Зепса каннема частт

Рувики лопаста
Петьф статья
Зепса каннема механическяй частт уськоня мархта

'

Зепса каннема частт' — аксессуар, конат няфтьсазь пингть и нолдафт тевс зепс каннеманди или уськоня вельде. Зепса каннема часттненди эсь лацонь ширекс ащи компактнай кшнинь лангаксоц, кона тяльги курмозезт. Циферблатс сяда сидеста кяшф лкштади лангакс алу, кона ванфтсы сонь эрькодама крштадемада-колавомада.

Эрь кодама пингста зепса каннема часттне ульсть эрь кодама моделень, сяконь лувксса классическяй зепса каннема частт нюрьхкяня ускьня мархта или частт-кулон кувака уськоня мархта, конат арасть пяк мяльс туфокс и содафокс наряжамбяльксокс кода алятненди, станя и аватненди. Ушедомок XVII-це векста, зепса каннема часттне ульсть аф явоштови пяльксокс алянь гардеробса, тяфтама частонь каннемась няфнезе каннить козяшинц и сери вастса ащеманц. Тяфтама частт каннесь аф эрсь, сяс мес часттнень лангакссна аноклакшневсь питни кшниста. XIX-це векста зепонь каннема часттнень сяшкава кармасть содамост, што частонь путомс зепсь арась обязательнайкс алянь щапнень эса.

XX-це и XXI-це векнень кядьса каннема частнень сяда келиста нолдамаснон сюнеда валом-валом сяда ингольдень питни шисна юмась.

Зепса каннема часттнень эвондамасна

Зепса каннема шуфтонь частт.

Зепса каннема часттнень эряма пингсна ушедсь пингонь ункстамань шашфневи-якафтови васенце механизматнень эвондамаснон сюнеда XIV-це векста. Аноклайкс-тиикс лувондови Петер Хенляйн Нюрнбергста. Зепса каннема васенце часттне, конат содафт «нюрнбергские яйца мокшекс Нюрнбергскяй ал» лем ала, ульсть нолдафт 1510-це кизоня Нюрнбергса[1]. 1527-це кизоня часттнень васенце экземплярсна ульсть аноклафт казненеди Мартину Лютеронди. XVI векста ульсть арьсефт-тифт зепса каннема частт, конат шарсть искусствань произведения лангс, а аф ункстамань прибор[2].

Зепса каннема васенце часттнень эса ульсь аньцек фкя стрелка, а глянцень улемась, кона вельхнезе циферблатть, ашезь сявондев мяльс. Эрь цифрать лангса ладяфоль аф оцю комбаня, конань вельде шарьхкотькшневсь пингсь кядь видеса варжамать вельде, зепста часттнень апак таргак. Пингонь ётазь зепса канневи часттнень эса эвондась минутань, а меле секундань няфти стрелка[2][3].

Формасна тя часттнень ульсь аф фкя лаца — синь ульсть покаряфт, алкс ащихть, аф прокс покаряфт. Синь ульсь кода путомс ярмак кяскавняс или кода брелок. Частонь циферблатсь пяксневсь кшниньпанкскаса керф вастоня мархта. Механизмась тифоль стальста и кшниста, а глянцть — пандонь кевста глянцть, ушедомок 1610-це кизоста. Сяда меле зепса каннема часттнень эса ульсь пружинань шашфнемка, шарыня, нолдамань механизма (якама), стрелкати регулятор и механизма. XVIII-це – XIX-це векнень тя часттне фалу сяда цебярьгофневсть. Схематне полаткшневсть лездомань элементаса, тяфтапне, кода боевой, сигнальнай и ремонтнай механизмат, а станя жа устройства ковгярьксть няфтеманц. Кевонь нежетне, тиендевсть рубинцта, XVII-це векста ушедсть нолдавома Англияса. Минутань стрелкась ушедсь келиста нолдавома тевс 1650-це кизода меле, часттнень сяда точнайста няфтеманкса. Секундань стрелкась эвондась 1655-це кизоня, а сонь колганза содамась кассь 1750-це кизода меле[3]. Часттнень ушедсть тиендема зрняста, сияста, [[Кев пандонь глянць|кев пандонь гляньцста]. 1632-це кизоня Жак Тутен Лионцта арьсесь од эмаль и эмальста тиф лангаксти мазыста рисовандакшнесть[4].

