Паисий Патриархсь, то 1656-це кизонь местнай Московскяй соборть решенияц, конань коряс сембонь, кит крёснихть-озондыхть кафта сурса, азозь еретикокс и макссезь анафемати, мольсь каршек тейнза . 1656-це кизонь соборть эрязста азф анафемац кафта сурса сембе крёсныхнень-озондыхнень лангс, кона меле лоткафтфоль РПЦ-нь 1971-це кизонь Поместнай соборть мархта, и арась васенце туфталкс XVII-це векста церькавса явомати.

Кода народть ёткса, стане и священствать оцю пяльксонц ёткса нолдасть юрхт мяльхне, кле рузонь благочестиясь греческяйть коряс сяда цебярь, а москувоннесь — киевоннеть коряс. Тя арьсемась эвондась Кельме-Шинь стямань ширень Русьса, мзярда грекне католикнень мархта путозь кядьснон Флорентийскяй унияти, Константинопольть прамдонза меле, Литвать Польшать алу люпштамдонза меле (тезиссь «Москусь — Колмоце Римсь»), а стане жа реформаторхнень кяжсна вятсть сянди, што Рузонь церькавсь явовсь кафтува. Фкя ширде ульсть Никононь («никониатне») ширень кирдиенза, а омбоце ширде сире койхнень ширень кирдисна, конатнень оцюняснон эзда фкясь ульсь Аввакум.

Строительствась

Патриархть Никононь тевонзон эзда фкясь ульсь Россияса монастырень пуроптомась. 1653-це кизоня Валдайскяй эрьхконь цёнгаса путфтольхть Иверскяй монастырть шуфтонь васенце кудонза. 1655-це кизоня путфоль кевонь Успенскяй соборсь.

Валдайскяй Иверскяй монастырсь, конань пуроптозе Никон

1656-це кизоня Никон сатсь оцязорть кядьста мярьгома путомс Кий-цёнгаса монастырь, кона тяни содаф кода Онежскяй Крестнай монастырсь. Васенце куттнень строямаснон мельге 1656-це кизоста сявомок 1659-це кизоти самс ванцть озонды атятне Нифонт Теребинский и Исаия, а тяфта жа стольниксь Василий Парамонович Поскочин — Никононь надияма ломаненза. Сяка 1656-це кизоня Никон патриархсь макссь ушеткс Новоиерусалимскяй монастырти кода патриархнень Моску алдонь резиденцияснонды. Монастырсь строяфоль Воскресенскяй велень модатнень лангса. Никононь арьсефонц коряс, теенза эрявсь арамс сай пингста православнай миронь центракс.

Оцязорть мархта туркс тумась

Од оцязорсь Алексей Михайлович лувозе патриархть Никононь надияма ломанькс, кулхцондозе сонь государствань вятемань тевсовок. Мзярда мольсь Речь Посполитаять мархта войнатне (1654—1667) и оцязорсь ламос ашезь уленде эсь вастсонза, кадондозе патриархть правительствань вятикс. Оцязорть мярьгоманц коряс «Инь оцю Азорсь» патриархть титулонцты ульсь полатф оцязоронь титулсь «Великай Государь». Тяфта ащи тевсь вятсь сельмонь каямати и кяжиямати кода баярхнень ширде, конатнень ашель мяльсна юмафтомс оцязорть лангс влияниять, стане и ламоц духовенствань ломаттнень, кепотьксонди, «благочестиянь ревнителень» ингольдень кружоку сувсихнень ширде.

Новоиерусалимскяй монастырсь, конань пуроптозе Никон партиархсь 1656-це кизоня. 1899-це кизонь коллажсь

Никон патриархсь арсесь каршек сянди, мезть сон шарьхкодезе кода врьгятема гражданскяй правительствать ширде сонь юрисдикциянц и полномочиянзон лангс. Сембода оцю каршек арама лиссь 1649-це кизонь Соборнай уложениять примамац каршес, конань коряс ёмлалгофневсь духовенствать статусоц и Церькавсь путневсь государствать кядялу. Тяфта, дохоттне монастырскяй вотчинатнень кирдемаснон эзда ётнесть Уложениять коряс пуроптф Монастырскяй приказти и тушендсть государствань казнав; мирской суттне кармасть ванондомост тефнень, конат канневсть церькавонь суттнень вятемаснонды.