Автоматическяй туфтомась васенцеда нолдафоль тевс именна зепса каннема часттнень эса. Эсезост туфтома часттне ушедсть нолдавома тевс 1770-це кизоста сявомок, швейцарецть Абрахам Льюис Переллетонь вельде. 1777-це кизоня Абрахам Бреге цебярьгофдозе эсезонза туфтомань конструкциять. XIX-це векть кучказонза механизмать туфнезь и стрелкатнень ётафнезь сяда сидеста ниле квадратнай сечениянь панжемать вельде. 1790-це кизода меле ушедсть нолнема тевс лангса ащи туфтомань пунянять. Бреге и Одемар сувафтозь тевс тя пунянять кажнайсь сонць XIX-це векть васенце пяльксстонза. Швейцарецсь Адриан Филипп васенцеда нолдазе тевс туфтомань пунянять, а тяфта жа фкя пингста и стрелкань ётафтомать 1842-це кизоня[3].

Зепса каннема часттнень видеса тевс нолневсть эрь кодама стака функцият. Ульсь киртьф мяльса шавомась, жаккарднай механизматне, хронографсь, минутань репетирсь, термометрсь, барометрсь, компассь и стак тов. Точнайшить цебярьгофтоманкса и атмосферсаса уликснень эзда сотнфста аф ащеманкса покоди механизматне часттнень эса фалу сяда цебярьгофневсть[3].

XIX-це векста зепса канневи часттнень эса тиевсть няеви полафткст эстетикаса декорированияса. Формас коре тяни синь ульсть лапшт. Лангакссна нолневсть солафксста, а кой-кона компаниятне вельхнезьсинь зрняста 10–14 каратонь эчколмаса. Тя лезнесь синьцебярьста якамаснон 20–25 киза. Зрнянь лангаксста тифнень тянкса и рамсезь. Лангаксснон цебярьгофтоманкса, кркштадематнень и шофафкснень эзда зрнянь лангакс мархта часттнень эса, Бреге васенцелда нолдазе тевс [Гильоширование|гильошированиянь]] техникать корпуснень и циферблаттнень эса. Мазыста тиф сёрматфксне кяшендезь аф сатыкснень и няевсть сяда мазыста. Курок мастярхне ушедсть тиендема часттнень эзда аф аньцек мазоптомбяль, но и кода питни предмет. Сембе сяка ланга путневсь, жемчугсь, бриллиантттне и нолневсь тевс и сяда тов козяшить и и питнишить няфтеманкса. Бреге ульсь васенцетнень ёткста фкясь, кие тиезень лиякс оформляндафста, коса простотась и мазышись арасть инь эрявикс вастокс[5].

XIX-це векть ушетксста часттне ульсть аф оцюфт и лапшт, мезенкса синь ульсь кода каннемс жилеткань зепе потмоса или кувака уськоняса, кона лапотьфоль кргать перьф. Пингонь ётазь модась уськонятнень лангс полафневсь: кувалмосна, эчколмасна каннемасна. Уськонясь ульсь кода щафтомс кргас, пункстаф желетонь килькшти, улемс сяда нюрьхкяня или ащемс кода соткс жилетть кафцьке зепонзонды. Векть песта уськонясь тага ушедовсь каннема кргать маласа [5].

Часттнень лангс оцю вешфксть инкса, синь кармасть тиендемост ламотне. Конструкцияснон фалу цебярьгофтомасна вятьсь сяда лама частонь нолдамаса вариаттненди. Аф прянь шнафтоманкса частонь каннемса XIX-це векаста, часттнень полафтсь дизайнасна, синь лоткасть улемда щамса мазышить няфтемаса и каннемстост кармась няевома аньцек частонь уськонясь мяштьса кргать видеса[5].

Россияса васенце мастеркс, кие ушедсь частонь тиема, ульсь Павел Буре. Сонь частонза ульсть эсь лацоннекс аф аньцек ланга няевомать , но и эрявикс шить сюнеда. Синь аноклакшневсть и армияти. Ульсть нолдафт казнендиофицерхненди и солдаттненди, явфнемок войскань родть коряс. Синь аеркшнесть фкя-фкада аф аньцек лангаксть эсь лацонза тифонц эзда , но и эрь кодама мелодиянь коряс, кона морась тя эсь лацонь изделиятнень эса. Гражданскяй эряйхненди Павел Буре тиендсь частт зрнянь лангакс мархта, поладомок мезеньге питни пялькст. Пингонь ётазь Бурень компанияц келепнезе зепса каннема частонь нолдамать 1917-це кизоти самс. Васенце мировой войнать аделамда меле вешфкссь казнетнень лангс кассь, сяс компанияти савсь виияфтомс нолдамась[6].

Мекольце кизотнень зепса каннема часттнень лангс мяльсь кассь[7], ии синь тага ушедсть улема популярнайкс. Ламоц компаниятне нолнихть репликат частонь сире модельхнень коряс[8].