Тянь инкса, а тяфта жа кой-кона баярхнень и духовенствать инкса, конатнень ульсть оцязорть лангс влияниясна и конат кяжияфольхть патриарх Никононь лангс, колавсь оцязорть и патриархть ёткса ладямась. 1658-це кизонь 10 (20)-це июльста Никон сембонь ингольде атказась патриаршествать эзда. Сон надиясь, што оцязорсь кармай эняльдема простямс сонь и тердсы меки вастозонза. Но Алексей Михайлович кучсь Никононди Трубецкой князть, штоба содамс туфталть колга. Корхнемат лядомс, конатнень лангс надиякшнесь Никон, ашельхть. Кафта шида меле ни — 1658-це кизонь 12-це июльста — ингольдень патриархсь тусь Воскресенскяй Новоиерусалимскяй монастыри, конань (Крестнай и Иверскяй монастырьда башка) 1656-це кизоня сонць пуроптозе и сонць азорсель тоса

Но туфталкс патриархть и Алексей Михайловичень ёткса аф ладямати, мекольцеть ширде аськолкста башка, ульсь и Никононь философскяй тевоц. Оцязорсь, мязрда нинге одоль, пяк кельгозе Никононь, нльне лемнезе сонь «Великай Государькс», патриархсь арьсесь концепция, конань коряс лихтсь тяфтама тезис «священствась сяда вяре царствать коряс», кона нежеди сянь лангс, што фкявок светскяй законць аф эрси церковоннеть, Шкаеннеть коряс сяда вяре.

Оцязорсь шарфтозе эздонза шаманц и валхтозе священстваста

1660-це кизоня Москуса пуромф Соборса арьсефоль сявомс Никононь кядьста архиерействать и нльне священствать; но суд ашель, сяс мес тевть ладязь максомс судс шинь стяма ширдень патриархненди. Тяфта лиссь никоновскяй монахть-справщикть Епифаний Славинецкяень и Полоцкяй Богоявленскяй монастырень архимандритть Игнатий Иевлевичень мярьгомаснон коряс. Тянь лаца оцязорти тя кизефксть арьсемс указовась и Иерусалимонь церькавонь ингольдень епископсь Паисий Лигарид, кона ашель Соборса, хуш сонь тердезь патриархне салава ётафтови совещанияс, коса сон ётафнесь фкя кяльста омбоцети шинь стяма ширде саф патриархнеди.

Никон патриархть лангса судсь
(С. Д. Милорадович, 1885-це кизось)

Патриархне тертьфтольхть нинге 1662-це кизоня, но лама пинге теест ашель кода самс Москуву. Мекпяли, 1666-це кизонь ноябрьста панжевсь Рузонь церькавонь поместнай соборсь — Москувонь Оцю соборсь, коза састь кафта патриархне: Паисий Александрийскяй и Макарий Антиохийскяй. Кафцьке патриархне ся пингть Константинопольса катфтольхть кафедрафтома Константинополень Соборть решениянц коряс (муворшикс лувовсь ся, што синь ламос ашельхть эсь патриархиясост, а ся лиссь рузонь оцязорть Алексей Михайловичень эняльдеманц сюнеда самс Россияв и улемс Москувонь Оцю соборса), но Москуву тянь колга кулясь сась ни Никононь лангса судта меле. Тяда башка, сяда меле рузонь оцязорть эняльдеманц коряс, Константинопольскяй патриархсь эсь арьсеманц нельгомс Александрийскяй и Антиохийскяй патриархнень кафедраснон полафтозе.

1666—1667-це кизонь Соборхнень идеологиянь базаснон и документснон, конатнень эса ванондовсь «сире кемамать» ширень кирдиензонды аф кондястикс Никононь богослужебнай реформанза, тиендезь-латцезь «латинскяй» толконь монахсь учёнайсь Симеон Полоцкяй, Паисий Лигарид и Афонскяй Иверскяй монастырень архимандритсь Дионисий, конат эрясть Москуса 1655-це кизоста сявомок 1669-це кизоти самс.

1666-це кизонь 12 (22)-це декабрьста ётафтовсь Никононь тевонц коряс колмоце, Соборонь мекольце заседаниясь, кона ётась Чудовонь монастырень Благовещенскяй церькавса.

12-це декабрнь грамотаса, коза путозь кядьснон Москувонь Оцю соборонь Рузонь поместнай церькавонь сембе архиерейхне, а тяфта жа греческяй поместнай церькафнень иерархсна (патриархне, митрополиттне, архиепископне, епископне), сёрматфт коень сембе коламатне, конатнень сюнеда Никон паньф патриаршестваста и священстваста Рузонь церькавонь поместнай соборть судонц вельде.

1. Никон аердазе (обжазе) оцязорть, мзярда кадозе паствать и тусь Воскресенскяй монастыри, аньцек сянкса, мес оцязоронь чиновниксь эрьхтезе патриархть вардонц.

2. Никон ашезь миренда мезьге мархта и ашезь карма каендама, а тиендсь хиротоният од вастса, строясь од монастырьхть, конатнень лемдезень «аф кондясти валса и суетнай лемнемаса»: Од Иерусалим, Голгофа, Вифлеем, Иордан, тянь мархта сон сюцесь Шкаеннеть и пеетькшнесь иняруть лангса, шнакшнезе эсь прянц Од Иерусалимонь патриархокс, салсемок разбойникокс, и кда улель ба сонь виец, то сяволезе царствать колмоце пяльксонц.

3. Азонкшнесь анафемат патриархнень Паисиень и Макариянь лемс, конат састь сонь судендамонза, лемдемок синь Аннакс и Каиафакс, а оцязоронь кучфнень, конат кучфтольхть сонь судс тердемонза, лемдезень Пилатокс и Иродкс.

4. Никон сёрматкшнесь патриархненди сёрмат, коса тяштсь Алексей оцязорть колга, што оцязорсь «латиномудренник, муцяй и обжай, Иеровоам и Озия» и сянь колга, што Россиянь церькавсь прась латинскяй догматтненди, сембода пяк муворгофнезе тянь эса Паисий Лигаридонь.

5. Никон, соборса тя тевть колга апак корхтак, сонць сявозе епископть Павел Коломенскяень санонц, кяжса лаказь валхтозе Павелонь лангста мантиянц, и тяда башка «сюдозе вишке урматненди и наказаматненди», мезть сюнеда Павелонь шоворсь ёнец и ямбарнясь шавовсь: или сязендезь вирень кяжи ракшатне, или ляйти прась и шавовсь.

6. Эсь духовнай алянц Никон кафта кизот аф ужяльдезь пикссезе и ашесть пчксе сонь токаф вастонза, тяда меле патриархне синць няезь Никононь духовниконц «сембе ширде лафчемфста».

Коень-закононь тя коламатнень инкса Никон ульсь паньф священстваста: аф аньцек патриаршай достоинстваста, но епископонь санцтовок и арась простой монахокс.

Никон монахсь соборнай судта и вастстонза панемда меле ульсь прважаф Ферапонтовань Белозёрскяй монастыри; Алексей Михайловичень куломдонза меле ульсь ётафтф сяда кеме надзор алу Кирилло-Белозёрскяй монастыри.

Куломац и сяда товонь шкайгиц

Оцязорть Алексей Михайловичень куломда меле престолсь ётась сонь цёранцты Фёдор Алексеевиченди, кона ужяльдезе Никононь. Улихть кулят, што од оцязорсь арьсекшнезе Симеон Полоцкяень мархта азф планть Российскяй царствать моданзон лангса тиемс ниле патриархият. Согласно этим сведениям, патриаршие престолы предполагались в Новгороде, Казани, Астрахани и Тобольске и папскяй престол, кона лемдеволь Никононди. 1681-це кизоня Никононди, стакаста сярядити, мярькфоль мрдамс Воскресенскяй Новоиерусалимскяй монастыри, конанди пачкодемста сон кулось. Тя лиссь 17-це августста Николо-Тропинскяй приходса Ярославль ошть каршеса, Которосли ляйть прама вастсонза</ref>.