Сембода сидеста васьфневихне

Рынкаса улихть лама эрь кодама зепса каннема частт кода классическяй Механическяй частт, станя кварцевай механизма мархта. Кварцевай часттне аф вешихть туфтома,синь лувондовихть сяда надежнайкс и кемоста ащикс коламатнень каршес, молихть батарейкатнень вельде. Лангакссь и уськонясь тифт металлста. Сяда вешендевихнень ёткса сияннетне и зрнязса валфне. Тяфта жа рынкаса улихть модельхт секундомер и хронограф мархта, эсост нфтеви шись, ковсь[9].

Лангкакссна тожа аф фкя лаца дизайнань. Васьфневихть частт, коса циферблатсь вельхневи, и панкскафтома, а тяфта жа шотонь частт. Шотонь часттнень эсь лацонь шисна сянь эса, мес часттнень фтала ули панкс, конань няят пачканза, коса ули ваномс частонь механизмать молемаснон.[9].

Зепса каннема классическяй частт

Уськоня мархтот, конатне ули кода пункстамс щамозт или сумказт. Традиционнай пялькснень эзда фкясь классическяй модельхнень ёткста ляткшни панкскясь.Синь эряйхть сяда сидеста механическяй калибра мархтот[10].

Башка явфнесазь зепса каннема зрнянь часттнень, конат улихть кода лувомс афкуксонь искусствань произведениякс. сядонголе тяфтама часттнень лангса покодсть художникне и сидеста металлть лангс мазыста тяшнелезь канниснон лемонц[10].

Частт-кулотт

Тяфтама часттне сяда сидеста мяльс туфт аватненди. Уськоняса частонди шары кулон, конань ули панкскац, коса ули кода путомс фотографиясь. Сяда сидеста панкскац мазоптф питни металлса и солафксса, а тяфта жакевняса, петфнемаса или художественнайста арфнефста[10].

Брегет

Брегетсь шары сире пингонь зепса каннема часттнень лангс шавома вайгяль мархта, конатнень сембода оцю питнишисна видеста пингть няфтемаса, а тяфта жа няфнезь числать и ковть. Эсь лемснон каннесазь Абрахама Бреге частонь мастерть фамилиянц коряс. Модельсь ульсь содафокс XIX-це векста и аф весть лятфневи Александра Пушкинонь «Евгений Онегин» романцонза[11][12].

Ванк нинге

Литературась

  • Пипуныров В. Н. История часов с древнейших времён до наших дней. — М.: Наука, 1982.
  • Канн Г. Краткая история часового искусства. — Ленинградский Гублит, 1926.

Лятфтамат

  1. ↑ Галицкая И. А. Коллекция карманных часов Псковского музея-заповедника // Псков. — 2018. — № 48. — С. 62—76.
  2. ↑ 1 2 Как появились первые карманные часы: Маленькие шедевры, открывшие новую эпоху в развитии Человечества. kulturologia.ru.
  3. ↑ 1 2 3 4 Богданов И. Ф. История механических часов: 700 лет совершенствования // Евразийский научный журнал. — С. 33—36.
  4. ↑ Пипуныров В. Н. История часов с древнейших времён до наших дней / Манстров Л. Е.. — М.,: Наука, 1982.
  5. ↑ 1 2 3 Гурьева Т.Н. Европейские карманные часы XIX века // Вестник СПбГУКИ. — 2017. — Декабрь (№ 4).
  6. ↑ Как появились и совершенствовались карманные часы с боем? chasyinfo.ru. Дата обращения: 11 январьста 2024.
  7. ↑ Беккер А.О., Воробьёв-Шерышев А.А. Атрибуция карманных и наручных часов второй половины XIX — первой половины XX века: основные методы, рекомендуемый алгоритм действий // Грамота. — 2021. — Т. 14, № 8.
  8. ↑ Тимур Бараев. Откуда появилась мода на карманные часы и зачем она вернулась. РБК (31 октябрьста 2013). Дата обращения: 9 январьста 2024.
  9. ↑ 1 2 Как выбрать карманные часы. chasyinfo.ru. Дата обращения: 27 декабрьста 2023.
  10. ↑ 1 2 3 Карманные часы на цепочке: какими бывают и как носить? Мужские правила. Дата обращения: 27 декабрьста 2023.
  11. ↑ Тимур Бараев. Носил ли Евгений Онегин часы Breguet. Alfavit watch (10 февральста 2017). Дата обращения: 14 январьста 2023.
  12. ↑ Софья Багдасарова. Скрытая реклама в романе «Евгений Онегин». Культура.рф. Дата обращения: 14 январьста 2023.

Ссылкатне

Сявф"https://mdf.ruwiki.ru/w/index.php?title=Зепса_каннема_частт&oldid=394044"-ста