Никон патриархть калмоц Новоиерусалимскяй монастырьса

Фёдор Алексеевич оцязорсь ащесь сянь лангса, штоба Никононь кулонц лангса озксть ётафтолезь кода патриархонди, аф ваномок Москувонь патриархть Иоакимонь каршек ащеманц лангс, кона атказась морафтомс озксса и лятфнемс Никононь кода патриархонь. И тя сянь инкса, што сон Рузонь церькавонь поместнай соборть — Москувонь Оцю соборть и соборнай судть (кона ульсь тя поместнай соборса) решениянц, кона панезе Никононь священстваста теенза азф муворшить инкса, лувозе видекс.

Никононь скитоц Новоиерусалимскяй монастырть ваксса

1681-це кизонь 26‑це августста Никон ульсь калмаф, сонь аноконди катф кошарксонц коряс, Новоиерусалимскяй монастырень Воскресенскяй соборть лямбе ширень приделсонза (кона лемтьф Иоанн Предтечань прянц Керомац лемса); Федор Алексеевич сонць авардезь лувондозе велькссонза Апостолть и 17-це кафизмать и аф весть палсезе сонь види кяденц.

1682-це кизоня Федор Алексеевич толмацясь восточнай патриархнень кядьста мярьгомань каготт. Синь эсост мярькфоль сувафтомс Никононь патриархнень ёткс и лятфнемс озондомста тяфтама лемса.

Кядьса сёрматф «Никон иняру патриархть эряфонь азксоц, конань тяштезе вакссонза эряй клириксь». И. К. Шушерин, XVIII-це векть ушетксоц.

Константинопольскяй патриархть Иаковонь 1682-це кизонь 5-це маень грамотац азонды:

Мялямса преподобнайсь, кельгома брадоньке, Никон азорсь, Москувонь и марнек Руссиянь ингольдень патриархсь, тевонзон инкса получамать вастс, ламос преподобничествать и кирдемшкать инкса, ули простиндаф и валхтф лангстонза соборнай панемась, и улеза простяма теенза тяниень векса и сай пингть Алять и Цёранц и Иняру Ваймопожфть эзда, Иняру и Живоначальнайть Троицать эзда; примамок архиерействать духовнай хитононц, да примасы, кода патриархонь, церькавса фалу лятфнемать, лятфнесаськ Москувонь лия патриархнень мархта священнай диптихса, и эрь кодама лемневи пинкнень иняру церькавонь лемнематнень ётамста сотови Москувонь лия патриархнень мархта, патриархокс жа; лувондови и лемневи и лятфневи, и кивок катк аф тиеви каршек тянди, афкукс тяфта катк ули! Тякось жа видешинкса нолдазе сонь тя простямать.

Вильям Шмидт религиоведсь тяшкснезе, што Никононь куломдонза меле рузонь православнай ломаттне лисендсть Патриархснон васьфтема, шнама и явсема. Нинге аф учемок Никононь патриархонь лемти мрдаманц, народсь прашендсь теенза кода святительти-исповедникти и лама маятамань пачк ётай иняру ломаненди. Эста няевсь, што рузонь народсь кельгсы и кородсы патриархть Никононь, кемай сонь видексшинцты. Кафолическяй церькавсь мяльвельде и кенярдезь нолязе Никононь, ладямок сонь патриаршай лемса и сувафтомок сонь первопрестольнайхнень Москувонь Иняру Патриархнень ёткс. Воскресенскяй монастырьса иняру патриархть Никононь калмонц ваксса XVII-це векть песта XXI-це векть ушетксонцты молемс лисендсть чудань лама пчкафтомат.

Синодальнай пингть цензурать люпштаманц ала документтнень, конат сотфт Москувонь Оцю соборть заседаниянзон мархта — Никононь лангса судть мархта (соборнай определениясь Никононь коень коламанзон колга и соборнай грамотась Никононь священстваста валхтоманц колга), ашесть печатлакшне официальна нолневи «1666 — 67-це кизонь Москувонь Оцю Соборонь тевтиематне» каготтнень ёткса.

2013-це кизоня археолокнень мархта ульсь панчф патриархть Никононь калмоц, но ульсь муф аньцек шава саркофаг — калмось инголи ульсь грабаф

Никононди мялямгефне

Никон Патриархсь «Россиять 1000-кизоц» мялямгевса Великай Новгородса.

1862-це кизоня Никононь скульптурац сувафтфоль Великай Новгородса ащи «Россияти Тёжянь киза Мялямгевть» фигуранзон ёткс.

2005-це кизоня, мзярда топодсь патриархть Никононь шачема шиста ниле сятт кизот, Вельдеманово велеса кудъюрхтть вастса, коса патриархсь ётафтозе идькс пингонц, путфоль памятник-часовня. Тя илати мазоптфоль-петьфоль пандть ала лихтибрясь и тифоль эшеляма васта. Мялямгевть ваксс стяфтфоль сюконямань крёз мокшэрзянь народть эзда

2006-це кизонь 5-це августста Патриархть Никононь кулома шистонза 325-це кизонь топодемати Саранскяйса панчфоль Никононди мялямгев, конань иняруяфтозе патриархсь Алексий II. Монументть автороц — мокшэрзянь скульпторсь Николай Филатов.

Киноса няфтемац

• Александр Парра «Гуляндай ломатть» художественнай фильмаса, СССР, 1988-це кизось.
• Валерий Гришко «Раскол» историческяй сериалса, Россия, 2011-це кизось.

Лятфтамат

Комментариятне

Коста сявфт

Литературась

• Алексеев А. С., Завьялов С. М. Алебастровый саркофаг Патриарха Никона: состав и возможные источники // Российская археология. 2013. № 4. С. 109—112.
• Богданов А. П. Патриарх Никон // Вопросы истории. — 2004. — № 1. — С. 51—117.
• Воробьёва Н. В. Личность патриарха Никона в отечественной историографии. — Омск: Изд-во ОмЭИ, 2007. — 243 с.
• Воробьёва Н. В. Историко-канонические и богословские воззрения патриарха Никона. Омск: Изд-во ОмГУ, 2008. — 413 c.
• Зызыкин М. В. Патриарх Никон. Его государственные и канонические идеи. Варшава, 1931—1938. Т. I—III.
• Зеленская Г. М. Патриарх Никон — зодчий Святой Руси. — М.: Воскресенский Ново-Иерусалимский ставропигиальный монастырь : Паломник, 2011. — 315 с. 4500 экз. — ISBN 978-5-91796-004-3
• Каптерев Н. Ф. Патриарх Никон и царь Алексей Михайлович. Т. 1—2 М., 1996.
• Лифшиц А. Л. Документы о поставках продовольствия и других запасов ссыльному Патриарху Никону в Ферапонтов монастырь // Вестник церковной истории. 2010. № 1—2 (17—18). С. 5—16.
• Лобачёв С. В. Патриарх Никон. — СПб.: Искусство — СПБ, 2003. — 416 с.
• «Патриарх Никон. Рождённый на земле Нижегородской». Н. Новгород: РИДО, 2007. Составители архим. Тихон (Затёкин), О. В. Дёгтева и др.
• Патриарх Никон: трагедия русского раскола (сборник статей). М.: Даръ, 2006 г. ISBN 5-485-00069-X.
• Патриарх Никон, возлюбленник и содружебник царя Алексея Михайловича: жизнь Никона, деятельность его, заточение и кончина. — Издание 2-е, И. А. Морозова. — М.: типо-лит. Д. А. Бонч-Бруевича, 1899.
• Пётр (Алексеев), протоиерей Рассказ Петра Великого о патриархе Никоне.
• Румянцева В. С. Патриарх Никон и духовная культура в России XVII в.: Из рукописного наследия патриарха Никона: «Правила христианской жизни („нужнеишиа Заповеди“)»: Исследование и публикация. / Российская акад. наук, Ин-т российской истории РАН. — М. : Ин-т российской истории РАН, 2010. — 253 с. — ISBN 978-5-8055-0217-1
• Севастьянова С. К. Материалы к «Летописи жизни и литературной деятельности патриарха Никона». — СПб.: Дмитрий Буланин, 2003. — 520 с.
• Севастьянова С. К. Переписка патриарха Никона с иконийским митрополитом Афанасием // Древняя Русь. Вопросы медиевистики. — 2004. — № 3(17). — С. 87—97.
• Севастьянова С. К. Эпистолярное наследие патриарха Никона: переписка с современниками: исследование и тексты. / Науч. ред. член-корр. РАН Е. К. Ромодановская. — М.: «Индрик», 2007. — 776 с
• Никон / Севастьянова С. К., Зеленская Г. М. // Николай Кузанский — Океан. — М. : Большая российская энциклопедия, 2013. — (Большая российская энциклопедия : [в 35 т.] / гл. ред. Ю. С. Осипов ; 2004—2017, т. 23).
• Субботин Н. И. Дело патриарха Никона
• Успенский Б. А. История русского литературного языка (XI—XVII вв.). 3-е изд., испр. и доп. — М.: Аспект Пресс, 2002. — 558 с.
• Шмидт В. В. Патриарх Никон и его наследие в контексте русской истории, культуры и мысли: опыт демифологизации. : диссертация … доктора философских наук : 09.00.13 / Шмидт Вильям Владимирович; [Место защиты: Рос. акад. гос. службы при Президенте РФ]. — М., 2007. — 483 с.
• Шмидт В. В. Никоноведение: библиография, историография и историософия. // Государство, религия, церковь в России и за рубежом. 2008. № 3/4.
• Шушерин И. К. Известие о рождении и воспитании и житии святейшего Никона, патриарха Московского и всея России // Патриарх Никон — протопоп Аввакум. М., 1997.
• Palmer W. The Patriarch and the Tsar: History of the Condemnation of the Patriarch Nicon by a Plenary Council of the Orthodox Catholic Eastern Church, held at Moscow A. D. 1666—1667. Written by Paisius Ligarides of Scio. L., 1871—1876. Vol. 1-6;
• Patriarch Nicon on Church and State: Nicon’s «Refutation» / Ed., introd., not. V. A. Tumins, G. Vernadsky. B. а. о., 1982
• Лавров А. Никон, митрополит Новгородский и Великолукский (1649—1652) // София. 1999. — № 1. — С. 29-31.
• Патриарх Никон: облачения, личные вещи, автографы, вклады, портреты / Составитель и отв. ред. Е. М. Юхименко. — М., 2002. — 152 с.
• Патриарх Никон и его время / Отв. ред. и сост. Е. М. Юхименко. — М.: Государственный Исторический музей, 2004. — 368 с. — (Труды Государственного Исторического музея). — ISBN 5-89076-119-6.

Ссылкатне

• Никон (Минин-Ларионов) на сайте Русское Православие
• Патриарх Никон и его наследие.
• 400-летний юбилей со дня рождения Святейшего Патриарха Никона: официальный сайт МП 27 мая 2005 г.
• С. В. Гнутова, К. А. Щедрина. Кийский крест, Крестный монастырь и преображение сакрального пространства в эпоху патриарха Никона Архивировано 16 февральста 2012 года.
• Исследование, реабилитирующее патриарха Никона, обсудят в РАГС
• Изображения Патриарха Никона: Галерея электронных изображений.
• Патриарх Никон. Труды / Научное исследование, подготовка документов к изданию, составление и общая редакция В.В. Шмидта. — М.: Изд-во Моск. ун-та, 2004. — 1264 с.